KOUMA NOU KAPAV GAGN LAVIKTWAR LOR LAENN?

1 | Pa Fer Preferans

Seki Labib Ansegne:

“Bondie tret tou dimoun parey lor mem baz. Bondie aksepte [tou] dimoun dan ninport ki nasion si li ador li e fer seki drwat.”—ZISTWAR BANN APOT 10:34, 35.

Seki Savedir:

Zeovaa pa ziz nou dapre pei ek kiltir ki nou sorti, ras ki nou ete, ouswa kouler nou lapo. Okontrer, li konsantre li lor seki pli inportan, setadir, nou bann panse ek nou bann dezir. Labib mem dir ki, “enn dimounn trouv zis seki paret devan so lizie, me Zeova trouv seki ena dan leker.”—1 Samiel 16:7.

Seki Ou Kapav Fer:

Mem si nou pa kapav lir dan leker, nou kapav esey imit Bondie ek konsider tou dimounn parey. Pa met bann dimounn dan bann kategori me fer zefor pou aprann konn zot personelman. Si ou santi ki ou pe devlop bann santiman negatif anver lezot, kouma par exanp, anver bann dimounn enn lot ras ouswa ki sorti enn lot pei, priye Bondie ek demann Li pou ed ou tir sa bann santiman-la dan ou leker. (Psom 139:23, 24) Si, avek sinserite, ou demann Zeova pou donn ou lafors pou aret fer preferans, ou kapav sir ki Li pou ekout ou lapriyer ek Li pou ed ou.—1 Pier 3:12.

a Zeova se nom Bondie.—Psom 83:18, NW.

“Avan sa, zame mo ti asiz avek enn dimounn blan san lager . . . Aster, mo form parti enn vre fami internasional bann frer.”—TITUS

Enn Vre Zistwar—TITUS

Inn Reisi Aret Ena Laenn

Titus ti bien ankoler akoz lalwa segregasion, setadir bann lalwa inzis ki ti separ bann nwar ek bann blan. Alor, li ti rant dan enn group bien violan kot bann dimounn ti pans parey kouma li. Li rakonte: “Nou ti pe al dan bann plas kot bann nwar pa ti gagn drwa rantre, kouma bann lotel ek bann bar, zis pou provok bann lager.” Titus dir ki li ti ena boukou laenn, ek ki se sa laenn lamem ki ti fer li vinn violan. Li dir: “Si mo pa ti dakor avek enn kikenn, ki li enn misie ouswa enn madam, momem ki ti premie pou koumans lager ek bat dimounn-la.”

Titus ti sanze kan li ti koumans etidie Labib avek bann Temwin Zeova. Kan li ti lir Labib, sa ti fer li koumans pans enn lot fason. Li ti sirtou bien apresie promes ki dir ki dan enn nouvo lemond “pa pou ena ni lamor, ni dey, ni lamantasion, ni douler.”—Revelasion 21:3, 4.

Kan li ti fek koumans etidie Labib, Titus ti trouv sa bien difisil pou aret ena laenn pou lezot. Li dir: “Sa ti bien difisil pou sanz mo fason panse ek mo bann aksion.” Me seki ti ed li, se seki li ti aprann dan Zistwar Bann Apot 10:34, 35, kot li dir ki Bondie tret tou dimounn parey.

Ki rezilta sa finn ena? Titus explike: “Kan mo ti trouv lamour ki bann Temwin Zeova ti ena ant zot, mem si zot ras ouswa zot kouler lapo ti diferan, sa finn konvink mwa ki zot pe pratik vre relizion. Avan mem ki mo ti pran batem ek vinn enn Temwin, enn frer blan dan lasanble ti invit mwa kot li pou pran enn repa ansam. Sa ti koumadir enn rev. Avan sa, zame mo ti asiz avek enn dimounn blan san lager ek la, mo ti pe manz ansam avek li, dan so lakaz. Aster, mo form parti enn vre fami internasional bann frer.”