Zezi—Nou Gran Pret ki Ena Boukou Konpasion

1-2. (a) Kifer Zeova inn avoy Zezi lor later? (b) Ki nou pou examine dan sa lartik-la? (Ebre 5:7-9)

INN gagn apepre 2,000 an, Zeova inn avoy so Garson ki Li bien kontan lor later. Kifer Li’nn fer sa? Enn parmi bann rezon se pou liber bann dimounn ar pese ek lamor, ek osi pou regle tou bann problem ki’nn arive akoz Satan. (Zan 3:16; 1 Zan 3:8) Zeova ti kone osi ki lavi ki Zezi ti pou viv lor later ti pou prepar li pou li vinn enn Gran Pret ki konpran nou ek ki ena boukou konpasion. Zezi ti vinn Gran Pret apre so batem lane 29 Nou Lepok.a

² Dan sa lartik-la, nou pou trouve kouma lavi ki Zezi inn viv lor later, inn prepar li pou vinn enn Gran Pret ki ena boukou konpasion. Li bien inportan ki nou konpran sa. Kifer? Parski gras-a sa, li pou pli fasil pou nou priye Zeova ek nou vinn pros ar Li, sirtou kan nou dekouraze akoz nou bann febles ouswa bann pese ki nou fer.—Lir Ebre 5:7-9.

GARSON KI BONDIE BIEN KONTAN VINN LOR LATER

3-4. Ki bann sanzman Zezi inn bizin fer pou li vinn lor later?

³ Boukou parmi nou kitfwa inn bizin fer bann sanzman dan zot lavi. Par exanp, kitfwa nou’nn bizin kit nou pei, nou lakaz, nou bann fami, ek nou bann kamarad. Sa bann sanzman-la kapav bien difisil pou fer! Selman, personn parmi nou pa’nn fer bann sanzman kouma seki Zezi ti bizin fer. Dan lesiel, li ti anz pli inportan ki Zeova ena. Li ti touletan ere ek li ti lame drwat Zeova, ek Zeova ti bien kontan li. (Ps. 16:11; Prov. 8:30) Pourtan, Filipien 2:7 dir ki volonterman “li ti kit tou,” setadir li ti kit gran pozision ki li ti ena dan lesiel, pou li vinn viv avek bann dimounn ki inparfe lor later.

⁴ Mazinn osi bann premie lane ki Zezi ti lor later. Zezi ti ne dan enn fami pov. Nou konn sa parski so bann paran ti kapav donn zis de ti zwazo kouma sakrifis dan tanp. (Lev. 12:8; Lik 2:24) Kan move Lerwa Erod ti aprann ki Lemesi ti ne, li ti anvi touy li, ek pou Zezi gagn lavi sov, so fami inn bizin sove ek al res Lezip. (Mat. 2:13, 15) Lavi ki Zezi ti ena lor later, ti bien diferan ar lavi ki li ti ena dan lesiel!

5. Ki kitsoz Zezi ti aprann kan li ti lor later, ek kouma sa finn prepar li pou li vinn enn Gran Pret ki ena boukou konpasion? (Get zimaz osi.)

⁵ Kan Zezi ti lor later, li ti trouve kouma bann dimounn ki ti otour li ti pe soufer. Li ti aprann osi seki bann dimounn resanti kan enn kikenn ki zot kontan mor. Sirman li ti ena bann kamarad ek bann fami ki ti mor, ek parmi zot ti ena so papa adoptif, Zozef. Pandan so laktivite predikasion, li ti zwenn boukou dimounn ki ti malad, ki ti aveg, ki pa ti kapav marse, ek osi bann paran ki zot zanfan inn mor. Zezi ti montre boukou konpasion anver zot. (Mat. 9:2, 6; 15:30; 20:34; Mark 1:40, 41; Lik 7:13) Li vre ki, kan li ti dan lesiel, Zezi ti trouve kouma bann dimounn ti pe soufer. Selman, aster-la ki li ti enn imin ek ki li ti lor later, li ti konpran pli bien seki bann dimounn resanti kan zot soufer. (Iza. 53:4) Gras-a so lavi lor later, Zezi inn kapav konpran nou sitiasion, nou santiman, nou bann laper, ek nou bann soufrans. Ek limem li’nn viv sertin parmi sa bann kitsoz-la, kouma par exanp tristes, fatig, ek langwas.

ZEZI TI ENA BOUKOU KONPASION POU BANN DIMOUNN

6. Dan profesi Izai, ki nou aprann lor konpasion ki Zezi ti pou ena pou bann dimounn? (Izai 42:3)

⁶ Kan li ti prese, Zezi ti montre boukou konpasion anver bann dimounn ki lezot ti tret dan enn move fason. Kan li ti fer sa, li ti realiz profesi ki ena dan liv Izai. Bann Lekritir Ebre parfwa konpar bann dimounn ki for ek ki ris, ar enn zardin ki bien fertil ouswa ar bann gran pie. (Ps. 92:12; Iza. 61:3; Zer. 31:12) Parkont, profet Izai ti konpar bann dimounn ki ti mizer ek ki lezot ti tret dan enn move fason, ar ‘bann lerb ki kourbe ek enn lames ki pe al tengn,’ savedir ki bann dimounn ti konsider zot kouma bann nanye ditou. (Lir Izai 42:3) Zeova ti servi sa bann lexanp-la pou montre lamour ek konpasion ki Zezi ti pou ena pou bann ti-dimounn; bann dimounn ki pa ti ena okenn valer pou lezot.

7-8. Kouma Zezi ti realiz profesi Izai?

⁷ Matie ti montre ki Zezi ti realiz profesi Izai kan li ti ekrir: “Li pa pou kas okenn long lerb ki deza kourbe, ek li pa pou tengn enn lames ki deza pe al tengn.” (Mat. 12:20) Zezi ti fer boukou mirak pou ed bann dimounn ki lezot ti tret dan enn move fason; Sa bann dimounn-la ti koumadir ‘bann lerb ki ti kourbe.’ Li ti fer bann mirak osi pou ed bann dimounn ki ti panse zot lavi pa ti pou ameliore; Sa bann dimounn-la ti koumadir bann ‘lames ki ti pe al tengn.’ Parmi sa bann dimounn-la, ti ena enn zom ki ti ena lalep. Sa zom-la kitfwa ti panse ki pa ti ena okenn lespwar pou li geri ek ki zame li pa ti pou reviv ansam ar so fami ek so bann kamarad. (Lik 5:12, 13) Zezi ti geri osi enn zom ‘ki ti sourd ek ki ti gagn difikilte pou koze.’ Mazine seki sa zom-la ti resanti kan lezot ti pe koze otour li me ki li pa ti pe konpran nanye! (Mark 7:32, 33) Anou get enn lot kitsoz ki Zezi ti fer.

⁸ Dan lepok Zezi, bann Zwif ti panse ki kan enn kikenn li malad ouswa andikape, sa ti enn pinision pou bann pese ki li ouswa so bann paran ti fer. (Zan 9:2) Akoz sa krwayans-la, bann Zwif ti tret dan enn move fason bann dimounn ki ti malad ek ki ti andikape. Me kan Zezi ti geri sa bann dimounn-la, sa ti montre zot ki Bondie ti gagn zot traka, ek sa ti redonn zot enn lespwar. Ki sa aprann nou lor bann santiman ki Zezi ena pou nou azordi?

9. Kouma Ebre 4:15, 16 montre ki nou Gran Pret vremem ena konpasion pou bann dimounn inparfe?

⁹ Lir Ebre 4:15, 16. Nou kapav sir ki Zezi konpran nou ek ki li pou touletan montre konpasion anver nou. Li konpran nou soufrans ek nou bann santiman. Dan sa verse-la, mo Grek ki’nn servi pou “konpran” vedir ki Zezi partaz nou lapenn ek nou tristes. Ek bann mirak ki Zezi ti fer ti montre sa! Zezi ti fer bann mirak, pa parski li ti bizin fer li, me parski li ti vremem gagn traka lezot ek li ti anvi ed zot. Par exanp, kan Zezi ti geri sa zom ki ti ena lalep la, li ti kapav fer sa mirak-la delwin. Selman, li ti swazir pou tous sa zom-la pou geri li. Kitfwa sa fer lontan ki personn pa ti tous sa zom-la! Ek kan Zezi ti geri sa zom ki ti sourd la, li ti montre konsiderasion anver li kan li ti amenn li dan enn landrwa trankil pou geri li, pou ki li pa tann tapaz ki lafoul ti pe fer. Kan enn Farizien ti maltret enn madam ki ti repanti parski li ti lav lipie Zezi ar so bann larm ek li ti souy zot ar so seve, Zezi ti defann sa madam-la. (Mat. 8:3; Mark 7:33; Lik 7:44) Zezi pa ti rezet bann ki ti soufer, ki ti malad, ouswa ki ti fer pese. Okontrer, li ti akeyir zot ek li ti ena boukou konpasion pou zot. Nou kapav sir ki Zezi pou fer parey pou nou azordi!

NOU SWIV LEXANP NOU GRAN PRET AZORDI

10. Kouma nou kapav ed bann sourd ek bann aveg pou vinn pros ar Zeova? (Get zimaz osi.)

¹⁰ Nou vremem anvi swiv lexanp Zezi, akoz sa nou fer zefor pou montre konpasion ek lamour anver lezot. (1 Pier 2:21; 3:8) Mem si nou pa kapav fer bann mirak pou geri bann sourd ek bann aveg, nou kapav ed zot pou aprann konn Zeova ek pou vinn pros avek li. Par exanp, azordi nou bann piblikasion disponib dan plis ki 100 langaz sign. Ek pou bann dimounn ki aveg ek malvwayan, nou ena bann piblikasion dan plis ki 60 lang ek bann video avek deskripsion odio dan plis ki 100 lang. Gras-a sa bann piblikasion-la, bann sourd ek bann aveg pe reisi vinn pros ar Zeova ek Zezi.

11. Kouma lorganizasion Zeova montre ki li ena konpasion parey kouma Zezi? (Zistwar Bann Zapot 2:5-7, 33) (Get zimaz osi.)

¹¹ Lorganizasion Zeova fer boukou zefor pou ed tou kalite dimounn pou vinn pros ar Zeova. Apre so rezireksion, Zezi ti avoy lespri sin lor so bann disip pou ki zot partaz bon nouvel ar bann dimounn ki ti vinn Zerizalem zour fet Lapantkot. Anplis, sakenn ti pe tann sa bon nouvel-la “dan so prop lang.” (Lir Zistwar Bann Zapot 2:5-7, 33.) Azordi, gras-a Zezi ki pe diriz lorganizasion Zeova, nou pe fer bann piblikasion dan plis ki 1,000 lang. Nou pe mem fer bann piblikasion dan bann lang ki bien tigit dimounn koze. Par exanp, ena sertin lang lokal ki bien tigit dimounn koze dan lenor ek dan lesid Lamerik. Kanmem sa, ena bann piblikasion dan plis ki 160 sa bann lang-la, pou fer sir ki maximum dimounn kapav tann koz lor bon nouvel. Nou fer osi bann piblikasion dan plis ki 20 lang Romani. Bann dimounn ki koz sa bann lang-la, zot res dan les ek dan sid-es Lerop, ek bien souvan bann dimounn denigre zot ek persekit zot. Gras-a bann piblikasion ki fer dan sa bann lang-la, plizir milye dimounn inn koumans servi Zeova.

12. Ki kitsoz ankor lorganizasion Zeova fer pou bann dimounn azordi?

¹² Lorganizasion Zeova pa zis ed bann dimounn pou tann koz lor bon nouvel, me li osi ed bann dimounn ki pe soufer akoz bann katastrof natirel. Par exanp, bann milye frer ek ser port zot volonter pou ed bann ki’nn pas par bann katastrof natirel. Dan sa bann landrwa-la, nou lorganizasion fer an-sort osi ki bann dimounn kapav rasanble dan enn plas pou ki zot kapav aprann plis lor lamour ki Zeova ena pou zot.

NOU GRAN PRET KAPAV ED TWA

13. Kouma Zezi kapav ed twa azordi?

¹³ Zezi, li nou bon berze, ek li fer an-sort ki nou gagn tou seki nou bizin pou ki nou kapav res pros ar Zeova. (Zan 10:14; Efe. 4:7) Parfwa, akoz bann sitiasion ki nou viv, kitfwa nou santi nou kouma enn lames ki pe al tengn ouswa kouma enn lerb ki kourbe. Eski to dekouraze parski to ena enn maladi grav, to’nn fer enn erer, ouswa to ena enn problem ar enn kikenn dan lasanble? Akoz to pe soufer, kitfwa to gagn difikilte pou res konsantre lor bann promes ki Zeova inn fer konsernan lavenir. Selman, fode pa to bliye ki Zezi trouv to sitiasion ek li konpran to santiman. Ek parski li ena konpasion pou twa, li anvi ed twa. Par exanp, li kapav servi lespri sin pou donn twa lafors kan to dekouraze. (Zan 16:7; Tit 3:6) Li kapav osi servi bann ansien ek bann lezot frer ek ser pou ankouraz twa, soutenir twa, ek ed twa.—Efe. 4:8.

14. Kan nou dekouraze, ki nou kapav fer?

¹⁴ Si to dekouraze, pa bliye ki Zezi li nou Gran Pret, ek reflesi osi lor seki sa vedir pou twa. Rapel osi ki Zeova inn avoy Zezi lor later pa zis pou donn so lavi kouma enn ranson, me osi pou ed li konpran pli bien bann problem ki bann dimounn gagne. Kan nou dekouraze akoz bann pese ki nou fer ouswa akoz nou bann febles, Zezi anvi ed nou ek li pre pou ed nou “dan ler ki bizin.”—Ebre 4:15, 16.

15. Ki finn ed enn frer pou retourn dan lasanble?

¹⁵ Kan nou fer zefor pou rod ek pou ed bann dimounn ki’nn kit Zeova, Zezi gid nou ver zot. (Mat. 18:12, 13) Anou get lexanp Stefano.b Apre 12 an ki li ti nepli form parti dan lasanble, Stefano ti desid pou asiste enn renion. Li dir: “Sa pa ti fasil pou mwa, me mo ti anvi rekoumans servi Zeova ansam ar mo bann frer ek ser. Bann ansien ki ti vinn get mwa, ti met mwa bien alez. Parfwa, mo ti santi mwa bien tris ek dekouraze parski mo ti kit Zeova. Selman, bann frer ti rapel mwa ki Zeova ek Zezi pa anvi ki mo bes lebra. Kan mo ti reintegre, lasanble ti bien akeyir mwa ek mo fami. Plitar, mo madam ti koumans etidie Labib, ek zordi, mwa ek mo fami, nou pe servi Zeova ansam.” Kan nou Gran Pret trouv nou ed bann ki’nn repanti pou retourn dan lasanble, nou kapav sir ki li extra kontan!

16. Kifer nou rekonesan ki Zezi nou Gran Pret?

¹⁶ Kan li ti lor later, Zezi ti ed boukou dimounn “dan ler ki bizin.” Azordi osi, nou sir ki li pou ed nou kan nou bizin led. Anplis, dan lemond nouvo, Zezi pou ed tou bann dimounn ki obeir Zeova, li pou liber zot ar pese ek zot pou ena enn lavi parfe. Nou bien rekonesan anver nou Bondie, Zeova, parski Li’nn telman kontan nou ki Li’nn etabli Zezi kouma nou Gran Pret, ek Zezi li enn Gran Pret ki ena boukou konpasion!