Kouma Ou Kapav Santi Ou Anpe Malgre Lager?
Gary, ki avan ti servi dan larme, dir: “Avan ki mo etidie Labib, mo pa ti kone kifer ena bann dimounn ki kriel, ki inzis, ek kifer ena otan problem dan lemond. Me aster-la, mo ena lape lespri. Mo kone ki Bondie Zeova pou fer later vinn enn plas kot nou santi nou an sekirite.”
Pa zis Gary tousel ki ena sa santiman-la. Gete kouma Labib inn ed lezot dimounn ankor.
SEKI LABIB DIR: “Twa, A Zeova, to bon ek to pre pou pardone.”—Psom 86:5.
KOUMA SA EDE: “Sa verse-la rasir mwa ki Zeova li ena mizerikord. Mo kone ki li pre pou pardonn mwa pou tou seki mo’nn fer dan lepase kan mo ti partisip dan lager.”—Wilmar, Kolonbi.
SEKI LABIB DIR: “Mo pe kree enn nouvo lesiel ek enn nouvo later; ek pa pou rapel bann kitsoz avan, ni zot pa pou enn pwa lor leker.”—Izai 65:17.
KOUMA SA EDE: “Akoz mo lexperyans dan larme, mo gagn stress post-traumatique ek depresion. Me sa verse-la rapel mwa ki biento Zeova pou fer mwa bliye net tou sa bann move souvenir-la. Zot pou disparet pou touletan. Se enn zoli kado!”—Zafirah, Lamerik.
SEKI LABIB DIR: “Pandan so regn, bann dimounn ki zis pou fleri, ek pou ena lape an-abondans, ziska ki lalinn nepli existe.”—Psom 72:7.
KOUMA SA EDE: “Souvan mo pans lor sa bann parol-la. Biento, lager ek tou bann dega ki li fer pou disparet, ek nou pou nepli ena pou trakase pou sekirite bann dimounn ki nou kontan.”—Oleksandra, Ikrenn.
SEKI LABIB DIR: “To bann mor pou reviv. . . . Leve ek kriye dan lazwa, zot ki res dan lapousier!”—Izai 26:19.
KOUMA SA EDE: “Kan enn lot tribi ti vini pou touy bann dimounn ki dan tribi Tutsi, preske zot tou dan mo fami ti mor. Me sa verse-la rasir mwa ki mo pou retrouv zot ankor. Mo atann avek inpasians pou tann zot bann lavwa ki zwaye kan zot pou resisite!”—Marie, Rwanda.
SEKI LABIB DIR: “Enn tigit letan ankor, ek move dimounn nepli pou existe . . . Me bann ki ena douser pou erit later, ek zot pou dan enn gran lazwa parski pou ena lape an-abondans.”—Psom 37:10, 11.
KOUMA SA EDE: “Mem si lager inn fini, ena ankor boukou linzistis ek bann dimounn ki bien move. Sa bann verse-la inn extra ed mwa. Zeova trouv tou kitsoz ek li konpran mo sitiasion. Li promet ki biento pou nepli ena okenn soufrans ek nou pa pou mem rapel zot.”—Daler, Tajikistan.
Bann dimounn ki’nn mansione dan sa magazinn-la, zot parmi bann milyon Temwin Zeova ki Labib inn ede pou trouv lape. Zot inn aprann pou nepli ena laenn pou enn lot dimounn, enn lot ras, enn lot pei ek enn lot tribi. (Efezien 4:31, 32) Bann Temwin Zeova pa pran par dan bann kitsoz politik ek dan bann kitsoz ki violan.—Zan 18:36.
Bann Temwin Zeova osi soutenir zot kamarad parey kouma enn fami kot ena lamour. (Zan 13:35) Par exanp, Oleksandra, ki nou ti mansione avan, ti bizin sove depi so pei pou al dan enn lot pei avek so ser akoz lager. Li dir: “Kan nou’nn travers frontier, deswit nou’nn trouv bann Temwin ki res dan sa pei-la ki ti la pou akeyir nou. Zot soutien inn ed nou pou ki nou kapav adapte dan sa nouvo pei-la kouma bann refizie.”
Nou kontan pou invit ou pou asiste nou bann renion kot nou aprann lor mesaz lape ki ena dan Labib ek kouma pou aplik li. Ou kapav al lor jw.org pou rod enn plas ki pli pre kot ou pou asiste nou renion, ouswa pou demann enn letid Labib gratis ki ou kapav fer avek enn bann Temwin Zeova dan brosir Viv Ere pou Touletan!