LARTIK LETID 43
KANTIK 90 Ankouraz Sakenn Parmi Nou
Ki Kitsoz Kapav Ed Twa kan To Ena Bann Dout?
“Verifie tou kitsoz.”—1 TES. 5:21.
PWIN PRINSIPAL
Dan sa lartik-la, nou pou gete seki nou kapav fer si nou ena bann dout.
1-2. (a) Ki kestion sertin serviter Zeova kitfwa poz zotmem? (b) Ki nou pou examine dan sa lartik-la?
KI NOU zenn ouswa vie, parfwa nou tou nou ena bann dout.a Anou get de-trwa lexanp. Enn zenn pe demann limem si Zeova vremem interese ar li, ek akoz sa li pa sir si li bizin pran batem. Enn frer pe reflesi lor desizion ki li ti pran kan li ti zenn. Olie ki li ti fer enn travay pou gagn boukou kas ek enn karyer dan sa lemond-la, li ti fer bann sakrifis pou ki li kapav met Zeova an premie dan so lavi. Me aster-la ki li ena enn fami ek ki li ena kas zis pou donn so fami seki zot bizin, li pe demann limem si li’nn pran enn bon desizion. Enn ser aze nepli ena boukou lafors ek lenerzi, ek li dekouraze parski li nepli kapav fer kantite ki li ti pe fer avan. Eski to’nn deza poz twa bann kestion koumsa: ‘Eski Zeova vremem interese ar mwa? Bann sakrifis ki mo’nn fer pou Zeova, eski zot vo lapenn? Eski mo ankor itil pou Zeova?’
2 Si nou pa fer zefor pou rod repons sa bann kestion-la, sa kapav fer nou perdi nou lafwa an Zeova ek mem aret servi Li. Dan sa lartik-la, nou pou gete kouma Labib kapav ed nou si nou panse (1) ki Zeova pa interese ar nou, (2) ki bann desizion ki nou’nn pran dan lepase pa ti bon, ouswa (3) ki nou nepli itil pou Zeova.
KI KITSOZ KAPAV ED TWA POU SIRMONT TO BANN DOUT?
3. Ki nou kapav fer si nou ena bann dout?
3 Kan nou ena bann dout, ouswa kan nou poz nou-mem bann kestion, li inportan ki nou rod bann repons dan Labib. Si nou fer sa, nou lafwa dan Zeova ek nou lamitie avek Li pou vinn pli for. Ek lerla, nou pou plis kapav “tini ferm dan lafwa.”—1 Kor. 16:13.
4. Kouma eski nou kapav “verifie tou kitsoz”? (1 Tesalonisien 5:21)
4 Lir 1 Tesalonisien 5:21. Labib ankouraz nou pou “verifie tou kitsoz.” Me kouma nou kapav fer sa? Kan nou ena bann dout, li bon ki nou rod bann repons dan Labib. Anou reget lexanp sa zenn ki pa ti sir si Zeova interese ar li la. Eski li bizin res koumsa mem ek kontign panse ki Zeova pa interese ar li? Non. Okontrer, li bizin “verifie tou kitsoz,” setadir li bizin etidie Labib pou kone seki Zeova panse lor li.
5. Kan nou ena bann dout, ki nou bizin fer pou nou kone seki Zeova panse lor la?
5 Kan nou lir Labib, se koumadir nou pe “tann” Zeova koz avek nou. Selman, pou ki nou kone seki Zeova panse lor bann dout ki nou ena, nou bizin fer plis ki zis lir Labib. Nou bizin rod ek etidie bann verse ki pou ed nou pou gagn bann repons pou nou bann kestion. Pou nou fer sa, nou kapav fer bann resers dan nou bann piblikasion. (Prov. 2:3-6) Nou bizin osi priye Zeova pou ki Li gid nou dan nou bann resers ek ed nou pou trouve seki Li panse lor bann dout ki nou ena. Nou kapav osi rod bann prinsip Labib ek bann lezot linformasion ki kapav ed nou dan nou sitiasion. Enn lot kitsoz ki kapav ed nou, se lir zistwar bann fidel serviter Zeova, sirtou bann ki ti pans parey kouma nou.
6. Kouma bann renion kapav ed nou pou sirmont nou bann dout?
6 Enn lot fason ki nou “tann” Zeova koz avek nou, se atraver nou bann renion. Kan nou asiste regilierman bann renion, nou kapav tann enn kitsoz dan enn diskour ouswa dan enn repons ki enn kikenn inn done, ek kitfwa se samem ki nou ti bizin tande pou nou sirmont nou bann dout. (Prov. 27:17) Aster-la, anou gete seki kapav ed nou pou sirmont trwa dout ki nou kapav ena.
KAN NOU PA SIR SI ZEOVA VREMEM INTERESE AR NOU
7. Ki kestion sertin kapav poz zotmem?
7 Kitfwa to’nn deza demann tomem: ‘Eski Zeova interese ar mwa?’ Si to panse ki to pa vo nanye, to kapav panse ki li inposib ki to vinn kamarad ar Kreater liniver. Lerwa David kitfwa ti pans koumsa. Li ti trouv sa extraordiner ki Zeova gagn traka bann dimounn. Akoz sa, li ti dir: “A Zeova, ki enn imin ete pou ki to remark li, ki garson enn zom ete pou ki to pran li kont?” (Ps. 144:3) Si twa osi to pe poz twa sa kestion-la, kotsa to kapav gagn so repons?
8. Dapre 1 Samiel 16:6, 7, 10-12, ki Zeova trouve dan bann dimounn?
8 Labib montre ki Zeova remark bann dimounn ki kitfwa pena valer pou lezot. Par exanp, Zeova ti avoy Samiel kot Zese pou ki li swazir enn parmi so bann garson pou vinn prosin lerwa Izrael. Zese ti apel set parmi so wit garson pou vinn zwenn Samiel, me li pa ti apel so pli zenn garson, setadir David.b Selman, se David ki Zeova ti swazir. (Lir 1 Samiel 16:6, 7, 10-12.) Zeova ti trouve kisann-la David ti ete vremem. Li ti kone ki sa zenn zom-la ti vremem kontan Li.
9. Kifer to kapav sir ki Zeova interese ar twa? (Get zimaz osi.)
9 Reflesi kouma Zeova inn deza montre twa ki Li interese ar twa. Par exanp, Li donn twa bann konsey ki to bizin pou to fer fas ar ninport ki sitiasion. (Ps. 32:8) Sa montre ki Li konn twa bien ek ki Li kone seki to bizin. (Ps. 139:1) Alor, si to met an pratik konsey ki Zeova donn twa ek ki to trouve kouma sa vremem ed twa, to pou sir ki Zeova vremem interese ar twa. (1 Kro. 28:9; Zist. 17:26, 27) Zeova trouv tou bann zefor ki to fer pou servi Li ek obeir Li. Li trouv osi tou to bann zoli kalite ek Li anvi vinn to Kamarad. (Zer. 17:10) Alor, Li pou bien kontan si twa osi to vinn so kamarad!—1 Zan 4:19.
“Si to rod [Zeova], li pou les twa trouv li.”—1 Kro. 28:9 (Get paragraf 9)c
KAN NOU PANSE KI BANN DESIZION KI NOU’NN PRAN DAN LEPASE PA TI BON
10. Kan nou reflesi lor bann desizion ki nou’nn pran dan lepase, ki kestion nou kapav poz nou-mem?
10 Parfwa, sertin reflesi lor bann desizion ki zot inn pran dan lepase ek zot demann zotmem si sa bann desizion-la ti bon. Kitfwa zot ti desid pou kit enn bon travay ouswa pou pa fer enn karyer dan sa lemond-la, pou ki zot kapav fer plis pou Zeova. Me plis letan pase, kitfwa zot remarke ki zot bann kamarad ki’nn fer karyer dan sa lemond-la, ena boukou kas ek ena enn lavi konfortab. Akoz sa, kitfwa zot demann zotmem: ‘Eski bann sakrifis ki mo’nn fer pou servi Zeova ti vo lapenn? Ouswa eski mo ti bizin travay plis, koumsa mo ti pou ena plis kas azordi?’
11. Kifer ekrivin Psom 73 ti trakase?
11 Si twa osi to’nn poz twa sa bann kestion-la, lexanp ekrivin Psom 73 kapav ed twa. Kan li ti get bann dimounn ki pa ti servi Zeova, li ti trouve ki zot ti ena kas, zot ti an bonn sante, ek zot pa ti ena okenn problem. (Ps. 73:3-5, 12) Kan li ti trouve ki sa bann dimounn-la ti dan bien, li ti panse ki bann zefor ki li ti fer pou servi Zeova ti dan vid. Akoz sa, li “ti trakase toutlong lazourne.” (Ps. 73:13, 14) Me ki kitsoz ti ed sa ekrivin psom la pou lit kont so bann panse negatif?
12. Dapre Psom 73:16-18, ki kitsoz ti ed sa ekrivin psom la?
12 Lir Psom 73:16-18. Sa ekrivin psom la ti al dan tanp Zeova. Laba, li ti kapav reflesi pli bien, ek li ti konpran ki mem si sertin ti ena enn lavi konfortab, zot pa ti ena okenn lespwar pou lavenir. Lerla, li ti nepli trakase ek li ti sir ki servi Zeova se meyer desizion ki li ti pran. Anplis, li ti bien deside pou kontign servi Zeova.—Ps. 73:23-28.
13. Ki to kapav fer si to panse ki bann desizion ki to’nn pran dan lepase pa ti bon? (Get zimaz osi.)
13 Parey kouma sa ekrivin psom la, twa osi to kapav lit kont to bann panse negatif gras-a Labib. Kouma to kapav fer sa? Rapel bann bon kitsoz ki to ena, kouma par exanp, bann benediksion ki Zeova donn twa. Pa bliye osi ki bann dimounn ki pa servi Zeova, zot pa gagn tousala. Pou sa bann dimounn-la, enn bon travay ek enn lavi konfortab, se samem ki pli inportan pou zot parski zot pena okenn lespwar pou lavenir. Selman, twa to diferan! Kifer? Parski Zeova pa zis donn twa bann bon kitsoz depi aster-la, me Li osi promet twa ki Li pou donn twa bann zoli kitsoz dan lavenir. (Ps. 145:16) Pa bliye sa osi: Si to ti pran bann lezot desizion, to pa kone kouma to lavi ti pou ete azordi. Selman, ena enn kitsoz ki nou tou nou kapav sir: Si nou pran bann desizion parski nou kontan Zeova ek nou kontan nou prosin, nou pou touletan ena enn lavi ki ere.
Imazinn twa dan Paradi (Get paragraf 13)d
KAN NOU PANSE KI NOU NEPLI ITIL POU ZEOVA
14. Dan ki sitiasion sertin serviter Zeova ete, ek akoz sa, ki kestion kitfwa zot poz zotmem?
14 Sertin serviter Zeova nepli kapav fer otan pou Zeova parski zot inn rant dan laz, zot ena bann problem lasante, ouswa zot ena enn andikap. Akoz sa, kitfwa zot panse ki zot pena valer pou Zeova. Ek lerla, zot demann zotmem: ‘Eski mo ankor itil pou Zeova?’
15. Ki kitsoz ekrivin Psom 71 ti sir?
15 Ekrivin Psom 71 ti ena mem santiman. Li ti priye Zeova ek li ti dir: “Pa abandonn mwa kan mo lafors pe diminie.” (Ps. 71:9, 18) Mem si li ti santi li feb, sa ekrivin psom la ti sir ki si li ti servi Zeova avek fidelite, Zeova ti pou soutenir li ek gid li. Li ti konpran ki, mem si enn kikenn ena so bann limit, Zeova bien kontan kan sa dimounn-la fer so maximum pou servi Li.—Ps. 37:23-25.
16. Sit sertin fason kouma nou bann frer ek ser aze zot itil pou Zeova. (Psom 92:12-15)
16 Si to enn kikenn ki aze, reflesi lor kouma Zeova trouv twa. Zeova kapav ed twa pou servi Li avek fidelite, mem si to pena otan lafors ki avan. (Lir Psom 92:12-15.) Alor, olie ki to kontign pans lor seki to pa kapav fer, konsantre twa lor seki to kapav fer. Par exanp, to kapav ed lezot gras-a to bon lexanp ek kan to montre ki to vremem interese ar zot. To kapav rakont zot kouma Zeova inn ed twa dan to lavi, ek partaz avek zot bann promes Zeova ki to pe atann avek inpasians. Pa bliye osi ki bann lapriyer ki to fer pou to bann frer ek ser kapav fer zot boukou dibien. (1 Pier 3:12) Alor, dan ninport ki sitiasion ki nou kapav ete, nou tou nou kapav fer kitsoz pou Zeova ek pou lezot.
17. Kifer fode pa nou konpar nou avek lezot?
17 Eski to santi twa dekouraze parski to pa pe kapav fer plis dan to servis pou Zeova? To kapav sir ki tou seki to pe reisi fer, ena boukou valer pou Zeova. Kitfwa to ena tandans pou konpar seki to pe fer ar seki lezot pe fer. Selman, fode pa to fer sa! Kifer? Parski Zeova pa konpar nou ar lezot. (Gal. 6:4) Par exanp, Mari ti donn Zezi enn delwil parfime ki kout bien ser. (Zan 12:3-5) Me enn pov vev ti donn zis de tipti pies ki ti ena bien tigit valer. (Lik 21:1-4) Eski Zezi ti konpar sa de madam-la? Non. Okontrer, li ti trouv toule-de kouma bann madam ki ena boukou lafwa. Zezi imit so Papa dan enn fason parfe. Alor, to kapav sir ki Zeova trouv tou seki to pe fer pou Li, mem si twa to panse ki seki to pe fer bien tigit. Li trouve ki to ena lafwa dan Li ek ki to bien kontan Li.
18. Ki kitsoz kapav ed nou pou sirmont nou bann dout? (Get osi lankadre “Parol Bondie Kapav Ed Twa kan To Ena Bann Dout.”)
18 Parfwa, li kapav arive ki nou ena bann dout. Selman, kouma nou’nn trouve dan sa lartik-la, Labib kapav ed nou pou sirmont sa bann dout-la. Alor, fer zefor pou gagn repons pou bann kestion ki to poz tomem. Koumsa, to pou nepli trakase ouswa dekouraze. Rapel ki Zeova konn twa personelman ek ki Li vremem interese ar twa. Li apresie tou bann zefor ki to fer pou met Li an premie dan to lavi, ek Li promet twa ki Li pou rekonpans twa. Wi, to kapav sir ki Zeova kontan tou so bann serviter ki fidel ek ki zot ena boukou valer pou Li.
KANTIK 111 Rezon pou nou Zwaye
a EXPRESION KI’NN EXPLIKE: Dan sa lartik-la, nou pou koz lor bann dout ki nou kapav ena. Kitfwa nou panse ki Zeova pa interese ar nou, ouswa ki bann desizion ki nou’nn pran dan lepase pa ti bon. Selman, dan sa lartik-la, nou pa pe koz lor bann dout ki enn kikenn ena kan li mank lafwa dan Zeova ek dan so bann promes.
b Labib pa dir nou ki laz David ti ena kan Zeova ti swazir li, me kitfwa li ti ankor enn adolesan.—Get Latour Degard 1e Septam 2011 p. 29, par. 2, an Franse.
c DESKRIPSION ZIMAZ: Enn zenn pe etidie Labib pou kone ki Zeova panse lor li.
d DESKRIPSION ZIMAZ: Enn frer pe lav bann vit pou gagn kas pou nouri so fami ek anmemtan li pe imazinn li dan Paradi.