“ To Enn Dimounn Ki Ena Boukou Valer”!

1-2. Ki kitsoz kapav ed nou pou konpran ki nou ena boukou valer pou Zeova?

POU Zeova, so bann serviter ena boukou valer. Selman, sertin parmi zot pa krwar ki Li vremem kontan zot. Kitfwa zot pans koumsa parski enn kikenn inn fer zot santi ki zot pena valer. Eski sa finn deza ariv twa? Si wi, ki kitsoz kapav ed twa pou konpran ki to ena boukou valer pou Zeova?

² Enn kitsoz ki kapav ed twa, se kan to reflesi lor bann zistwar ki ena dan Labib ki montre kouma Zeova trouv bann dimounn. Zezi, Zeova so Garson, ti ena respe pou bann dimounn ek li ti tret zot avek zantiyes. Kan li ti fer sa, Zezi ti montre sa bann dimounn ki ti panse zot pa vo nanye la, ki zot ena boukou valer pou li ek pou so Papa. (Zan 5:19; Ebre 1:3) Dan sa lartik-la, nou pou gete (1) kouma Zezi ti ed bann dimounn pou konpran ki zot ti ena boukou valer pou Zeova, ek (2) kouma nou kapav vremem sir ki nou ena boukou valer pou Zeova.—Aze 2:7.

KOUMA ZEZI TI ED BANN DIMOUNN POU KONPRAN KI ZOT ENA BOUKOU VALER?

3. Kan bann dimounn dan Galile ti rod led Zezi, kouma li ti tret zot?

³ Kan Zezi ti pe prese dan Galile, boukou dimounn ti vini pou ekout li ek pou ki li geri zot. Kan Zezi ti trouv zot, “li ti gagn pitie pou zot, parski ti maltret zot ek ti rezet zot kouma bann mouton ki pena berze.”(Mat. 9:36) Bann sef relizie Zwif pa ti pran zot kont ek ti tret zot kouma bann dimounn ki inferyer. Bann-la ti mem dir ki zot ti “bann dimounn modi.” (Zan 7:47-49) Parkont, Zezi ti pran letan pou ansegn zot ek pou geri zot bann maladi. Sa ti montre ki zot ti ena boukou valer pou Zezi. (Mat. 9:35) Anplis, pou ki li kapav ed pli boukou dimounn, Zezi ti form so bann disip pou prese ek li ti donn zot pouvwar pou “geri bann malad.”—Mat. 10:5-8.

4. Ki leson nou aprann ar fason ki Zezi ti tret bann dimounn ki ti pe ekout li?

⁴ Zezi ti tret bann dimounn ki ti ekout li, avek respe ek zantiyes. Kan li ti fer sa, li ti montre ki sa bann dimounn ki lezot ti konsider kouma inferyer la, ti ena boukou valer pou li ek pou so Papa. Si to pe servi Zeova me to panse ki to pena valer pou Li, reflesi lor kouma Zezi ti tret bann dimounn ki ti pe ekout li. Si to fer sa, sa pou ed twa pou trouve ki kantite valer to ena pou Zeova.

5. Ki kitsoz nou kone lor sa madam ki Zezi ti zwenn dan Galile la?

⁵ Zezi pa ti zis ansegn bann group dimounn, me li ti osi ansegn ek ed bann dimounn personelman. Par exanp, kan li ti dan Galile, li ti zwenn “enn madam ki ti pe perdi disan pandan 12 an.” (Mark 5:25) Dapre Lalwa, sa madam-la ti inpir, ek ninport kisann-la ki ti tous li, ti pou vinn inpir. Akoz sa, li pa ti kapav frekant lezot ek li ti pas boukou letan tousel dan so kwin. Li pa ti kapav osi ador Zeova ansam ar lezot dan bann sinagog ek dan bann fet. (Lev. 15:19, 25) Sa madam-la pa ti zis soufer lor plan fizik, me li ti osi soufer lor plan emosionel parski kitfwa li ti panse ki li pa ti ena valer.—Mark 5:26.

6. Ki kitsoz sa madam-la ti fer pou ki li geri?

⁶ Sa madam-la ti pe extra soufer ek li ti anvi ki Zezi geri li. Selman, li pa ti demann Zezi pou geri li. Kifer? Parski kitfwa li ti gagn onte, ouswa li ti anbarase akoz so maladi. Kitfwa li ti per osi tansion Zezi kriy ar li parski li ti inpir ek ki li pa ti gagn drwa vinn parmi lafoul. Akoz sa, li ti zis tous linz Zezi. Li ti sir ki sa ti pou geri li. (Mark 5:27, 28) Sa madam-la ti ena enn gran lafwa, ek vremem li ti geri. Kan sa ti arive, Zezi ti demann lafoul kisann-la ti tous li, ek lerla madam-la ti dir li seki li ti fer. Kouma Zezi ti reazir?

7. Kouma Zezi ti tret sa madam ki ti pe soufer la? (Mark 5:34)

⁷ Zezi ti tret sa madam-la avek zantiyes ek respe. Li ti trouve ki madam-la “ti pe per ek ti pe tranble.” (Mark 5:33) Zezi ti konpran so santiman ek li ti rasir li. Li ti mem apel li, “mo tifi.” Sa lexpresion-la montre ki Zezi pa ti zis montre respe anver sa madam-la, me li ti osi montre lamour ek zantiyes anver li. (Lir Mark 5:34.) Se sel fwa dan Labib kot Zezi apel enn madam “mo tifi,” ek kitfwa li ti servi sa lexpresion-la parski li ti trouve ki madam-la ti pe gagn extra per. Ki sa madam-la ti resanti apre ki Zezi ti koz ar li dan sa fason-la? Sirman li ti extra kontan parski Zezi ti tret li avek amour ek zantiyes. Zezi ti osi rekonfort sa madam-la pou ki li pa santi li koupab parski li ti dan lafoul ek ki li ti tous so linz. Zezi ti ed sa madam-la pou trouv limem parey kouma Zeova trouv li, setadir kouma so tifi ki ena boukou valer pou Li.

8. Ki bann difikilte Maria ti gagne?

⁸ Azordi osi, sertin serviter Zeova ena bann problem lasante ki fer zot deprime ek fer zot panse ki zot pena valer. Anou get lexanp Maria,a enn pionie permanan ki res Brezil. Depi so nesans, li pena lipie ek li pena lame gos. Li dir: “Akoz mo andikap, mo bann kamarad lekol ti boufonn mwa ek zot ti dir mwa bann kitsoz bien blesan. Mem mo fami ti fer mwa santi ki mo pena valer.”

9. Ki kitsoz inn ed Maria pou konpran ki li ena boukou valer pou Zeova?

⁹ Ki kitsoz ti ed Maria? Kan li ti vinn enn Temwin Zeova, bann frer ek ser ti rekonfort li, ek zot ti ed li pou trouv limem parey kouma Zeova trouv li. Maria dir: “Pena ase paz dan mo karne pou ekrir nom bann frer ek ser ki’nn ed mwa! Mo extra rekonesan anver Zeova parski Li’nn donn mwa enn zoli fami dan lasanble.” Sa bann frer ek ser la inn vremem ed Maria pou konpran ki li ena boukou valer pou Zeova.

10. Dan ki sitiasion Mari Magdalenn ti ete? (Get zimaz osi.)

¹⁰ Anou gete kouma Zezi ti ed enn lot madam: Mari Magdalenn. Labib dir ki li ti posede par set demon! (Lik 8:2) Sa bann demon-la kitfwa ti fer li fer bann kitsoz bizar, ek akoz sa bann dimounn ti res lwin ar li. Mari ti soufer boukou, ek sirman li ti bien per ek li ti panse ki personn pa ti kontan li. Kitfwa se Zezi ki ti tir sa set demon-la lor li, ek apre sa, li ti vinn so disip. Ki kitsoz ankor Zezi ti fer pou montre Mari Magdalenn ki li ti ena boukou valer pou Zeova?

11. Kouma Zezi ti montre Mari Magdalenn ki li ti ena boukou valer pou Zeova? (Get zimaz osi.)

¹¹ Zezi ti donn Mari Magdalenn privilez pou akonpagn li ek so bann disip dan zot laktivite predikasion.b Gras-a sa, li ti kapav ekout Zezi kan Zezi ti pe ansegn lezot. Anplis, Zezi ti aparet ar li mem zour ki li ti resisite, ek li ti enn parmi bann premie disip ar ki Zezi ti koze sa zour-la. Zezi ti osi demann li pou al dir so bann zapot ki li ti resisite. Tousala montre ki Mari Magdalenn ti ena boukou valer pou Zeova!—Zan 20:11-18.

12. Kifer Lidia ti panse ki li pena valer?

¹² Parey kouma Mari Magdalenn, boukou dimounn azordi panse ki personn pa kontan zot. Lidia, enn ser ki res Lespagn, dir ki kan so mama ti ansint li, li ti anvi avorte. Lidia rapel ki kan li ti tipti, so mama pa ti pran li kont ek ti bien maltret li. Li dir: “Parski mo mama pa ti montre ki li kontan mwa, touletan mo ti anvi ki bann dimounn kontan mwa ek aksepte mwa. Mo mama ti fer mwa krwar ki mo ti enn move dimounn, ek akoz sa mo ti panse ki, ninport ki kitsoz ki mo fer, zame personn pa pou kontan mwa.”

13. Ki kitsoz ti ed Lidia pou konpran ki li ena valer pou Zeova?

¹³ Kan Lidia ti vinn dan laverite, lapriyer, so lektir Labib, ek seki bann frer ek ser ti dir li ek ti fer pou li, ti ed li pou konpran ki li ena valer pou Zeova. Li dir: “Mo misie souvan dir mwa ki kantite li kontan mwa, ek li touletan rapel mwa bann zoli kalite ki mo ena. Mo bann bon kamarad osi fer parey.” Parey kouma Lidia, kitfwa ena enn kikenn dan to lasanble ki bizin led pou konpran ki li ena valer pou Zeova. Par to bann parol ek to bann aksion, eski to kapav ed li pou konpran sa?

TROUV TOMEM PAREY KOUMA ZEOVA TROUV TWA

14. Kouma 1 Samiel 16:7 ed nou pou konpran fason ki Zeova trouv bann dimounn? (Get osi lankadre “Pou Zeova, Kifer So Bann Serviter Ena Boukou Valer?”)

¹⁴ Fason ki bann dimounn sa lemond-la trouv twa, li pa parey ar fason ki Zeova trouv twa. (Lir 1 Samiel 16:7.) Pou Zeova, to valer pa depann lor to laparans, ouswa lor ki kantite kas ek ledikasion to ena. (Iza. 55:8, 9) Alor, fer zefor pou trouv twa parey kouma Zeova trouv twa, pa kouma bann dimounn trouv twa. Labib koz lor bann dimounn ki parfwa ti panse zot pena valer, kouma par exanp Eliya, Noemi, ek Ann. Kan to lir zot zistwar, esey trouve kouma Zeova ti vremem kontan zot. To kapav osi ekrir bann lexperyans ki to’nn viv, ki’nn montre twa ki Zeova vremem kontan twa ek ki to ena valer pou Li. To kapav osi fer bann resers lor sa size-la dan nou bann piblikasion.c

15. Kifer Zeova ti konsider Daniel kouma “enn dimounn ki ena boukou valer”? (Daniel 9:23)

¹⁵ Pa bliye ki se parski to fidel ki to ena boukou valer pou Zeova. Kan li ti ena preske 100 an, profet Daniel ti “bien fatige” ek bien dekouraze. (Dan. 9:20, 21) Kouma Zeova ti ankouraz li? Zeova ti avoy anz Gabriel pou rapel Daniel ki li ti “enn dimounn ki ena boukou valer” ek ki Li ti tann so bann lapriyer. (Lir Daniel 9:23.) Kifer Daniel ti ena boukou valer pou Zeova? Se parski li ti ena boukou zoli kalite, kouma par exanp li ti fidel ek li ti kontan lazistis. (Eze. 14:14) Zeova inn fer ekrir sa zistwar-la dan Labib pou ki sa rekonfort nou. (Rom. 15:4) Dan mem fason, parski to pe fer seki drwat ek to fidel ar Zeova, to ena boukou valer pou Li. Ek parey kouma Zeova ti ekout bann lapriyer Daniel, Li pou ekout to bann lapriyer osi.—Mish. 6:8; Ebre 6:10.

16. Ki kitsoz kapav ed twa pou trouv Zeova kouma enn Papa ki bien kontan twa?

¹⁶ Trouv Zeova kouma enn Papa ki kontan twa. Zeova anvi ed twa; Li pa rod tou ti defo ar twa. (Ps. 130:3; Mat. 7:11; Lik 12:6, 7) Kan bann dimounn inn reflesi lor la, sa finn ed zot pou sirmont bann santiman negatif ki zot ti ena lor zotmem. Par exanp, Michelle, enn ser ki res Lespagn, ti panse ki personn pa kontan li ek ki li pena valer parski so misie pandan plizir lane ti bien rabes li ek maltret li. Michelle dir: “Kan mo santi ki mo pa vo nanye, mo esey pans Zeova ki pe sarye mwa dan so lebra ek ki pe donn mwa proteksion ek lamour ki mo bizin.” (Ps. 28:9) Lauren, enn ser ki res Sid-Afrik, souvan rapel limem ki, si Zeova inn atir li, inn ed li pou res pros ar Li pandan tou sa bann lane-la, ek inn servi li pou ansegn lezot, sa vedir ki li bizin ena boukou valer pou Zeova ek ki li bien itil pou Li.—Oze 11:4.

17. Ki kitsoz kapav ed twa pou to sir ki to ena faver Zeova? (Psom 5:12) (Get zimaz osi.)

¹⁷ To bizin sir ki to ena faver Zeova. (Lir Psom 5:12.) David ti konpar faver Zeova ar “enn gran boukliye” ki protez bann dimounn ki drwat. Kan to kone ki to ena faver Zeova ek ki Li pe soutenir twa, sa kapav protez twa kont bann santiman negatif ki to ena lor tomem. Kouma to kapav kone ki to ena faver Zeova? Gras-a so Parol, Labib, Zeova dir nou seki Li resanti pou nou. Li kapav osi servi bann ansien, bann bon kamarad, ouswa lezot dan lasanble pou rapel nou ki nou ena valer pou Li. Me kouma to bizin reazir kan lezot felisit twa ek ankouraz twa?

18. Kifer to bizin aksepte kan lezot felisit twa ek dir bann bon kitsoz lor twa?

¹⁸ Kan bann dimounn ki konn twa ek ki kontan twa, felisit twa ouswa dir bann bon kitsoz lor twa, fode pa to panse ki seki zot pe dir li fos. Pa bliye ki Zeova kapav servi zot pou fer twa konpran ki to ena so faver. Michelle, ki nou ti mansione avan, dir: “Tigit-tigit, mo pe koumans aksepte bann kitsoz pozitif ki lezot dir lor mwa. Mem si mo ankor gagn difikilte pou krwar bann bon kitsoz ki zot dir lor mwa, mo kone ki Zeova anvi ki mo krwar zot.” Bann ansien osi inn ed Michelle avek boukou lamour ek zantiyes. Azordi, Michelle pe servi kouma pionie ek televolonter pou Betel.

19. Kifer to kapav sir ki to ena boukou valer pou Zeova?

¹⁹ Zezi inn fer nou konpran ki nou Papa Zeova bien kontan nou. (Lik 12:24) Alor, nou kapav sir ki nou ena boukou valer pou Zeova. Fode zame nou bliye sa! Ek anou kontign fer nou maximum pou ed lezot pou konpran ki zot ena boukou valer pou Zeova!