LARTIK LETID 41
Kouma Nou Kapav Ed Bann Etidian Labib pou Progrese—Premie Parti
“Li kler ki zot enn let ki sorti kot Lekris, ki transmet par nou.”—2 KOR. 3:3.
KANTIK 78 “Ansegn Parol Bondie”
REZIMEa
Tou bann manb enn lasanble bien kontan kan zot trouv enn etidian Labib zot lasanble pran batem. (Get paragraf 1)
1. Kouma 2 Korintien 3:1-3 ed nou pou apresie privilez ki nou ena pou fer bann letid Labib? (Get zimaz lor kouvertir.)
KI TO resanti kan to trouv enn etidian Labib dan to lasanble pran batem? Sirman to bien kontan. (Mat. 28:19) Ek si se twa ki’nn fer so letid, sirman to pou plis kontan ankor! (1 Tes. 2:19, 20) Bann disip ki fek pran batem zot “enn let rekomandasion,” pa zis pou bann ki’nn etidie avek zot, me osi pou lasanble-la an-antie.—Lir 2 Korintien 3:1-3.
2. (a) Ki kestion inportan nou pou examine dan sa lartik-la, ek kifer? (b) Ki ete enn letid Labib? (Get not.)
2 Pandan sa kat dernie lane-la, sak mwa, bann Temwin Zeova finn etidie Labibb avek anviron 10,000,000 dimounn. Extraordiner, pa vre! Ek pandan sa bann lane-la, plis ki 280,000 dimounn finn pran batem sak lane ek zot finn vinn bann disip Zezi Kris. Kouma nou kapav ed sa bann milyon etidian Labib la pou pran batem? Zeova ankor pe donn bann dimounn lokazion pou vinn so bann Temwin. Se akoz sa ki nou fer nou maximum pou ed sa bann dimounn-la pou progrese pli vit posib pou ki zot pran batem. Anplis, letan pe pas bien vit!—1 Kor. 7:29a; 1 Pier 4:7.
3. Ki nou pou examine dan sa lartik-la konsernan bann letid Labib?
3 Azordi, travay predikasion li bien inportan, akoz sa Komite Santral finn demann bann biro nasional pou reflesi lor seki nou kapav fer pou ed pli boukou etidian Labib pou progrese ek pou pran batem. Dan sa lartik-la ek dan prosin lartik, nou pou gete seki nou kapav aprann ar lexperyans bann pionie, bann misioner, ek bann responsab sirkonskripsion.c (Prov. 11:14; 15:22) Zot pou explik nou seki bann ansegnan Labib ek zot bann etidian kapav fer pou ki sa bann etidian-la kapav tir plis profi ar zot letid Labib. Dan sa lartik-la, nou pou get sink kitsoz ki sak etidian Labib bizin fer pou ki zot kapav kontign progrese ziska ki zot pran batem.
FER LETID SAK SEMENN
Demann to etidian si ena enn plas kot zot kapav asize ansam pou koz lor Labib (Get paragraf 4-6)
4. Ki kitsoz nou bizin konpran konsernan bann letid Labib ki koumanse devan laport bann dimounn?
4 Boukou frer ek ser etidie ar bann dimounn devan zot laport. Mem si o-koumansman se enn bon fason pou ki dimounn-la interese ar Labib, souvan sa bann konversasion-la zot bien kourt ek kitfwa pa reisi zwenn sa bann dimounn-la sak semenn. Pou zot reisi swiv lintere sa bann dimounn-la, sertin frer ek ser pran zot nimero telefonn ek zot telefonn sa bann dimounn-la ouswa avoy zot enn mesaz pou zot partaz enn panse ki sorti dan Labib avek zot. Bann ti konversasion koumsa kapav dire pandan plizir mwa san ki zot vinn bann letid Labib ki vremem progrese. Eski enn etidian Labib pou progrese ek pran batem si li pa donn plis letan ek fer plis zefor pou etidie Labib? Kitfwa non.
5. Kouma nou kapav servi konsey ki trouv dan Lik 14:27-33 pou ed nou bann etidian?
5 Zezi ti servi enn lexanp pou explike seki enn dimounn bizin fer pou vinn so disip. Li ti koz lor enn kikenn ki anvi ranz enn latour ek lor enn lerwa ki anvi al lager. Zezi ti dir ki sa kikenn ki anvi ranz enn latour-la ti bizin “asize avan pou kalkile komie sa pou koute” pou ki li reisi terminn so konstriksion. Li ti osi dir ki sa lerwa-la ti bizin “dabor asize, pran konsey” pou gete si so larme ti pou kapav gagn sa lager-la. (Lir Lik 14:27-33, NW.d) Dan mem fason, Zezi ti kone ki enn kikenn ki anvi vinn so disip ti bizin reflesi bien lor seki li bizin fer pou ki li kapav swiv Zezi. Se akoz sa ki nou bizin ankouraz nou bann etidian Labib pou etidie avek nou sak semenn. Kouma nou kapav fer sa?
6. Ki nou kapav esey fer pou ki nou bann etidian Labib progrese?
6 Pou koumanse, to kapav fer sa bann letid ki fer devan laport la vinn pli long. Par exanp, si to abitie koz zis lor enn verse, kitfwa to kapav koz lor enn deziem verse sak fwa ki to vizit li. Kan dimounn-la inn abitie ar kantite letan ki to pran sak fwa ki to vizit li, demann li si ena enn plas kot zot kapav asize pou kontign konversasion-la. Repons dimounn-la pou montre twa si li vremem interese ar so letid. Pou li progrese pli vit, to kapav mem demann li si li anvi etidie de fwa par semenn. Selman, pou li progrese, li pa ase ki li zis etidie enn ouswa de fwa par semenn.
PREPAR TWA BIEN AVAN SAK LETID
Prepar twa bien pou sak letid, ek montre to etidian kouma pou prepar so letid (Get paragraf 7-9)
7. Kouma to kapav prepar twa bien pou sak letid ki to fer?
7 Enn ansegnan Labib bizin prepar li bien avan sak letid. To bizin lir seki zot pou etidie ansam ek get bann verse Labib. Bann lide prinsipal bizin kler dan to lespri. Reflesi lor tit ki zot pou examine ansam, bann soutit, bann kestion, bann verse ki bizin “lir,” bann zimaz, ek bann video ki kapav ede pou explik sa size-la. Apre sa, pans to etidian ek reflesi alavans kouma to kapav explik sa bann linformasion-la dan enn fason sinp ek kler, pou ki to etidian kapav konpran li fasilman ek met li an pratik.—Ne. 8:8; Prov. 15:28a.
8. Dapre Kolosien 1:9, 10, ki kitsoz lapot Pol ansegn nou konsernan lapriyer ki nou fer pou nou bann etidian Labib?
8 Dan to preparasion, priye Zeova konsernan to etidian ek seki li bizin. Demann Zeova pou ed twa servi Labib dan enn fason ki pou kapav tous so leker. (Lir Kolosien 1:9, 10.) Esey reflesi alavans lor ki kitsoz to etidian kapav gagn difikilte pou konpran ouswa pou aksepte. Pa bliye ki to lobzektif se pou ed to etidian progrese ziska ki li pran batem.
9. Kouma enn ansegnan kapav ed so etidian pou prepar so letid? Explike.
9 Gras-a enn letid Labib regilie, nou espere ki nou etidian pou rekonesan pou tou seki Zeova ek Zezi inn fer ek lerla li pou anvi aprann plis. (Mat. 5:3, 6) Pou ki li kapav tir maximum profi ar so letid, enn etidian bizin res konsantre lor seki li pe aprann. Pou li fer sa, explik li ki li bien inportan ki li prepar li bien pou sak letid. Kouma li kapav fer sa? Li bizin lir leson-la alavans, ek reflesi kouma li kapav met an pratik seki li pe aprann. Kouma twa to kapav ed li pou prepar li bien? Prepar enn leson ansam avek li pou montre li kouma pou fer sa.e Montre li kouma pou trouv bann repons pou bann kestion, ek explik li ki si li soulign de-trwa mo, sa pou ed li pou rapel bann repons. Apre sa, demann li pou reponn dan so prop mo. Kan li fer sa, to pou kone si li’nn bien konpran seki li’nn etidie. Me ena enn lot kitsoz ankor ki to kapav ankouraz to etidian pou fer.
APRANN LI KOUMA POU KOMINIK AVEK ZEOVA TOULEZOUR
Aprann to etidian kouma pou kominik avek Zeova (Get paragraf 10-11)
10. Kifer li bien inportan pou lir Labib toulezour, ek ki enn etidian bizin fer pou ki li kapav tir plis profi ar so lektir Labib?
10 Anplis ki li etidie sak semenn, enn etidian Labib pou plis progrese si li fer sertin kitsoz par limem toulezour. Par exanp, li bizin kominik avek Zeova. Kouma li kapav fer sa? Kan li ekout Zeova ek li koz avek Li. Li kapav ekout Zeova kan li lir Labib toulezour. (Zozwe 1:8; Ps. 1:1-3) To kapav montre li kouma pou servi “Program Lektir Labib” ki lor jw.org.f Biensir, pou ki li kapav tir plis profi ar so lektir Labib, ankouraz li pou medit lor seki li pe aprann lor Zeova, ek kouma li kapav met an pratik seki li pe aprann dan so lavi toulezour.—Zist. 17:11; Zak 1:25.
11. Kouma enn etidian kapav aprann pou priye, ek kifer li inportan ki li priye Zeova souvan?
11 Ankouraz to etidian pou priye Zeova sak zour. Priye avek tou to leker kan to koumans ek kan to fini letid, ek mansionn nom to etidian dan to lapriyer. Kan li ekout to bann lapriyer, li pou aprann kouma pou priye avek tou so leker ek li pou kone osi ki li bizin priye Zeova o-nom Zezi Kris. (Mat. 6:9; Zan 15:16) Kan to etidian pou lir Labib toulezour (ekout Zeova) ek li pou priye (koz ar Zeova) sa pou ed li pou vinn pli pros ar Zeova. (Zak 4:8) Si li fer sa toulezour, sa pou ed li pou progrese ziska ki li vwe so lavi ar Zeova ek pran batem. Ki kitsoz pou ed li ankor?
ED LI POU ENA ENN BON LAMITIE AVEK ZEOVA
12. Kouma enn ansegnan kapav ed so etidian pou ena enn bon lamitie avek Zeova?
12 Nou anvi ki nou etidian aprann konn Zeova. Me seki li aprann bizin osi tous so leker pou ki li met li an pratik. Zezi ti ansegn bann dimounn boukou kitsoz ek zot ti kontan aprann ar li. Kifer? Parski li ti tous zot leker. (Lik 24:15, 27, 32) To etidian bizin trouv Zeova kouma enn Kikenn ki reel, enn Kikenn avek ki li kapav ena enn bon lamitie. Li bizin trouv Zeova kouma so Papa, so Bondie, ek so Kamarad. (Ps. 25:4, 5) Pandan letid, atir latansion to etidian lor bann zoli kalite ki Bondie ena. (Ex. 34:5, 6; 1 Pier 5:6, 7) Ninport ki size zot pe etidie, met laksan lor personalite Zeova. Ed to etidian pou kontan bann zoli kalite ki Zeova ena, kouma so lamour, so bonte, ek so konpasion. Zezi ti dir ki “komannman pli gran e pli inportan” se “kontan to Segner, [“Zeova,” NW] to Bondie avek tou to leker.” (Mat. 22:37, 38) Alor, ed to etidian pou kontan Zeova avek tou so leker.
13. Kouma to kapav ed enn etidian Labib pou aprann konn bann kalite ki Zeova ena? Donn enn lexanp.
13 Kan to koz avek to etidian, explik li kifer to kontan Zeova. Sa pou ed to etidian pou konpran ki li osi li bizin vinn kamarad Zeova, ek aprann pou kontan Li. (Ps. 73:28) Par exanp, eski ena enn fraz dan piblikasion ki zot pe etidie ouswa dan enn verse Labib ki tous to leker ek ki koz lor lamour, sazes, lazistis, ek pwisans Zeova? Pa ezite pou partaz sa avek to etidian, ek fer li kone ki se enn parmi bann rezon kifer to kontan Zeova. Ena enn lot kitsoz osi ki sak etidian Labib bizin fer pou ki li progrese ek pran batem.
ANKOURAZ LI POU ASISTE BANN RENION
Ankouraz to etidian pou asiste bann renion pli vit posib (Get paragraf 14-15)
14. Dapre Ebre 10:24, 25 kouma bann renion kapav ed enn etidian pou progrese?
14 Nou tou nou anvi ki nou bann etidian progrese ziska ki zot pran batem. Enn parmi bann meyer fason ki nou kapav ed zot se kan nou ankouraz zot pou asiste renion. Bann ansegnan ki ena lexperyans dir ki bann etidian ki pa tarde pou asiste bann renion, zot progrese pli vit. (Ps. 111:1) Sertin ansegnan explik zot bann etidian ki, si zot anvi konn Labib pli bien, zot bizin asiste bann renion. Lir Ebre 10:24, 25 avek to etidian, ek explik li bann bienfe ki li pou gagne si li asiste bann renion. Montre li video Ki Pase dan Lasal Bann Temwin Zeova?g ek ed li pou konpran ki li bien inportan ki li asiste sak renion.
15. Ki nou kapav fer pou ankouraz nou etidian pou asiste bann renion regilierman?
15 Ki to kapav fer si to etidian pankor asiste renion ouswa li pa pe asiste bann renion regilierman? Partaz avek li bann kitsoz ki to aprann dan renion. Kan li trouve ki to resanti kan to asiste bann renion, li osi li pou anvi asiste bann renion. Donn li Latour Degard ouswa Kaye Renion Lavi Kretien ek Minister ki pe etidie dan renion. Montre li seki pou examine dan prosin renion. Demann li ki kitsoz li trouv interesan. Seki to etidian pou trouve ek tande pandan so premie renion, pou pli extra ki ninport ki kitsoz ki li’nn trouve ek tande dan ninport ki lezot relizion. (1 Kor. 14:24, 25) Li pou zwenn bann frer ek ser ki pou ena enn bon linflians lor li ek ki pou ed li progrese ziska ki li pran batem.
16. Ki nou bizin fer pou ki nou bann etidian Labib progrese ziska batem, ek ki nou pou examine dan prosin lartik?
16 Kouma nou kapav fer bann letid Labib ki progrese ziska batem? Nou kapav ed nou etidian pou trouv linportans so letid kan nou ankouraz li pou etidie sak semenn ek pou prepar so letid. Nou anvi osi ankouraz li pou kominik avek Zeova toulezour ek pou ena enn bon lamitie avek Li. Nou anvi ankouraz nou etidian pou asiste bann renion. (Get lankadre “Seki enn Etidian Bizin Fer pou ki Li Progrese Ziska Batem.”) Selman, kouma nou pou examine dan prosin lartik, ena sink kitsoz ankor ki bann ansegnan Labib bizin fer pou ki zot etidian progrese ziska batem.
KANTIK 76 Ki To Pe Resanti?
a Ansegn enn dimounn enn kitsoz se ed li pou “reflesi, resanti, ouswa azir dan enn nouvo fason.” Nou text pou lane 2020, Matie 28:19, rapel nou linportans pou etidie Labib avek bann dimounn ek pou ansegn zot kouma zot kapav vinn bann disip Zezi Kris. Dan sa lartik-la ek dan prosin lartik, nou pou gete kouma nou kapav ameliore dan sa travay ki bien inportan la.
b EXPRESION KI’NN EXPLIKE: Si regilierman to koz lor bann size Biblik avek enn dimounn pou ed li aprann bann lansegnman ki ena dan Labib, to pe fer enn letid Labib. Si to’nn montre enn etidian kouma enn letid Labib deroule ek ki apre sa to finn fer so letid de fwa, ek si to ena bann bon rezon pou panse ki sa letid-la pou kontigne, to kapav met sa lor to rapor.
c Dan sa de lartik-la, nou pou get osi bann sigzesion ki sorti dan seri lartik “Bann l’Étude Biblik Ki Faire Nou Étudiant Progressé” ki ti aparet dan Nou Minister depi Ziliet 2004 ziska Me 2005.
d Lik 14:27-33: “27 Si kikenn pa sarye so poto soufrans ek swiv mwa, li pa kapav vinn mo disip. 28 Par exanp, kisannla parmi zot ki anvi ranz enn latour, pa pou asize avan pou kalkile komie sa pou koute pou gete si li ena ase kas pou fini travay la? 29 Sinon, li kapav koul baz me li pa pou reisi fini li, ek lerla tou bann dimounn ki pou trouv sa pou koumans riy li, 30 ek pou dir: ‘Sa zom-la finn koumans ranze me li pa’nn reisi fini.’ 31 Kan enn lerwa al lager kont enn lot lerwa, eski li pa dabor asize, pran konsey pou gete si avek so dis mil zom li kapav al lager kont so lennmi ki ena vin-mil? 32 Si li pa kapav, letan lotla ankor lwin, li avoy enn delegasion pou fer lape. 33 Dan mem fason, zot kapav sir ki si enn kikenn pa abandonn tou so bann dibien, li pa pou kapav vinn mo disip.”
e Get video kat minit Aprann Nou Bann Etidian pou Prepar Zot. Lor JW Library®, al dan seksion ODIO/VIDEO > NOU RENION EK NOU MINISTER > AMELIOR NOU BANN KAPASITE.
f Al dan seksion LABIB EK OU > BANN ZOUTI POU ETIDIE LABIB.
g Lor JW Library®, al dan seksion ODIO/VIDEO > NOU RENION EK NOU MINISTER > BANN ZOUTI POU PREDIKASION.