“Vre Sazes Pe Kriye For”

1. Kouma boukou dimounn reazir ar sazes ki sorti dan Labib? (Proverb 1:20, 21)

DAN boukou pei, souvan nou trouv nou bann frer ek ser pe debout dan bann plas kot dimounn pase souvan. Avek enn sourir lor zot figir, zot pe donn bann dimounn enn piblikasion pou lir. Sirman twa osi to’nn deza pres koumsa. Ek kitfwa, sa inn fer twa mazinn verse ki ena dan Proverb, ki koz lor sazes ki pe kriye for dan bann plas piblik, pou ki bann dimounn kapav tann so konsey. (Lir Proverb 1:20, 21.) Vre sazes, se sazes ki sorti kot Zeova. Ek nou trouv sa dan Labib ek dan nou bann piblikasion. Sa sazes-la, samem ki bann dimounn bizin pou ki zot kapav gagn lavi eternel. Nou bien kontan kan enn kikenn aksepte nou bann piblikasion. Me pa tou dimounn ki fer sa. Sertin pa interese pou aprann seki ena dan Labib, ek ena lezot ki riye kan zot trouv nou prese. Zot panse ki Labib li tro vie ek ki li pa itil. Ena lezot ki kritik bann lansegnman Labib. Zot dir ki bann dimounn ki swiv sa bann lansegnman-la, zot strikt ek zot kontan ziz lezot. Kanmem sa, Zeova kontign donn tou dimounn so sazes. Kouma Li fer sa?

2. Kotsa nou kapav trouv vre sazes azordi, me ki boukou dimounn swazir pou fer?

² Enn fason ki Zeova fer bann dimounn konn vre sazes, se gras-a so Parol, Labib. Preske tou dimounn kapav lir Labib azordi. Me ki nou kapav dir konsernan nou bann piblikasion? Gras-a led Zeova, sa bann piblikasion-la disponib dan plis ki 1,000 lang. Bann dimounn ki lir ek met an pratik seki zot aprann dan sa bann piblikasion-la, zot gagn bann bienfe. Malerezman, boukou dimounn inn desid pou pa ekout vre sazes ki sorti kot Zeova. Kan zot ena pou pran bann desizion, zot prefer kont lor zotmem, ouswa ekout sazes sa lemond-la. Ek parski nou, nou swiv seki Labib dir, zot pena okenn respe pou nou. Dan sa lartik-la, nou pou gete kifer bann dimounn reazir koumsa. Me pou koumanse, anou gete kouma nou kapav gagn sazes ki sorti kot Zeova.

APRANN KONN ZEOVA POU FER NOU GAGN SAZES

3. Ki nou bizin fer pou gagn vre sazes?

³ Sazes, se kapasite pou servi seki nou kone pou pran bann bon desizion. Parkont, vre sazes li boukou plis ki sa. Labib dir: “Lakrint pou Zeova, samem koumansman lasazes, ek konesans lor sa Kikenn ki Pli Sin la, ala seki lintelizans ete.” (Prov. 9:10) Alor, kan nou ena pou pran enn desizion inportan, nou bizin kone ki Zeova panse lor la. Nou kapav fer sa kan nou etidie Labib ek bann piblikasion. Kan nou fer sa, sa montre ki nou ena vre sazes.​—Prov. 2:5-7.

4. Kifer zis Zeova tousel kapav donn nou vre sazes?

⁴ Zis Zeova tousel kapav donn nou vre sazes. (Rom. 16:27) Kifer nou kapav dir ki sazes sorti kot Zeova? Premierman, Zeova Li nou Kreater, ek Li konn tou kitsoz lor so kreasion. (Ps. 104:24) Deziemman, tou seki Zeova fer montre ki Li ena sazes. (Rom. 11:33) Ek trwaziemman, bann ki swiv konsey Zeova, zot touletan gagn bann bienfe. (Prov. 2:10-12) Si nou anvi gagn vre sazes, nou bizin aksepte sa trwa verite bien inportan la, ek les zot gid nou bann desizion ek nou bann aksion.

5. Ki arive kan bann dimounn pa aksepte ki vre sazes sorti zis kot Zeova?

⁵ Boukou dimounn ki nou zwenn dan predikasion, zot dakor pou dir ki bann kitsoz ki ena dan lanatir, zot extraordiner. Me selman, zot pa dakor ki ena enn Kreater. Ena lezot ki dir ki zot krwar dan Bondie, me zot dir ki bann prinsip Labib nepli itil azordi. Akoz sa, zot fer seki zot anvi. Me eski zot ena rezon? Eski lemond boukou pli bon parski sa bann dimounn-la pe kont lor zot prop sazes, olie ki zot kont lor sazes Bondie? Eski zot vremem ere? Eski zot ena enn zoli lespwar pou lavenir? Seki nou trouve otour nou, li an-akor avek seki nou lir dan sa verse-la: “Pena okenn sazes, okenn disernman, ni okenn konsey ki kapav al kont Zeova.” (Prov. 21:30) Alor, sa vremem motiv nou pou kontign demann Zeova pou donn nou vre sazes! Malerezman, laplipar dimounn pa fer sa. Kifer?

KIFER BANN DIMOUN REZET VRE SAZES?

6. Dapre Proverb 1:22-25, kisann-la rezet vre sazes?

⁶ Boukou dimounn pa ekoute kan vre sazes “kriye for lor sime.” Dapre Labib, ena trwa kalite dimounn ki rezet sazes: “bann ki pena lexperyans,” “bann ki boufonn dimounn,” ek “bann ki bet.” (Lir Proverb 1:22-25.) Anou gete kifer sa bann dimounn-la rezet sazes ki sorti kot Bondie, ek kouma nou kapav fer nou maximum pou nou pa vinn kouma zot.

7. Kifer sertin prefer res kouma bann dimounn ki “pena lexperyans”?

⁷ “Bann ki pena lexperyans” se bann dimounn ki krwar tou seki zot tande, ek zot les bann dimounn anbet zot fasilman. (Prov. 14:15) Souvan, nou zwenn sa kalite dimounn-la dan predikasion. Par exanp, reflesi lor bann milyon dimounn ki pe les bann sef relizie ouswa bann politisien anbet zot. Sertin dimounn gagn sok kan zot realize ki sa bann dimounn-la inn anbet zot. Me bann ki mansione dan Proverb 1:22, zot prefer res san lexperyans parski zot kontan kouma zot ete. (Zer. 5:31) Zot fer seki zot anvi, ek zot pa anvi aprann seki Labib dir ouswa obeir so bann lalwa. Zot pans parey kouma enn madam bien relizie ki res dan Québec, dan Kanada, ki ti dir enn Temwin: “Si nou pret inn anbet nou, li ki an-tor, pa nou!” Nou pa anvi imit sa kalite dimounn-la, pa vre?​—Prov. 1:32; 27:12.

8. Ki kitsoz pou ed nou pou gagn sazes?

⁸ Parkont, Labib ankouraz nou pou pa res kouma bann dimounn ki pena lexperyans, me pou rezonn parey kouma bann “adilt.” (1 Kor. 14:20) Nou gagn sazes kan nou aplik bann prinsip Labib dan nou lavi. Si nou fer sa, nou pou trouve kouma Labib ed nou pou evit gagn bann problem ek pou pran bann bon desizion. Alor li bon ki nou reflesi lor bann desizion ki nou’nn pran ziska ler. Si sa fer inpe letan ki to pe etidie Labib ek ki to pe asiste bann renion, me ki to pankor donn Zeova to lavi ek pran batem, kitfwa to kapav demann tomem kifer to pankor fer sa. Ek aster, si to’nn fini pran batem, eski to pe fer zefor pou pres pli bien ek pou vinn enn pli bon ansegnan? Eski to bann desizion montre ki to pe swiv bann prinsip Labib? Eski to pe tret lezot parey kouma Zezi ti pou tret zot? Si nou trouve ki nou bizin fer bann sanzman, anou swiv bann konsey Zeova, parski “li donn sazes bann dimounn sinp ouswa ki pena lexperyans.”​—Ps. 19:7.

9. Kouma “bann ki boufonn dimounn” montre ki zot rezet sazes Zeova?

⁹ Deziem kalite dimounn ki rezet sazes Bondie, se “bann ki boufonn dimounn.” Parfwa, nou zwenn sa kalite dimounn-la dan predikasion. Zot kontan boufonn lezot. (Ps. 123:4) Labib ti dir ki dan bann dernie zour, ti pou ena boukou dimounn ki ti pou kontan boufonn lezot. (2 Pier 3:3, 4) Parey kouma bann zann Lot, ena boukou dimounn azordi ki pa kas latet avek seki Bondie dir. (Zen. 19:14) Ek ena boukou ki boufonn bann dimounn ki viv dapre bann prinsip Labib. Sa bann dimounn-la “swiv zot prop dezir,” ek zot fer bann move kitsoz. (Zid 7, 17, 18) Zot ena mem latitid ki bann aposta ek bann ki’nn rezet Zeova!

10. Dapre Psom 1:1, ki nou bizin fer pou ki nou pa vinn kouma bann dimounn ki boufonn lezot?

¹⁰ Kouma nou kapav fer nou maximum pou ki nou pa vinn kouma bann ki boufonn lezot? Enn fason pou fer sa, se kan nou evit frekant bann dimounn ki kontan plengne lor tou ti kitsoz. (Lir Psom 1:1.) Savedir ki nou bizin pa lir ek pa ekout nanye ki sorti kot bann aposta. Nou bizin fer bien atansion pou nou pa koumans plengne lor tou ti kitsoz. Sinon, sa kapav fer nou koumans kritike, ek nou kapav koumans dout Zeova ek bann linstriksion ki Li donn nou atraver so lorganizasion. Pou ki nou pa tom dan sa piez-la, nou kapav demann noumem: ‘Eski mo abitie plengne kan nou gagn bann nouvo instriksion, ouswa kan nou gagn bann nouvo explikasion? Eski mo abitie tir lay ar bann frer ki ena bann responsabilite?’ Kan nou fer nou maximum pou aret fer sa bann kitsoz-la, nou pou fer Zeova plezir.​—Prov. 3:34, 35.

11. Kouma “bann ki bet” konsider bann prinsip Zeova?

¹¹ Trwaziem kalite dimounn ki rezet sazes Zeova, se “bann ki bet.” Zot bet parski zot pa anvi viv dapre bann prinsip Zeova. Zot prefer fer seki zot anvi. (Prov. 12:15) Sa bann dimounn-la zot rezet Zeova ek sazes ki sorti kot Zeova. (Ps. 53:1) Kan nou zwenn sa bann kalite dimounn-la dan predikasion, bien souvan zot kritik nou parski nou swiv bann prinsip Labib. Selman, zot pena bann pli bon prinsip ki kapav amelior nou lavi. Labib dir: “Enn dimounn ki bet pa kapav gagn vre sazes; devan laport lavil, li pena nanye pou dir.” (Prov. 24:7) Bann dimounn ki bet pa kapav donn bann bon konsey. Akoz samem Zeova dir nou ki nou bizin “res lwin ar enn kikenn ki bet”!​—Prov. 14:7.

12. Ki kitsoz pou ed nou pou nou pa fer parey kouma bann ki bet?

¹² Nou pa parey kouma bann dimounn ki pa kontan bann konsey Zeova. Okontrer, nou fer zefor pou kontan fason panse Zeova ek so bann prinsip. Nou kapav ogmant nou lamour pou bann prinsip Zeova, kan nou reflesi lor seki ariv bann ki obeir Zeova ek bann ki dezobeir Li. Reflesi lor bann problem ki bann dimounn gagne kan zot rezet bann konsey Zeova. Lerla, to pou realize ki to lavi boukou pli bon parski to pe obeir Zeova.​—Ps. 32:8, 10.

13. Eski Zeova fors nou pou swiv so bann konsey?

¹³ Zeova donn tou dimounn so sazes. Me Li pa fors personn pou aksepte sa. Selman, Li explike ki pou ariv bann dimounn ki pa ekout so sazes. (Prov. 1:29-32) Bann ki desid pou dezobeir Zeova pou “pey konsekans zot bann aksion.” Avek letan, zot pou soufer akoz fason ki zot pe viv, ek finalman, Zeova pou detrir zot. Parkont, Zeova fer sa promes-la ar bann dimounn ki swiv so konsey: “Sa kikenn ki ekout mwa la pou res an sekirite. Ek li pou viv trankil san ki li per okenn maler.”​—Prov. 1:33.

VRE SAZES FER NOU GAGN BANN BIENFE

14-15. Ki nou aprann dan Proverb 4:23?

¹⁴ Nou touletan gagn bann bienfe kan nou ekout sazes Bondie. Kouma nou’nn trouve, li pa difisil pou trouv bann konsey Zeova. Par exanp, dan liv Proverb, Li donn nou boukou konsey, ek si nou met zot an pratik, sa pou amelior nou lavi. Anou get kat parmi sa bann konsey-la.

¹⁵ Protez to leker. Labib dir: “Plis ki tou kitsoz ki to bizin proteze, protez to leker, parski ladan mem ki bann lasours lavi sorti.” (Prov. 4:23) Reflesi lor seki nou bizin fer pou protez nou leker fizik. Nou bizin manz bann manze ki bon pou nou lasante, fer ase lexersis, ek rezet bann move labitid. Dan mem fason, nou bizin fer sertin kitsoz pou protez nou leker sinbolik. Nou bizin lir Labib toulezour. Nou bizin prepar, asiste, ek partisip dan bann renion. Nou bizin prese regilierman. Ek nou bizin rezet bann move labitid ki kapav sali nou lespri, kouma bann divertisman imoral ek bann move frekantasion.

16. Kifer Proverb 23:4, 5 li itil pou nou azordi?

¹⁶ Kontant twa ar seki to ena. Labib donn sa konsey-la: “Pa fatig twa pou gagn larises. . . . Kan to get li, li nepli la, parski li’nn gagn lezel parey kouma enn leg ek li anvole dan lesiel.” (Prov. 23:4, 5) Bann dimounn kapav perdi zot kas ek zot bann dibien san ki zot atann. Me azordi, bann dimounn ris ek pov, toulede galoup deryer larzan. Akoz sa, bien souvan, zot fer bann kitsoz ki gat zot repitasion, zot lamitie ar lezot, ek mem zot lasante. (Prov. 28:20; 1 Tim. 6:9, 10) Parkont, kan nou ena sazes, nou pa pou trakas nou plis ki bizin konsernan larzan. Lerla, sa pou ed nou pou ki nou pa gourma kas, me ki nou kontant nou ar seki nou ena.​—Eccl. 7:12.

17. Kouma nou kapav gagn “lalang enn dimounn saz,” ki mansione dan Proverb 12:18?

¹⁷ Reflesi avan to koze. Si nou pa fer atansion, nou kapav fer boukou ditor par nou bann parol. Labib dir: “Bann koze san reflesi zot koumadir bann kout lepe, me lalang enn dimounn saz, li enn gerizon.” (Prov. 12:18) Nou ede pou ki ena lape kan nou pa fer palab lor lezot. (Prov. 20:19) Si nou anvi ki nou bann parol ankouraz lezot ek pa bles zot, nou bizin lir ek reflesi lor Parol Bondie regilierman. (Lik 6:45) Kan nou reflesi lor seki Labib dir, nou bann parol kapav vinn enn “lasours lasazes” ki ankouraz lezot.​—Prov. 18:4.

18. Kouma Proverb 24:6 kapav ed nou dan predikasion?

¹⁸ Swiv bann instriksion lorganizasion. Labib donn nou sa konsey bien itil la: “Bann bon konsey, zot bien inportan pou fer lager, ek kan ena boukou konseye, ena laviktwar.” (Prov. 24:6) Kan nou swiv sa prinsip-la, kouma sa ed nou pou pres pli bien ek pou vinn bann pli bon ansegnan? Olie ki nou prese ek ansegne kouma nou nou anvi, nou fer zefor pou swiv bann sizesion ki nou gagne. Par exanp, kan nou bann frer ek ser fer bann size dan renion, nou kapav gagn bann lide kouma pou prese ek ansegne dan enn pli bon fason. Anplis, lorganizasion Zeova donn nou bann zouti bien efikas, kouma bann piblikasion ek bann video, ek nou kapav servi sa pou ed bann dimounn pou konpran Labib. Eski to pe bien servi sa bann zouti-la?

19. Ki to panse lor sazes Zeova? (Proverb 3:13-18)

¹⁹ Lir Proverb 3:13-18. Nou bien rekonesan pou bann bon konsey ki ena dan Labib. Ki nou ti pou fer san sa bann konsey-la? Dan sa lartik-la, nou’nn get sertin konsey pratik ki trouv dan liv Proverb. Me dan Labib an-antie ena bann bon konsey ki Zeova donn nou. Alor, anou fer nou best pou kontign met an pratik sa bann konsey-la dan nou lavi toulezour. Sazes Zeova pena valer pou sa lemond-la. Me nou, nou sir ki “bann ki trap [sazes] bien for pou ere.”