“Lager-la, Li pou Zeova”

An 1999, gouvernman Lafrans ti dir ki nou biro nasional Lafrans ti bizin pey bann tax lor bann kontribision ki zot ti gagne depi 1993 a 1996. Nou ti amenn case-la devan bann lakour dan Lafrans, me malerezman nou ti perdi case-la. Lerla, nou ti fer apel sa desizion-la. Me nou ti gagn mem repons ek gouvernman ti pran 4.5 milyon euro lor kont labank biro nasional Lafrans. Sel mwayin ki nou ti ena pou gagn sa kas-la, se ki nou amenn case-la devan CEDH. Me avan ki nou case pas devan zot, CEDH ti fer nou zwenn ar enn so bann reprezantan, ansam ar bann avoka gouvernman Lafrans pou gete si nou ti kapav tom enn laranzman avan ki nou case pas lakour.

Nou ti kone ki reprezantan CEDH la ti pou demann nou pou donn gouvernman Lafrans enn ti som larzan. Selman, nou ti kone ki si nou ti donn bann-la larzan, Zeova pa ti pou dakor ar sa. Sa larzan-la, se nou bann frer ek ser ki’nn donn sa pou soutenir travay Rwayom Bondie. Alor, sa larzan-la pa pou gouvernman. (Mat. 22:21) Me mem si nou ti kone ki nou pa ti pou donn bann-la larzan, nou ti al asiste sa renion-la pou montre ki nou ena respe pou bann prosedir CEDH.

Nou ti zwenn reprezantan CEDH ek bann avoka gouvernman Lafrans dan enn zoli biro. Ek depi koumansman mem, sa pa ti pas bien parski reprezantan CEDH ti dir ki bann Temwin Zeova ti bizin pey sertin tax gouvernman Lafrans. Lerla, lespri sin Zeova ti pous nou pou dir, “Eski ou kone ki gouvernman inn fini pran plis ki 4.5 milyon euro lor nou kont labank?”

So figir ti sanze parski li pa ti konn sa, ek li ti bien ankoler ki gouvernman Lafrans ti fer sa. Kan bann avoka gouvernman Lafrans ti konfirme ki zot ti pran sa kas-la, so latitid ti sanze net. Li ti lev ar zot ek li ti kennsel renion-la deswit. Lerla, mo ti rann mwa kont ki Zeova ti sanz sa case-la net pou ki nou kapav gagne. Nou ti extra kontan kan nou ti sorti dan sa biro-la, ek nou ti etone ar seki ti arive.

Le 30 Zin 2011, CEDH ti pran enn desizion an faver bann Temwin Zeova. Zot ti dir ki sa tax-la ti ilegal ek zot ti donn lord gouvernman Lafrans pou retourn nou nou kas, plis bann lintere! Sa desizion bien inportan la ankor pe protez drwa bann Temwin Zeova dan Lafrans ziska azordi. Sa kestion ki lespri sin ti pous nou pou poze la, ti koumadir sa ros ki ti touy Goliat la. Li ti sanz sa case-la net! Kifer nou’nn gagn sa case-la? Se parski, parey kouma David ti dir Goliat, “lager-la, li pou Zeova.”—1 Sam. 17:45-47.

Se pa zis sa fwa-la ki nou’nn gagn enn case devan lakour. Ziska ler, nou’nn gagn 1,225 case devan bann lakour siprem dan 70 pei ek devan bann lakour internasional. Ek nou’nn gagn sa bann case-la mem si bann gouvernman ek bann relizion bien pwisan ti opoz ar nou. Sa bann viktwar-la pe protez nou bann drwa kouma par exanp, drwa pou rekonet bann Temwin Zeova kouma enn relizion, nou drwa pou prese, pou refiz partisip dan bann seremoni nasional, ek pou refiz met disan.

Me kouma sa inn arive ki mo’nn bizin al defann enn case dan Lerop, alor ki mo ti pe servi dan Biro Mondial bann Temwin Zeova, dan New York, Letazini?

MO BANN PARAN TI BIEN DEVWE

Mo bann paran, George ek Lucille, ti fer 12^em klas Lekol Galaad, ek zot ti pe servi dan Letiopi kan mo’nn ne an 1956. Zot ti apel mwa Filip, parey kouma sa “predikater” dan premie siek la. (Zist. 21:8) Selman, enn an apre, gouvernman ti interdi nou laktivite laba. Mem si mo ti ankor bien zenn, mo rapel kouma mo fami ti pe servi Zeova an sekre. Sa lepok-la, mo ti trouv sa extraordiner! Malerezman, an 1960, bann ofisie ti fors nou pou kit pei-la.

Nou fami ti al res dan Wichita, dan Kansas, Letazini. Me mo bann paran pa ti perdi sa lamour ki zot ti ena pou predikasion kan zot ti misioner la. Zot ti ansegn mwa, mo gran ser, Judy, ek mo ti frer, Leslie, ki ti ne dan Letiopi zot osi, pou kontan Zeova ek pou servi Li ar tou nou leker. Mo’nn pran batem laz 13 an. Trwa-z-an apre, nou fami ti al servi dan Arequipa, dan Perou, kot ti bizin plis proklamater.

An 1974, kan mo ti ena 18 an, biro nasional Perou ti demann mwa ek kat lezot frer pou al servi kouma pionie spesial. Nou ti bizin al pres dan bann teritwar kot zame personn pa’nn prese avan. Sa bann teritwar-la ti trouv dan Les Andes, ki bann gran-gran montagn. Nou ti bizin koz ar bann dimounn ki ti koz lang Ketchua ek Aymara. Nou ti vwayaz dan enn karavann, ek nou ti apel li “Lars,” parski li ti koumadir enn gro bwat. Mo bien kontan kan mo rapel bann moman kot mo ti servi Labib pou montre bann dimounn ki biento, Zeova pou tir povrete, maladi, ek lamor. (Rev. 21:3, 4) Ek boukou parmi sa bann dimounn-la ti vinn bann Temwin Zeova.

MO KOUMANS TRAVAY DAN BIRO MONDIAL

An 1977, Frer Albert Schroeder, enn manb Komite Santral bann Temwin Zeova, ti vinn Perou. Ek pandan so vizit, li ti ankouraz mwa pou ranpli enn form pou servi dan Betel dan Biro Mondial. Mo ti ranpli form-la. Ek apre, le 17 Zin 1977, mo ti koumans servi dan Betel Brooklyn. Pandan kat-r-an, mo’nn travay dan servis Netwayaz ek Mintenans.

An Zin 1978, pandan enn lasanble internasional dan Nouvelle-Orléans, dan Louisiane, mo ti zwenn enn ser ki apel Elizabeth Avallone. Parey kouma mwa, li’nn grandi dan laverite ek so bann paran ti pe servi Zeova avek tou zot leker. Elizabeth ti pe servi kouma pionie permanan depi kat-r-an, ek li ti anvi kontign servi Zeova dan servis aplintan toutlong so lavi. Apre sa lasanble-la, nou ti res an kontak, ek bien vit, nou ti tom amoure. Nou’nn marye le 20 Oktob 1979, ek nou’nn koumans servi ansam dan Betel.

Apre nou maryaz, premie lasanble kot nou’nn servi ti enn lasanble espagnol dan Brooklyn, ek bann frer ek ser laba ti bien kontan nou. Apre sa, nou ti al servi dan trwa lezot lasanble, ek bann frer ek ser sa bann lasanble-la ti bien kontan nou ek ti bien soutenir nou dan nou servis pou Betel. Nou bien rekonesan pou zot soutien ek osi pou soutien nou bann kamarad ek nou bann fami ki’nn ed nou pou pran swin nou bann paran ki ti vinn vie.

MO KOUMANS TRAVAY DAN DEPARTMAN LEGAL

An Zanvie 1982, mo ti gagn enn lafektasion ki mo pa ti atann ditou. Mo ti bizin al servi dan Departman Legal dan Betel. Trwa-z-an apre, bann frer ti demann mwa pou al swiv bann kour liniversite pou ki mo vinn enn avoka. Pandan mo bann letid, mo ti etone pou aprann ki se gras-a bann case ki bann Temwin Zeova ti gagne dan bann lakour, ki bann dimounn dan Letazini ek dan boukou lezot pei ti lib pou fer sertin kitsoz. Pandan mo bann letid, nou ti etidie sa bann case inportan la afon.

An 1986, kan mo ti ena 30 an, mo ti vinn responsab Departman Legal. Mo ti bien kontan ki bann frer dan Betel ti fer mwa konfians sa kantite-la, mem si mo ti ankor bien zenn. Selman, mo ti bien strese osi parski ti ena boukou kitsoz ki mo pa ti kone. Anplis, mo ti kone ki sa travay-la pa ti pou fasil ditou.

Mo ti vinn enn avoka an 1988. Selman, mo pa ti rann mwa kont kouma sa bann lane ki mo’nn pase dan liniversite la, ti ena enn move lefe lor mwa ek lor mo lamitie avek Zeova. Kan enn kikenn fer bann long letid, sa kapav fer li vinn enn kikenn ki ena lanbision, ek fer li panse ki li pli siperyer ki bann ki pena mem ledikasion ki li. Enn sans ki Elizabeth ti la, parski li ti ed mwa pou repran bann bon labitid spiritiel ki mo ti ena avan ki mo al liniversite. Apre inpe letan, mo ti revinn pros ar Zeova. Avek letan, mo’nn konpran ki ena enn ta konesans, se pa sa ki pli inportan. Seki pli inportan ek seki donn enn sans nou lavi, se ena enn bon lamitie avek Zeova ek ena enn gran lamour pou Li ek nou bann frer ek ser.

“DEFANN EK ETABLI BON NOUVEL PAR BANN MWAYIN LEGAL”

Apre ki mo ti terminn mo bann letid dan liniversite, mo ti pas plis letan pou ed Departman Legal pou protez bann drwa lorganizasion Zeova, ek osi nou drwa pou pres bon nouvel. Mo travay ti bien interesan, me li ti osi bien difisil parski ti koumans ena bann sanzman dan lorganizasion. Par exanp, dan bann lane 1990, nou ti abitie demann bann kontribision pou nou bann piblikasion. Me apartir 1991, bann frer ti demann Departman Legal seki ti kapav fer pou aret demann bann kontribision, koumsa nou bann piblikasion ti pou vinn gratis. Lerla, nou travay dan Betel ek dan predikasion ti pou vinn pli fasil. Ziska zordi, sa desizion-la pe protez nou kont bann tax ki ilegal. Akoz sa sanzman-la, sertin dimounn ti panse ki nou ti pou gagn mwins kas, ek ki nou pa ti pou ena ase piblikasion pou donn bann dimounn ki interese. Zot ti panse ki mwins dimounn ti pou gagn lokazion pou konn Zeova. Me se pa sa ki ti arive! Depi 1990, kantite bann serviter Zeova inn plis ki double, ek azordi tou dimounn kapav gagn bann piblikasion gratis. Ar mo prop lizie, mo’nn trouve ki se zis gras-a led Zeova ek gras-a direksion ki lesklav fidel ek saz donn nou, ki nou’nn reisi fer sa bann gran sanzman-la dan lorganizasion.—Ex. 15:2; Mat. 24:45.

Nou pa gagn bann case dan lakour zis parski nou ena bann bon avoka. Bien souvan, seki pous bann ziz ek bann lezot ofisie gouvernman pou azir dan nou faver, se bon kondwit bann Temwin Zeova. Mo’nn trouv sa par exanp an 1998, kan trwa manb Komite Santral ek zot madam ti vinn asiste enn lasanble spesial dan Kiba. Mem si avan nou ti ena bann renion ar bann ofisie gouvernman sa pei-la, kan bann-la ti trouve ki kantite sa bann frer-la ek zot madam ti zanti ek ti ena boukou respe, sa ti konvink zot ki nou pa inplik nou dan bann zafer politik.

Selman, kan enn linzistis arive, parfwa sel mwayin ki nou ena pou rezoud sa problem-la, se al devan lakour pou “defann ek etabli bon nouvel par bann mwayin legal.” (Fil. 1:7) Par exanp, pandan plizir lane, bann gouvernman dan Lerop ek dan Kore Disid pa ti aksepte ki bann Temwin Zeova ena drwa pou pa fer servis militer. Ek akoz sa, apepre 18,000 frer dan Lerop ek plis ki 19,000 frer dan Kore Disid, ti al fer prizon parski zot pa ti aksepte fer servis militer.

Me le 7 Ziliet 2011, dan case Bayatyan c. Arménie, CEDH ti pran enn desizion extraordiner: Tou bann pei Lerop ti bizin aksepte ki bann dimounn ki pa aksepte fer servis militer akoz zot larelizion, fer enn travay sosial dan plas sa servis militer la. Ek le 28 Zin 2018, enn parmi bann pli gran lakour dan Kore Disid ti pran mem desizion. Si nou bann zenn frer pa ti gard zot netralite, sa de viktwar-la pa ti pou posib.

Bann frer ki travay dan Departman Legal dan Biro Mondial ek dan bann Betel dan lemond antie pe travay bien dir pou defann nou drwa pou ador Zeova ek pou pres bon nouvel lor Rwayom Bondie. Se vremem enn gran loner pou defann nou bann frer ek ser ki pe gagn lopozision ar bann gouvernman. Mem kan nou pa gagn enn case dan lakour, nou pe donn enn temwaniaz ‘bann gouverner, bann lerwa, ek bann nasion.’ (Mat. 10:18) Kan nou al devan lakour pou defann enn case, tou bann dimounn ki konserne kouma par exanp, bann ziz, bann ofisie gouvernman, bann media ouswa bann lezot dimounn, bizin lir bann verse ki nou’nn ekrir dan nou bann dokiman ek tann bann verse ki nou mansione devan lakour. Gras-a sa, bann dimounn ki ena enn leker sinser aprann kisann-la bann Temwin Zeova ete. Zot aprann osi lor nou bann krwayans. Sertin parmi zot inn mem vinn bann Temwin Zeova.

MERSI, ZEOVA!

Depi sa 40 dernie lane-la, mo’nn gagn privilez pou travay ansam ar bann frer dan lemond antie ek pou reprezant nou lorganizasion devan bann lakour siprem ek devan bann dimounn ki bien inportan dan bann gouvernman. Mo bien kontan ek mo bien apresie bann frer ki travay ansam ar mwa dan Departman Legal dan Biro Mondial ek osi dan bann lezot departman legal dan lemond antie. Mo finn ena enn zoli lavi ek mo finn gagn boukou benediksion ar Zeova.

Ki li dan bann bon moman ouswa dan bann move moman, avek fidelite ek amour Elizabeth inn soutenir mwa pandan sa 45 dernie lane-la. Li vremem enn bon lexanp pou mwa, parski li’nn fer tousala malgre enn maladi ki pe afebli li.

Elizabeth ek mwa, nou’nn trouve ar nou prop lizie ki se pa par nou-mem ki nou gagn lafors ek laviktwar. Parey kouma David ti dir, “Se Zeova ki donn lafors so pep.” (Ps. 28:8) Wi, “lager-la, li pou Zeova.”