Kontign Priye pou Gagn Faver Bondie

Bondie finn donn bann dimounn enn kado ki zis zot tousel ena: kapasite pou kominik avek Li ek pou dir Li seki zot resanti dan lapriyer. Profet David ti dir dan enn lapriyer: “Twa ki ekout lapriyer, ver twa, tou sort kalite dimounn pou vini.” (Psom 65:2, NW) Me, kouma nou bizin priye pou ki Bondie ekout nou ek beni nou?

AVEK LIMILITE, FER BANN LAPRIYER KI SINSER

Kan ou fer bann lapriyer personel ou kapav dir Bondie seki ena lor ou leker, setadir ou kapav dir Li seki ou vremem resanti. (Psom 62:8) Bondie Tou-Pwisan bien kontan bann lapriyer sinser ki nou fer avek tou nou leker.

SERVI BONDIE SO NOM

Mem si Bondie ena plizir tit, Li ena enn sel nom. “Mwa mo Zeova. Samem mo nom.” (Izai 42:8) Nom Zeova aparet apepre 7,000 fwa dan bann Lekritir Sakre. Boukou profet ti servi nom Bondie. Abraam ti dir: “Silteple Zeova, . . . les mwa kontign [koz avek twa].” (Zenez 18:30) Nou osi nou bizin servi nom Bondie, Zeova, kan nou priye.

OU KAPAV PRIYE DAN OU PROP LANG

Bondie konpran nou bann panse ek nou bann santiman, ninport ki langaz nou koze. Li donn nou sa lasirans-la dan bann Lekritir Sakre: “Bondie tret tou dimoun parey lor mem baz. Bondie aksepte ninport ki dimoun dan ninport ki nasion si li ador li e fer seki drwat.”​—Zistwar Bann Apot 10:34, 35.

Me selman, pou nou gagn benediksion Bondie, nou bizin fer plis ki zis priye. Dan bann lartik ki swiv, nou pou gete seki nou bizin fer.