LARTIK LETID 38
KANTIK 25 Enn Dibien Spesial
Eski To Pe Pran Kont Bann Lavertisman?
“Pou pran enn ek pou abandonn lot-la.”—MAT. 24:40.
PWIN PRINSIPAL
Nou pou examinn trwa lexanp ki Zezi inn servi, ek nou pou gete ki lien zot ena avek zizman ki pou ena dan lepok lafin.
1. Ki Zezi pou fer biento?
NOU pe viv enn lepok kot pou ena bann gran sanzman! Biento, Zezi pou ziz tou dimounn. Kouma nou konn sa? Nou konn sa parski Zezi ti donn so bann disip enn “sign” ki ti pou anons so prezans ek “peryod lafin sa lemond-la.” (Mat. 24:3) Nou trouv sa dan Matie sapit 24 ek 25, Mark sapit 13, ek Lik sapit 21.
2. Ki nou pou examine dan sa lartik-la, ek kifer sa bien inportan?
2 Zezi inn servi trwa lexanp pou averti nou, pou ki nou kapav prepar nou pou sa lepok zizman-la. Sa bann lexanp-la se lexanp bann mouton ek bann kabri, lexanp bann vierz ki ena sazes ek bann vierz ki bet, ek lexanp bann talan. Sa bann lexanp-la montre ki Zezi pou ziz sak dimounn dapre so bann aksion. Amezir ki nou examinn sa bann lexanp-la, anou reflesi lor bann leson ki nou kapav aprann ek lor kouma nou kapav met zot an pratik. Pou koumanse, anou examinn premie lexanp-la, lexanp bann mouton ek bann kabri.
BANN MOUTON EK BANN KABRI
3. Kan eski Zezi pou ziz bann dimounn?
3 Dan lexanp bann mouton ek bann kabri, Zezi montre ki li pou ziz bann dimounn dapre fason ki zot inn reazir ar bon nouvel ek soutien ki zot inn donn ‘so bann frer.’ (Mat. 25:31-46) Sa zizman-la pou arive pandan “gran soufrans,” zis avan Armagedon. (Mat. 24:21) Lerla, parey kouma enn berze separ bann mouton ek bann kabri, Zezi pou separ bann ki’nn soutenir so bann frer ar bann ki pa’nn fer li.
4. Dapre Izai 11:3, 4, kifer nou kapav sir ki Zezi pou ziz avek lazistis? (Get zimaz lor osi.)
4 Labib dir ki Zeova inn etabli Zezi kouma ziz, ek ki Zezi pou ziz avek lazistis. (Lir Izai 11:3, 4.) Li get bien seki bann dimounn fer, seki zot panse, ek seki zot dir, ek osi kouma zot azir anver so bann frer. (Mat. 12:36, 37; 25:40) Zezi pou kone kisann-la inn soutenir so bann frer ek travay ki zot pe fer.a Enn parmi bann kitsoz pli inportan ki enn kikenn kapav fer pou li soutenir bann frer Zezi, se partisip dan laktivite predikasion. Bann ki pou soutenir bann frer Zezi dan sa domenn-la, Zezi pou konsider zot kouma “bann dimounn ki drwat” ek zot pou gagn posibilite pou viv “pou touletan” lor later. (Mat. 25:46; Rev. 7:16, 17) Se enn zoli rekonpans, pa vre! Anplis, si zot res fidel pandan gran soufrans ek apre sa, zot nom pou res dan “liv lavi.”—Rev. 20:15.
Biento, Zezi pou ziz bann dimounn ek li pou deside kisann-la ki bann mouton ek kisann-la ki bann kabri (Get paragraf 4)
5. Ki leson nou aprann dan lexanp bann mouton ek bann kabri, ek kisann-la gagn bann bienfe gras-a sa lexanp-la?
5 Montre to fidelite. Lexanp bann mouton ek bann kabri konsern sirtou bann ki ena lesperans pou viv lor later. Sa bann dimounn-la montre ki zot ena lafwa kan zot soutenir bann frer Zezi ek ki zot partisip dan predikasion. Zot montre zot lafwa osi kan zot swiv direksion lesklav fidel ek saz ar fidelite. (Mat. 24:45) Bann Kretien ki ena lesperans pou al dan lesiel osi bizin pran kont lavertisman ki ena dan lexanp bann mouton ek bann kabri. Kifer? Parski Zezi pe get bien seki zot fer, seki zot panse, ek seki zot dir. Zot osi zot bizin montre zot fidelite. Ofet, Zezi servi de lezot lexanp pou donn bann lavertisman bann Kretien ki ena lesperans pou al dan lesiel. Nou trouv sa bann lexanp-la dan Matie sapit 25. Aster-la, anou examinn lexanp bann vierz ki ena sazes ek bann vierz ki bet.
BANN VIERZ KI ENA SAZES EK BANN VIERZ KI BET
6. Kouma sa sink vierz-la inn montre ki zot ena sazes? (Matie 25:6-10)
6 Dan lexanp bann vierz, Zezi koz lor dis vierz ki’nn sorti pou al zwenn lemarye. (Mat. 25:1-4) Toule dis vierz ti anvi akonpagn lemarye dan resepsion maryaz. Me Zezi dir ki sink parmi sa bann vierz-la ti “ena sazes” ek ki sink lezot la ti “bet.” Sa sink vierz ki ena sazes la ti prepar zot bien. Zot ti prepar zot pou atann lemarye, mem si arive li vinn bien tar. Zot ti amenn zot bann lalanp delwil ar zot pou ekler zot aswar, ek zot ti amenn delwil anplis ar zot tansion lemarye tarde. Zot ti prepar zot pou ki zot lalanp kontign res alime. (Lir Matie 25:6-10.) Kan lemarye ti arive, bann vierz ki ena sazes ti al ar li dan resepsion maryaz. Dan mem fason, bann frer Zezi ki’nn prepar zot bien, setadir ki’nn kontign veye ek ki’nn res fidel ziska ki Zezi arive, zot pou gagn zot rekonpans kan zot pou zwenn li dan so Rwayom ki dan lesiel.b (Rev. 7:1-3) Me ki nou kapav dir lor sa sink vierz ki bet la?
7. Ki ti ariv sa sink vierz ki bet la, ek kifer?
7 Sa sink vierz ki bet la, zot bien diferan ar sa sink vierz ki ena sazes la. Kifer? Parski zot pa ti prepar zot bien pou atann lemarye arive. Zot lalanp ti pe al tengn, ek zot pa ti amenn delwil anplis avek zot. Kan zot ti aprann ki lemarye ti pre pou arive, zot ti bizin al aste delwil, ek kan lemarye ti arive, zot pa ti la. Parkont, “bann vierz ki ti pare, ti al avek [nouvo-marye] dan resepsion maryaz. Lerla ti ferm laport deryer zot.” (Mat. 25:10) Kan bann vierz ki bet la ti retourne ek ki zot ti anvi rant dan resepsion maryaz, lemarye ti dir zot: “Mo pa konn zot.” (Mat. 25:11, 12) Malerezman, sa bann vierz-la pa ti prepar zot pou atann lemarye ziska ki li arive. Ki leson bann Kretien ki ena lesperans pou al dan lesiel kapav aprann ar sa exanp-la?
8-9. Ki leson bann Kretien ki ena lesperans pou al dan lesiel kapav aprann ar lexanp bann dis vierz? (Get zimaz osi.)
8 Prepar twa bien ek kontign veye. Dan sa lexanp-la, Zezi pa ti pe rod dir ki ti pou ena de group Kretien ki ena lesperans pou al dan lesiel, setadir enn group ki ti pou prepar zot bien pou atann ki li arive, ek enn lot group ki pa ti pou fer sa. Non. Li ti pe explik bann Kretien ki ena lesperans pou al dan lesiel seki pou arive si zot pa prepar zot bien pou andire ziska lafin. Si zot pa pre kan li arive, zot pa pou gagn zot rekonpans. (Zan 14:3, 4) Sa lavertisman-la bien-bien inportan! Ninport ki lesperans nou ena, ki li dan lesiel ouswa lor later, nou tou nou bizin pran kont lavertisman ki ena dan lexanp bann dis vierz. Sakenn parmi nou bizin prepar li bien ek kontign veye; nou bizin pre “pou andire ziska lafin.”—Mat. 24:13.
9 Apre ki li’nn koz lor lexanp bann dis vierz, pou montre ki nou bizin prepar nou bien ek kontign veye, Zezi koz lor lexanp bann talan. Sa lexanp-la montre ki nou bizin kontign travay bien dir.
Nou tou nou bizin pran kont lavertisman ki ena dan lexanp bann dis vierz. Nou bizin prepar nou bien, kontign veye, ek nou bizin pre “pou andire ziska lafin” (Get paragraf 8-9)
BANN TALAN
10. Kouma sa de esklav-la ti montre ki zot fidel? (Matie 25:19-23)
10 Dan lexanp bann talan, Zezi koz lor trwa esklav: De ki ti fidel anver zot met ek enn ki pa ti fidel anver li. (Mat. 25:14-18) De esklav-la ti montre ki zot ti fidel parski zot ti travay bien dir pou ki zot met fer profi. Avan ki li al an vwayaz, met-la ti donn toule trwa esklav bann talan, setadir enn gro som larzan. Sa de esklav ki ti fidel la ti travay bien dir ek zot ti servi bien larzan ki zot met ti donn zot. Kan zot met ti retourne, zot ti reisi double sa larzan-la. Akoz sa, zot met ti felisit zot ek zot ti “partaz lazwa [zot] met.” (Lir Matie 25:19-23.) Me ki trwaziem esklav-la ti fer ar larzan ki so met ti donn li?
11. Ki ti ariv sa esklav “pares” la, ek kifer?
11 Trwaziem esklav-la ti gagn enn talan ar so met, selman li ti enn “pares.” Met-la ti panse ki esklav-la ti pou servi bien sa talan-la. Me olie sa, esklav-la ti anter li, ek kan met-la ti retourne, esklav-la pa ti fer okenn profi ar talan-la. Anplis, esklav-la ti ena enn move rezonnman. Olie ki li exkiz li parski li pa’nn fer profi ar larzan-la, li ti dir ki so met “enn dimounn exizan.” Sa esklav-la ti bien desevwar so met! Akoz sa, met-la ti pran sa talan-la ar li ek li ti met esklav-la deor.—Mat. 25:24, 26-30.
12. Azordi, kisann-la sa de esklav ki fidel la?
12 Sa de esklav ki fidel la se bann Kretien ki ena lesperans pou al dan lesiel ek ki fidel. Zot “partaz lazwa [zot] met,” Zezi, kan zot gagn zot rekonpans pou al dan lesiel, setadir “premie rezireksion.” (Mat. 25:21, 23; Rev. 20:5b) Parkont, lexanp sa esklav pares la se enn lavertisman pou bann Kretien ki ena lesperans pou al dan lesiel. Kifer nou dir sa?
13-14. Ki leson bann Kretien ki ena lesperans pou al dan lesiel kapav aprann ar lexanp bann talan? (Get zimaz osi.)
13 Kontign travay bien dir. Dan lexanp bann talan, parey kouma dan lexanp bann dis vierz, Zezi pa pe rod dir ki bann Kretien ki ena lesperans pou al dan lesiel, pou vinn pares. Non. Li ti pe explike seki ti pou ariv zot si zot nepli fer travay ki li’nn donn zot avek tou zot leker. Si sa arive, zot pa pou kapav “res parmi bann ki Bondie finn apele ek finn swazir,” ek zot pa pou kapav rant dan Rwayom Bondie.—2 Pier 1:10.
14 Lexanp bann talan ek lexanp bann dis vierz montre ki tou bann frer Zezi bizin kontign prepar zot bien, zot bizin kontign veye, ek zot bizin kontign travay bien dir. Eski Zezi inn donn enn lot lavertisman bann Kretien ki ena lesperans pou al dan lesiel? Wi, nou trouv sa dan Matie 24:40, 41.
Zezi bien kontan kan li trouv bann Kretien ki ena lesperans pou al dan lesiel travay bien dir (Get paragraf 13-14)d
KISANN-LA ZEZI “POU PRAN”?
15-16. Kouma Matie 24:40, 41 montre ki bann Kretien ki ena lesperans pou al dan lesiel bizin kontign veye?
15 Avan ki li ti koz lor sa trwa lexanp-la, Zezi ti servi enn lexanp pou dekrir dernie zizman bann Kretien ki ena lesperans pou al dan lesiel. Sa ti pou montre kisann-la parmi zot ti ena faver Zeova. Dan sa lexanp-la, Zezi koz lor de zom ki ti pe travay dan karo, ek lor de madam ki ti pe kraz dible. Toule-de zom ti pe fer mem travay, ek toule-de madam osi ti pe fer mem travay. Selman, Zezi ti dir ki ti “pou pran enn ek pou abandonn lot-la.” (Lir Matie 24:40, 41.) Apre sa, Zezi ti ankouraz so bann disip pou “kontign veye, parski zot pa kone ki zour zot Segner pe vini.” (Mat. 24:42) Zezi ti dir preske mem kitsoz kan li ti fini koz lor lexanp bann dis vierz. (Mat. 25:13) Kitfwa sa de lexanp-la ena enn lien ant zot, parski dan toule-de nou konpran ki se zis bann Kretien ki vremem ena lesperans pou al dan lesiel ek ki res fidel ar Zeova, ki Zezi “pou pran” ek pou amenn avek li dan so Rwayom.—Zan 14:3.
16 Kontign veye. Si enn frer Zezi pa res lor so gard ek ki li pa kontign veye, li pa pou form parti “bann ki Bondie inn swazir.” (Mat. 24:31) Avredir, tou bann serviter Zeova, ki nou ena lesperans pou viv dan lesiel ouswa lor later, bizin pran kont bann lavertisman Zezi. Nou bizin kontign veye ek res fidel anver Zeova.
17. Kifer fode pa nou trakase si dan nou lepok Zeova ankor pe swazir bann dimounn pou al viv dan lesiel?
17 Nou’nn aprann konn Zeova bien, ek nou sir ki zame Li pa pou fer enn kitsoz ki inzis. Alor, fode pa nou trakase si dan nou lepok Zeova ankor pe swazir bann dimounn pou al viv dan lesiel.c Fode pa nou bliye seki Zezi ti dir dan lexanp karo rezin, konsernan bann travayer ki ti vinn travay zis enn-er-tan avan lafin lazourne. (Mat. 20:1-16) Sa bann travayer-la ti gagn mem lapey ki bann ki ti pe travay depi pli boner. Li parey osi pou enn Kretien ki ena lesperans pou al dan lesiel. Mem si Zeova fek swazir li, ouswa si sa fer lontan ki Zeova inn swazir li, sa Kretien-la pou reisi gagn so rekonpans zis si li res fidel ar Zeova.
PRAN KONT BANN LAVERTISMAN
18-19. Ki bann leson ek bann lavertisman nou’nn examine dan sa lartik-la?
18 Ki nou’nn examine dan sa lartik-la? Pou bann ki ena lesperans pou viv lor later, lexanp bann mouton ek bann kabri montre ki nou bizin kontign montre nou fidelite anver Zeova. Nou bizin fer sa depi aster-la mem ek pandan gran soufrans osi. Sa lepok-la, Zezi pou ziz bann ki fidel ek li pou gete si zot merite “gagn lavi pou touletan.”—Mat. 25:46.
19 Nou’nn osi examinn de lexanp ki donn bann lavertisman pou bann Kretien ki ena lesperans pou al dan lesiel. Dan lexanp bann dis vierz, sink parmi zot ti ena sazes. Zot ti prepar zot bien ek zot ti kontign veye. Zot ti prepar zot pou atann lemarye, mem si arive li vinn bien tar. Parkont, sa sink vierz ki ti bet la, pa ti prepar zot. Akoz sa, lemarye pa ti les zot rant dan resepsion maryaz. Leson pou nou: Nou osi nou bizin prepar nou bien ek kontign veye ziska ki lafin arive. Dan lexanp bann talan, nou’nn trouve ki sa de esklav ki ti fidel la, ti travay bien dir. Zot ti fer zot met fer profi, ek zot ti gagn so faver. Parkont, met-la ti rezet sa esklav ki ti pares la. Leson pou nou: Ziska ki lafin arive, nou bizin kontign travay bien dir dan servis Zeova. Dan dernie lexanp ki nou’nn examine, nou’nn trouve ki bann Kretien ki ena lesperans pou al dan lesiel bizin kontign veye ek res fidel. Si zot fer sa, Zezi “pou pran” zot ek pou amenn zot avek li dan lesiel. Sa bann Kretien-la pe atann avek inpasians ki zot ansam avek Zezi dan lesiel. Lerla, apre lager Armagedon, zot pou marye ar Lagno.—2 Tes. 2:1; Rev. 19:9.
20. Ki Zeova pou fer pou bann ki kontign pran kont so bann lavertisman?
20 Biento, Zezi pou ziz tou dimounn. Selman, nou pena okenn rezon pou per! Si nou kontign res fidel, nou Papa Zeova pou donn nou “sa pwisans ki plis ki seki normal la” pou ki nou “reisi . . . tini dibout devan Garson limanite.” (2 Kor. 4:7; Lik 21:36) Ninport ki lesperans nou ena, si nou kontign pran kont bann lavertisman Zezi, nou pou reisi fer Zeova plezir. Lerla, dan so bonte extraordiner, Li pou ekrir nou nom “dan liv lavi”!—Dan. 12:1; Rev. 3:5.
KANTIK 26 To’nn Fer Sa pou Mwa
a Get lartik “Ki Nou Kone lor Fason ki Zeova Pou Ziz Bann Dimounn dan Lavenir?” dan Latour Degard Me 2024.
b Pou gagn plis linformasion, get lartik “Eski To Pou ‘Kontign Veye’?” dan Latour Degard 15 Mars 2015.
d DESKRIPSION ZIMAZ: Enn ser ki ena lesperans pou al dan lesiel pe fer letid enn madam ki li’nn zwenn dan predikasion.