“Swazir Zotmem . . . Kisann-la Zot Pou Servi”

1. Pou nou vremem ere, ki nou bizin fer, ek kifer? (Izai 48:17, 18)

NOU Papa Zeova bien kontan nou, ek Li anvi ki nou ena enn zoli lavi depi aster-la mem ek osi dan lavenir. (Ekle. 3:12, 13) Li’nn kree nou avek kapasite pou fer bann kitsoz extraordiner. Selman, Li pa’nn kree nou avek kapasite pou diriz nou par nou-mem ek pou deside par nou-mem seki bon ek seki pa bon. (Ekle. 8:9; Zer. 10:23) Li kone ki, pou nou vremem ere, nou bizin servi Li ek obeir Li.—Lir Izai 48:17, 18.

2. Ki kitsoz Satan anvi fer nou krwar, ek ki Zeova inn fer pou montre ki Satan enn manter?

² Satan anvi fer nou krwar ki nou kapav ere san Zeova dan nou lavi, ek ki bann dimounn kapav diriz zot par zotmem. (Zen. 3:4, 5) Pou montre ki Satan enn manter, Zeova inn les bann dimounn diriz zot par zotmem. Ki rezilta sa finn ena? Kan nou get tou seki pe pase otour nou, nou trouve ki bann dimounn pa kapav diriz zot par zotmem. Parkont, Labib koz lor plizir zom ek plizir fam ki ti vremem ere parski zot ti pe servi Zeova. Pli zoli lexanp parmi zot, se Zezi Kris limem. Dan sa lartik-la, nou pou gete kifer Zezi ti swazir pou servi Zeova. Apre sa, nou pou gete kifer Zeova merite ki nou ador Li. Ek an dernie, nou pou get sertin rezon kifer nou’nn swazir pou servi Zeova.

KIFER ZEZI TI SWAZIR POU SERVI ZEOVA?

3. Ki kitsoz Satan ti dir Zezi, ek ki Zezi ti swazir pou fer?

³ Kan li ti lor later, Zezi ti bizin swazir kisann-la li ti pou servi. Inpe apre ki Zezi ti pran batem, Satan ti dir li ki li ti pou donn li tou bann rwayom ki ena lor later si li ti ador li zis enn sel fwa. Lerla, Zezi ti reponn li: “Sorti la ale, Satan! Parski finn ekrir: ‘Se Zeova to Bondie ki to bizin adore, ek se zis li tousel ki to bizin donn enn servis sakre.’” (Mat. 4:8-10) Anou get sertin rezon kifer Zezi ti swazir pou servi Zeova.

4-5. Sit bann rezon kifer Zezi ti swazir pou servi Zeova.

⁴ Rezon prinsipal kifer Zezi ti swazir pou servi Zeova, se parski li bien kontan so Papa. (Zan 14:31) Anplis, Zezi servi Zeova parski li kone ki samem meyer kitsoz ki li kapav fer. (Zan 8:28, 29; Rev. 4:11) Li kone ki Zeova Limem Kreater, ki nou kapav fer Li konfians, ek ki se gras-a Li ki nou gagn tou bon kitsoz. (Ps. 33:4; 36:9; Zak 1:17) Zeova inn touletan dir Zezi laverite ek Li’nn mem donn li tou seki li ena. (Zan 1:14) Parkont Satan li, li lekontrer Zeova, ek se akoz li ki bann dimounn fer pese ek zot mor. Li enn manter ki anvi gagn seki pa pou li, ek li pans zis limem. (Zan 8:44) Zezi konn Zeova bien ek li konn Satan osi bien. Akoz sa, zame li pa’nn pans pou fer parey kouma Satan ek rebel kont Zeova.—Fil. 2:5-8.

⁵ Enn lot rezon kifer Zezi ti swazir pou servi Zeova, se parski li ti kone ki si li ti res fidel, sa ti pou amenn boukou bienfe. (Ebre 12:2) Li ti kone ki si li ti res fidel, li ti pou sanktifie nom Zeova ek li ti pou donn bann dimounn posibilite pou libere ar pese ek lamor.

KIFER ZEOVA MERITE KI NOU ADOR LI?

6-7. Kifer boukou dimounn azordi pa servi Zeova, ek kifer Zeova merite ki nou ador Li?

⁶ Azordi, boukou dimounn pa servi Zeova parski zot pa konn so bann zoli kalite ek zot pa konn tou seki Li’nn fer pou zot. Zot parey kouma bann dimounn avek ki Pol ti prese dan Atenn, parski bann-la osi pa ti konn Bondie.—Zist. 17:19, 20, 30, 34.

⁷ Pol ti explik zot ki se vre Bondie “ki donn tou dimounn lavi, ki fer zot respire ek ki donn zot tou kitsoz.” Pol ti osi dir zot: “Gras-a li nou ena lavi, nou bouze ek nou existe.” Bondie Li nou Kreater, ek “apartir enn sel zom li’nn fer tou bann pep,” ek se akoz sa ki Li merite ki nou ador Li.—Zist. 17:25, 26, 28.

8. Ki kitsoz Zeova zame pa pou fer? Explike.

⁸ Zeova Li nou Kreater ek Limem ki ena pli gran lotorite dan liniver. Alor, Li ti kapav obliz bann dimounn pou servi Li. Selman, zame Li pa pou fer sa. Olie sa, Li donn nou bann prev ki Li existe ek ki Li kontan sakenn parmi nou. Li anvi ki maximum dimounn vinn so bann kamarad pou touletan. (1 Tim. 2:3, 4) Se akoz sa ki Li form nou pou nou ansegn bann dimounn bann bon kitsoz ki Li pou fer pou zot, ek osi kouma Li pou fer sa. (Mat. 10:11-13; 28:19, 20) Li’nn osi pran bann dispozision pou ki nou kapav ador Li, ek Li’nn osi donn nou bann ansien ki bien kontan nou ek ki pran nou swin.—Zist. 20:28.

9. Kouma nou kone ki Zeova kontan tou dimounn?

⁹ Zeova vremem kontan bann dimounn, ek Li mem donn bann dimounn ki pa krwar dan Li bann bon kitsoz. Par exanp, depi ki bann imin existe, bann milyar dimounn inn swazir pou dezobeir Zeova ek pou fer seki zot anvi. Me kanmem sa, Zeova inn kontign donn zot seki zot bizin pou viv, pou ki zot ena enn zoli lavi. (Mat. 5:44, 45; Zist. 14:16, 17) Li’nn donn zot bann kamarad ek bann fami ki kontan zot. Zot kapav osi gagn bann zanfan, zot kapav travay, ek zot kapav profit bien zot lavi. (Ps. 127:3; Ekle. 2:24) Tousala montre ki nou Papa Zeova vremem kontan tou dimounn. (Ex. 34:6) Aster-la, anou get sertin rezon kifer nou’nn swazir pou servi Zeova ek osi kouma Li beni bann ki swazir pou servi Li.

KIFER NOU’NN SWAZIR POU SERVI ZEOVA?

10. (a) Sit rezon prinsipal kifer nou servi Zeova. (Matie 22:37) (b) Ki bienfe to’nn gagne gras-a pardon Zeova? (Psom 103:13, 14)

¹⁰ Parey kouma Zezi, rezon prinsipal kifer nou servi Zeova se parski nou bien kontan Li. (Lir Matie 22:37.) Kan nou aprann konn bann zoli kalite ki Li ena, sa atir nou ver Li. Par exanp, Zeova touletan pre pou pardonn nou. Kan bann Izraelit ti dezobeir Li, Li ti sipliy zot ek ti dir zot: “Silvouple, aret fer bann move kitsoz ki zot pe fer.” (Zer. 18:11) Zeova kone ki nou inparfe ek ki “nou finn fer ar lapousier.” (Lir Psom 103:13, 14.) Kan nou reflesi komie fwa Zeova inn pardonn nou, sa motiv nou pou servi Li, pa vre!

11. Sit bann lezot rezon kifer nou’nn swazir pou servi nou Papa Zeova.

¹¹ Nou osi servi Zeova parski nou kone ki samem meyer kitsoz ki nou kapav fer. (Mat. 4:10) Anplis, nou kone ki si nou res fidel ar Zeova, sa pou amenn boukou bienfe. Kan nou res fidel ar Zeova, nou ede pou ki so nom sanktifie, nou montre ki Satan enn manter, ek nou fer nou Papa Zeova plezir. Anplis, si nou swazir pou servi Zeova, nou pou osi ena posibilite pou servi Li pou touletan!—Zan 17:3.

12-13. Ki to’nn aprann ar lexanp Jane ek Pam?

¹² Mem si nou ankor bien zenn, nou kapav aprann pou kontan Zeova. Lerla, amezir ki nou grandi, nou lamour pou Li pou vinn pli for. Anou get lexanp de ser ki apel Jane ek Pam.a Zot ti ena 11 an ek 10 an kan zot ti koumans etidie Labib. Mem si zot bann paran pa ti interese pou etidie Labib, zot ti donn Jane ek Pam permision pou etidie Labib ar bann Temwin Zeova. Selman, zot ti bizin kontign al Legliz ar zot fami dan wikenn. Jane dir: “Seki bann Temwin Zeova ti ansegn mwa dan Labib ti ed mwa pou reziste kont presion mo bann kamarad, ek pou pa tom dan bann piez kouma ladrog ek limoralite.”

¹³ Apre de-trwa lane, toule-de ser ti vinn bann proklamatris. Inpe apre, zot ti koumans fer pionie ek anmemtan zot ti pran swin zot bann paran ki ti vinn vie. Jane explike seki li resanti konsernan tou seki Zeova inn fer pou li. Li dir: “Mo’nn trouve ki Zeova vremem pran swin so bann kamarad, ek ki kouma 2 Timote 2:19 dir, ‘Zeova konn bann ki pou Li.’” Nou kapav sir ki Zeova pou touletan pran swin bann ki kontan Li ek ki swazir pou servi Li!

14. Kouma nou kapav defann Zeova? (Get zimaz osi.)

¹⁴ Nou anvi ki bann dimounn konn laverite lor Zeova. Anou pran enn lexanp: Fer koumadir to ena enn bon kamarad ki bien zanti, ki zenere, ek ki touletan pre pou pardone. Enn zour, to tann enn kikenn dir ki to kamarad li move ek li malonet. Kouma to pou reazir? Sirman to pou defann li, pa vre! Dan mem fason, kan nou tann bann dimounn dir bann move kitsoz lor Zeova, nou anvi defann Li kan nou dir laverite lor Li. (Ps. 34:1; Iza. 43:10) Alor, se par nou bann parol ek nou bann aksion ki nou kapav montre ki nou kontan Zeova, ek ki nou’nn swazir pou servi Li.

15. Ki bienfe lapot Pol inn gagne parski li’nn fer bann sanzman dan so lavi? (Filipien 3:7, 8)

¹⁵ Nou aksepte pou fer bann sanzman dan nou lavi pou nou fer Zeova plezir ek pou nou fer plis pou servi Li. Par exanp, lapot Pol ti ena enn pozision bien inportan dan larelizion zwif. Selman, li ti aksepte kit sa relizion-la pou ki li kapav vinn enn disip Zezi ek servi Zeova. (Gal. 1:14) Gras-a sa, li ti gagn boukou lazwa dan so servis pou Zeova, ek li’nn gagn privilez pou regne ansam avek Zezi dan lesiel. Pol zame pa’nn regret so desizion pou servi Zeova, ek nou osi zame nou pou regret desizion ki nou’nn pran pou servi Zeova.—Lir Filipien 3:7, 8.

16. Ki to’nn aprann ar lexanp Julia? (Get zimaz osi.)

¹⁶ Si nou fer nou servis pou Zeova vinn nou priorite dan nou lavi, Li pou beni nou depi aster-la mem ek osi dan lavenir. Anou get lexanp enn ser ki apel Julia. Avan ki li konn laverite, depi tipti Julia ti pe sant dan koral Legliz. Li ti sant telman bien ki enn profesionel dan lamizik lopera ti trouve ki li ti ena boukou talan ek lerla li ti form li. Bien vit, Julia ti vinn bien popiler, ek li ti al sante dan bann gran-gran lasal lopera. Julia ti al dan enn gran lekol lamizik, ek laba enn so bann kamarad ti koumans koz lor Bondie avek li. Li ti explik li ki Bondie ena enn nom ek ki Li apel Zeova. Inpe apre, Julia ti koumans etidie Labib de fwa par semenn. Avek letan, Julia ti desid pou fer plis pou Zeova olie ki li fer enn karyer dan lamizik. Sa desizion-la pa ti fasil pou pran! Julia dir: “Boukou dimounn ti dir mwa ki mo ti pe gat sa talan ki mo ti ena la. Me mwa, mo ti anvi fer mo best pou servi Zeova.” Azordi, sa fer plis ki 30 an ki Julia pe servi Zeova. Ki li resanti konsernan so desizion pou servi Zeova? Li dir: “Mo ere parski mo’nn swazir pou servi Zeova, ek mo kone ki dan lavenir Li pou satisfer dezir mo leker.”—Ps. 145:16.

KONTIGN SERVI ZEOVA

17. Lafin sa lemond-la bien pre, alor ki lefe sa bizin ena lor bann ki’nn swazir pou servi Zeova ek lor bann ki pankor fer li?

¹⁷ Lafin sa lemond-la bien pre! Lapot Pol ti dir: “Parski ‘dan enn tigit letan’ ankor, ‘sa kikenn ki pe vini la pou vini ek li pa pou tarde.’” (Ebre 10:37) Ki lefe sa bizin ena lor nou? Pa res boukou letan pou ki bann dimounn swazir pou servi Zeova. Alor, si to pankor fer li, pa tarde pou fer li. (1 Kor. 7:29) Ek si nou’nn fini swazir pou servi Zeova, nou kone ki mem si nou gagn bann difikilte, sa pou zis pou “enn tigit letan.”

18. Ki kitsoz Zezi ek Zeova anvi nou fer?

¹⁸ Zezi inn ankouraz so bann disip pou pa zis koumans swiv li, me pou kontign swiv li. (Mat. 16:24) Alor, si sa fer lontan ki nou pe servi Zeova, nou bizin bien determine pou kontign servi Li. Nou bizin kontign fer zefor pou viv an-akor avek desizion ki nou’nn pran pou servi Li. Sa pa pou touletan fasil, me si nou kontign servi Li, nou pou ere ek nou pou gagn boukou bienfe depi aster-la mem ek osi dan lavenir!—Ps. 35:27.

19. Ki to’nn aprann ar lexanp Gene?

¹⁹ Sertin panse ki si zot servi Zeova, zot pa pou kapav profit zot lavi. Zenn, eski to panse ki to pou rat boukou kitsoz dan to lavi si to servi Zeova? Enn zenn frer ki apel Gene, dir: “Mo ti panse ki mo pa ti pe reisi profit mo lavi parski mo ti enn Temwin Zeova. Boukou kamarad avek ki mo’nn grandi ti kontan sorti ar bann tifi, fer bann fet, ouswa zwe bann video game ki violan, alor ki mwa mo ti pe pas mo letan dan renion ek dan predikasion.” Sa fason panse-la ti ena enn move lefe lor Gene. Li dir: “Mo ti koumans amenn enn doub lavi. . . . Ek pandan enn moman, mo ti bien kontan sa. Me selman, mo pa ti vremem ere. Lerla, mo ti koumans mazinn bann bienfe ki nou gagne kan nou obeir seki ena dan Labib ek mo ti desid pou servi Zeova avek tou mo leker. Depi ki mo’nn pran sa desizion-la, mo santi ki Zeova inn reponn tou mo bann lapriyer.”

20. Ki nou bizin bien deside pou fer?

²⁰ Dan enn sante, enn ekrivin psom ti dir Zeova: “Ere sa kikenn ki to swazir la ek ki to akeyir dan to lakour.” (Ps. 65:4) Alor, anou bien deside pou kontign servi Zeova, parey kouma Zozwe ki ti dir: “Me mwa ek mo fami, nou pou servi Zeova.”—Zozwe 24:15.