Eski To’nn “Aprann Sekre” pou Kontant Twa ar Seki To Ena?

1. Ki savedir ena kontantman, ek ki sa pa vedir?

ESKI to kontant twa ar seki to ena? Enn kikenn ki kontant li ar seki li ena, li satisfe ar seki li ena. Li ena sa santiman-la parski li apresie bann bon kitsoz ki Zeova inn donn li. Gras-a sa, li zwaye ek li santi li anpe. Li pa ankoler ouswa dekouraze akoz bann kitsoz ki li pena. Kan enn kikenn kontant li ar seki li ena, sa pa vedir ki li pa kas latet ar fason ki li viv so lavi. Li normal ki enn kikenn anvi fer plis dan so servis pou Zeova. (Rom. 12:1; 1 Tim. 3:1) Selman, enn kikenn ki kontant li ar seki li ena, li pa pou perdi so lazwa mem si li pankor gagn enn privilez ki li pe rode.

2. Si nou pa kontant nou ar seki nou ena, ki move kitsoz kapav arive?

² Si nou pa satisfe ar seki nou ena, kitfwa nou pou koumans pran bann move desizion. Par exanp, sertin dimounn ki pa satisfe ar seki zot ena, zot travay boukou ek zot fer overtime pou ki zot kapav aste bann kitsoz ki zot pa vremem bizin. Malerezman, sertin frer ek ser inn mem kokin kas ouswa bann lezot kitsoz ki zot ti anvi gagne. Dan zot leker, kitfwa zot ti pans koumsa, ‘Mo merite gagn sa,’ ‘Mo anvi gagn sa deswit,’ ouswa ‘Mo pran kas-la, mo ava retourn li apre.’ Selman, tou kokin se kokin, ek Zeova deteste sa. (Prov. 30:9) Sertin ki pa’nn gagn enn privilez ki zot ti pe rode, inn telman dekouraze ki zot inn aret servi Zeova. (Gal. 6:9) Ki finn arive pou ki enn serviter Zeova fer enn kitsoz koumsa? Avek letan, kitfwa li’nn aret kontant li avek seki li ti ena.

3. Ki leson nou aprann dan Filipien 4:11, 12?

³ Nou tou nou kapav aprann pou kontant nou ar seki nou ena. Lapot Pol ti dir ki li ti ‘aprann pou kontant li ar seki li ena dan ninport ki sitiasion.’ (Lir Filipien 4:11, 12.) Pol ti ekrir sa bann parol-la kan li ti dan prizon. Kanmem sa, li pa ti perdi so lazwa. Li ti “aprann sekre” pou kontant li ar seki li ena. Si nou trouv sa difisil pou kontant nou ar seki nou ena, lexanp lapot Pol kapav ed nou pou devlop sa kalite-la. Selman, fode pa nou panse ki sa kalite-la vini enn kout koumsa; nou bizin aprann pou devlop li. Kouma? Anou get bann lezot kalite ki kapav ed nou pou kontant nou ar seki nou ena.

REKONESANS

4. Kifer kan nou ena rekonesans, sa ed nou pou kontant nou ar seki nou ena? (1 Tesalonisien 5:18)

⁴ Li pli fasil pou enn kikenn ki ena rekonesans pou kontant li ar seki li ena. (Lir 1 Tesalonisien 5:18.) Par exanp, si nou rekonesan pou bann kitsoz ki nou ena, nou pa pou trakase plis ki bizin pou bann kitsoz ki nou anvi me ki nou pena. Kan nou rekonesan anver Zeova pou bann responsabilite ki nou ena aster-la, nou pou fer nou best dan sa bann responsabilite-la, olie ki nou kontign pans bann responsabilite ki nou anvi gagne. Zeova kone ki li inportan ki nou ena rekonesans. Se pou sa rezon ki dan Labib, Li dir nou ki nou bizin remersie Li kan nou priye Li. Kan nou ena rekonesans, nou gagn “lape Bondie ki depas tou seki nou kapav konpran.”—Fil. 4:6, 7.

5. Kifer bann Izraelit ti bizin rekonesan anver Zeova? (Get zimaz osi.)

⁵ Anou get lexanp bann Izraelit. Plizir fwa, zot ti plengn ar Zeova parski zot ti anvi manz bann manze ki zot ti pe gagne dan Lezip. (Nonb 11:4-6) Li vre ki zot lavi pa ti fasil dan dezer. Me ki kitsoz ti kapav ed zot pou kontant zot ar seki zot ti ena? Zot ti bizin reflesi lor tou bann kitsoz ki Zeova ti fer pou zot, ek zot ti bizin ena rekonesans anver Zeova pou sa. Par exanp, zot ti bizin rapel kouma zot ti bann esklav dan Lezip, kouma bann Ezipsien ti pe maltret zot, ek kouma Zeova ti avoy dis fleo lor Lezip pou sov zot. Kan zot ti kit Lezip, Zeova ti ed zot pou gagn boukou lor, larzan, ek linz ar bann Ezipsien. (Ex. 12:35, 36) Kan zot ti devan Lamer Rouz ek ki larme Faraon ti deryer zot, Zeova ti ouver lamer-la an de pou ki zot sape. Ek kan zot ti pe marse dan dezer, toulezour Zeova ti pe donn zot lamann. Problem bann Izraelit se pa ki zot ti mank manze, me se ki zot pa ti rekonesan pou tou seki Zeova ti fer pou zot.

6. Kouma eski nou kapav devlop rekonesans?

⁶ Kouma eski nou kapav devlop rekonesans? Premierman, pran letan toulezour pou reflesi lor bann bon kitsoz ki to ena dan to lavi ek ki rann twa ere. Sak zour, to kapav mem ekrir de ouswa trwa parmi sa bann kitsoz-la. (Lam. 3:22, 23) Deziemman, montre ki to ena rekonesans. Pran labitid pou remersie lezot pou seki zot fer pou twa. Me sirtou, remersie Zeova sak zour. (Ps. 75:1) Ek trwaziemman, swazir bann kamarad ki ena rekonesans. Si nou bann kamarad ingra ouswa zot abitie plengne, nou pou vinn parey kouma zot. Parkont, si zot ena rekonesans, sa pou detin lor nou. (Det. 1:26-28; 2 Tim. 3:1, 2, 5) Kan nou rod bann lokazion pou montre nou rekonesans anver lezot, nou pou mwins konsantre nou lor nou bann difikilte ek lor bann kitsoz ki nou anvi, me ki nou pena.

7. Kouma Aci inn devlop rekonesans, ek ki lefe sa finn ena lor li?

⁷ Anou get lexanp Aci, enn ser ki res Indonezi. Li dir: “Pandan pandemi COVID-19, mo ti koumans konpar mo sitiasion ar sitiasion bann lezot frer ek ser. Ek akoz sa, mo ti koumans vinn negatif.” (Gal. 6:4) Ki kitsoz ti ed Aci pou sanz so fason panse? Li dir: “Mo ti koumans kont bann benediksion ki mo ti pe gagne sak zour. Ek mo ti pe reflesi lor bann bon kitsoz ki mo ti pe gagne parski mo ti form parti dan lorganizasion Zeova. Apre sa, mo ti priye Zeova pou dir Li ki kantite mo ti rekonesan pou sa. Sa ti ed mwa pou kontant mwa ar seki mo ena.” Si to pa satisfe ar seki to ena, eski to kapav fer kouma Aci pou ki to kapav ogmant to rekonesans?

LIMILITE

8. Ki ti ariv Barouk?

⁸ Pandan enn tan, Barouk, Zeremi so sekreter, pa ti satisfe ar seki li ti ena. Barouk ti ena enn responsabilite bien difisil. Li ti bizin ed Zeremi pou dir Izrael, enn pep ki ti ingra, seki ti pou ariv zot parski zot ti dezobeir Zeova. Olie ki li ti res konsantre lor seki Zeova ti anvi li fer, Barouk ti koumans pans tro boukou lor seki li li ti anvi fer. Lerla, Zeova ti servi Zeremi pou dir Barouk: “To pe rod bann gran kitsoz pou tomem. Aret rod sa bann kitsoz-la.” (Zer. 45:3-5) Se koumadir Zeova ti pe dir Barouk: “Kontant twa ar seki to ena.” Barouk ti ekout Zeova. Gras-a sa, li ti kontign ena faver Zeova.

9. Dapre 1 Korintien 4:6, 7, si nou ena limilite, ki kitsoz nou pou rekonet? (Get zimaz osi.)

⁹ Li kapav arive ki enn Kretien panse ki li merite gagn enn privilez. Kitfwa li pans koumsa parski li ena bann kapasite, li travay dir, ouswa sa fer lontan ki li pe servi Zeova. Selman, fer koumadir enn lot dimounn gagn sa privilez ki li ti pe rode la. Ki kitsoz kapav ed sa Kretien-la pou li pa dekouraze? Li bon ki li reflesi lor seki lapot Pol ti dir dan 1 Korintien 4:6, 7. (Lir.) Sak privilez ki nou gagne ek tou bann kapasite ki nou ena, sorti kot Zeova. Zeova pa donn nou sa bann kitsoz-la parski nou pli spesial ki lezot. Li donn nou sa bann kitsoz-la, parski Li kontan nou ek ki Li bon anver nou.—Rom. 12:3, 6; Efe. 2:8, 9.

10. Kouma nou kapav aprann pou ena limilite?

¹⁰ Nou kapav aprann kouma pou ena limilite kan nou reflesi lor lexanp Zezi ek nou swiv so lexanp. Anou gete seki ti arive lanwit ki Zezi ti lav lipie so bann zapot. Lapot Zan dir: “Zezi, ki ti kone [1] ki so Papa ti’nn met tou kitsoz dan so lame ek [2] ki li ti sorti kot Bondie ek [3] ti pe al kot Bondie, . . . ti koumans lav lipie bann disip.” (Zan 13:3-5) Zezi ti kapav panse ki se so bann zapot ki ti bizin lav so lipie. Me Zezi zame pa’nn panse ki akoz li Garson Bondie, li merite ena enn zoli lakaz, enn ta kas, ouswa enn lavi ki fasil. (Lik 9:58) Zezi ti ena limilite ek li ti kontant li ar seki li ti ena. Li’nn les enn zoli lexanp pou nou.—Zan 13:15.

11. Kouma limilite inn ed Dennis pou li kontant li ar seki li ena?

¹¹ Dennis, enn frer ki res Oland, inn fer boukou zefor pou ena limilite parey kouma Zezi. Me li dir ki sa pa ti fasil. Dennis dir: “Parfwa, mo dekouraze kan enn kikenn gagn enn privilez ki mo ti anvi gagne, parski mo panse ki se mwa ki ti bizin gagn sa. Dan sa bann moman-la, mo etidie lor limilite. Lor aplikasion JW Library^®, mo’nn kree enn kategori kot ena bann verse ki koz lor limilite. Mo’nn fer sa pou ki mo kapav trouv sa bann verse-la vit-vit, pou mo lir zot souvan. Mo’nn osi download bann diskour ki koz lor limilite lor mo telefonn, ek souvan mo ekout zot.a Gras-a sa, mo’nn aprann ki tou seki nou fer, se pou donn Zeova laglwar, pa pou ki nou nou gagn laglwar. Se Zeova dan so bonte ki donn sakenn enn travay pou fer, ek se Li ki fer travay-la marse.” Si parfwa to dekouraze parski to pa’nn gagn enn privilez ki to ti pe rode, fer zefor pou ena plis limilite. Sa pou ed twa pou ena enn bon lamitie avek Zeova ek to pou kontant twa ar seki to ena.—Zak 4:6, 8.

RES KONSANTRE LOR TO LESPERANS

12. Dapre Izai 65:21-25, ki bann zoli promes Zeova inn fer konsernan lavenir?

¹² Nou pou plis satisfe ar seki nou ena kan nou reflesi lor bann promes ki Zeova inn fer nou konsernan lavenir. Dan liv Izai, Zeova dir ki Li konpran ki nou ena boukou difikilte. Me Li osi promet nou ki Li pou tir tou sa bann difikilte-la. (Lir Izai 65:21-25.) Lerla, nou pou kapav viv an sekirite dan enn zoli lakaz. Nou pou fer bann travay ki pou rann nou zwaye, ek nou pou manz bann manze ki ena gou ek ki bon pou lasante. Nou pa pou trakase tansion enn maler ariv nou ouswa nou zanfan. (Iza. 32:17, 18; Eze. 34:25) Wi, nou kapav sir ki tou sa bann zoli promes-la pou realize biento.

13. Ar ki problem nou bizin fer fas azordi, ek kouma sa ed nou kan nou reflesi lor nou lesperans?

¹³ Kifer li bien inportan ki nou reflesi souvan lor nou lesperans konsernan lavenir? Se parski nou pe viv dan “bann dernie zour,” ek ki nou tou nou pe fer fas ar bann problem ki “difisil pou siporte.” (2 Tim. 3:1) Zeova ed nou pou andire toulezour kan Li soutenir nou, Li donn nou lafors ek bann konsey ki nou bizin. (Ps. 145:14) Anplis, nou lesperans kapav osi ed nou kan nou gagn bann difikilte. Kitfwa to bizin travay bien-bien dir parski to gagn difikilte pou donn to fami seki zot bizin pou viv. Me eski sa pou touletan koumsa? Non! Zeova inn promet ki Li pou donn twa seki to bizin, ek Li pou donn twa ankor plis dan lemond nouvo. (Ps. 9:18; 72:12-14) Kitfwa to ena bann douler kronik, depresion, ouswa to ena enn maladi bien grav. Me eski touletan to pou soufer koumsa, san okenn lespwar ki to geri? Non! Dan Paradi, Zeova pou tir maladi ek lamor pou touletan. (Rev. 21:3, 4) Sa lesperans-la ed nou pou pa dekouraze ouswa ankoler akoz bann kitsoz ki pe ariv nou azordi. Mem si enn kikenn tret nou dan enn fason inzis, si enn kikenn ki nou kontan mor, ouswa si ariv nou enn maler, nou ankor kapav ena lazwa ek santi nou anpe. Kifer? Parski ninport ki difikilte ki nou gagne aster-la, nou kone ki ‘sa bann difikilte-la zot tanporer’ ek ki dan lemond nouvo, nou pou gagn enn soulazman ki eternel.—2 Kor. 4:17, 18.

14. Kouma nou kapav ranforsi nou lesperans?

¹⁴ Nou lesperans kapav ed nou pou kontant nou ar seki nou ena. Alor, kouma nou kapav ranforsi nou lesperans? Parey kouma enn kikenn ki bizin met linet pou ki li kapav trouv pli bien bann kitsoz ki lwin, kitfwa nou bizin fer sertin kitsoz pou ranforsi nou lesperans pou ki nou kapav mazinn nou dan Paradi. Par exanp, kan nou trakase akoz kas, nou kapav sey mazine kouma nou lavi pou ete kan personn pa pou mizer, ek ki kas pou nepli ena okenn valer. Kan nou santi nou dekouraze akoz bann privilez ki nou pa’nn gagne, nou kapav sey mazine kouma sa bann kitsoz-la pa pou ena okenn linportans kan nou pou parfe ek ki nou pe servi Zeova depi plizir milye lane. (1 Tim. 6:19) Azordi, ena telman boukou kitsoz ki pe trakas nou, ki nou kapav trouv sa difisil pou res konsantre lor bann promes ki Zeova inn fer nou. Selman, plis nou reflesi lor so bann zoli promes, plis nou pou kapav res konsantre lor nou lesperans olie ki nou konsantre nou lor bann traka ki nou ena.

15. Ki leson nou aprann ar lexanp Christa?

¹⁵ Anou gete kouma lesperans inn ed Christa, madam Dennis, ki nou ti mansione taler-la. Christa dir: “Mo ena enn maladi ki fer mo bann misk vinn bien feb. Mo pa kapav marse, mo lor enn fotey roulant, ek mo res lor lili preske touletan. Toulezour mo soufer akoz mo bann douler. Ek mo dokter inn fek dir mwa ki mo lasante pa pou ameliore. Me kan li’nn dir mwa sa, deswit mo’nn dir ar momem, ‘Li pa trouv lavenir parey kouma mwa mo trouve.’ Mo res konsantre lor mo lesperans, ek sa donn mwa lape lespri. Azordi, li vre ki mo ena boukou problem, me dan lemond nouvo mo pou ena enn zoli lavi!”

“BANN DIMOUNN KI ENA ENN GRAN RESPE POU LI PA MANK NANYE”

16. Kifer Lerwa David ti dir ki bann dimounn ki ena enn gran respe pou Zeova “pa mank nanye”?

¹⁶ Selman, mem si nou kontant nou ar seki nou ena, nou pou kontign gagn bann problem. Anou get lexanp Lerwa David. Trwa parmi so bann zanfan ti mor. Sertin dimounn ti akiz li pou bann kitsoz ki li pa ti fer, ek sertin so bann kamarad ti trayir li. Pandan plizir lane, li ti bizin sove parski enn lerwa ti pe rod touy li. Malgre sa bann problem-la, David ti res zwaye. Konsernan Zeova, li ti dir: “Bann dimounn ki ena enn gran respe pou Li pa mank nanye.” (Ps. 34:9, 10) Kifer David ti dir sa? Parski li ti kone ki mem si Zeova pa ti pou anpes li gagn bann problem, Li ti pou touletan donn li seki li bizin. (Ps. 145:16) Parey kouma David, nou kapav sir ki kan nou ena bann problem, Zeova pou ed nou pou andire. Lerla, nou pou kapav res zwaye ek anpe dan ninport ki sitiasion.

17. Kifer nou bien deside pou kontant nou ar seki nou ena?

¹⁷ Zeova anvi ki nou kontant nou ar seki nou ena. (Ps. 131:1, 2) Alor, anou kontign fer zefor pou kontant nou ar seki nou ena. Si nou fer zefor pou ena rekonesans, pou ena limilite, ek pou ranforsi nou lesperans, nou pou kapav dir: “Wi, mo vremem satisfe.”—Ps. 16:5, 6.