Imit Zot Lafwa
1. Ki nou pou examine dan Letid Biblik Kongregasion apartir semenn le 19 Oktob?
1 Apartir semenn le 19 Oktob 2015, nou pou etidie liv Imit Zot Lafwa pandan Letid Biblik Kongregasion. Sa liv-la examinn zistwar 14 zom ek fam ki ti ena lafwa ki mansione dan Labib. Sa liv-la finn ekrir dan enn fason ki pou ed nou trouv sa bann dimounn-la koumadir zot reel. Nou pou aprann ki bann difikilte zot finn bizin fer fas pou servi Zeova. Sa liv-la pou montre nou osi ki bann leson nou kapav tire ar zot lexanp pou ed nou fer bann aplikasion personel azordi.—Ebre 6:12.
2. Dekrir sertin karakteristik liv Imit Zot Lafwa.
2 Karakteristik: Dan sa liv-la ena enn tablo avek bann dat ek bann map. Sa pou ed nou kone kotsa ek ki lepok sak personaz ti viv. Anplis, sak sapit ena enn parti ki apel “Medite . . . ,” ki pou ed nou medit lor bann resi ek aplik bann leson pratik ki nou finn aprann. Pou ed nou imazinn sa bann resi biblik la, finn fer boukou resers pou ki ena bann zimaz bien kolore ek bien detaye.
3. Ki profi nou pou tire kan nou pou etidie sa liv-la?
3 Kouma To Kapav Tir Profi? Dan koumansman sa liv-la, ena enn let Komite Santral ki ankouraz nou par sa bann parol-la: “Servi to limazinasion; esey mazine ki sa bann personaz Biblik la ti resanti, ek sey trouv seki zot ti trouve. Gete kouma zot finn reazir dan enn sertin sitiasion, ek reflesi kouma twa, to ti pou reazir.” Biensir, servi to limazinasion, sa pa vedir al fer bann gran-gran sipozision, me plito, pou imazinn resi ki Labib rakonte ek pou konpran sitiasion sa bann personaz-la. Nou bizin letan ek meditasion pou kapav fer sa. (Ne. 8:8) Si enn leson koumans omilie enn sapit, frer ki diriz Letid Biblik Kongregasion pou fer enn ti rezime 30-60 segonn lor leson ki finn examine semenn dernie. Alafin, kapav poz enn ouswa de kestion pou fer revizion si leson-la pena parti “Medite . . . ”
4. Kifer nou bizin etidie liv Imit Zot Lafwa?
4 Nou pe viv dan enn lemond ki toulezour pe rod afebli ouswa fer nou lafwa disparet dan tou kalite fason. Liv Imit Zot Lafwa baze lor enn seri lartik ki paret dan Latour Degard. Se enn kado ki Zeova donn nou pou fortifie nou lafwa. (Zak 1:17) Anou profit bien sa kado-la kan nou asiste Letid Biblik Kongregasion regilierman ek kan nou partisip otan ki nou kapav pandan ki nou pou etidie sa liv-la ansam!