To Kapav Reziste Kont Bann Move Dezir

1. Kont ki kitsoz nou tou nou bizin lite?

ESKI’NN deza arive ki to’nn bizin fer boukou zefor pou lit kont enn move dezir? Si wi, fode pa to dekouraze. Labib dir: “Pena okenn tantasion ki zot inn gagne ki lezot pa’nn gagne.” (1 Kor. 10:13)a Sa verse-la montre ki se pa zis to tousel ki pe bizin lit kont bann move dezir. Selman, avek led Zeova, to kapav reziste kont sa bann move dezir-la.

2. Ar ki tantasion sertin Kretien ek sertin etidian Labib pe bizin fer fas? (Get zimaz osi.)

² Labib dir osi ki “sak dimounn pas par enn test kan li les so prop dezir atir li ek antrenn li.” (Zak 1:14) Sa verse-la fer nou konpran ki sak dimounn gagn diferan tantasion. Par exanp, sertin Kretien gagn tantasion pou komet limoralite sexiel ar bann dimounn ki pa mem sex ki zot, alor ki sertin gagn tantasion pou komet limoralite ar bann dimounn ki mem sex ki zot. Sertin ki ti pe get pornografi avan, kitfwa pe bizin lit kont dezir pou retom dan sa piez-la. Li parey osi pou bann ki ti pe droge avan ouswa bann ki ti pe bwar boukou. Zot osi, zot pe bizin lite pou pa retom dan sa bann piez-la. Sa se zis de-trwa tantasion ki sertin frer ek ser ek sertin etidian Labib pe bizin fer fas. Sirman, nou tou nou’nn deza ena mem santiman ki lapot Pol, ki ti dir: “Kan mo anvi fer seki drwat, tandans pou fer seki move li dan mwa.”—Rom. 7:21.

3. Si enn kikenn sak fwa pe bizin fer bann gro zefor pou lit kont mem move dezir, ki lefe sa kapav ena lor li?

³ Si sak fwa to pe bizin fer bann gro zefor pou lit kont mem move dezir, kitfwa to panse ki to pena lafors pou lit kont sa. Kitfwa to panse osi ki to pena faver Zeova parski to ena sa move dezir-la. Selman, fode pa to pans koumsa parski sa li pa vre. Pou ed twa konpran sa, sa lartik-la pou reponn de kestion: (1) Kisann-la anvi ki to pans koumsa? (2) Kouma to kapav lit kont to bann move dezir?

SEKI SATAN ANVI FER NOU KRWAR

4. (a) Kifer Satan anvi fer nou krwar ki nou pena lafors pou lit kont bann tantasion? (b) Kifer nou sir ki nou ena lafors pou lit kont nou bann move dezir?

⁴ Satan anvi fer nou krwar ki nou pena lafors pou lit kont bann tantasion ki nou gagne. Zezi ti fer so bann disip konpran ki Satan ti pou esey tant zot. Akoz sa, li ti ansegn so bann disip pou dir sa bann parol-la dan zot lapriyer: “Pa les nou tom dan tantasion, me sap nou ar sa kikenn ki move la.” (Mat. 6:13) Satan panse ki bann dimounn pa pou obeir Zeova kan zot gagn tantasion pou fer bann move kitsoz. (Zob 2:4, 5) Kifer Satan pans sa? Se parski limem li pa’nn reisi lit kont so prop dezir, ek li pa’nn anvi res fidel ar Zeova. Akoz sa, li panse ki nou kouma li ek ki nou pa pou reisi res fidel ar Zeova kan nou gagn enn tantasion. Satan ti mem panse ki li ti pou kapav tant Garson Bondie pou fer enn move kitsoz. (Mat. 4:8, 9) Me reflesi lor la: Eski vremem nou pena lafors pou lit kont nou bann move dezir? Non, nou ena lafors, parski parey kouma lapot Pol, nou sir ki “pou tou kitsoz [nou] ena lafors gras-a sa kikenn ki donn [nou] pwisans la.”—Fil. 4:13.

5. Zeova sir ki nou kapav lit kont nou bann move dezir. Kouma nou konn sa?

⁵ Parkont, Zeova Li Li sir ki nou kapav lit kont nou bann move dezir. Kouma nou konn sa? Parski Zeova inn fini predir ki enn gran lafoul dimounn ki fidel anver Li, pou reisi travers gran soufrans. Zeova, nou Bondie ki pa kapav koz manti, dir ki enn kantite dimounn pou rant dan lemond nouvo, pa zis enn tigit dimounn. Zot pou “ena bann long rob blan lor zot,” savedir ki Zeova pou konsider zot kouma bann dimounn ki sin. (Rev. 7:9, 13, 14) Sa montre ki Zeova kone ki nou kapav lit kont nou bann move dezir.

6-7. Ki kitsoz ankor Satan anvi fer nou krwar?

⁶ Satan anvi fer nou krwar osi ki akoz nou ena bann move dezir, nou pena faver Zeova. Kifer li anvi fer nou krwar sa? Se parski limem li’nn perdi faver Zeova, li’nn perdi posibilite pou viv pou touletan, ek biento Zeova pou detrir li. (Zen. 3:15; Rev. 20:10) Satan bien ankoler ek li zalou parski nou nou ena posibilite pou viv pou touletan. Akoz sa, li anvi fer nou krwar ki nou parey kouma li ek ki nou pena okenn lespwar pou lavenir. Selman, nou pa kouma li, parski Labib rasir nou ki Zeova anvi ed nou pou ki nou kapav viv pou touletan. Zeova “pa anvi ki personn detrir, me li anvi ki tou dimounn repanti.”—2 Pier 3:9.

⁷ Alor, si nou panse ki nou pena lafors pou lit kont nou bann move dezir, ouswa ki nou pena faver Zeova, nou pe rant dan zwe Satan. Kan nou konpran sa, sa kapav donn nou lafors pou tini ferm kont Satan.—1 Pier 5:8, 9.

SEKI NOU KAPAV RESANTI AKOZ NOU INPARFE

8. Apart bann move aksion ki nou fer, ki lot lexplikasion Labib done pou mo “pese”? (Psom 51:5) (Get osi “Expresion Ki’nn Explike.”)

⁸ Apart seki Satan anvi fer nou krwar, ena enn lot kitsoz ankor ki kapav fer nou panse ki nou pena lafors pou lit kont nou bann move dezir ouswa ki nou pena faver Zeova. Sa kitsoz-la, se nou linperfeksion, ouswa pese ki nou’nn erite ar nou bann premie paran, Adan ek Ev.b—Zob 14:4; lir Psom 51:5.

9-10. (a) Ki Adan ek Ev ti resanti apre ki zot ti vinn inparfe? (Get zimaz osi.) (b) Kouma pese so linflians bien for lor nou?

⁹ Anou reflesi lor seki Adan ek Ev ti resanti apre ki zot ti vinn inparfe. Apre ki zot ti dezobeir Zeova, zot ti kasiet ek zot ti kouver zot lekor. Konsernan seki zot ti fer, liv Étude perspicace des Écritures, dir: “Akoz pese, Adan ek Ev ti santi zot koupab, zot ti trakase, zot ti perdi konfians an zotmem, ek zot ti gagn onte.” Se koumadir Adan ek Ev ti anprizone dan enn lakaz kot ena zis kat pies. Zot ti kapav sorti dan enn pies pou al dan enn lot pies, selman zot pa ti pou kapav sorti dan lakaz-la. Pese ti vinn kouma enn prizon pou zot, ek zot pa ti pou kapav sorti ladan.

¹⁰ Biensir, nou pa dan mem sitiasion ki Adan ek Ev, parski zot zot pa gagn bann bienfe gras-a laranson. Me nou, gras-a laranson, nou kapav gagn pardon pou nou bann pese ek ena enn bon lamitie ar Bondie. (1 Kor. 6:11) Me kanmem sa, akoz Adan ek Ev, nou’nn erit pese ek linperfeksion. Ek akoz sa, nou osi nou santi nou koupab, nou trakase, nou pena konfians an nou-mem, ek nou gagn onte. Labib dir ki pese so linflians bien for lor bann dimounn, “mem lor bann ki pa ti fer pese dan mem fason ki Adan ti fer pese.” (Rom. 5:14) Selman, mem si nou inparfe, fode pa nou panse ki nou pena lafors pou lit kont nou bann move dezir ek ki nou pena faver Zeova. Nou kapav rezet sa bann santiman negatif la. Kouma?

11. Kan nou panse ki nou pena lafors pou lit kont bann move dezir, kouma nou bizin reazir, ek kifer? (Romin 6:12)

¹¹ Kan nou panse ki nou pena lafors pou lit kont enn move dezir, se koumadir nou ena enn ti lavwa dan nou latet ki pe dir nou ki zame nou pa pou kapav lit kont sa move dezir-la. Selman, fode zame nou ekout sa lavwa-la. Kifer? Parski Labib ansegn nou ki fode pa nou les pese kontign “regne kouma lerwa” lor nou. (Lir Romin 6:12.) Savedir ki nou kapav swazir pou pa les nou inflianse par nou bann move dezir. (Gal. 5:16) Zeova sir ki nou kapav reziste kont bann tantasion ki nou gagne. Sinon, Li pa ti pou demann nou pou fer sa. (Det. 30:11-14; Rom. 6:6; 1 Tes. 4:3) Sa montre nou ki nou kapav lit kont nou bann move dezir.

12. Kan nou panse ki nou pena faver Zeova parski nou ena bann move dezir, kouma nou bizin reazir, ek kifer?

¹² Dan mem fason, kan nou panse ki nou pena faver Zeova parski nou ena bann move dezir, se koumadir nou ena enn ti lavwa dan nou latet ki pe dir nou ki nou pa pou kapav lit kont sa. Selman, fode zame nou ekout sa lavwa-la. Kifer? Parski Labib ansegn nou ki Zeova konpran ki nou inparfe. (Ps. 103:13, 14) Li “konn tou kitsoz” lor nou. Li mem kone kifer ek ki bann diferan sitiasion inn ariv nou dan nou lavi, ki’nn fer nou ena sa bann move dezir-la. (1 Zan 3:19, 20) Selman, tanki nou kontign fer zefor pou reziste kont sa bann move dezir-la ek ki nou pa fer sa bann move kitsoz-la, Zeova pou konsider nou kouma bann dimounn ki drwat. Kouma nou konn sa?

13-14. Si nou ena bann move dezir, eski savedir ki nou pena faver Zeova? Explike.

¹³ Labib montre ki ena enn diferans ant ena enn move dezir ek les nou inflianse par sa move dezir-la pou fer enn move kitsoz. Enn move dezir, se enn kitsoz ki kapav arive san ki nou atann ek nou pena kontrol lor la. Parkont, fer enn move kitsoz, se enn kitsoz lor ki nou ena kontrol; nou kapav kontrol nou-mem pou pa fer sa kitsoz-la. Par exanp, dan premie siek, sertin dan lasanble Korint ti bann omosexiel avan ki zot ti vinn bann Kretien. Lapot Pol ti dir: “Koumsa mem ki sertin parmi zot ti ete.” Eski savedir ki zame ankor zot pa finn ena okenn dezir pou komet limoralite sexiel apre ki zot ti vinn bann Kretien? Li posib ki zot ti ankor ena sa dezir-la, parski li bien-bien difisil pou aret ena sa kalite dezir-la. Selman, bann Kretien ki ti reisi kontrol sa bann move dezir-la ek ki pa ti fer sa bann move kitsoz-la, ti ena faver Zeova. Kan Labib koz lor sa bann Kretien-la, li dir ki “finn lav zot; finn sanktifie zot; finn deklar zot kouma bann dimounn drwat.” (1 Kor. 6:9-11) Li parey pou nou osi!

¹⁴ Si to ena enn move dezir, to kapav lit kont sa. Mem si to pa pe reisi tir net sa move dezir-la, to kapav kontrol tomem pou to pa ‘fer bann kitsoz ki to lekor ek to panse pous twa pou fer.’ (Efe. 2:3) Alor, ki kitsoz kapav ed twa pou to kontign lit kont to bann move dezir?

SEKI KAPAV ED TWA POU LIT KONT BANN MOVE DEZIR

15. Pou ki nou lit kont nou bann move dezir, kifer nou bizin onet ar nou-mem?

¹⁵ Pou to lit kont to bann move dezir, to bizin onet ar tomem ek rekonet ki to ena sa bann febles-la. Fode pa ki to anbet tomem par “bann fos rezonnman.” (Zak 1:22) Par exanp, si to ena enn problem ar labwason, fode pa to panse ki problem-la pa grav ek to dir ar tomem, ‘Lezot bwar plis ki mwa.’ Ouswa, si to pe lite pou pa get pornografi, fode pa to met tor lor lezot ek to dir ar tomem, ‘Si mo madam ti ena plis lafeksion pou mwa, mo pa ti pou tom dan sa piez-la.’ Si to koumans ena bann rezonnman koumsa, li pou pli difisil pou to reziste kont tantasion. Alor, fode pa to rod bann pretext pou to fer enn move kitsoz. Pa bliye ki se tomem ki responsab to bann aksion.—Gal. 6:7.

16. Kouma to kapav prepar twa pou to pa tom dan tantasion?

¹⁶ Apre ki to’nn onet ar tomem ek ki to’nn rekonet ki to ena sa febles-la, to bizin bien deside pou pa fer sa move kitsoz-la. (1 Kor. 9:26, 27; 1 Tes. 4:4; 1 Pier 1:15, 16) Reflesi lor bann kitsoz ki kapav fer twa tom dan tantasion ek osi kan eski sa kapav arive. Par exanp, kitfwa li pou pli difisil pou to reziste kont sa tantasion-la kan to fatige, ouswa kan inn tar aswar. Prepar twa ek fini deside seki to bizin fer si tantasion-la arive. Ek meyer moman pou to fer sa, se avan ki tantasion-la arive.—Prov. 22:3.

17. Ki nou kapav aprann ar lexanp Zozef? (Zenez 39:7-9) (Get zimaz osi.)

¹⁷ Anou gete seki nou kapav aprann ar lexanp Zozef. Kan Potifar so madam ti esey tant li, deswit Zozef ti dir li non. (Lir Zenez 39:7-9.) Ki leson nou aprann? Avan mem ki Potifar so madam ti esey tant li, Zozef ti fini kone seki li ti bizin fer. Dan mem fason, avan mem ki enn tantasion arive, to bizin fini kone seki to bizin fer. Koumsa, kan enn tantasion arive, li pou pli fasil pou to reziste kont tantasion-la, parski to’nn fini kone seki to bizin fer.

EXAMINN TOMEM REGILIERMAN

18. Ki kitsoz ankor kapav ed nou pou lit kont nou bann move dezir? (2 Korintien 13:5)

¹⁸ Pou ki to reisi lit kont to bann move dezir, to bizin osi “kontign examinn” tomem regilierman, setadir “kontign verifie” si to pe fer bann progre pou lit kont to bann move dezir. (Lir 2 Korintien 13:5.) Detanzantan, pran letan pou reget to fason panse ek to bann aksion, ek fer bann sanzman ki bizin. Par exanp, mem si to’nn reisi reziste kont enn tantasion, demann tomem: ‘Komie letan mo’nn pran pou reziste kont sa tantasion-la?’ Si to rann twa kont ki to’nn pran boukou letan pou to reziste kont sa tantasion-la, fode pa to dekouraze. Olie sa, reflesi lor seki to kapav fer pou ki to reazir pli vit enn prosenn fwa. Poz tomem sa bann kestion-la: ‘Kan enn move panse pas dan mo latet, eski mo kapav aret pans lor la pli vit? Eski li pli difisil pou mo reziste kont bann tantasion akoz bann divertisman ki mo swazir? Kan enn zimaz imoral pas devan mo lizie, eski deswit mo aret get li? Eski mo konpran kifer li vo lapenn ki mo obeir Zeova, mem si mo bizin fer boukou zefor pou mo fer sa?’—Ps. 101:3.

19. Si nou pran bann tipti move desizion, kouma sa kapav fer nou gagn difikilte pou lit kont bann move dezir?

¹⁹ Kan to examinn tomem, fode pa ki to rod bann pretext pou to aksepte bann move kitsoz. Labib dir ki “leker pli tret ki ninport ki lezot kitsoz ek li bien move.” (Zer. 17:9) Ek Zezi ti dir ki “se dan leker ki bann move rezonnman sorti.” (Mat. 15:19) Par exanp, enn kikenn ki’nn aret get pornografi, avek letan kitfwa kapav panse ki li “pa danzere” pou get bann zimaz ki kapav fer li ena bann panse imoral, tanki sa bann zimaz-la pa porno. Li kapav dir ar limem, ‘Pena nanye demal pou pans bann move kitsoz, tanki mo pa fer li vremem.’ Si enn kikenn pans koumsa, se koumadir li pe “fer bann plan an-avans pou satisfer bann move dezir [so] lekor.” (Rom. 13:14) Ki nou bizin fer pou rezet sa kalite rezonnman-la? Nou bizin fer zefor pou evit pran bann tipti move desizion, parski sa kapav fer nou pran bann gro move desizion ek fer nou fer bann pese bien grav.c Nou bizin osi rezet bann move panse, ouswa “bann move rezonnman,” ki kapav fer nou aksepte bann move kitsoz.

20. Ki pou ariv nou bann move dezir dan lemond nouvo, ek kouma Zeova pe ed nou azordi?

²⁰ Dan sa lartik-la, nou’nn aprann ki Zeova donn nou lafors pou lit kont nou bann move dezir. Nou’nn trouve osi ki gras-a laranson, nou kapav gagn pardon nou bann pese ek nou ena lespwar pou viv pou touletan dan lemond nouvo. Sa lepok-la, nou pou vremem ere parski nou pou kapav servi Zeova san ki nou bizin lit kont bann move dezir. Me an-atandan, avek led Zeova, nou kapav sir ki nou ena lafors pou lit kont nou bann move dezir, ek ki nou ena so faver!