Kouma Nou Bizin Reazir kan Ena Bann Linzistis?

1-2. Kouma bann dimounn reazir kan ena bann linzistis, ek ki kestion kitfwa nou poz nou-mem?

NOU pe viv dan enn lemond kot ena linzistis! Boukou dimounn soufer parski zot pov, ouswa akoz zot kominote, zot kiltir, zot laparans, ouswa pou bann lezot rezon. Boukou dimounn soufer osi parski bann dimounn ris ouswa bann gouvernman fer kas zis pou zotmem. Akoz sa bann sitiasion-la ek bann lezot sitiasion ankor, kitfwa nou ouswa enn kikenn ki nou kone pe soufer.

² Alor, nou pa etone ki boukou dimounn ankoler azordi kan zot trouv sa kantite linzistis ki ena dan lemond la. Nou tou nou anvi viv dan enn lemond kot nou santi nou an sekirite ek kot nou santi nou bien. Se akoz sa ki sertin dimounn esey rezoud bann problem ki zot trouve dan sa lemond-la ouswa dan zot pei. Zot sign bann petision, fer bann manifestasion, ouswa soutenir bann politisien ki promet pou lit kont linzistis. Selman, nou bann Kretien, nou’nn aprann ki nou bizin “pa fer parti dan lemond” ek ki nou bizin atann ki Rwayom Bondie tir tou bann linzistis. (Zan 17:16) Me kanmem sa, parfwa nou bien sagrin ouswa nou ankoler, kan nou trouv bann dimounn tret lezot dan enn move fason. Ek lerla, kitfwa nou demann nou-mem: ‘Kouma mo bizin reazir kan sa arive? Eski ena kitsoz ki mo kapav fer depi aster-la mem pou lit kont linzistis?’ Avan ki nou reponn sa bann kestion-la, anou gete seki Zeova ek Zezi resanti konsernan linzistis.

ZEOVA EK ZEZI DETESTE LINZISTIS

3. Kifer nou pa kontan kan tret nou ouswa lezot dan enn move fason? (Izai 5:7)

³ Labib explike kifer nou pa kontan kan tret nou ouswa lezot dan enn move fason. Li dir ki Zeova inn kree nou dan so resanblans ek ki Li “kontan lazistis ek seki drwat.” (Ps. 33:5; Zen. 1:26) Zeova zame azir dan enn fason inzis, ek Li pa kontan kan bann dimounn tret lezot dan enn move fason. (Det. 32:3, 4; Mish. 6:8; Zaka. 7:9) Par exanp, dan lepok profet Izai, boukou Izraelit ti pe tret bann lezot Izraelit dan enn move fason. Akoz sa, “bann ki ti pe soufer akoz linzistis ti pe kriye,” ek Zeova ti tann zot. (Lir Izai 5:7.) Lerla, Zeova ti pini bann ki ti pe kontign dezobeir so bann lalwa, ek ki ti pe tret lezot dan enn move fason.—Iza. 5:5, 13.

4. Ki Zezi resanti kan bann dimounn tret lezot dan enn move fason? (Get zimaz osi.)

⁴ Parey kouma Zeova, Zezi kontan lazistis ek li deteste linzistis. Enn zour, kan Zezi ti trouv enn zom ki so lame ti paralize, li ti ena pitie pou li ek li ti geri li. Selman, kan bann sef relizie ti trouv sa, zot ti ankoler. Zot ti dir ki Zezi pa ti respekte lalwa lor Saba. Zot pa ti kas latet ki sa zom-la ti geri ek ki li ti aret soufer. Ki Zezi ti resanti kan zot ti reazir koumsa? Li ti “bien tris ki zot ti ena enn leker dir.”—Mark 3:1-6.

5. Kan nou ankoler, ki nou bizin rapel?

⁵ Zeova ek Zezi ankoler kan bann dimounn tret lezot dan enn fason inzis. Alor, li normal ki nou osi nou ankoler. (Efe. 4:26) Selman, nou bizin rapel ki mem si nou ankoler, sa pa pou tir linzistis. Akoz sa, nou bizin kontrol nou koler. Avredir, si nou res ankoler pandan enn bon bout letan, sa kapav fer nou-mem ditor. Sa kapav rann nou malad ouswa mem fer nou tom dan depresion. (Ps. 37:1, 8; Zak 1:20) Alor, ki nou bizin fer kan bann dimounn tret nou ouswa lezot dan enn fason inzis? Anou gete seki nou kapav aprann ar lexanp Zezi.

KI ZEZI TI FER KAN BANN DIMOUNN TI MALTRET LEZOT?

6. Kan Zezi ti lor later, kouma bann dimounn ti tret lezot? (Get zimaz osi.)

⁶ Kan li ti lor later, Zezi ti trouv bann dimounn maltret lezot. Li ti kone ki bann sef relizie ti azout enn ta lalwa ki ti rann lavi bann dimounn bien difisil. (Mat. 23:2-4) Li ti kone osi ki gouvernman Romin ti tret bann dimounn dan enn move fason. Bann Zwif ti nepli anvi ki bann Romin diriz zot. Sertin Zwif ti mem zwenn ansam pou fer bann group pou lager kont bann Romin. Selman, Zezi pa ti soutenir bann ki ti lager pou sanz gouvernman. Ek kan sertin ti pe rod fer li vinn lerwa, Zezi ti refize.—Zan 6:15.

7-8. Kan Zezi ti lor later, kifer li pa ti esey rezoud tou bann problem? (Zan 18:36)

⁷ Kan li ti lor later, Zezi pa ti mel li dan bann zafer politik pou rezoud bann problem ki li ti trouve otour li. Kifer? Parski li ti kone ki bann dimounn pena drwa pou diriz lezot ek ki zot “pa’nn kree pou diriz [zot] pa,” setadir zot pena kapasite pou diriz lezot. (Ps. 146:3; Zer. 10:23) Anplis, ena de rezon prinsipal kifer bann dimounn pa kapav lit kont linzistis. Premierman, se Satan ki pe diriz lemond. Li bien kriel, ek souvan li inflians bann dimounn pou azir parey kouma li. (Zan 8:44; Efe. 2:2) Deziemman, akoz nou linperfeksion, mem si nou ena bann bon lintansion, nou pa kapav rezoud bann problem ki ena dan lemond, parski nou pa touletan fer seki drwat.—Ekle. 7:20.

⁸ Zezi ti kone ki se zis Rwayom Bondie ki ti pou kapav tir tou bann kitsoz ki fer nou soufer. Se akoz sa ki li ti servi tou so letan ek so lenerzi “pou prese ek anons bon nouvel lor Rwayom Bondie.” (Lik 8:1) Li ti rekonfort bann dimounn ki ti “fin ek swaf lazistis,” ek li ti dir zot ki biento ti pou nepli ena koripsion ek linzistis. (Mat. 5:6; Lik 18:7, 8) Se zis Rwayom Bondie, pa bann gouvernman imin, ki pou fer sa bann sanzman-la, ek sa Rwayom-la “pa fer parti dan sa lemond-la.”—Lir Zan 18:36.

SWIV LEXANP ZEZI KAN TO TROUV BANN LINZISTIS

9. Kifer to sir ki se zis Rwayom Bondie ki pou tir tou bann soufrans?

⁹ Parski nou pe viv dan bann “dernie zour,” nou trouv pli boukou linzistis ki kan Zezi ti lor later. Selman, parey kouma dan lepok Zezi, azordi osi nou soufer akoz Satan ek bann move dimounn ki pe imit li. (2 Tim. 3:1-5, 13; Rev. 12:12) Parey kouma Zezi, nou kone ki se zis Rwayom Bondie ki pou tir tou bann kitsoz ki fer nou soufer. Parski nou soutenir Rwayom Bondie, nou refiz partisip dan bann lamars, bann manifestasion, ouswa lezot kitsoz pou lit kont linzistis. Anou get lexanp enn ser ki apel Stacy.a Avan ki li ti konn laverite, Stacy souvan ti partisip dan bann manifestasion pou lit kont linzistis. Selman, apre inpe letan, li ti nepli sir ki seki li ti pe fer ti pe ed bann dimounn ek rezoud bann problem. Li dir: “Kan mo ti dan sa bann manifestasion-la, mo ti pe demann momem si mo ti pe fer enn bon kitsoz. Me aster-la, mo sir ki se zis Rwayom Bondie ki pou rezoud tou bann problem. Mo kone ki Zeova pou fer enn kitsoz ki mwa mo pa kapav fer, setadir Li pou tir tou bann soufrans.”—Ps. 72:1, 4.

10. Dapre Matie 5:43-48, kifer fode pa ki nou esey sanz bann lalwa ek bann gouvernman? (Get zimaz osi.)

¹⁰ Azordi, boukou dimounn zwenn ar bann group ki esey sanz bann lalwa ek bann gouvernman. Boukou parmi zot telman ankoler ki zot dezobeir bann lalwa ek fer lezot ditor. Selman, se pa sa ki Zezi inn ansegn nou. (Efe. 4:31) Enn frer ki apel Jeffrey, dir: “Mo kone ki dan bann manifestasion, bien vit bann dimounn kapav ankoler. Zot kapav koumans detrir ek kokin bann kitsoz, ek parfwa zot mem bles lezot.” Selman, Zezi inn ansegn nou ki nou bizin kontan tou dimounn, mem bann ki pa dakor avek nou ek bann ki persekit nou. (Lir Matie 5:43-48.) Akoz sa, nou fer tou seki nou kapav pou swiv lexanp Zezi.

11. Kifer parfwa nou kapav trouv sa difisil pou nou swiv lexanp Zezi?

¹¹ Mem si nou kone ki se Rwayom Bondie ki pou tir tou soufrans pou touletan, nou kapav trouv sa difisil pou nou swiv lexanp Zezi kan bann dimounn tret nou dan enn fason inzis. Anou gete seki enn ser ki apel Janiya ti resanti kan bann dimounn ti tret li dan enn move fason akoz so kouler lapo. Li dir: “Mo ti extra ankoler. Sa ti bien bles mwa ek mo ti anvi ki sa bann dimounn-la peye pou seki zot inn fer. Akoz sa, mo ti panse ki si mo ti zwenn enn group ki ti manifeste kont rasism ek diskriminasion, sa ti pou ed mwa pou mo santi mwa pli bien.” Selman, avek letan, Janiya ti konpran ki li ti bizin sanz so fason panse. Li dir: “Mo ti konpran osi ki olie ki mo ti fer Zeova konfians, mo ti krwar seki bann dimounn dir ek mo ti pe fer zot konfians. Lerla, mo ti desid pou koup tou kontak avek bann dimounn ki ti form parti sa group-la.” Mem si li normal ki nou ankoler kan bann dimounn tret nou ouswa lezot dan enn move fason, nou bizin pa les nanye anpes nou gard nou netralite.—Zan 15:19.

12. Kifer nou bizin vey bien lor bann kitsoz ki nou lir, gete, ek ekoute?

¹² Ki kitsoz kapav ed nou pou res kalm kan bann dimounn tret nou ouswa lezot dan enn fason inzis? Enn kitsoz ki nou kapav fer, se vey bien lor bann kitsoz ki nou lir, gete, ek ekoute. Parfwa, sertin dimounn poste bann linformasion lor bann rezo sosio zis pou sok bann dimounn ouswa pou kritik gouvernman. Ek bien souvan, bann zournalis donn zot lopinion lor enn sitiasion, ek zot pa dir seki’nn vremem arive. Me mem si sa bann linformasion-la zot vre, eski sa pou ed nou si nou kontign pans lor la? Avredir, si nou pas tro boukou letan pou lir ouswa pou ekout bann linformasion koumsa, sa kapav fer nou plis ankoler ouswa dekouraze. (Prov. 24:10) Ek seki pli pir, se ki sa kapav fer nou aret met Rwayom Bondie an premie dan nou lavi, ek bliye ki se zis Rwayom Bondie ki pou tir tou soufrans.

13. Kan nou lir Labib toulezour, kouma sa kapav ed nou kan nou trouv bann dimounn tret lezot dan enn move fason?

¹³ Si nou lir Labib toulezour ek nou reflesi lor seki nou lir, sa pou ed nou pou kone seki nou bizin fer kan bann dimounn tret nou ouswa lezot dan enn move fason. Kan enn ser ki apel Alia, ti trouv bann dimounn maltret sertin dan so kominote, sa ti bien fatig li. Li ti bien ankoler parski sa bann dimounn-la pa ti gagn okenn pinision. Li dir: “Mo ti demann momem, ‘Eski mo vremem krwar ki Zeova pou rezoud sa bann problem-la?’ Dan sa moman-la, mo ti pe lir Zob 34:22-29. Sa bann verse-la ti rapel mwa ki Zeova trouv tou kitsoz. Se zis Li tousel ki kapav ziz dan enn fason parfe, ek se zis Li tousel ki kapav rezoud tou bann problem.” Nou tou nou pe atann ki Rwayom Bondie tir bann linzistis, me an-atandan ki nou kapav fer?

SEKI NOU KAPAV FER DEPI ASTER-LA MEM

14. Ki kitsoz nou kapav fer depi aster-la mem? (Kolosien 3:10, 11)

¹⁴ Li vre ki nou pa kapav sanz fason ki bann dimounn tret lezot. Selman, nou kapav kontrol seki nou nou fer. Parey kouma nou ti gete avan, nou swiv lexanp Zezi kan nou kontan tou dimounn. Akoz sa, nou bizin fer zefor pou tret lezot avek zantiyes ek respe, mem bann ki persekit nou ouswa maltret nou. (Mat. 7:12; Rom. 12:17) Zeova bien kontan kan nou tret tou dimounn dan enn bon fason ek avek zantiyes.—Lir Kolosien 3:10, 11.

15. Kan nou partaz bann verite ki ena dan Labib, ki lefe sa kapav ena lor bann dimounn?

¹⁵ Meyer fason ki nou kapav lit kont linzistis, se kan nou partaz bann verite ki ena dan Labib avek lezot. Kifer nou dir sa? Kan bann dimounn aprann plis lor Zeova ek ki zot anvi fer Li plezir, sa pous zot pou fer bann sanzman dan zot lavi. Par exanp, zot aprann pou montre zantiyes ek lamour anver lezot. (Iza. 11:6, 7, 9) Anou get lexanp Jemal. Avan ki li vinn dan laverite, li ti form parti enn group ki ti lager pou sanz gouvernman dan so pei parski li ti panse ki sa gouvernman-la pa ti bon. Li dir: “To pa kapav fors bann dimounn pou sanze. Selman, kan zot aprann bann verite ki ena dan Labib, zot kapav sanze. Se koumsa ki mo’nn sanze.” Seki Jemal ti aprann ti motiv li pou aret partisip dan bann lager. Alor, kan nou ansegn bann dimounn bann verite ki ena dan Labib, nou kapav ed zot pou aret fer bann kitsoz ki fer lezot ditor.

16. Kifer nou kontan fer bann dimounn kone seki Rwayom Bondie pou fer?

¹⁶ Parey kouma Zezi, nou kontan fer bann dimounn kone ki se zis Rwayom Bondie ki pou rezoud nou bann problem pou touletan. Sa promes-la kapav ankouraz bann dimounn ki pe soufer akoz linzistis. (Zer. 29:11) Stacy, ki nou’nn mansione avan, dir: “Parski mo kone ki Bondie pou tir tou soufrans, sa ed mwa pou res kalm kan bann dimounn tret mwa ouswa lezot dan enn move fason. Zeova servi bann promes ki ena dan Labib pou rekonfort nou.” Twa osi, to bizin fer zefor pou rekonfort lezot gras-a bann promes ki ena dan Labib. Plis to konpran seki Labib dir lor soufrans, plis to pou sir ki sa bann lansegnman-la zot vre. Lerla, ninport kotsa to ete, ki to dan lekol ouswa dan travay, to pou kapav ansegn lezot kifer nou soufer ek seki Zeova pou fer biento pou tir tou soufrans.b

17. Kouma Zeova ed nou kan lezot tret nou dan enn move fason?

¹⁷ Malerezman, tanki Satan “sef sa lemond-la,” nou pou kontign soufer. Selman, nou sir ki nou pou ena enn zoli lavenir parski Zeova inn promet ki Li pou ed nou depi aster-la mem, Li pou detrir Satan, ek Li pou tir tou bann kitsoz ki fer nou soufer. (Zan 12:31) Dan Labib, Zeova pa zis dir nou kifer ena sa kantite soufrans-la, me Li osi dir nou seki Li resanti kan Li trouv nou soufer. (Ps. 34:17-19) Gras-a Zezi, Zeova ansegn nou kouma nou bizin reazir kan lezot tret nou dan enn move fason ek osi kouma so Rwayom pou tir tou soufrans. (2 Pier 3:13) Alor, anou fer tou seki nou kapav pou pres bon nouvel lor Rwayom Bondie, ek anou kontign atann avek pasians lepok kot later pou ranpli ar “lazistis ek ladrwatir.”—Iza. 9:7.