Tigit-Tigit Later Pe Detrir​—Ki Labib Dir lor La?

“Akoz seki bann imin pe fer azordi, biento pou ena enn katastrof klimatik. Bann gran lavil pou fer fas ar bann inondasion. Par moman pou fer pli so ki normal. Pou ena bann tanpet ki fer per. Lasesres dan plizir landrwa dan lemond. Bann milyon lespes plant ek zanimo pou disparet. Nou pa pe exazere ek se pa enn fim. Se seki lasians pe dir pou arive akoz fason ki nou pe servi bann resours lenerzi.”​—Diskour António Guterres, sekreter zeneral L’Organisation des nations unies, konsernan rapor Groupe d’experts intergouvernemental sur l’évolution du climat (GIEC) ki’nn sorti le 4 Avril 2022.

“Dapre bann siantis, biento preske tou bann 423 park nasional dan Letazini pou afekte par sanzman klimatik, sirtou parski sa bann park-la pli sansib ar tanperatir ki pe ogmante. Sa bann move kitsoz ki kapav arive la, kouma par exanp bann dife ek bann inondasion ki fer bann gro dega, bann iceberg ki pe fonn, nivo lamer ki pe monte ek tanperatir ki pe ogmante, zot resanble bann katastrof ki nou lir dan Labib.”​—“Flooding Chaos in Yellowstone, a Sign of Crises to Come,” The New York Times, 15 Zin 2022.

Eski bann problem lanvironnman ki ena lor later pou rezoud? Si wi, kisann-la pou fer sa? Get seki Labib dir lor la.

Labib ti predir bann problem lanvironnman

Labib dir ki Bondie pou “detrir bann ki detrir later.” (Revelasion 11:18, NTKM) Sa verse Labib la ansegn nou trwa kitsoz:

1. 1. Seki bann imin fer pou bien afekte later.

2. 2. Destriksion later pou arete.

3. 3. Se Bondie, pa bann imin, ki pou rezoud bann problem lanvironnman ki ena lor later.

Nou planet pou ena enn pli bon lavenir

Labib dir ki ‘later pou res pou touletan.’ (Ekleziast 1:4) Touletan pou ena bann dimounn ki pou res lor la.

• “Bann ki swiv bon sime pou posed later e viv lor la pou toultan.”​—Psom 37:29, PKM.

Nou planet pou revinn dan enn bon leta.

• “Dezer ek landrwa sek pou bien kontan, ek laplenn kot nanye pa pouse pou dan lazwa ek pou bourzone kouma safran.”​—Izai 35:1.