Ki Bon, Ki Pa Bon: Lor Ki Kitsoz Souvan Bann Dimounn Baz Zot Desizion?

Laplipar dimounn pou dakor ki ena sertin kitsoz ki bon, ek ena ki pa bon. Par exanp, zot dakor ki viol, agresion sexiel lor enn zanfan ek touy enn kikenn, se bann kitsoz ki vremem pa bon. Parkont, zot trouv sa bon kan enn kikenn azir dan enn fason zis, kan li montre bonte ek kan li konpran lezot. Me kan sa konsern sexialite, lonette, ouswa kouma pou elve bann zanfan, boukou dimounn panse ki zot kapav deside par zotmem ki bon ek ki pa bon, ek ninport ki swa zot fer dan sa bann domenn-la li pa move. Souvan bann dimounn pran desizion dapre seki zot zot resanti, ek dapre seki lezot panse lor la. Eski se enn bon fason fer?

ESKI NOU BIZIN PRAN BANN DESIZION DAPRE SEKI NOU RESANTI?

Souvan nou pran bann desizion dapre seki nou resanti ouswa dapre nou konsians, setadir dapre seki nou nou panse bon ouswa pa bon. (Romin 2:14, 15) Depi tipti mem, bann zanfan konn fer diferans ant enn bon konportman ek enn move konportman, ek zot kapav mem santi zot koupab kan zot mal azir. Avek letan, nou konsians li forme dapre seki nou aprann ar nou fami, nou bann kamarad, nou bann profeser, nou lantouraz, nou relizion ek nou kiltir. Lerla kan nou pran bann desizion, nou konsians fer nou kone si nou pe bien fer ouswa non, dapre bann prinsip ki nou’nn aprann.

Nou konsians kapav pous nou pou konpran lezot, pou montre rekonesans, pou azir dan enn fason zis, ek pou ena konpasion anver lezot. Li kapav osi anpes nou fer bann kitsoz ki pou bles bann dimounn ki nou kontan, ouswa pou fer bann kitsoz ki pou fer nou gagn onte, ouswa santi nou koupab.

Eski li touletan bon ki nou pran bann desizion dapre seki nou resanti? Gete ki Garrick dir lor ki kalite lavi li ti amene kan li ti zenn. Li dir: “Mo ti kapav fer tou seki mo ti anvi.” Me selman, kan li ti fer seki li ti panse bon, li ti trouve ki sa pa ti pe amenn bann bon rezilta. Li dir ki li pa ti ere ek ki li ti amenn enn lavi imoral, li ti enn droge, enn soular, ek li ti bien violan.

ESKI NOU BIZIN PRAN BANN DESIZION DAPRE SEKI LEZOT PANSE?

Souvan, kan nou ena pou pran bann desizion, nou osi pran kont seki lezot panse lor la. Sa permet nou profit zot lexperyans ek zot sazes. Nou gagn respe nou fami, nou bann kamarad, ek nou lantouraz kan nou al dapre seki zot zot panse bon.

Eski li touletan bon ki nou pran bann desizion dapre seki lezot panse? Kan Priscila ti zenn, li ti fer parey kouma so bann kamarad ek li ti pe gagn relasion sexiel avan maryaz. Me, mem si li ti pe fer bann kitsoz ki lezot panse bon, li pa ti ere. Li dir: “Kan mo ti pe fer parey kouma lezot, mo pa ti santi mwa bien. Mo ti fer bann kitsoz ki bien bet ek pran bann risk initil.”

ESKI ENA ENN PLI BON GID?

Li bon ki nou pran kont nou santiman ek santiman lezot kan nou ena pou pran enn desizion. Me sa pa touletan ase. Parfwa, bann desizion ki nou pran kapav afekte nou ek lezot osi dan enn move fason parski nou pa trouve ki bann konsekans kapav ena pli devan. (Proverb 14:12) Par exanp, mem si aster-la nou panse ki nou lopinion ek lopinion lezot bon, plitar nou kapav trouve ki seki nou ti panse bon, ofet li pa bon. Apre tou, ena sertin konportman ki avan bann dimounn ti trouv extra pa bon, me aster-la zot trouv sa normal, alor ki seki zot ti trouv bon avan aster zot trouv li pa bon.

Eski ena enn pli bon gid ki kapav ed nou deside ki bon, ki pa bon? Eski ena bann prinsip ki nou kapav swiv aster-la ki pa pou fer nou regrete plitar?

Erezman, ena enn bon gid ki nou kapav fer konfians, ki pa sanz-sanze ek ki itil pou zot tou ninport kotsa zot reste. Prosin lartik pou koz lor kotsa nou kapav gagn meyer gid ki pou ed nou kone ki bon, ki pa bon.