Kouma Nou Kapav Ena Plis Lafwa dan Promes Zeova Konsernan Lemond Nouvo?

1-2. Ki nou bizin kontign fer pandan ki nou pe atann lemond nouvo?

ZEOVA inn promet ki Li pou ranplas sa vie lemond-la par enn nouvo lemond kot pou ena lazistis. (2 Pier 3:13) Nou bien rekonesan anver Zeova pou sa! Mem si nou pa kone kan lemond nouvo pou arive, bann kitsoz ki pe arive dan sa lemond-la montre ki li pa pou tarde.​—Mat. 24:32-34, 36; Zist. 1:7.

² Ninport ki kantite letan nou dan laverite, nou tou nou bizin ena plis lafwa dan sa promes-la. Kifer? Parski mem enn lafwa bien for kapav vinn feb. An realite, Pol dir ki, kan nou mank lafwa, se enn “pese ki blok nou fasilman.” (Ebre 12:1) Pou nou lafwa pa vinn feb, nou bizin kontign reflesi lor bann kitsoz ki montre ki lemond nouvo pou arive biento.​—Ebre 11:1.

3. Ki nou pou examine dan sa lartik-la?

³ Dan sa lartik-la, nou pou get trwa kitsoz ki pou ed nou pou ena plis lafwa dan promes Zeova konsernan lemond nouvo: (1) reflesi lor laranson, (2) reflesi lor pwisans Zeova, ek (3) kontign fer bann kitsoz ki pou fer nou vinn pli pros ar Zeova. Apre sa, nou pou gete kouma mesaz ki Zeova ti donn Abakuk, kapav fer nou lafwa vinn pli for azordi. Me pou koumanse, anou get sertin sitiasion ki nou pe fer fas azordi, kot nou vremem bizin ena plis lafwa dan promes konsernan lemond nouvo.

BANN SITIASION KOT NOU BIZIN ENA ENN LAFWA FOR

4. Kouma nou bann desizion montre ki nou ena enn lafwa for?

⁴ Pou nou kapav pran bann bon desizion toulezour, nou bizin ena enn lafwa for. Par exanp, nou bizin pran bann desizion konsernan nou travay, bann dimounn ki nou frekante, nou bann divertisman, ledikasion, maryaz, ek zanfan. Akoz sa, li bon ki nou demann noumem: ‘Eski mo bann desizion montre ki mo sir ki sa lemond-la pe al fini, ek ki biento Zeova pou ranplas li par enn nouvo lemond? Ouswa eski mo fer parey kouma bann dimounn ki pena okenn lesperans?’ (Mat. 6:19, 20; Lik 12:16-21) Nou pou pran bann pli bon desizion si nou sir ki lemond nouvo pou arive biento!

5-6. Kifer nou lafwa bizin for kan ena bann leprev? Donn enn lexanp.

⁵ Kan nou fer fas ar bann leprev osi, nou bizin ena enn lafwa for. Kitfwa nou bizin fer fas ar persekision, ouswa nou ena enn maladi kronik. Kitfwa osi nou pe bizin fer fas ar lezot kitsoz ki pe dekouraz nou. O-koumansman, kitfwa nou pe reisi andir leprev-la. Me si leprev-la kontigne mem, nou bizin ena plis lafwa pou nou reisi andire ek nou kontign servi Zeova avek lazwa.​—Rom. 12:12; 1 Pier 1:6, 7.

⁶ Kan enn leprev pe kontigne mem, kitfwa nou kapav panse ki lemond nouvo pa pou vinn zame. Me eski savedir ki nou lafwa feb? Pa neseserman. Anou pran enn lexanp. Kan ena enn move liver, kitfwa nou kapav panse ki lete pa pou vinn zame. Selman, lete touletan vini. Dan mem fason, kan nou bien dekouraze, kitfwa nou kapav panse ki lemond nouvo pa pou vinn zame. Selman, kan nou lafwa for, nou kone ki Zeova touletan tini so bann promes. (Ps. 94:3, 14, 15; Ebre 6:17-19) Lerla, nou pou kontign met Zeova an premie dan nou lavi.

7. Ki move fason panse nou bizin rezete?

⁷ Nou bizin ena enn lafwa for osi pou nou kapav prese. Kan nou prese, boukou dimounn panse ki “bon nouvel” konsernan lemond nouvo, li zis enn rev. (Mat. 24:14; Eze. 33:32) Fode zame nou les zot move fason panse detin lor nou. Pou ki sa pa arive, nou bizin kontign gard nou lafwa for. Anou get trwa kitsoz ki pou ed nou pou fer sa.

REFLESI LOR LARANSON

8-9. Kan nou reflesi lor laranson, kouma sa kapav fer nou lafwa vinn pli for?

⁸ Enn fason ki nou kapav fer nou lafwa vinn pli for se kan nou reflesi lor laranson. Laranson se enn garanti ki Zeova pou tini so bann promes. Kan nou pran letan pou reflesi kifer Zeova inn donn laranson, ek lor seki sa inplike, nou pou ena plis lafwa dan promes Zeova konsernan lemond nouvo. Kifer nou dir sa?

⁹ Anou gete seki laranson inplike. Zeova inn donn nou so Garson premie-ne ki Li bien kontan, so kamarad pli pros. Zeova inn avoy Zezi lor later ek li’nn ne kouma enn imin parfe. Kan li ti lor later, Zezi inn bizin andir tou kalite difikilte. Li’nn bien soufer ek li’nn gagn enn vilin lamor. Sa finn kout Zeova bien ser! Zeova zame pa ti pou les so Garson soufer ek mor, zis pou nou gagn enn pli bon lavi pou enn ti moman! (Zan 3:16; 1 Pier 1:18, 19) Zeova inn donn nou so Garson, alor Li pou fer sir ki nou kapav viv pou touletan dan lemond nouvo.

REFLESI LOR PWISANS ZEOVA

10. Dapre Efezien 3:20, ki kitsoz Zeova kapav fer?

¹⁰ Enn deziem fason ki nou kapav fer nou lafwa vinn pli for, se kan nou reflesi lor pwisans Zeova. Zeova ena kapasite pou tini tou bann promes ki Li fer. Boukou dimounn panse ki li inposib ki nou viv pou touletan dan enn nouvo lemond. Me Zeova bien souvan fer bann promes ki bann dimounn pa kapav fer. Apre tou, Li Bondie Tou-Pwisan! (Zob 42:2; Mark 10:27) Alor, fode pa nou etone kan Li promet nou bann kitsoz extraordiner.​—Lir Efezien 3:20.

11. Sit sertin promes extraordiner ki Zeova inn fer. (Get lankadre “Sertin Promes Extraordiner Ki’nn Realize.”)

¹¹ Anou get sertin kitsoz ki ti paret inposib, ki Zeova ti promet so bann serviter dan lepase. Par exanp, mem si Abraam ek Sara ti bien vie, Zeova ti promet zot ki zot ti pou gagn enn garson. (Zen. 17:15-17) Li ti osi dir Abraam ki pei Kanaan ti pou vinn pou so bann desandan. Pandan bann santenn lane ki bann Izraelit, bann desandan Abraam, ti esklav dan Lezip, kitfwa sertin ti panse ki sa promes-la pa ti pou realize. Me li ti realize! Plitar, Zeova ti dir Elizabet, ki ti enn vie madam, ki li ti pou gagn enn zanfan. Zeova ti osi dir Mari, enn vierz, ki li ti pou gagn enn garson, ek ki sa garson-la ti pou Garson Bondie. Sa ti pou realiz enn promes ki Zeova ti fer dan zardin Edenn bann milye lane avan!​—Zen. 3:15.

12. Kouma Zozwe 23:14 ek Izai 55:10, 11 montre nou ki Zeova bien pwisan?

¹² Kan nou reflesi lor tou bann promes ki Zeova inn fer, ek lor kouma Li’nn tini sa bann promes-la, nou konpran ki Zeova bien pwisan. Sa ogmant nou lafwa dan so promes konsernan lemond nouvo! (Lir Zozwe 23:14; Izai 55:10, 11.) Sa prepar nou osi pou explik lezot ki lemond nouvo, li pa enn rev, ni enn zistwar. Konsernan lemond nouvo, Zeova Limem inn dir: “Sa bann parol-la zot fidel ek vre.”​—Rev. 21:1, 5.

FER BANN KITSOZ KI POU FER NOU VINN PROS AR ZEOVA

13. Kouma bann renion kapav fer nou lafwa vinn pli for? Explike.

¹³ Enn trwaziem kitsoz ki pou fer nou lafwa vinn pli for, se kan nou fer bann kitsoz ki pou fer nou vinn pli pros ar Zeova. Par exanp, anou get bann bienfe ki nou gagne gras-a nou bann renion. Anna, ki pandan plizir dizenn lane inn fer diferan form servis aplintan, dir: “Bann renion inn ed mwa pou gard mo lafwa for. Parfwa, li arive ki frer ki pe fer size-la, li pa enn top orater, ouswa li pa pe ansegn nanye ki nouvo. Selman, souvan mo aprann bann kitsoz ki ed mwa konpran Labib pli bien, ek sa ranforsi mo lafwa.”b Nou lafwa vinn for osi kan nou ekout bann repons ki nou bann frer ek ser done dan renion.​—Rom. 1:11, 12; 10:17.

14. Kouma predikasion kapav fer nou lafwa vinn pli for?

¹⁴ Nou lafwa vinn pli for osi kan nou prese. (Ebre 10:23) Barbara, ki pe servi Zeova depi plis ki 70 an, dir: “Pou mwa, predikasion inn touletan ranforsi mo lafwa. Plis mo koz lor bann zoli promes Zeova, plis mo lafwa vinn for.”

15. Kouma nou letid personel kapav fer nou lafwa vinn pli for? (Get zimaz osi.)

¹⁵ Enn lot kitsoz ki kapav fer nou lafwa vinn pli for se nou letid personel. Susan dir ki sa ed li boukou ki li ena enn program pou etidie. Li dir: “Bann Dimans, mo etidie Letid Latour Degard ki pou fer lot semenn. Bann Lindi ek Mardi, mo prepar mo renion lasemenn. Bann lezot zour, mo fer mo letid personel.” Susan touletan swiv so program pou etidie, ek sa ed li pou gard so lafwa for. Irene, ki’nn servi pandan plizir dizenn lane dan biro mondial, dir ki kan li etidie lor bann profesi, sa ed li pou gard so lafwa for. Li dir: “Mo trouv sa extraordiner ki mem bann ti detay dan bann profesi Zeova realize.”c

“LI POU REALIZE VREMEM”

16. Kouma bann parol ki Zeova ti dir Abakuk konsern nou osi azordi? (Ebre 10:36, 37)

¹⁶ Sertin serviter Zeova pe atann lafin depi bien lontan, ek sertin panse ki lafin ti bizin fini arive. Me Zeova kone seki so bann serviter resanti. Akoz sa, Li ti dir profet Abakuk: “Letan fixe pou vizion-la realize, li pankor arive. Vit-vit li pe al ver so realizasion, ek li pa pou koz manti. Mem si li tarde, kontign atann li! Parski li pou realize vremem. Li pa pou an-retar!” (Abak. 2:3) Eski Zeova ti dir sa bann parol-la zis pou Abakuk? Ouswa eski sa konsern nou osi azordi? Lespri sin inn servi lapot Pol pou dir sa bann parol-la bann Kretien ki pe atann lemond nouvo. (Lir Ebre 10:36, 37.) Alor, nou kapav sir ki, mem si nou panse ki promes Zeova konsernan lemond nouvo pe tarde, “li pou realize vremem. Li pa pou an-retar!”

17. Kouma enn ser inn swiv konsey ki Zeova ti donn Abakuk?

¹⁷ Boukou Temwin pe swiv konsey ki Zeova ti donn Abakuk ek zot pe “kontign atann.” Sertin parmi zot pe mem atann depi plizir dizenn lane. Par exanp, Louise inn koumans servi Zeova depi 1939. Li dir: “Sa lepok-la, mo ti panse ki Armagedon ti pou fini arive avan ki mo kit kolez. Me sa pa ti arive! Pandan boukou lane, seki’nn ed mwa pou atann ki Zeova realiz so bann promes, se lexanp bann serviter dan lepase, ki ti pe atann zot osi ki Zeova realiz so bann promes. Par exanp, mo ti lir zistwar Noe, Abraam, Zozef, ek lezot ankor, ki ti bizin atann lontan avan ki zot gagn rekonpans ki Zeova ti promet zot. Nou’nn touletan sir ki bann promes Zeova pou realize, ek sa finn ed mwa ek lezot osi pou nou sir ki lemond nouvo bien pre.” Boukou serviter Zeova ki lontan dan laverite ena mem santiman ki Louise!

18. Kan nou reflesi lor kreasion, kouma sa kapav ed nou pou ena plis lafwa dan promes Zeova konsernan lemond nouvo?

¹⁸ Li vre ki lemond nouvo pankor arive. Selman, reflesi lor bann kitsoz ki deza la, kouma par exanp bann zetwal, bann pie, bann zanimo, ek bann dimounn. Personn pa kapav dir ki sa bann kitsoz-la pa existe! Mem si enn lepok zot pa ti existe, zot la azordi zis parski Zeova inn kree zot. (Zen. 1:1, 26, 27) Zeova inn promet nou enn nouvo lemond. Alor, nou kapav sir ki Li pou tini so promes. Dan sa nouvo lemond-la, bann dimounn pou viv pou touletan ek zot pou ena enn bon lasante. Nou kapav sir ki lemond nouvo pou arive dan moman ki Zeova inn fixe!​—Iza. 65:17; Rev. 21:3, 4.

19. Kouma to kapav fer to lafwa vinn pli for?

¹⁹ An-atandan, fer tou seki to kapav pou fer to lafwa vinn pli for. Ogmant to rekonesans pou laranson. Reflesi lor pwisans Zeova. Ek kontign fer bann kitsoz ki pou fer twa vinn pli pros ar Li. Si to fer sa bann kitsoz-la, to pou form parti bann dimounn “ki gras-a lafwa ek pasians, erit bann promes.”​—Ebre 6:11, 12; Rom. 5:5.