1 | Lapriyer “Zet Tou Zot Traka lor Li”

LABIB DIR: “Zet tou zot traka lor [Bondie], parski li gagn zot traka.”—1 PIER 5:7.

Seki Savedir

Zeova invit nou pou koz avek li lor ninport ki fardo ki pez lour lor nou lespri ek nou leker. (Psom 55:22) Nou kapav priye lor ninport ki problem, ki li gro ouswa li tipti. Si li inportan pou nou, li inportan pou Zeova. Kan nou priye li, nou kapav gagn lape lespri.—Filipien 4:6, 7.

Seki Kapav Ede

Kan nou ena bann problem avek nou lasante mantal, nou kapav santi nou tousel. Bann lezot dimounn pa touletan konpran par ki nou pe pase. (Proverb 14:10) Me kan avek tou nou leker, nou dir Bondie seki nou resanti dan lapriyer, li pou touletan ekout nou avek lamour ek konpran nou. Zeova trouv nou, li konn nou bann difikilte ek nou lapenn ek li anvi ki nou priye li lor ninport ki kitsoz ki fatig nou.—2 Kronik 6:29, 30.

Kan nou koz ar Zeova dan lapriyer sa ranforsi nou konfians ki li gagn nou traka. Nou kapav ena mem santiman ki sa ekrivin ki ti dir dan lapriyer: “To konn mo soufrans ek traka ki pe kraz mwa.” (Psom 31:7) Kan nou kone ki Zeova trouv tou bann problem par ki nou pe pase, sa kapav ed nou pou andire dan bann moman difisil. Me li fer plis ki zis remark nou bann problem. Plis ki ninport kisann-la, li konpran tou seki nou pe pase ek li ed nou pou trouv rekonfor ek lankourazman dan Labib.

Labib Pe Ed Julian

Kouma Langwas Afekte Mwa?

“Mo enn dimounn angwase ek mo ena enn maladi ki apel OCD (obsessive-compulsive disorder). Mo kapav angwase ninport ki ler. Enn moman mo kapav santi mwa bien, ek enn lot moman mo kapav santi mwa extra angwase san okenn rezon. Mo angwase sirtou kan mo parmi lezot dimounn. Mo extra trakase lor seki zot panse lor mwa.

“Bann kamarad ki kone ki mo angwase, zot fer zot best pou ed mwa. Mem si ena fwa seki zot dir pa ed mwa, mo apresie bann zefor ki zot fer.

“Ena fwa li difisil pou priye akoz mo angwase ek akoz sa maladi OCD la. Mo bizin fer bann gro zefor pou koz ar Zeova dan lapriyer. Bann lide pas telman vit dan mo latet ki souvan mo abriti. Kan mo pa kapav kontrol mo bann panse, li difisil pou dir Zeova ki mo pe panse ouswa ki mo pe resanti.”

Kouma Labib Ed Mwa?

“Mo’nn aprann dan Labib ki mo pa bizin fer bann long lapriyer ouswa servi bann gran-gran mo pou ki Bondie ekout mwa. Parfwa kan mo pa kapav dir seki mo resanti, mo zis dir: ‘Zeova, silteple ed mwa.’ Mem si mo dir zis sa, mo santi ki Zeova konpran mwa ek ki li donn mwa seki mo bizin dan sa ler-la. Anplis ki mo priye, mo’nn koumans swiv osi enn tretman medikal. Mo kontan pou dir ki gras-a sa de kitsoz-la, mo lasante inn bien ameliore. Mem si mo bizin fer boukou zefor pou demann mo Papa ki dan lesiel led, mo kontan pou fer li parski mo kone ki li kontan mwa ek ki li anvi ed mwa.”