Bwat Zouti ki Nou Servi pou Ansegne
1. Dan ki fason bann Kretien parey kouma bann zouvriye?
1 Bann zouvriye servi plizir kalite zouti. Ena zouti ki zot servi zis pou bann travay presi, ena lezot zouti ki zot servi pli souvan. Bann zouvriye ki ena lexperyans touletan ena sa bann zouti-la dan zot bwat, ek zot bien konn servi sa bann zouti-la. Labib ankouraz sak Kretien pou vinn efikas dan so minister ek pou vinn “enn zouvriye ki pena nanye pou onte.” (2 Tim. 2:15, NW.) Ki zouti pli inportan dan nou bwat zouti? Se Parol Bondie—zouti prinsipal ki nou servi pou “fer bann disip.” (Mat. 28:19, 20, NW.) Alor, nou bizin fer tou seki nou kapav pou vinn efikas dan fason ki nou “servi parol laverite kouma bizin.” Selman, dan nou bwat zouti, ena lezot zouti ki nou servi bien souvan. Tou bann Kretien bizin aprann servi sa bann zouti-la dan enn fason efikas pou ansegn bann dimounn laverite.—Prov. 22:29.
2. Ki bann zouti prinsipal nou servi pou ansegne?
2 Bann Zouti Inportan ki Nou Servi pou Ansegne: Apar Labib, ki bann lezot zouti nou bizin servi? Enn zouti bien inportan ki nou servi pou ansegn bann verite ki ena dan Labib se liv Ki la Bible enseigné vrai-mem? Apre ki nou finn etidie sa liv-la avek enn etidian, nou servi liv “Reste dan l’amour Bondié” pou montre li kouma li kapav aplik bann prinsip Labib dan so lavi toulezour. Alor, nou bizin bien konn servi sa de piblikasion-la. Dan nou bwat zouti, nou bizin ena osi sertin brosir. Enn parmi bann brosir prinsipal ki nou servi pou koumans bann letid Labib se Enn Bon Nouvel Ki Sorti kot Bondie! Si dan nou teritwar ena bann dimounn ki pa tro konn lir ouswa ki koz enn lot lang ek pena boukou piblikasion dan sa lang-la, nou kapav osi servi brosir Ekout Bondie ouswa Ekout Bondie ek Viv pou Touletan. Enn brosir bien inportan ki nou servi pou diriz nou bann etidian ver lorganizasion se Kisannla Pe Fer Volonte Jéhovah Zordi? Bann video kouma Kifer Li Bon Etidie Labib?, Ki Pase dan Lasal Bann Temwin Zeova? ek Dieu a-t-il un nom ?, zot ki bien itil pou fer bann disip ek nou bizin aprann pou servi zot bien.
3. Ki bann prosin lartik dan Nou Minister pou ed nou pou fer?
3 Biento pou ena bann lartik dan Nou Minister ki pou ed nou pou vinn bien efikas pou servi bann piblikasion prinsipal ki nou ena pou ansegne. Amezir ki nou fer zefor pou servi sa bann zouti-la dan enn fason efikas, nou pou obeir sa konsey inspire la: “Vey lor twa ek lansegnman ki to done. Persevere. Koumsa mem to pou sov tomem anmemtan ki to sov bann ki ekout twa.”—1 Tim. 4:16.