De Nouvo Manb Komite Santral

LE 5 OKTOB 2024, ti fer enn lanons spesial dan renion aniel: Frer Jody Jedele ek Frer Jacob Rumph inn vinn manb Komite Santral bann Temwin Zeova. Sa de frer-la pe servi Zeova avek fidelite pandan boukou lane.

Frer Jedele inn ne dan Missouri, dan Letazini, ek li’nn grandi dan laverite. So fami ti pe res dan enn landrwa kot pa ti ena boukou Temwin Zeova. Gras-a sa, Jody ti gagn lokazion pou zwenn bann frer ek ser ki ti sorti dan lezot landrwa ek ki ti vinn prese dan so landrwa. Lamour ek linite ki ti ena parmi sa bann frer ek ser la ti ena enn gran lefe lor li. Jody ti pran batem kan li ti enn adolesan, le 15 Oktob 1983. Li ti kontan prese, ek kan li ti fini lekol, li ti vinn pionie permanan an Septam 1989.

Kan Jody ti zenn, so bann paran ti amenn li ek so ser pou vizit Betel. Sa bann vizit-la ti motiv Jody ek so ser pou fixe lobzektif pou servi dan Betel, ek toule-de ti reisi realiz sa lobzektif-la. Frer Jedele ti ariv Betel Wallkill an Septam 1990. O-koumansman, li ti travay dan Departman Netwayaz ek apre sa dan Servis Medikal.

Sa lepok-la, ti ena boukou progre dan bann lasanble lang Espagnol ek ti bien bizin bann frer pou ede dan sa bann lasanble-la. Alor, Frer Jedele ti al servi dan enn sa bann lasanble-la ek li ti koumans aprann Espagnol. Inpe apre, li ti zwenn ar Damaris, enn ser ki ti pionie ek ki ti pe servi dan mem sirkonskripsion ki li. Avek letan, zot inn marye, ek Damaris osi inn al servi dan Betel.

An 2005, zot ti kit Betel pou pran swin zot bann paran, ki ti pe servi Zeova avek fidelite. Sa lepok-la, Frer ek Ser Jedele ti pe servi kouma pionie permanan. Frer Jedele ti enn formater pou Lekol Pionie, ek li ti servi dan Komite Led Medikal ek dan Komite Konstriksion Rezional.

An 2013, Frer ek Ser Jedele ti gagn linvitasion pou retourn Betel pou travay lor proze konstriksion Warwick. Ek apre sa, zot inn osi servi dan Patterson ek dan Wallkill. Frer Jedele inn travay dan Departman Lokal Devlopman/Konstriksion ek dan Departman Mondial Linformasion Medikal. An Mars 2023, li’nn koumans servi kouma asistan dan Komite Servis. Kan li reflesi lor tou bann lafektasion ki li’nn gagne, li dir: “Kan to gagn enn nouvo lafektasion, parfwa sa kapav fer twa gagn per. Me se lerla mem ki to bizin rapel ki li inportan ki to kont lor Zeova, parski se Limem ki pou donn twa kapasite pou fer ninport ki kitsoz ki Li demann twa.”

Frer Rumph inn ne dan Californie, dan Letazini. Kan li ti tipti, so mama ti inaktif. Me kanmem sa, li ti fer zefor pou ansegn Jacob bann verite ki ena dan Labib. Toule lane, Jacob ti al kot so granmer, ki ti enn ser ki fidel. So granmer ti ed li pou konn plis lor Labib, ek kan li ti ena 13 an, Jacob ti demann pou etidie Labib. Li ti pran batem kan li ti enn adolesan, le 27 Septam 1992. So mama ti rekoumans prese ek asiste bann renion. So papa, so frer, ek so ser ti fer bann progre ek zot osi zot ti pran batem.

Kan li ti zenn, Jacob ti trouve kouma bann pionie ti zwaye. Alor, kan li ti fini lekol, li ti koumans fer pionie an Septam 1995. An lan 2000, ti li al Ekwater, enn pei kot ti bizin plis proklamater. Laba, li ti zwenn Inga, enn pionie ki ti sorti Kanada, ek avek letan zot ti marye. Apre zot maryaz, zot ti al servi dan enn ti lavil dan Ekwater kot ti ena zis enn ti group proklamater. Azordi, ena enn gran lasanble laba.

Avek letan, Frer ek Ser Rumph ti vinn bann pionie spesial ek apre sa zot ti servi dan servis sirkonskripsion. An 2011, zot ti gagn linvitasion pou fer 132^em klas Lekol Galaad. Apre lekol, zot ti al servi dan diferan landrwa dan lemond ek zot inn fer diferan form servis, kouma par exanp servis Betel, servis misioner, ek servis sirkonskripsion. Frer Rumph inn osi gagn privilez pou fer formater pou Lekol pou Bann Evanzelizater Rwayom Bondie.

Akoz pandemi COVID-19, Frer ek Ser Rumph ti bizin retourn Letazini. Bann frer ti invit zot pou vinn Betel Wallkill, kot Frer Rumph ti gagn enn formasion pou Departman Servis. Avek letan, zot ti retourn dan biro nasional Ekwater, kot Frer Rumph ti servi kouma enn manb Komite Biro Nasional. An 2023, zot ti al Warwick. Ek an Zanvie 2024, Frer Rumph ti koumans servi kouma asistan dan Komite Servis. Kan Frer Rumph mazinn bann diferan lafektasion ki li’nn gagne, li dir: “Landrwa kot nou servi Zeova, se pa sa ki inportan, seki pli inportan se bann dimounn avek ki nou pe servi Li.”

Nou vremem bien kontan travay dir ki sa bann frer-la pe fer, ek nou “kontign ena enn gran lestim pou bann zom koumsa.”—Fil. 2:29.