Nou Pa Tousel

1-2. (a) Kan nou gagn bann difikilte, kifer nou kapav sir ki nou pa tousel? (b) Ki nou pou examine dan sa lartik-la?

KAN nou pas par bann sitiasion difisil, kitfwa nou kapav ena santiman ki nou tousel dan enn gran lafore ek ki pena okenn sime sorti. Selman, nou pa tousel. Zeova, nou Papa ki bien kontan nou, trouv bann difikilte ki nou pe gagne ek Li promet nou ki Li pou ed nou. Avek boukou lamour, Li rasir so bann serviter ki fidel, ek Li dir zot: “Mo pou ed [zot].”—Iza. 41:10.

² Dan sa lartik-la, nou pou gete kouma Zeova ed nou. Premierman, Li gid nou. Deziemman, Li donn nou seki nou bizin. Trwaziemman, Li protez nou. Ek katriemman, Li rekonfort nou. Zeova rasir nou ki ninport ki difikilte ki nou fer fas dan lavi, zame Li pa pou bliye nou. Zame Li pa pou kit nou. Alor, nou pa tousel!

ZEOVA GID NOU

3-4. Kouma Zeova gid nou? (Psom 48:14)

³ Lir Psom 48:14. Zeova kone ki nou pa kapav diriz nou par nou-mem ek ki nou bizin Li pou gid nou. Kouma Li ed so bann serviter ki fidel azordi? Li servi so Parol Labib pou gid nou. (Ps. 119:105) Zeova servi Labib pou ed nou pou pran bann bon desizion, ek Li ed nou osi pou pans ek pou azir parey kouma Li. Kan nou obeir seki Li ansegn nou dan Labib, nou kapav ena enn zoli lavi depi aster-la mem ek nou ena lespwar pou viv pou touletan.a Par exanp, Zeova ansegn nou pou pardonn lezot ek pou pa kontign res ankoler ar bann ki ofans nou. Li osi ansegn nou ki nou bizin onet dan tou seki nou fer ek ki nou bizin kontan lezot avek tou nou leker. (Ps. 37:8; Ebre 13:18; 1 Pier 1:22) Kan nou fer zefor pou ena sa bann zoli kalite-la, nou vinn bann pli bon paran, bann pli bon konzwin, ek bann pli bon kamarad.

⁴ Anplis, dan Labib, Zeova koz lor bann dimounn ki ti gagn bann difikilte ek “ki ti ena bann santiman parey kouma nou.” (1 Kor. 10:13; Zak 5:17) Nou kapav gagn bann bienfe kan nou lir zistwar sa bann dimounn-la ek aplik bann leson ki nou aprann ar seki zot inn viv. Premierman, sa ed nou pou konpran ki se pa zis nou tousel ki pe gagn bann difikilte. Ena lezot ki finn gagn bann mem difikilte ki nou, ek gras-a led Zeova, zot inn reisi andire. (1 Pier 5:9) Ek deziemman, sa ed nou pou trouve seki kapav ed nou pou andir bann difikilte ek pou res zwaye.—Rom. 15:4.

5. Kisann-la Zeova servi pou gid nou?

⁵ Zeova servi osi nou bann frer ek ser pou gid nou.b Par exanp, bann responsab sirkonskripsion vizit bann lasanble pou ankouraz nou. Zot fer bann diskour ki ranforsi nou lafwa ek ki ed nou pou res ini ar nou bann frer ek ser. (Zist. 15:40–16:5) Bann ansien osi travay dir pou ed sakenn parmi nou pou res pros ar Zeova. (1 Pier 5:2, 3) Bann paran ansegn zot zanfan pou kontan Zeova, pou pran bann bon desizion, ek pou ena bann bon labitid. (Prov. 22:6) Anplis, bann ser ki ena matirite ed bann ser ki pli zenn par zot lexanp, kan zot donn bann konsey pratik, ek kan zot ankouraz bann-la.—Tit 2:3-5.

6. Kouma nou kapav montre ki nou rekonesan pou tou seki Zeova inn fer pou nou?

⁶ Zeova inn donn nou tou seki nou bizin pou ki nou kapav pran bann bon desizion ek pou ki nou ena enn zoli lavi. Kouma nou kapav montre ki nou rekonesan pou tou seki Li’nn fer pou nou? Proverb 3:5, 6 dir: “Fer Zeova konfians avek tou to leker, ek pa kont lor to prop lintelizans.” Kan nou fer sa, “li pou fer [nou] bann sime vinn drwat,” setadir Li pou ed nou pou ena enn lavi ki ere ek pou evit boukou problem. Nou bien rekonesan ki Zeova donn nou bann konsey ki nou bizin personelman, pa vre! Sa montre ki Li konn nou bien ek ki Li bien kontan nou.—Ps. 32:8.

ZEOVA DONN NOU SEKI NOU BIZIN

7. Kouma Zeova ed nou pou gagn seki nou bizin? (Filipien 4:19)

⁷ Lir Filipien 4:19. Zeova pa zis gid nou. Li osi beni nou kan nou fer zefor pou gagn seki nou bizin, kouma par exanp manze, linz, ek enn plas pou reste. (Mat. 6:33; 2 Tes. 3:12) Li normal ki nou trakase pou sa bann kitsoz-la. Selman, Zeova pa anvi ki nou trakas plis ki bizin akoz sa bann kitsoz-la. (Mat. 6:25) Kifer? Parski nou Papa zame pa pou abandonn so bann serviter ki fidel. (Mat. 6:8; Ebre 13:5) Alor, nou kapav fer Li foul konfians kan Li dir ki Li pou donn nou seki nou bizin.

8. Ki Zeova ti fer pou David?

⁸ Anou gete kouma Zeova ti ed David. Pandan boukou lane, David ti bizin sove pou sap so lavi, parski Lerwa Sail ti pe rod touy Li. Selman, Zeova ti donn li ek so bann zom seki zot ti bizin pou viv. Kan David ti reflesi kouma Zeova ti pran li swin pandan tou sa bann lane-la, li ti dir: “Mo ti enn zenom ek aster-la mo’nn vinn vie, me mo pa finn trouv enn dimounn zis ki’nn abandone, ni so bann zanfan ki pe rod dipin.” (Ps. 37:25) Kitfwa twa osi parey kouma David, to’nn trouve kouma Zeova inn donn so bann serviter seki zot ti bizin pandan bann moman difisil.

9. Kan ena bann katastrof, kouma Zeova donn so bann serviter seki zot bizin? (Get zimaz osi.)

⁹ Kan ena bann katastrof, Zeova donn so bann serviter seki zot bizin. Par exanp, kan ti ena enn lafaminn dan premie siek, bann Kretien dan diferan landrwa ti donn bann frer ek ser bann kitsoz ki zot ti bizin. (Zist. 11:27-30; Rom. 15:25, 26) Azordi osi, bann serviter Zeova fer parey. Kan ena enn katastrof, Zeova servi so bann serviter pou donn bann ki’nn afekte par sa sitiasion-la bann kitsoz kouma manze, delo, linz, ek medsinn. Ena osi bann lekip konstriksion ki repar bann lakaz ek bann Lasal Renion ki’nn andomaze. Anplis, bann serviter Zeova servi Labib pou rekonfort ek ankouraz bann ki’nn perdi zot lakaz ouswa enn fami pros.c

10-11. Ki leson to’nn aprann ar lexanp Borys?

¹⁰ Zeova ed osi bann ki pa ador Li. Akoz sa, nou anvi imit Li ek rod bann lokazion pou ed bann ki pa servi Li. (Gal. 6:10) Kan nou fer sa, sa kapav ed zot pou konn plis lor nou ek lor Zeova. Anou get lexanp Borys, ki res Likrenn ek ki direkter enn lekol. Mem si Borys pa ti enn Temwin Zeova, li ti touletan zanti anver so bann zelev ki ti Temwin ek li ti respekte zot bann krwayans. Kan ti ena lager, li ti desid pou kit so vilaz pou al res dan enn landrwa kot li ti pou plis an sekirite, ek nou bann frer ti ed li. Borys ti osi asiste Komemorasion Lamor Zezi. Kan li pans lor tou seki bann frer inn fer pou li, Borys dir: “Bann Temwin Zeova ti bien zanti ar mwa ek zot ti pran mwa bien swin. Mo bien rekonesan pou tou seki zot inn fer pou mwa.”

¹¹ Nou tou nou kapav imit nou Papa Zeova, kan nou montre lamour anver bann ki bizin led, mem si zot pena mem krwayans ki nou. (Lik 6:31, 36) Nou espere ki lamour ki nou ena pou zot pou motiv zot pou aprann plis lor Zeova ek pou koumans servi Li ansam avek nou. (1 Pier 2:12) Mem si zot pa swazir pou servi Zeova, nou kontan pou ed zot parski “ena plis lazwa kan done ki kan resevwar.”—Zist. 20:35.

ZEOVA PROTEZ NOU

12. Kouma Zeova pou protez so pep? (Psom 91:1, 2, 14)

¹² Lir Psom 91:1, 2, 14. Zeova promet nou ki Li pou protez nou kont ninport ki kitsoz ki kapav gat nou lamitie avek Li. Satan pou fer latet-lipie pou anpes nou ador Zeova dan bon fason, me Zeova pa pou les li fer sa. (Zan 17:15) Anplis, kan pou ena “gran soufrans,” nou kapav sir ki Li pou ed nou pou ena enn lafwa for ek ki Li pou sap nou.—Rev. 7:9, 14.

13. Kouma Zeova protez sakenn parmi nou personelman?

¹³ Zeova promet nou osi ki Li pou protez sakenn parmi nou personelman. Li’nn donn nou Labib pou ki nou kapav fer diferans ant seki bon ek seki pa bon. (Ebre 5:14) Kan nou met an pratik seki nou aprann dan Labib, sa protez nou lamitie avek Li ek sa ed nou pou pran bann bon desizion. Gras-a sa, nou pou kapav res an bonn sante ek ena enn lavi ki ere. (Ps. 91:4) Anplis, gras-a lasanble, Zeova donn nou led ki nou bizin pou ki nou kapav res fidel ar Li. (Iza. 32:1, 2) Nou bann frer ek ser dan nou lasanble kontan Zeova ek zot obeir Li. Kan nou pas letan avek zot dan renion, dan predikasion, ek pandan bann moman detant, sa ankouraz nou ek sa anpes nou pou fer seki move.—Prov. 13:20.

14. (a) Kifer Bondie permet nou gagn bann difikilte? (b) Kouma Psom 9:10 rasir nou? (Get not osi.)

¹⁴ Dan lepase, souvan Zeova ti protez so pep kan zot lavi ti an danze. Selman, Li pa ti fer sa sak fwa ki zot ti an danze. Labib montre ki “bann sitiasion ki personn pa atann” kapav ariv ninport kisann-la. (Ekle. 9:11) Anplis, pou prouve ki Satan enn manter, parfwa Zeova permet ki so bann serviter gagn persekision ouswa mor. (Zob 2:4-6; Mat. 23:34) Sa kapav ariv nou osi azordi. Mem si Zeova pa tir nou bann difikilte, nou kapav sir ki zame Li pa pou abandonn bann ki kontan Li.d—Ps. 9:10.

ZEOVA REKONFORT NOU

15. Kouma lapriyer, Labib, ek nou bann frer ek ser rekonfort nou? (2 Korintien 1:3, 4)

¹⁵ Lir 2 Korintien 1:3, 4. Parfwa, akoz bann sitiasion ki nou viv, nou trakase, nou strese, ouswa nou an-dey. Eski to santi twa tousel parski to pe pas par enn sitiasion difisil? Eski to ena linpresion ki personn pa konpran seki to resanti? To kapav sir ki Zeova konpran seki to resanti. Li pa zis resanti nou lapenn, me Li osi “konsol nou dan tou nou bann difikilte.” Kouma? Kan nou sipliy Zeova dan lapriyer, Li donn nou “lape Bondie ki depas tou seki nou kapav konpran.” (Fil. 4:6, 7) Li rekonfort nou osi kan nou lir bann parol ki Li dir nou dan Labib. Dan Labib, Li dir nou ki kantite Li kontan nou, Li montre nou kouma pou gagn lasazes, ek Li donn nou enn lespwar. Anplis, nou bann renion osi rekonfort nou parski nou gagn bann lankourazman ki sorti dan Labib ek nou antoure ar bann frer ek ser ki kontan nou.

16. Ki leson to’nn aprann ar lexanp Nathan ek Priscilla?

¹⁶ Anou get lexanp Nathan ek Priscilla, ki res Lamerik. Zot lexanp pou montre nou kouma Zeova rekonfort ek ankouraz so bann serviter gras-a Labib. Finn gagn de-trwa lane, zot ti desid pou al servi dan enn teritwar kot ti bizin plis proklamater. Nathan dir: “Nou ti sir ki Zeova ti pou beni nou bann zefor.” Selman, kan zot ti ariv dan zot nouvo teritwar, san ki zot atann, zot ti gagn bann problem lasante ek finans. Akoz sa, zot ti bizin retourn kot zot. Selman, laba osi zot ti kontign gagn bann problem finans. Nathan dir: “Nou ti pe atann ki Zeova beni nou dan enn sertenn fason, me kan sa bann sitiasion-la ti arive, nou ti demann nou-mem kifer Zeova pa ti pe beni nou. . . . Mo ti koumans demann momem si mo ti fer enn move kitsoz.” Selman, avek letan, Nathan ek Priscilla ti konpran ki Zeova pa ti abandonn zot. Nathan dir: “Pandan sa bann moman difisil la, Labib ti koumadir enn bon kamarad ki ti ankouraz nou ek gid nou. . . . Olie ki nou ti konsantre lor bann difikilte ki nou ti gagne, nou ti konsantre lor kouma Zeova ti ed nou pou andir sa bann difikilte-la. Sa ti prepar nou pou fer fas ar bann difikilte ki nou ti pou gagne dan lavenir.”

17. Kouma Helga ti gagn rekonfor? (Get zimaz osi.)

¹⁷ Zeova kapav osi rekonfort nou gras-a nou bann frer ek ser. Kouma? Anou get lexanp Helga ki res Ongri. Pandan plizir lane, li ti gagn bann difikilte ki ti fer li strese. Akoz sa, li ti santi ki li pena valer. Me aster-la, kan li reflesi lor la, li konpran ki Zeova ti pe servi bann frer ek ser dan lasanble pou rekonfort li. Li dir: “Kan mo ti trakase akoz mo travay, mo zanfan ki malad, ek bann lezot difikilte, Zeova ti touletan ed mwa. Pandan sa trant lane ki finn pase la, Li’nn tini so promes ek Li’nn rekonfort mwa. Souvan Li’nn donn mwa lafors gras-a lankourazman mo bann frer ek ser, ki ti avoy mwa bann mesaz, bann kart, ek ki ti felisit mwa kan mo ti plis bizin sa.”

18. Kouma nou kapav rekonfort lezot?

¹⁸ Nou kapav imit nou Bondie Zeova kan nou rekonfort lezot. Se enn gran privilez, pa vre! Kouma nou kapav fer sa? Nou fer sa kan nou ekout zot avek pasians, nou dir zot bann parol ki pou konsol zot, ek nou ed zot dan enn fason pratik. (Prov. 3:27) Nou fer zefor pou ed tou bann ki pe soufer, mem bann ki pa servi Zeova. Kan bann dimounn an-dey, malad, ouswa trakase, nou al vizit zot, nou ekout zot, ek nou partaz avek zot bann parol ankourazan ki sorti dan Labib. Wi, nou imit Zeova, “Bondie ki konsol bann dimounn dan tou kalite sitiasion,” kan nou ed nou bann frer ek ser pou andir zot bann difikilte, ek kan nou ed bann ki pa servi Zeova pou aprann konn Li.—Mat. 5:16.

ZEOVA POU TOULETAN ED NOU

19. Ki Zeova fer pou nou, ek kouma nou kapav imit Li?

¹⁹ Zeova vremem pran swin tou bann ki kontan Li. Zame Li pa pou kit nou kan nou gagn bann difikilte. Parey kouma enn paran ki kontan ek pran swin so zanfan, Zeova pran swin so bann fidel serviter. Li gid nou, Li donn nou seki nou bizin, Li protez nou, ek Li rekonfort nou. Nou imit nou Papa ki kontan nou kan nou soutenir ek ankouraz lezot kan zot gagn bann difikilte. Mem si nou gagn bann difikilte ek nou soufer dan sa lemond-la, nou kapav sir ki Zeova avek nou. Li fer nou sa promes-la: “Pa per parski mo avek twa.” (Iza. 41:10) Sa promes-la rasir nou ki avek Zeova, zame nou tousel!