Fer Konfians Rwayom Bondie, Sa Lavil ki Pou Dire pou Touletan La

1. Ki Zezi ti predir konsernan lavil Zerizalem?

DE-TRWA zour avan so lamor, Zezi ti anons enn profesi. Sa profesi-la ti realize enn premie fwa kan Zerizalem ek so tanp ti detrir. Dan sa profesi-la, Zezi ti explike ki enn zour lavil Zerizalem ti pou “antoure par bann larme.” (Lik 21:20) Ek li ti dir so bann disip ki kan zot ti pou trouv sa larme-la, zot ti bizin kit Zide deswit. Seki Zezi ti dir ti realize kan larme Romin ti antour Zerizalem.—Lik 21:21, 22.

2. Ki konsey lapot Pol ti donn bann Kretien ki ti res dan Zide ek dan Zerizalem?

² De-trwa lane avan ki larme Romin antour Zerizalem, lapot Pol ti ekrir enn let bann Kretien dan Zide ek dan Zerizalem. Dan sa let-la, ti ena enn mesaz bien inportan. Azordi, nou apel sa let-la liv Ebre. Dan sa let-la, Pol ti konsey bann Kretien pou prepar zot pou fer fas ar enn sitiasion bien difisil. Ar ki sitiasion zot ti pou bizin fer fas? Zerizalem ti pou detrir biento, ek si bann Kretien ti anvi gagn lavi sov, zot ti pou bizin aksepte abandonn zot lakaz ek zot bann biznes. Konsernan lavil Zerizalem, lapot Pol ti dir: “Isi nou pena enn lavil permanan.” Apre sa, li ti dir: “Me nou pe atann avek inpasians lavil ki pe vini.”—Ebre 13:14.

3. Ki ete “lavil ki ena bann vre fondasion,” ek kifer nou bizin kontign ena konfians dan sa lavil-la?

³ Kan bann Kretien ti desid pou kit Zerizalem ek Zide, boukou dimounn kitfwa ti boufonn zot ek ti dir zot ki zot bet. Selman, sa desizion-la ti sov zot lavi. Azordi, boukou dimounn kitfwa dir ki nou bet parski nou pa met nou konfians dan larzan ek nou pa kont lor bann dimounn pou regle bann problem ki ena dan lemond. Me pou ki rezon nou fer sa? Se parski nou kone ki biento Rwayom Bondie pou detrir sa move lemond-la. Nou fer konfians Rwayom Bondie, parski nou kone ki li “lavil ki ena bann vre fondasion.”a (Ebre 11:10; Mat. 6:33) Dan sak sou-tit sa lartik-la, nou pou gete (1) kouma konsey lapot Pol ti ed bann Kretien pou kontign ena konfians dan Rwayom Bondie, (2) kouma Pol ti prepar zot pou destriksion Zerizalem, ek (3) kouma konsey ki li ti donn sa bann Kretien-la kapav ed nou azordi.

FER ZEOVA KONFIANS PARSKI ZAME LI PA POU ABANDONN TWA

4. Kifer Zerizalem ti enn lavil inportan pou bann Kretien?

⁴ Zerizalem ti enn lavil inportan pou bann Kretien. Kifer? Parski lane 33 Nou Lepok, premie lasanble Kretien ti forme laba. Anplis, bann frer ki ti form parti dan komite santral ti res dan sa lavil-la. Boukou Kretien osi ti ena zot lakaz ek boukou dibien dan sa lavil-la. Selman, Zezi ti fini averti so bann disip ki zot ti pou bizin kit Zerizalem ek mem Zide.—Mat. 24:16.

5. Kouma Pol ti prepar bann Kretien pou fer fas ar seki ti pou arive biento?

⁵ Pou prepar bann Kretien pou fer fas ar seki ti pou arive biento, Pol ti ed zot pou konpran pli bien seki Zeova ti panse lor lavil Zerizalem. Pol ti rapel zot ki Zeova ti nepli aksepte servis ki bann pret ti fer dan tanp ek osi bann sakrifis ki zot ti ofer. (Ebre 8:13) Laplipar abitan Zerizalem ti rezet Lemesi. Bann dimounn ti nepli bizin al Zerizalem pou ador Zeova, ek biento Zerizalem ek so tanp ti pou detrir.—Lik 13:34, 35.

6. Kifer bann Kretien ti bizin konsey ki lapot Pol ti donn zot dan Ebre 13:5, 6?

⁶ Kan Pol ti ekrir so let pou bann Ebre, Zerizalem ti enn lavil kot boukou dimounn ti kontan ale. Enn ekrivin Romin dir ki Zerizalem ti lavil pli popiler ki ti ena dan Les sa lepok-la. Sak lane, bann Zwif ki ti res dan diferan pei ti vinn Zerizalem pou selebre bann fet. Zot ti depans boukou kas dan Zerizalem, ek sirman sertin Kretien ti vinn ris gras-a sa. Se kitfwa pou sa rezon-la ki Pol ti dir zot: “Montre par zot fason viv ki zot pena lamour pou larzan ek kontant zot ar seki zot ena.” Apre sa, li ti rapel zot promes ki Zeova fer ar sakenn parmi so bann serviter, kot Zeova dir: “Zame mo pa pou kit twa, ek zame mo pa pou abandonn twa.” (Lir Ebre 13:5, 6; Det. 31:6; Ps. 118:6) Bann Kretien ti bizin rapel ki Zeova zame pa ti pou abandonn zot. Kifer? Parski inpe apre ki zot ti gagn Pol so let, bann Kretien ti pou bizin kit zot lakaz, zot bann biznes, ek laplipar zot bann dibien, pou al res dan enn lot landrwa. Zot ti pou bizin koumans enn nouvo lavi laba, ek sa pa ti pou fasil.

7. Kifer nou bizin ogmant nou konfians dan Zeova depi aster-la mem?

⁷ Leson pou nou: Ki pou arive biento? “Gran soufrans” pou koumanse ek sa move lemond-la pou detrir. (Mat. 24:21) Parey kouma bann Kretien ki ti res Zerizalem, nou bizin res fidel depi aster-la mem ek nou bizin prepar nou pou ki nou pre pou gran soufrans. (Lik 21:34-36) Pandan gran soufrans, kitfwa nou kapav perdi nou lakaz ek tou nou bann dibien. Dan sa ler-la, nou pou bizin ena foul konfians dan Zeova parski zame Li pa pou abandonn nou. Me nou pa bizin atann gran soufrans koumanse pou nou fer Zeova konfians. Depi aster-la mem, nou kapav montre ki nou fer Li konfians. Par exanp, to kapav demann tomem: ‘Eski mo bann desizion ek bann proze ki mo fer pou lavenir montre ki mo pa met mo konfians dan larzan, me ki mo ena konfians ki Zeova pou pran mwa swin?’ (1 Tim. 6:17) Lexanp bann Kretien ki ti res Zerizalem kapav ed nou pou res fidel pandan gran soufrans. Selman, gran soufrans pou boukou pli difisil ki ninport ki sitiasion ki bann Kretien inn viv. Alor, kouma nou kapav kone seki nou pou bizin fer kan gran soufrans pou koumanse?

‘OBEIR BANN KI PE DIRIZ NOU’

8. Ki instriksion Zezi ti donn so bann disip?

⁸ De-trwa lane apre ki bann Kretien ti gagn lapot Pol so let, zot ti trouv larme Romin antour Zerizalem. Kan sa ti arive, zot ti kone ki ti ariv ler pou zot kit Zerizalem ek Zide, parski Zerizalem ti pre pou detrir. (Mat. 24:3; Lik 21:20, 24) Me kotsa zot ti pou ale? Zezi ti zis dir zot: “Ki bann dimounn dan Zide koumans sove pou al kot montagn.” (Lik 21:21) Ti ena boukou montagn dan sa rezion-la. Alor, kotsa zot ti pou bizin ale?

9. Kifer bann Kretien kitfwa ti demann zotmem lor ki montagn zot pou ale? (Get map osi.)

⁹ Ti ena boukou montagn kot bann Kretien ti kapav ale. Par exanp, ti ena bann montagn Samari, bann montagn Galile, Montagn Ermon, bann montagn dan Liban, ek bann montagn ki ti lot kote larivier Zourdin. (Get map.) Kot sa bann montagn-la, ti ena bann lavil kot zot ti kapav panse zot ti pou an sekirite. Par exanp, lavil Gamala ti lor enn montagn bien ot ek ti bien difisil pou al laba. Akoz sa, sertin Zwif ti kapav panse ki zot ti pou an sekirite laba. Selman, bann Romin ti atak sa lavil-la ek ti detrir li, ek boukou dimounn ki ti res laba ti mor.b

10-11. (a) Kisann-la Zeova kitfwa ti servi pou gid bann Kretien? (Ebre 13:7, 17) (b) Ki bienfe bann Kretien ti gagne kan zot ti obeir bann ki ti diriz zot? (Get zimaz osi.)

¹⁰ Zeova sirman inn servi bann frer ki ti pe diriz lasanble pou gid bann Kretien. Enn istorien ki apel Eusebius ti rakonte seki ti arive sa lepok-la. Li dir ki Bondie ti fer sertin frer dan Zerizalem kone ki bann Kretien ti bizin kit Zerizalem ek al Pela, enn lavil ki trouv dan Pere. Lavil Pela ti enn bon plas pou ki bann Kretien ale. Pela pa ti lwin ar Zerizalem, alor li pa ti difisil pou al laba. Anplis, laplipar dimounn ki ti res Pela ti bann non-Zwif ek zot pa ti interese pou lager kont bann Romin.—Get map.

¹¹ Bann Kretien ki ti ‘obeir bann ki ti diriz’ zot, ti sove pou al dan lavil Pela ki ti trouv dan bann montagn. (Lir Ebre 13:7, 17.) Zot ti obeir, ek gras-a sa zot ti gagn lavi sov. Zeova pa ti abandonn zot parski zot ti ena konfians dan Rwayom Bondie, sa “lavil ki ena bann vre fondasion” la.—Ebre 11:10.

12-13. Kouma Zeova inn gid so bann serviter dan bann moman difisil?

¹² Leson pou nou: Zeova servi bann frer ki diriz lasanble pou donn so bann serviter bann instriksion presi. Dan Labib, ena boukou zistwar ki montre kouma Zeova inn servi bann zom ki fidel pou gid so bann serviter dan bann moman difisil. (Det. 31:23; Ps. 77:20) Azordi osi, nou trouve kouma Zeova pe servi bann frer ki diriz lasanble pou gid so pep.

¹³ Par exanp, kan ti ena pandemi COVID-19, bann frer “ki pe diriz” lasanble ti donn nou bann instriksion. Sa bann frer-la ti donn bann ansien bann instriksion lor kouma pou fer bann renion ek lor kouma pou kontign ador Zeova. Zis de-trwa mwa apre ki pandemi COVID-19 ti koumanse, nou ti gagn enn lasanble dan plis ki 500 lang. Nou bann frer ek ser ti swiv sa lasanble-la par Internet, lor televizion, ouswa lor radio. Se premie fwa ki nou ti gagn enn lasanble koumsa! Pandan sa pandemi-la, Zeova ti kontign donn nou bann instriksion ki nou ti bizin. Gras-a sa, ti kontign ena linite parmi bann serviter Zeova. Ninport ki difikilte ki nou pou gagne dan lavenir, nou sir ki Zeova pou kontign ed bann ki pe diriz lasanble, pou pran bann bon desizion. Pou nou prepar nou pou gran soufrans ek pou nou azir avek sazes pandan sa moman bien difisil la, nou bizin ena konfians dan Zeova ek obeir bann ki diriz nou. Me ki lezot kalite ankor nou bizin ena?

MONTRE LAMOUR FRATERNEL EK LOSPITALITE

14. Dapre Ebre 13:1-3, ki kalite bann Kretien ti bizin ena avan ki Zerizalem detrir?

¹⁴ Kan gran soufrans pou koumanse, nou pou bizin montre enn gran lamour anver sakenn nou kamarad. Nou pou bizin swiv lexanp bann Kretien ki ti res dan Zerizalem ek dan Zide. Zot ti touletan kontan sakenn zot kamarad. (Ebre 10:32-34) Me dan bann dernie lane avan destriksion Zerizalem, zot ti bizin montre “lospitalite” ek enn “lamour fraternel” pli for ankor.c (Lir Ebre 13:1-3.) Li parey pou nou osi, amezir ki lafin pe koste, nou bizin kontign ogmant nou lamour pou nou bann frer ek ser.

15. Kan bann Kretien ti kit Zerizalem, kifer zot ti bizin montre lamour fraternel ek lospitalite anver zot kamarad?

¹⁵ Larme Romin ti antour Zerizalem, me apre zot ti ale. Gras-a sa, bann Kretien ti reisi kit Zerizalem. Selman, zot ti amenn bien tigit kitsoz ar zot. (Mat. 24:17, 18) Pandan ki zot ti pe al lor bann montagn, sakenn ti pe ed so kamarad, ek kan zot ti ariv Pela, sakenn ti ed so kamarad pou trouv enn plas pou reste ek enn travay. Boukou parmi sa bann frer ek ser la ti bizin manze, linz, ek enn plas pou reste. Sa bann Kretien-la ti montre ki zot ti ena lospitalite ek enn gran lamour fraternel parski sakenn ti pran swin so kamarad.—Tit 3:14.

16. Kouma nou kapav montre ki nou bien kontan nou bann frer ek ser ki bizin led? (Get zimaz osi.)

¹⁶ Leson pou nou: Nou bien kontan nou bann frer ek ser, akoz sa nou ed zot kan zot bizin led. Par exanp, boukou Kretien ti bien kontan pou ed zot bann frer ek ser ki’nn bizin kit zot pei akoz bann lager ouswa bann katastrof natirel. Zot ti donn sa bann frer ek ser la seki zot ti bizin pou viv, ek zot ti osi ed zot ek ankouraz zot pou kontign servi Zeova. Enn ser ki ti res Likrenn, me ki ti bizin kit so lakaz akoz lager, dir: “Nou ti trouve kouma Zeova ti servi nou bann frer ek ser pou gid nou ek pou pran nou swin. Zot ti bien zanti anver nou ek zot ti ed nou kan nou ti dan Likrenn, dan Ongri, ek aster-la ki nou dan Lalmagn, zot ankor pe ed nou.” Bann ki montre lospitalite ek pran swin zot bann frer ek ser, zot kouma bann zouti dan lame Zeova.—Prov. 19:17; 2 Kor. 1:3, 4.

17. Kifer nou bien bizin devlop lamour fraternel ek lospitalite depi aster-la mem?

¹⁷ Pandan gran soufrans, nou pou plis bizin ed nou bann frer ek ser ankor. (Abak. 3:16-18) Ek depi aster-la mem, Zeova pe form nou pou devlop lamour fraternel ek lospitalite, bann kalite ki nou pou bien bizin ena pandan gran soufrans.

KI POU ARIVE DAN LAVENIR?

18. Kouma nou kapav imit bann Kretien ki ti kit Zerizalem?

¹⁸ Bann Kretien ki ti obeir ek ki ti al dan bann montagn, ti gagn lavi sov kan Zerizalem ti detrir. Mem si zot ti kit tou seki zot ti ena, Zeova ti pran zot swin. Zame Li pa ti abandonn zot. Ki nou kapav aprann ar zot lexanp? Nou pa konn tou seki pou arive dan lavenir. Selman, Zezi inn averti nou ki nou “bizin pare” pou obeir. (Lik 12:40) Nou bizin osi reflesi lor konsey ki lapot Pol ti donn bann Kretien ek met li an pratik. Nou kone osi ki Zeova inn promet sakenn parmi nou ki zame Li pa pou kit nou ek ki zame Li pa pou abandonn nou. (Ebre 13:5, 6) Alor, anou kontign fer konfians Rwayom Bondie, sa lavil ki pou dire pou touletan la. Lerla, nou pou gagn bann benediksion pou touletan.—Mat. 25:34.