1925—San-t-an Inn Pase

ZOT TI BIZIN KONTIGN ATANN

Boukou Etidian Labib ti panse ki later ti pou vinn enn paradi an 1925. Kifer zot ti pans sa? Frer Albert Schroeder, ki plitar ti vinn enn manb Komite Santral, ti dir: “Nou ti panse ki an 1925, bann ki ti ena lesperans pou al dan lesiel, ti pou mont dan lesiel, ek ki bann zom fidel kouma Abraam ek David, ti pou resisite pou diriz later.” Alor, kan sa pa ti arive, sertin frer ek ser ti bien dekouraze.—Prov. 13:12.

Selman, mem si zot ti dekouraze, laplipar Etidian Labib ti kontign prese. Zot ti konpran ki seki ti pli inportan, se fer bann dimounn konn Zeova. Par exanp, anou gete kouma zot ti servi bann stasion radio pou pres ar boukou dimounn.

BANN TEMWIN TI ARANZ PLI BOUKOU STASION RADIO

An 1924, boukou dimounn ti pe ekout stasion radio WBBR. Akoz sa, an 1925, bann Etidian Labib ti aranz enn stasion radio pli pwisan pre ar Chicago, dan Illinois. Sa nouvo stasion-la ti apel WORD (ki vedir parol). Ralph Leffler, ki ti enn inzenier ek ki ti donn enn koudme pou aranz sa stasion-la, ti dir: “Bann aswar kot ti fer bien fre, bann dimounn ki ti res dan diferan landrwa ti ekout sa stasion-la.” Par exanp, enn fami ki ti res dan Pilot Station, dan Alaska, ki trouv plis ki 5,000 km ar stasion-la, ti ekout enn parmi bann premie program ki ti pase lor radio. Lerla, zot ti ekrir enn let pou remersie bann ki ti travay lor stasion WORD, pou sa zoli program spiritiel la.

Latour Degard 1^e Desam 1925 ti explike kifer boukou dimounn ti pe reisi ekout sa radio-la. Sa lartik-la dir: “Sa stasion radio la ti enn parmi bann stasion pli pwisan dan Letazini. Bann dimounn ki ti res lor lakot les ek lwes Letazini, ek mem bann dimounn ki ti res dan Kiba ek dan bann rezion pli lwin dan lenor Alaska, ti kapav ekout nou bann program. Gras-a sa stasion-la, boukou dimounn ki zame pa ti tann koz lor laverite, ti anvi konn plis lor la.”

Sa lepok-la, bann Etidian Labib ti anvi servi bann program lor radio pou pres bon nouvel dan Kanada. An 1924, ti aranz stasion radio CHUC dan Saskatoon, dan Saskatchewan. Sa stasion-la ti enn parmi bann premie stasion radio dan Kanada ki ti koz lor bann kitsoz spiritiel. Me an 1925, bann frer ti bizin rod enn pli gran plas pou sa stasion radio la. Alor, Sosiete Watch Tower ti vinn proprieter sa stasion radio la ek li ti aste Regent Building, enn vie teat dan Saskatoon. Li ti fer renovasion sa teat-la pou ki stasion radio la al laba.

Gras-a sa stasion radio la, boukou dimounn ki ti pe res dan bann ti lavil ek vilaz dan Saskatchewan ti tann bon nouvel pou premie fwa. Par exanp, dan enn lavil bien izole, enn madam ki apel Madam Graham, ti ekout enn program ki ti pase lor radio, ek li ti avoy enn let pou demann bann piblikasion. Frer George Naish ti dir ki sa madam-la ti bizin led, ek seki li ti ekrir dan let-la ti paret telman irzan ki bann frer ti avoy li tou bann liv Études des Écritures. Bien-vit, sa madam-la ti koumans partaz seki li ti pe aprann ar bann dimounn ki ti res bien lwin.

ENN VERITE INPORTAN

Dan Latour Degard 1^e Mars 1925, ti pibliye enn lartik bien inportan, ek so tem ti « La naissance de la nation ». Kifer sa lartik-la ti bien inportan? Parski sa ti fer inpe letan ki bann Etidian Labib ti kone ki Satan ena enn lorganizasion. Zot ti kone ki Satan ti kontrol bann demon ki dan lesiel, fos relizion, ek sistem politik ek komersial ki ena lor later. Selman, gras-a sa lartik-la, “esklav fidel ek saz” ti ed bann frer ek ser pou konpran ki Zeova osi ena enn lorganizasion. Lorganizasion Zeova li bien diferan ar lorganizasion Satan. Bann ki soutenir lorganizasion Zeova, zot opoz zot ar Satan ek bann ki swiv li. (Mat. 24:45) Anplis, sa esklav-la ti explike ki Rwayom Bondie ti etabli an 1914 ek ki sa lane-la, akoz ‘enn lager ki ti eklate dan lesiel,’ Satan ek so bann demon ti gagn pouse depi lesiel ek aster-la zot lor later.—Rev. 12:7-9.

Sertin Etidian Labib pa ti dakor avek sa nouvo explikasion-la. Selman, lartik-la ti dir: “Si enn kikenn ki pe lir sa Latour Degard la li pa dakor avek sa nouvo explikasion-la, li bizin ena pasians ek fer Zeova konfians, ek osi kontign servi Zeova avek fidelite.”

Tom Eyre, enn kolporter (ki aster-la nou apel enn pionie) ki ti res Langleter, ti explike seki laplipar bann Etidian Labib ti resanti kan zot ti lir sa lartik-la. Li ti dir: “Bann frer ti extra kontan kan zot ti gagn sa lexplikasion Revelasion 12 la. Kan nou ti konpran ki Rwayom Bondie ti koumans dirize dan lesiel, nou ti extra kontan pou partaz sa bon nouvel-la avek lezot. Sa ti fer nou anvi pres plis, ek sa ti ed nou pou trouve ki Zeova ti pou fer bann kitsoz extraordiner dan lavenir.”

ZOT TI KOZ LOR ZEOVA

Azordi, bann Temwin Zeova souvan koz lor verse Izai 43:10, ki dir: “Ala seki Zeova dir, ‘Zot mo bann temwin, Wi, mo serviter ki mo’nn swazir.’” Selman, avan lane 1925, bien rar nou ti servi sa verse-la dan nou bann piblikasion. Me sa ti sanze, parski an 1925, dan 11 magazinn Latour Degard ti koz lor Izai 43:10 ek 12.

Ver lafin Out 1925, bann Etidian Labib ti asiste enn lasanble dan Indianapolis, dan Indiana. Frer Rutherford ti ekrir enn mesaz pou akeyir bann delege ek ti fer inprim sa mesaz-la dan program lasanble. Li ti dir: “Nou’nn vinn sa lasanble-la pou nou gagn . . . lafors ar Lesegner pou ki nou ena enn pli gran dezir pou koz lor Zeova dan predikasion.” Pandan sa wit zour lasanble-la, ti ankouraz tou bann asistan pou sezi sak lokazion ki zot ti gagne pou koz lor Zeova.

Samdi le 29 Out, Frer Rutherford ti fer enn diskour, ki ti ena tem, “Inn Ler pou Azir.” Dan sa diskour-la, li ti explike kifer nou travay predikasion ti inportan. Li ti dir: “Zeova dir so pep . . . : ‘Zot mo bann temwin ek momem Bondie.’” Apre sa, li ti donn tou bann asistan enn lord ek li ti dir zot sa bann parol bien for la: “‘Met enn signal lor enn poto pou bann pep.’ Se zis bann dimounn ki gagn led lespri sin ki kapav koz lor Zeova parski zot so bann serviter.”—Iza. 43:12; 62:10.

Apre so diskour, Frer Rutherford ti lir enn dokiman. Lor dokiman-la ti ena enn mesaz ki ti apel « Message d’espérance ». Lasistans ti dakor avek sa mesaz ki ti dir ki se zis gras-a Rwayom Bondie ki nou kapav gagn “bann benediksion kouma ena enn zoli lavi, lape, lasante, liberte, vre lavi ek lazwa pou touletan.” Plitar, ti tradir sa mesaz-la dan plizir lang ek ti inprim li kouma enn trak. Ti distribie anviron 40 milyon kopi sa trak-la.

Mem si se plizir lane apre ki bann Etidian Labib ti sanz zot nom pou vinn “Bann Temwin Zeova,” kanmem sa zot ti pe koumans konpran ki kantite sa ti inportan pou koz lor nom Zeova.

ZOT TI KOUMANS VIZIT BANN DIMOUNN KI TI INTERESE

Parski ti pe koumans ena pli boukou Etidian Labib dan lemond, lorganizasion ti ankouraz bann frer ek ser pou re-al get bann dimounn ki ti interese ar bon nouvel. Apre kanpagn ki ti fer pou distribie sa trak-la, Bulletina ti donn sa instriksion-la: “Re-al vizit bann dimounn avek ki zot inn kit trak « Message d’espérance ».”

Dan Bulletin Zanvie 1925, ti ena enn rapor ki enn Etidian Labib ti fer. Sa etidian-la ti res dan Plano, dan Texas. Li ti dir: “Nou extra kontan parski kan nou retourn dan bann landrwa kot nou’nn prese avan, nou gagn bann pli bon rezilta ki kan nou pres dan bann nouvo landrwa. Pandan sa dis dernie lane-la, nou’nn pres sink fwa dan enn ti lavil ki dan nou teritwar. . . . Pa tro lontan, Ser Hendrix ek mo mama inn re-al pres laba ankor, ek zot inn distribie pli boukou liv ki avan.”

Dan Panama, enn kolporter ti dir: “Boukou dimounn ki ti refiz ekout mwa premie fwa, ti sanz zot latitid kan mo ti re-al get zot enn deziem ouswa enn trwaziem fwa. Sa lane-la, mo’nn pas maximum mo letan pou re-al vizit bann dimounn ki mo ti zwenn avan, ek mo’nn gagn bann zoli rezilta avek sertin parmi zot.”

SEKI ZOT TI POU FER DAN LAVENIR

Ver lafin lane 1925, Frer Rutherford ti ekrir enn let tou bann pionie ek ti explik zot seki zot ti reisi fer dan predikasion sa lane-la, ek osi seki zot ti pou bizin fer apre. Li ti dir: “Pandan sa lane-la, zot ti ena privilez pou rekonfort boukou dimounn ki ti tris. Sa travay-la inn fer zot gagn boukou lazwa. . . . An 1926, zot pou gagn boukou lokazion pou koz lor Bondie ek so Rwayom, ek pou montre kisann-la so bann serviter. . . . Alor, anou kontign servi nou lavwa pou loue ansam nou Bondie ek nou Lerwa.”

Ver lafin lane 1925, bann frer ti pe organize pou agrandi Betel Brooklyn. An 1926, zot ti pou koumans pli gran konstriksion ki lorganizasion ti pou fer.