Eski To Ena Lafwa?

Pou nou fer Zeova plezir, nou bizin ena lafwa. Selman, Labib dir ki “pa tou dimounn ki ena lafwa.” (2 Tes. 3:2) Kan lapot Pol ti dir sa bann parol-la, li ti pe koz lor “bann zom ki fer ditor ek ki move,” ek ki ti pe persekit li. Selman, se pa zis sa kalite dimounn-la ki pena lafwa. Parmi bann dimounn ki pena lafwa, ena bann ki pa krwar ki ena enn Bondie ki’nn kree tou kitsoz. (Rom. 1:20) Li vre ki ena sertin ki krwar dan lexistans enn kikenn ki pli siperyer. Selman, se pa sa kalite lafwa la ki fer Zeova plezir.

Nou bizin sir ki Zeova existe ek ki Li rekonpans bann ki vremem ena lafwa dan Li. (Ebre 11:6) Lafwa form parti frwi lespri sin Bondie. Ek pou nou gagn lespri sin, nou bizin demann sa Zeova. (Lik 11:9, 10, 13) Zeova inn servi so lespri sin pou fer bann dimounn ekrir Labib. Alor, enn lot fason ki nou gagn lespri sin se kan nou lir Labib. Apre sa, nou bizin reflesi lor seki nou’nn lir ek met an pratik seki nou’nn aprann. Kan nou fer sa, nou pe les lespri sin Bondie diriz nou lavi. Lerla, sa montre ki nou ena lafwa ek ki nou pe fer Li plezir.