Eski To Trouv Lame Bondie dan To Lavi?
“Bann serviter Zeova pou konn so lame.”—IZAI 66:14.
1, 2. Ki sertin dimounn panse lor Bondie?
BOUKOU dimounn panse ki Bondie pa interese ar seki zot fer. Zot panse ki Bondie pa gagn zot traka. Par exanp, kan enn siklonn ti detrir enn bon parti dan Philippines an Novam 2013, lemer enn gran lavil ti dir: “Sirman Bondie pa ti la.”
2 Lezot dimounn panse ki Bondie pa kapav trouv seki zot pe fer. (Izai 26:10, 11; 3 Zan 11) Dan lepok lapot Pol, sertin ti pans parey. Li ti dir ki sa bann dimounn-la pa finn trouv sa bon pou konn Bondie. Zot ti bann dimounn inzis, move, ek gourman kas.—Romin 1:28, 29.
3. (a) Ki bann kestion nou bizin poz noumem? (b) Ki “lame” Bondie souvan reprezante dan Labib?
3 Ki nou kapav dir lor nou? Nou kone ki Zeova trouv tou seki nou fer. Me eski nou krwar ki Zeova interese ar nou? Eski nou trouv so lame dan nou lavi? Dan Labib, souvan “lame” Bondie reprezant so lafors kan Li azir. Li servi so lafors pou ed so bann serviter ek pou gagn viktwar lor so bann lennmi. (Lir Deteronom 26:8.a) Zezi ti dir ki sertin dimounn ti pou kapav “trouv [Bondie].” (Matie 5:8) Eski nou osi nou parmi sa bann dimounn-la? Kouma nou kapav ‘trouv Bondie’? Dan sa lartik-la, nou pou examinn lexanp sertin dimounn dan Labib ki finn trouv lame Bondie dan zot lavi, ek lezot ki pa finn trouv so lame. Nou pou aprann osi kouma lafwa kapav ed nou pou trouv lame Bondie.
ZOT TI REFIZ TROUV LAME BONDIE
4. Kifer bann lennmi nasion Izrael finn refiz trouv lame Bondie?
4 Dan lepase, boukou dimounn ti gagn posibilite pou trouve ek pou tande kouma Bondie ti ed pep Izrael. Zeova ti servi bann mirak pou delivre so pep depi Lezip ek pou gagn viktwar lor boukou lerwa dan Later Promiz. (Zozie 9:3, 9, 10) Mem si ti ena lezot lerwa ki finn tann ek finn trouv seki Zeova ti fer pou sov so pep, sa bann lerwa-la “ti fer enn lalians pou konbat Zozie ek Izrael.” (Zozie 9:1, 2) Kan sa bann lerwa-la ti konbat nasion Izrael, zot ti gagn lokazion trouv lame Bondie. Gras-a Zeova so gran lafors, “soley ti res anplas ek lalinn pa ti bouze ziska ki lepep finn tir vanzans lor so bann lennmi.” (Zozie 10:13) Me Zeova finn permet leker bann lennmi Izrael “vinn teti,” pou ki zot lager ar nasion Izrael. (Zozie 11:20) Bann lennmi nasion Izrael finn perdi lager parski zot pa ti’le admet ki Zeova ti pe konbat pou so pep.
Nou bizin trouv lame Bondie dan nou lavi
5. Ki move Lerwa Ahab ti refiz pou krwar?
5 Plitar, move Lerwa Ahab ti gagn posibilite pou trouv lame Bondie plizir fwa. Eliya ti dir li: “Pa pou ena ni laroze ni lapli, sof si mo donn lord!” (1 Lerwa 17:1) Zis lame Zeova ki ti kapav fer enn kitsoz koumsa, me Ahab pa ti’le krwar. Plitar, Eliya ti priye Zeova, ek Bondie ti reponn li kan Li ti fer enn dife desann depi lesiel. Ahab ti trouv sa. Lerla, Eliya ti dir Ahab ki Zeova ti pou aret lasesres ek fer enn gro lapli tonbe. (1 Lerwa 18:22-45) Ahab ti trouv tou sa bann mirak-la me li ti refiz pou krwar ki li finn trouv lafors Zeova. Ki nou kapav aprann ar sa bann lexanp-la? Nou bizin trouv lame Bondie dan nou lavi.
ZOT TI TROUV LAME ZEOVA
6, 7. Ki bann Gibeonit ek Raab ti rekonet?
6 Bann Gibeonit ti bien diferan ar bann nasion ki ti otour zot. Zot finn trouv lame Bondie. Olie ki zot ti al lager kont bann Izraelit, bann Gibeonit ti anvi fer lape avek zot. Kifer? Zot ti dir ki se parski zot ti tann koz lor Zeova ek lor tou seki Li finn fer. (Zozie 9:3, 9, 10) Zot ti ena rezon pou rekonet ki Zeova ti pe lager pou Izrael.
7 Raab osi ti trouv lame Zeova. Mem si li pa ti enn Izraelit, li finn tande kouma Zeova ti liber so pep depi Lezip. Kan de espion ti vinn kot li, li ti dir zot: “Mo kone ki Zeova pou donn zot sa pei-la.” Raab ti ena lafwa ki Zeova ti pou kapav sap li ek so fami. Li’nn montre so lafwa an Zeova mem si li ti kone ki sa ti pou bien danzere.—Zozie 2:9-13; 4:23, 24.
8. Kouma sertin Izraelit ti rekonet lame Bondie?
8 Sertin parmi bann Izraelit pa ti reazir parey kouma move Lerwa Ahab kan zot ti trouv dife ki ti desann depi lesiel apre lapriyer Eliya. Zot ti rekonet ki se lame Zeova ki ti fer sa. Zot ti kriye: “Zeova, Limem vre Bondie.” (1 Lerwa 18:39) Pou zot, li kler ki zot ti trouv pwisans Bondie.
9. Kouma nou kapav trouv Zeova ek so lame azordi?
9 Nou finn examinn bann bon ek bann move lexanp pou ed nou konpran ki savedir “trouv Bondie” ouswa pou trouv lame Bondie. Amezir ki nou aprann konn Zeova ek so bann kalite, nou trouv so lame avek ‘lizie nou leker.’ (Efezien 1:18, NW.) Sa motiv nou pou imit bann dimounn fidel dan lepase ek azordi ki finn trouve kouma Zeova inn ed so pep. Me eski nou ena bann prev ki Bondie pe ed so pep azordi?
PREV KI LAME BONDIE PE AZIR AZORDI
10. Ki prev nou ena ki Zeova pe ed so pep azordi? (Get zimaz dan koumansman lartik.)
10 Nou ena enn kantite prev ki Zeova pe kontign ed so pep azordi. Souvan nou tann lexperyans bann ki finn priye pou demann Zeova so led dan zot lavi ek kouma Zeova finn reponn zot lapriyer. (Psom 53:2) Par exanp, kan Allan ti pe prese lor enn ti lil dan Philippines, li ti zwenn enn madam ki ti koumans plore. Li rakonte: “Zis sa gramatin-lamem, sa madam-la ti priye Zeova pou ki So bann Temwin trouv li.” Kan li ti enn adolesan, li ti etidie Labib avek bann Temwin. Me apre ki li’nn marye, li’nn vinn lor sa lil-la ek li’nn aret etidie. Bondie ti reponn so lapriyer telman vit ki sa ti tous so leker. Dan mwins ki enn an, li ti vwe so lavi ar Zeova.
Eski to pe trouv bann fason kot Zeova so lame pe azir dan to lavi? (Get paragraf 11-13)
11, 12. (a) Kouma Zeova pe ed so bann serviter? (b) Explike kouma Zeova ti ed enn ser.
11 Boukou serviter Zeova inn trouv so lame kan zot inn aret bann move labitid kouma fime, droge ek get pornografi. Sertin dir ki zot ti esey arete par zotmem, me zot pa’nn reisi. Me kan zot inn demann Zeova so led, Li’nn donn zot “pwisans ki plis ki seki normal,” ek sa inn ed zot pou aret zot bann move labitid.—2 Korintien 4:7, NW; Psom 37:23, 24.
Zeova ed so bann serviter pou fer fas ar bann problem personel
12 Zeova ed osi so bann serviter pou fer fas ar bann problem personel. Se seki ti ariv Amy. Li ti gagn responsabilite pou ede dan konstriksion enn Lasal kot nou fer renion ek lakaz bann misioner lor enn ti lil dan Losean Pacifique. Li ti bizin adapte ar enn nouvo kiltir, souvan pa ti ena ni kouran ni delo, bann semin ti inonde, li ti mank so fami ek li ti bizin res dan enn ti lasam dan lotel. Enn zour, li’nn kriy ar enn ser avek ki li ti pe travay. Li ti bien sagrin pou seki li’nn fer. Kan li ti retourn dan so lasam kot pa ti ena kouran, li ti priye Zeova ek ti demann Li so led. Apre, kan ti regagn kouran, li ti lir enn lartik dan Latour Degard lor bann zelev Guiléad ki ti gagn zot diplom. Sa lartik-la ti koz lor bann mem difikilte ki li osi li ti bizin fer fas. Li dir: “Mo ti santi ki Zeova ti pe koz avek mwa sa lanwit-la. Sa ti motiv mwa pou kontign mo servis.”—Psom 44:25, 26; Izai 41:10, 13.
13. Ki prev nou ena ki Zeova finn ed so pep pou defann zot drwa pou prese?
13 Zeova inn ed osi so pep pou defann zot drwa pou pres bonn nouvel ek pou fer zot laktivite rekonet devan bann lotorite. (Filipien 1:7) Par exanp, kan sertin gouvernman ti rod anpes nou travay predikasion, nou finn defann nou ka devan lakour. Nou finn gagn omwin 268 viktwar dan bann lakour siprem dan lemond antie. Depi lan 2000, ena 24 ladan ki nou finn gagne devan la Cour européenne des droits de l’homme. Li kler ki personn pa kapav aret lame Zeova!—Izai 54:17; lir Izai 59:1.b
14. Ki lezot prev nou ena ki Bondie Li avek so pep?
14 Predikasion ki fer dan lemond antie se enn lot prev ki Zeova pe ed nou. (Matie 24:14; Zistwar Bann Apot 1:8) Si ena linite parmi bann serviter Zeova dan lemond antie, se gras-a led Zeova. Sa linite-la li inik! Mem bann ki pa servi Zeova rekonet sa ek zot dir: “Vremem Bondie parmi zot.” (1 Korintien 14:25) Nou ena boukou prev ki Bondie Li avek so pep. (Lir Izai 66:14.c) Ki to kapav dir lor twa? Eski to trouv lame Zeova dan to lavi?
ESKI TO TROUV LAME ZEOVA DAN TO LAVI?
15. Kifer parfwa li kapav arive ki nou pa trouv lame Zeova dan nou lavi?
15 Parfwa, li kapav arive ki nou pa trouv lame Bondie dan nou lavi. Kifer? Kan nou ena boukou problem, nou kapav bliye ki kantite fwa Zeova inn ed nou dan lepase. Se samem ki ti ariv Eliya. Li ti ena kouraz, me kan Larenn Zezabel ti pe rod touy li, Eliya ti gagn per. Pandan sa moman-la, li ti bliye kouma Zeova ti ed li avan. Labib dir ki Eliya ti anvi mor. (1 Lerwa 19:1-4) Kotsa li ti kapav gagn led ek kouraz? Li ti bizin tourn ver Zeova.—1 Lerwa 19:14-18.
16. Kouma nou kapav trouv Bondie kan nou dan problem?
16 Zob ti tro konsantre lor so bann traka ki li pa ti trouv so sitiasion dan mem fason ki Zeova. (Zob 42:3-6) Parfwa, pou nou osi li kapav difisil pou trouv Bondie akoz nou bann problem. Ki kapav ed nou pou trouv seki Bondie pe fer pou nou? Nou bizin medit lor seki Labib dir konsernan nou bann problem. Lerla, Zeova pou vinn pli reel pou nou, ek nou osi nou pou kapav dir: “Mo zorey finn tann koz lor twa, me asterla mo pe trouv twa avek mo lizie.”
Eski Zeova pe servi twa pou ed lezot trouv Li? (Get paragraf 17, 18)
17, 18. (a) Kouma to kapav trouv lame Zeova dan to lavi? (b) Rakont enn lexperyans ki montre kouma Zeova pe ed nou azordi.
17 Kouma to kapav trouv lame Zeova dan to lavi? Anou pran sink lexanp. Premierman, kitfwa to finn trouve kouma Zeova inn ed twa pou konn laverite. Deziemman, sirman to rapel kouma enn fwa, apre enn diskour to finn dir: “Samem ki mo ti bizin!” Trwaziemman, kitfwa to finn trouve kouma Zeova finn reponn to lapriyer. Katriemman, kitfwa to ti anvi fer plis pou Zeova ek to finn trouve kouma Li’nn ed twa pou fer sa. Sinkiemman, li posib ki to finn kit to travay parski sa ti pe pran tro to letan ek anpes twa servi Zeova. Lerla to finn trouve kouma Li finn tini sa promes-la: “Zame mo pa pou kit twa.” (Ebre 13:5) Kan nou ena bann bon relasion avek Zeova, li pli fasil pou trouv so lame azir dan nou lavi.
18 Sarah, enn ser ki res Kenya, dir: “Mo ti priye pou enn etidian Labib, parski mo ti panse ki li pa ti apresie so letid. Mo ti demann Zeova si mo bizin aret fer so letid. Deswit kouma mo ti fini dir ‘Amen,’ mo telefonn ti sone. Etidian Labib-la ti demann mwa si li kapav vinn renion ansam avek mwa! Mo ti gagn sok!” Si nou esey trouv seki Zeova pe fer pou nou, nou pou trouv so lame pe azir dan nou lavi. Rhonna, enn ser ki res dan l’Asie, dir ki sa pran letan pou trouve kouma Zeova ed nou dan nou lavi. Li dir: “Me enn fwa ki nou finn trouve kouma Zeova ed nou, nou pou etone ki kantite Li interese ar nou!”
19. Ki kitsoz ankor nou bizin fer pou trouv Bondie?
19 Zezi ti dir ki bann ki “pou trouv Bondie” bizin “ena enn leker pir.” (Matie 5:8, NW.) Ki sa vedir? Nou bizin gard nou panse pir ek aret fer seki pa bon. (Lir 2 Korintien 4:2.) Dan sa lartik-la, nou finn aprann ki pou trouv Bondie, nou bizin kontign fer nou relasion avek Li vinn pli for. Dan prosin lartik, nou pou examine kouma lafwa kapav ed nou pou trouv lame Zeova pli bien dan nou lavi.
a Deteronom 26:8: “Finalman Zeova finn tir nou dan Lezip avek enn lame for, ek enn lebra pwisan ek bann aksion ki fer per avek bann sign ek bann mirak.”
c Izai 66:14: “To pou trouv sa, ek to leker pou kontan, to bann lezo pou pouse kouma lerb ki fek pouse. Ek bann serviter Zeova pou konn so lame, me Li pou denons so bann lennmi.”