Kouma Nou Kapav Gagn Plis Lazwa dan Predikasion?

1. Ki difikilte sertin proklamater gagne? (Get zimaz osi.)

NOU bien kontan nou Papa Zeova! Akoz sa, nou pres ar bann dimounn ek nou ed zot pou aprann konn Li. Boukou proklamater kontan prese. Me ena sertin ki pa tro zwaye dan predikasion. Kifer? Parski sertin timid ek zot mank konfians an zotmem, ek ena lezot ki gagn onte pou al devan laport bann dimounn. Ena sertin osi ki per tansion bann dimounn ankoler ar zot, ek ena lezot ki prefer evit bann problem. Mem si sa bann frer ek ser la bien kontan Zeova, zot gagn difikilte pou pres ar bann dimounn ki zot pa kone. Selman, zot kone ki sa travay-la bien inportan ek zot fer zefor pou prese regilierman. Nou kapav sir ki Zeova bien kontan kan Li trouv zot!

2. Si parfwa to pa zwaye dan predikasion, kifer fode pa to dekouraze?

² Eski twa osi to gagn sa bann difikilte-la, ek akoz sa to pa zwaye dan predikasion? Si wi, fode pa to dekouraze. Si to mank konfians an tomem pou to prese, savedir ki to pa anvi atir latansion lor tomem ek ki to pa anvi diskit ar bann dimounn. Anplis, personn pa kontan kan enn kikenn ankoler ar li, sirtou si li pe fer enn bon travay. To Papa Zeova kone ki to ena sa bann difikilte-la ek Li anvi ed twa. (Iza. 41:13) Dan sa lartik-la, nou pou get sink kitsoz ki pou ed nou pou sirmont sa bann difikilte-la. Sa pou ed nou pou gagn plis lazwa dan predikasion.

GAGN LAFORS GRAS-A PAROL BONDIE

3. Ki kitsoz ti ed Zeremi pou gagn kouraz pou prese?

³ Dan lepase, bann serviter Zeova ti gagn lafors gras-a Parol Bondie pou asim bann responsabilite bien difisil. Anou get lexanp profet Zeremi. Kan Zeova ti demann li pou prese, li ti bien trakase. Li ti dir: “Mo pa mem kone kouma pou koze, parski mo zis enn ti garson.” (Zer. 1:6) Zeremi ti mank konfians an limem. Ki kitsoz ti ed li pou gagn kouraz pou prese? Li ti gagn lafors gras-a Parol Bondie. Li ti dir: “So parol ti vinn kouma enn dife bien for, kouma enn dife bien for dan mo lezo, ek mo ti fatige tini li.” (Zer. 20:8, 9) Mem si Zeremi ti bizin pres dan enn teritwar bien difisil, mesaz ki li ti bizin prese ti donn li lafors pou fer seki Zeova ti demann li.

4. Kan nou lir Parol Bondie ek nou reflesi lor la, ki lefe sa ena lor nou? (Kolosien 1:9, 10)

⁴ Bann Kretien osi gagn lafors gras-a Parol Bondie. Kan li ti ekrir lasanble Kolos, lapot Pol ti dir so bann frer ki zot ti bizin kontign aprann plis lor Zeova. Sa ti pou ed zot pou kontign raport bann “frwi dan tou bann bon travay,” ek lerla zot ti pou “mars dan enn fason ki dign devan Zeova.” (Lir Kolosien 1:9, 10.) Predikasion bon nouvel lor Rwayom Bondie form parti sa ‘bann bon travay-la.’ Alor, kan nou lir Parol Bondie ek nou reflesi lor la, sa ogmant nou lafwa dan Zeova ek sa ed nou pou konpran kifer li inportan ki nou kontign pres bon nouvel.

5. Pou nou gagn plis bienfe kan nou lir ek etidie Labib, ki nou bizin fer?

⁵ Si to anvi gagn plis bienfe ar Parol Bondie, fode pa to taye-raze kan to lir to Labib, kan to etidie, ouswa kan to reflesi lor seki to’nn aprann. Okontrer, to bizin pran to letan! Si to lir enn verse ki to pa tro konpran, pa fer koumadir to’nn konpran li. Okontrer, servi Index des publications des Témoins de Jéhovah ouswa Liv Resers pou Bann Temwin Zeova pou esey konpran verse-la. Si to pran to letan kan to etidie, to pou ena plis konfians dan bann verite ki ena dan Labib. (1 Tes. 5:21) Ek plis to sir ki Labib dir laverite, plis to pou anvi partaz seki to’nn aprann ar lezot.

PREPAR TWA BIEN AVAN TO AL PRESE

6. Kifer nou bizin prepar nou bien avan ki nou al prese?

⁶ Si to prepar twa bien avan to al prese, to pou pli alez pou koz ar bann dimounn. Zezi ti prepar so bann disip avan ki li ti avoy zot dan predikasion. (Lik 10:1-11) Ek parski zot ti met an pratik seki Zezi ti ansegn zot, zot ti reisi fer travay ki Zezi ti donn zot ek sa ti rann zot zwaye.—Lik 10:17.

7. Kouma nou kapav prepar nou pou predikasion? (Get zimaz osi.)

⁷ Kouma to kapav prepar twa pou predikasion? Reflesi kouma to kapav partaz bann verite ki ena dan Labib dan enn fason efikas ek dan to prop mo. Reflesi osi lor de-trwa obzeksion ki to abitie gagne dan teritwar ek gete kouma to kapav sirmont zot. Ek kan to koumans koz ar bann dimounn, fer enn sourir, res amikal, ek pa strese.

8. Kifer nou kapav konpar bann Kretien ar bann resipian later?

⁸ Lapot Pol ti dir bann frer ek ser: “Nou ena sa trezor-la dan bann resipian later.” (2 Kor. 4:7) Ki ete sa trezor-la? Se nou predikasion, ki kapav sov lavi bann dimounn. (2 Kor. 4:1) Ki ete sa bann resipian later la? Se bann serviter Zeova ki pe pres bon nouvel. Dan lepok lapot Pol, bann marsan ti servi bann resipian later pou sarye bann kitsoz ki ena valer, kouma manze, divin, ouswa kas. Dan mem fason, Zeova inn donn bann resipian later, setadir so bann serviter, responsabilite pou pres enn mesaz ki ena boukou valer. Ek avek led Zeova, nou kapav gagn lafors ki nou bizin pou pres sa mesaz-la.

PRIYE POU GAGN KOURAZ

9. Si nou per reaksion bann dimounn kan nou prese, kouma nou kapav sirmont sa laper-la? (Get zimaz osi.)

⁹ Parfwa, nou kapav per ki bann dimounn pa ekout nou, ouswa ki zot opoz ar nou dan predikasion. Kouma nou kapav sirmont sa laper-la? Reflesi lor lapriyer ki bann zapot ti fer kan bann dimounn ti donn zot lord pou aret prese. Olie ki zot ti gagn per, zot ti demann Zeova pou ed zot “pou kontign koz lor [so] parol avek boukou kouraz.” Ek Zeova ti reponn zot lapriyer deswit! (Zist. 4:18, 29, 31) Alor, si parfwa to per reaksion bann dimounn kan to prese, priye Zeova. Demann Li pou ogmant to lamour pou to prosin pou ki to pa per kan to pres ar zot.

10. Kouma Zeova donn nou kouraz pou prese? (Izai 43:10-12)

¹⁰ Zeova inn fer nou vinn so bann Temwin, ek Li’nn promet nou ki Li pou donn nou kouraz. (Lir Izai 43:10-12.) Anou get kat fason kouma Li fer sa. Premierman, Zezi avek nou kan nou pres bon nouvel. (Mat. 28:18-20) Deziemman, Zeova servi so bann anz pou ed nou. (Rev. 14:6) Trwaziemman, Li donn nou so lespri sin ki ed nou pou rapel bann kitsoz ki nou’nn aprann. (Zan 14:25, 26) Ek katriemman, Li donn nou bann frer ek ser ki akonpagn nou kan nou prese. Alor, avek led Zeova ek soutien nou bann frer ek ser, nou kapav ena kouraz ek kontign prese.

ADAPTE TWA EK RES POZITIF

11. Kouma to kapav zwenn pli boukou dimounn pou prese? (Get zimaz osi.)

¹¹ Eski parfwa to dekouraze parski to pa zwenn bann dimounn lakaz kot zot? Alor, reflesi kotsa bann dimounn ete dan sa ler-la. (Zist. 16:13) Si zot dan zot travay ouswa zot pe fer shoping, kitfwa to kapav mars-marse lor semin ek pres dan enn fason informel. Enn frer ki apel Joshua dir: “Mo sezi lokazion pou prese kan mo pe marse dan bann sant komersial, ouswa dan bann lezot plas kot ena boukou dimounn.” Joshua ek so madam, Bridget, inn osi zwenn pli boukou dimounn kot zot, kan zot prese dan lasware ek osi dan Dimans tanto.—Efe. 5:15, 16.

12. Kouma nou kapav esey kone ki kitsoz interes bann dimounn ouswa dan ki kitsoz zot krwar?

¹² Kan bann dimounn pa tro interese ar nou mesaz, esey kone ki kitsoz interes zot ouswa dan ki kitsoz zot krwar. Joshua ek Bridget servi kestion ki ena devan lor nou bann trakt pou koumans bann konversasion. Par exanp, kan zot servi trakt Kouma Ou Konsider Labib?, zot dir: “Sertin dimounn panse ki Labib se enn liv ki sorti kot Bondie, me ena bann dimounn ki pa krwar ladan. Ou, ki ou panse?” Avek sa metod-la, bien souvan zot gagn bann bon konversasion.

13. Mem si bann dimounn pa ekout nou kan nou prese, kifer nou kapav zwaye? (Proverb 27:11)

¹³ Nou kapav zwaye mem kan bann dimounn pa ekout nou kan nou prese. Kifer? Parski nou’nn fer seki Zeova ek Zezi inn demann nou; nou’nn “donn enn temwaniaz.” (Zist. 10:42) Ek mem si nou pa zwenn personn kan nou al prese, ouswa mem si bann dimounn pa aksepte nou mesaz, nou kone ki nou pe fer Zeova plezir ek sa rann nou zwaye.—Lir Proverb 27:11.

14. Kifer nou bizin zwaye kan enn lot proklamater trouv enn kikenn dan teritwar ki interese ar nou mesaz?

¹⁴ Nou bizin zwaye osi kan enn lot proklamater trouv enn kikenn dan teritwar ki interese ar nou mesaz. Enn Latour Degard ti konpar nou travay predikasion ar seki bann dimounn ti fer kan enn zanfan ti perdi. Boukou dimounn ti donn enn koudme pou rod li, ek zot ti rod li plizir plas. Ek kan ti reisi trouv zanfan-la, tou dimounn ti zwaye, pa zis dimounn ki ti reisi trouv li la. Dan mem fason, pou ki enn kikenn vinn enn disip Zezi, tou dimounn dan lasanble donn enn koudme. Ek kan enn kikenn koumans asiste bann renion, nou tou nou bizin zwaye.

RES KONSANTRE LOR TO LAMOUR POU ZEOVA EK POU TO PROSIN

15. Kan nou reflesi lor Matie 22:37-39, kouma sa kapav ed nou pou gagn plis lazwa dan predikasion? (Get zimaz lor kouvertir.)

¹⁵ Si nou res konsantre lor nou lamour pou Zeova ek pou nou prosin, nou pou gagn plis lazwa dan predikasion. (Lir Matie 22:37-39.) Mazine ki kantite Zeova kontan kan Li trouv nou pe fer travay ki Li’nn donn nou! Reflesi osi kouma bann dimounn ere kan zot koumans etidie! Pa bliye osi ki, kan enn kikenn aksepte nou mesaz, li gagn posibilite pou servi Zeova ek pou viv pou touletan.—Zan 6:40; 1 Tim. 4:16.

16. Mem si nou konfine kot nou, kouma nou kapav kontign gagn lazwa dan predikasion? Donn enn lexanp.

¹⁶ Eski to nepli kapav sorti kot twa akoz to lasante ouswa akoz bann lezot rezon? Si wi, res konsantre lor seki to kapav fer pou to montre ki to kontan Zeova ek to prosin. Anou get lexanp Samuel ek Dania. Pandan pandemi COVID-19, zot ti konfine kot zot, ek dan sa moman bien difisil-la, zot ti pe pres par telefonn, zot ti ekrir bann let, ek zot ti pe fer letid bann dimounn lor Zoom. Samuel, ki ena enn kanser, ti osi pres ar bann dimounn ki li ti zwenn dan klinik kan li ti al fer so tretman. Li dir: “Nou ti santi nou fatige mantalman, fizikman, ek spiritielman. Me gras-a nou servis pou Zeova, nou ti gagn lazwa.” Anplis, sa lepok-la, Dania ti tonbe ek li ti bizin res lor lili pandan trwa mwa. Apre sa, li ti bizin servi enn fotey roulant pandan sis mwa. Li dir: “Mo ti esey fer mo maximum dapre mo sitiasion. Mo ti pres ar sa ners ki ti pe okip mwa la, ek mo ti pres ar bann dimounn ki ti pe vinn livre bann kitsoz kot mwa. Mo ti osi gagn bann bon konversasion lor telefonn avek enn reprezantan medikal.” Mem si Samuel ek Dania pa ti kapav fer otan ki avan, zot ti fer seki zot kapav ek sa ti rann zot zwaye.

17. Ki nou bizin fer pou nou gagn plis lazwa dan predikasion?

¹⁷ Dan sa lartik-la, nou’nn trouv sink konsey ki kapav ed nou pou gagn plis lazwa dan predikasion. Ek sa bann konsey-la mars pli bien si nou met zot tou an pratik anmemtan. Sak konsey koumadir enn zepis ki nou servi pou kwi enn manze, ek kan nou met tou sa bann zepis-la ansam, nou manze pou ena pli bon gou. Alor, si nou swiv tou bann konsey ki nou’nn trouve dan sa lartik-la, nou pou reisi fer fas ar bann difikilte ki nou gagne, ek nou pou gagn plis lazwa dan predikasion.