Eski Bann Premie Kitsoz ki To Ti Aprann dan Labib Ankor Kapav Ed Twa Azordi?

1. Bann lansegnman ki nou ti aprann kan nou ti fek koumans etidie Labib, ki lefe sa finn ena lor nou?

BANN kitsoz ki nou ti aprann kan nou ti fek koumans etidie Labib inn sanz nou lavi net! Par exanp, kan nou ti aprann ki nom Bondie, se Zeova, nou ti koumans vinn pros ar Li. (Iza. 42:8) Kan nou ti aprann seki arive kan enn kikenn mor, nou ti nepli demann nou-mem si nou kamarad ouswa nou fami ki’nn mor ankor pe soufer. (Ekle. 9:10) Ek kan nou ti aprann ki Bondie promet ki later pou vinn enn paradi, nou ti nepli trakase pou nou lavenir. Nou ti sir ki nou ti pou kapav viv pou touletan, pa zis pou enn tigit letan, ‘70 an ouswa 80 an.’—Ps. 37:29; 90:10.

2. Kifer Pier ti rapel bann ki ti “bien etabli dan laverite” ki zot ti bizin kontign reflesi lor bann lansegnman ki zot ti deza kone? (2 Pier 1:12, 13)

² Fode zame nou bliye sa: Bann premie lansegnman ki nou ti aprann kan nou ti fek koumans etidie Labib, zot bien-bien inportan. Dan so deziem let, lapot Pier ti ekrir bann Kretien ki ti “bien etabli dan laverite.” (Lir 2 Pier 1:12, 13.) Selman, sa lepok-la, ti ena bann fos ansegnan ek bann dimounn ki pa ti ena respe pou Bondie dan lasanble, ek zot ti anvi detourn bann frer ek ser ar laverite. (2 Pier 2:1-3) Akoz sa, Pier ti anvi ankouraz bann frer ek ser pou ki zot kapav protez zot kont bann foste ki sa bann dimounn-la ti pe ansegne. Ek pou li fer sa, li ti rapel zot sertin lansegnman inportan ki zot ti deza kone. Sa bann lansegnman-la ti pou ed zot pou res fidel ar Zeova ziska lafin.

3. Kifer tou bann Kretien bizin kontign reflesi lor bann lansegnman ki zot deza kone? Servi enn lexanp pou explike.

³ Mem si sa fer lontan ki nou pe servi Zeova, nou ankor kapav gagn bann bienfe ar bann lansegnman inportan ki ena dan Labib ek ki nou deza kone. Anou pran enn lexanp pou explik sa. Enn kwizinie ki ena lexperyans ek enn nouvo kwizinie, kapav servi mem ingredian pou kwi enn manze. Selman, sa kwizinie ki ena lexperyans la, inn aprann avek letan kouma pou servi sa bann mem ingredian-la pou fer bann nouvo manze ki bien bon. Dan mem fason, konpare ar bann ki nouvo dan laverite, bann Kretien ki lontan dan laverite kitfwa avek letan inn aprann kouma pou tir diferan leson ar bann mem lansegnman Labib. Kifer? Parski depi ki zot inn pran batem, kitfwa zot servis pou Zeova ouswa zot sitiasion inn sanze. Ek kan zot inn met an pratik bann lansegnman ki zot ti deza kone ar zot nouvo sitiasion, kitfwa zot inn aprann bann nouvo leson ki’nn bien ed zot. Aster-la, anou gete seki bann ki lontan dan laverite bizin rapel ar trwa lansegnman inportan ki ena dan Labib.

ZEOVA LI NOU KREATER

4. Kan nou’nn aprann ki Zeova Li nou Kreater, ki lefe sa finn ena lor nou?

⁴ Nou kone ki se enn Kreater ki bien pwisan ek ki ena sazes ki’nn kree later ek tou seki ena lor la. Labib dir “sa kikenn ki’nn konstrir tou kitsoz la se Bondie.” (Ebre 3:4) Me ena boukou lezot kitsoz ki nou kapav aprann ar sa verite bien inportan la. Par exanp, parski se Zeova ki’nn kree nou, Li konn tou kitsoz lor nou. Li osi gagn nou traka ek Li kone seki pli bon pou nou. Alor, parski nou’nn aprann ki Zeova Li nou Kreater, sa finn donn nou lavi enn sans ek sa finn sanz nou lavi dan plizir fason.

5. Ki kitsoz kapav ed nou pou rapel ki nou bizin ena limilite? (Izai 45:9-12)

⁵ Parski Zeova Li nou Kreater, sa ansegn nou ki nou bizin ena limilite. Par exanp, pandan enn moman, Zob ti dir bann move kitsoz lor Zeova. Dan sa ler-la, Zob ti bliye seki ti pli inportan, li ti mazinn zis limem, ek li ti esey montre ki li enn kikenn ki drwat. Lerla, Zeova ti rapel li ki se Li ki Kreater Tou-Pwisan. (Zob 38:1-4) Sa ti ed Zob pou konpran ki Zeova touletan fer seki drwat. Plitar, profet Izai ti dir ki fode zame bann dimounn panse ki zot ena plis sazes ki zot Kreater.—Lir Izai 45:9-12.

6. Dan ki sitiasion li bien inportan ki nou reflesi lor sazes ek pwisans ki nou Kreater ena? (Get zimaz osi.)

⁶ Kan enn kikenn lontan dan laverite, kitfwa li kapav koumans kont tro lor limem ek lor so prop lopinion, olie ki li kont lor Zeova ek so Parol, Labib. (Zob 37:23, 24) Ki bienfe li pou gagne kan li reflesi lor sazes ek pwisans ki so Kreater Zeova ena? (Iza. 40:22; 55:8, 9) Sa kapav ed li pou konpran ki fason panse Zeova pli inportan ki so fason panse, ek sa pou ed li pou ena limilite.

7. Ki Rahela ti fer pou ki li kapav aksepte enn sanzman ki finn ena dan lorganizasion?

⁷ Rahela, ki res Sloveni, inn trouve ki kan li rapel ki Zeova li nou Kreater, sa ed li pou aksepte bann sanzman ki ena dan lorganizasion. Li dir: “Parfwa, sa pa ti fasil pou mwa pou aksepte bann desizion ki bann frer ki diriz lorganizasion ti pran. Par exanp, mem si nou ti fini get Rapor 2023 #8 par Komite Santral, mo ti gagn sok premie fwa ki mo ti trouv enn frer ki ti ena labarb fer enn diskour. Alor, mo ti priye Zeova pou Li ed mwa aksepte sa sanzman-la.” Rahela ti konpran ki parski Zeova Li nou Kreater, Li touletan kone seki pli bon pou so lorganizasion. Leson pou nou: Si nou gagn difikilte pou aksepte enn nouvo lexplikasion ouswa enn nouvo instriksion, avek limilite, nou bizin pran letan pou reflesi lor sazes ek pwisans ki nou Kreater ena.—Rom. 11:33-36.

KIFER BONDIE PERMET KI BANN DIMOUNN SOUFER?

8. Ki bienfe nou’nn gagne kan nou’nn aprann kifer Bondie permet ki bann dimounn soufer?

⁸ Kifer Bondie permet ki bann dimounn soufer? Sertin dimounn ki pa konn repons sa kestion-la, zot ankoler ar Bondie ouswa zot panse ki Li pa existe. (Prov. 19:3) Me twa, to finn aprann ki se pa akoz Zeova ki nou soufer ek nou mor; se parski nou fer pese ek nou inparfe. To’nn aprann osi ki se parski Zeova ena pasians ki bann milyon dimounn pe gagn lokazion pou aprann konn Li ek pou aprann kouma biento Li pou tir tou soufrans. (2 Pier 3:9, 15) Sa bann verite-la inn rekonfort twa ek inn fer twa vinn pli pros avek Li.

9. Dan ki sitiasion nou bizin rapel kifer Zeova permet ki bann dimounn soufer?

⁹ Me an-atandan ki Zeova tir tou soufrans, nou bizin ena pasians. Selman, kan enn kikenn ki nou kontan mor, ouswa kan nou ouswa nou fami pe pas par bann difikilte ouswa par linzistis, kitfwa nou ankoler ek nou demann nou-mem kifer Zeova pe pran sa kantite letan-la pou tir tou bann soufrans ki ena lor later. (Abak. 1:2, 3) Dan bann sitiasion koumsa, li bon ki nou rapel kifer Zeova permet ki bann dimounn soufer.a (Ps. 34:19) Nou bizin osi reflesi lor Zeova so proze, setadir ki biento, Li pou tir tou soufrans pou touletan.

10. Depi ki so mama inn mor, ki kitsoz pe ed Anne pou andire?

¹⁰ Kan nou kone kifer Zeova permet ki bann dimounn soufer, sa kapav ed nou pou andir bann leprev. Anne, ki res Mayotte, enn ti zil ki trouv dan Losean Indien, dir: “Inn gagn de-trwa lane depi ki mo mama inn mor, ek sa rann mwa bien tris. Akoz sa, souvan mo fer zefor pou rapel ki se pa akoz Zeova ki nou soufer. Zeova vremem anvi tir tou soufrans ek resisit bann dimounn ki nou kontan. Kan mo reflesi lor la, sa ankouraz mwa ek sa donn mwa lafors pou res kalm mem si mo ankor bien tris akoz lamor mo mama.”

11. Kan nou kone kifer Zeova permet ki bann dimounn soufer, kouma sa motiv nou pou kontign prese?

¹¹ Kan nou kone kifer Zeova permet ki bann dimounn soufer, sa motiv nou pou kontign prese. Apre ki Pier ti explike ki Zeova ena pasians parski Li anvi ki bann dimounn repanti ek gagn lavi, li ti dir: “Reflesi ki kalite dimounn zot bizin ete par bann aksion ki montre ki zot kondwit sin ek ki zot atase ar Bondie.” (2 Pier 3:11) Nou predikasion form parti “bann aksion ki montre . . . ki [nou] atase ar Bondie.” Parey kouma nou Papa Zeova, nou kontan bann dimounn ek nou anvi ki zot viv dan lemond nouvo. Gras-a so pasians, Zeova pe donn bann dimounn posibilite pou ador Li. Se enn gran privilez pou travay ansam ar Bondie ek pou ed maximum dimounn pou aprann konn Li avan ki lafin vini!—1 Kor. 3:9.

NOU PE VIV DAN “BANN DERNIE ZOUR”

12. Kan nou ti aprann ki nou pe viv dan “bann dernie zour”, ki lefe sa finn ena lor nou?

¹² Labib dekrir bien kouma bann dimounn pou ete dan “bann dernie zour.” (2 Tim. 3:1-5) Kan nou trouve kouma bann dimounn otour nou pe azir, li kler ki sa bann profesi-la pe realize. Ek plis nou trouve kouma mantalite ek konportman bann dimounn pe anpire, plis sa konvink nou ki seki Labib dir, li vre.—2 Tim. 3:13-15.

13. Dapre lexanp ki trouv dan Lik 12:15-21, ki kestion li bon ki nou poz nou-mem?

¹³ Kan nou kone ki nou pe viv dan bann dernie zour, sa ed nou pou res konsantre lor bann kitsoz ki vremem inportan. Zezi ti explike kifer nou bizin fer sa dan lexanp ki trouv dan Lik 12:15-21. (Lir.) Kifer sa zom ris la ti “insanse”? Zezi pa ti dir sa parski sa zom-la ti ris. Li ti dir sa parski sa zom-la pa ti res konsantre lor seki ti vremem inportan. Li ti ‘ramas bann trezor pou limem me li pa ti ris devan Bondie.’ Sa zom-la ti mal servi so letan, sirtou ki li pa ti res boukou letan pou viv. Bondie ti dir li: “Aswar mem to pou perdi to lavi.” Azordi, amezir ki lafin pe koste, li bon ki nou poz nou-mem sa bann kestion-la: ‘Eski mo bann lobzektif montre ki mo pe konsantre lor bann kitsoz ki vremem inportan? Ki kalite lobzektif mo pe ed mo bann zanfan pou fixe? Eski mo servi mo lafors, mo letan ,ek mo bann kitsoz materyel pou ramas bann trezor pou momem ouswa bann trezor dan lesiel?’

14. Kouma lexanp Miki montre ki li inportan ki nou reflesi lor bann prev ki montre ki nou pe viv dan bann dernie zour?

¹⁴ Li inportan ki nou reflesi lor bann prev ki montre ki nou pe viv dan bann dernie zour. Kifer? Parski sa pou ed nou pou pran bann desizion ki montre ki nou pe met Zeova an premie dan nou lavi. Se seki Miki ti fer. Li dir: “Kan mo ti fini lekol, mo ti vremem anvi gagn enn travay ki ti pou permet mwa etidie bann zanimo. Me mo ti osi ena bann lobzektif spiritiel. Mo ti anvi fer pionie ek al servi kot bizin plis proklamater. Sertin frer ek ser dan mo lasanble ti dir mwa reflesi bien si mo ti pou kapav fer sa travay ki mo ti anvi fer la ek anmemtan realiz mo bann lobzektif spiritiel. Zot ti rapel mwa ki sa lemond-la ti pou detrir biento, ek ki dan lemond nouvo, mo ti pou ena leternite pou etidie bann zanimo. Lerla, mo ti desid pou pa fer sa travay-la. Olie sa, mo ti swiv enn kour ki pa ti pran tro mo letan ek ki ti fer mwa gagn bann konpetans ki bien itil. Gras-a sa kour-la, mo ti gagn enn travay ki ti permet mwa ena ase kas ek ase letan pou fer pionie. Sa ti permet mwa osi pou al servi dan Ekwater, enn pei kot bizin plis proklamater.” Azordi, Miki ek so misie pe servi dan servis sirkonskripsion dan sa pei-la.

15. Kouma lexanp Zak montre ki nou bizin kontign prese? (Get zimaz osi.)

¹⁵ Fode pa nou dekouraze kan bann dimounn pa interese ar bon nouvel. Kifer? Parski zot kapav sanze. Anou get lexanp Zak, Zezi so demi-frer. Zak ti trouv Zezi grandi, vinn Lemesi, ek ansegn bann dimounn dan enn fason extraordiner. Selman, pandan tou sa letan-la, li pa ti vinn enn disip Zezi. Se apre ki Zezi ti resisite ki Zak ti vinn so disip. Anplis, Zak ti vinn enn disip ki bien devwe!b (Zan 7:5; Gal. 2:9) Leson pou nou: Mem si nou fami pankor interese ar laverite, nou bizin kontign partaz bann verite ki ena dan Labib avek zot. Nou bizin osi kontign pres ar bann dimounn ki pa’nn anvi ekout nou avan. Fode pa nou bliye ki nou pe viv dan bann dernie zour. Alor, li bien inportan ki nou kontign prese. Seki nou dir bann dimounn azordi kapav ena enn lefe lor zot plitar, ek zot pou ankor kapav fer bann sanzman mem si gran soufrans fini koumanse.c

ENA REKONESANS POU BANN PREMIE KITSOZ KI TO TI APRANN DAN LABIB

16. Ki bienfe nou kapav gagne ar bann lansegnman ki nou deza kone? (Get osi lankadre “Servi Bann Lansegnman ki Ena dan Labib pou Ed Lezot.”)

¹⁶ Sertin manze spiritiel ki nou lorganizasion prepare, inn fer pou bann dimounn ki pa tro konn Labib. Par exanp, bann diskour piblik, bann magazinn ki nou servi pou prese, ek sertin lartik ek video ki ena lor jw.org, inn fer pou bann ki dimounn ki pa Temwin Zeova. Kanmem sa, nou osi nou kapav gagn bann bienfe ar sa bann lansegnman ki nou deza kone la. Kifer? Parski sa kapav ogmant nou lamour pou Zeova, ranforsi nou lafwa dan so Parol Labib, ek ed nou pou vinn bann ansegnan ki pli efikas.—Ps. 19:7.

17. Dan ki sitiasion nou bizin reflesi lor bann lansegnman ki nou deza kone?

¹⁷ Nou bien kontan kan nou gagn bann nouvo lexplikasion lor bann lansegnman ki ena dan Labib. Me mem si sa fer lontan ki nou pe servi Zeova, nou bizin touletan ena rekonesans pou bann premie kitsoz ki nou ti aprann dan Labib; bann kitsoz ki ti ed nou pou vinn pros ar Zeova. Kouma nou’nn trouve dan sa lartik-la, sa bann lansegnman-la ankor kapav ed nou azordi. Kan nou gagn enn instriksion ar lorganizasion ek ki nou panse ki nou lopinion ouswa nou fason fer pli bon, avek limilite nou bizin rapel ki Zeova, nou Kreater, Li ena sazes, Li bien pwisan, ek se Li ki pe diriz so lorganizasion. Kan nou ouswa enn kikenn ki nou kontan, pe pas par enn leprev, nou bizin ena pasians ek rapel kifer Zeova pe permet ki bann dimounn soufer. Ek kan nou bizin deside kouma nou pou servi nou letan ek nou bann kitsoz materyel, nou bizin rapel ki nou pe viv dan bann dernie zour ek ki pa res boukou letan avan ki lafin vini. Alor, anou kontign reflesi lor bann lansegnman ki nou deza kone, parski sa bann lansegnman-la pou fortifie nou, pou motiv nou, ek pou fer nou vinn bann dimounn ki ena sazes.