Violans Avek Fizi dan Lemond Antie​—Ki Labib Dir lor La?

Pandan mwa Ziliet 2022, partou dan lemond finn ena boukou violans avek fizi:

• “Bann Zapone inn bien afekte kan inn touy politisien ki pli renome dan Zapon [ansien Premie Minis Shinzo Abe]. Bann dimounn dan lemond inn gagn sok zot osi, parski Zapon se enn pei kot pena boukou krim violan ek kot ena bann lalwa bien strik konsernan bann fizi.”​—10 Ziliet 2022, The Japan Times.

• “Bann dimounn dan Dennmark inn gagn sok kan enn misie inn touy trwa dimounn avek enn fizi dan enn sant komersial, dan Copenhague.”​—4 Ziliet 2022, Reuters.

• “Sid Afrik: 15 dimounn inn mor apre ki enn group zom inn tir kout bal lor bann dimounn dan enn bar, dan Soweto.”​—10 Ziliet 2022, The Guardian.

• “Plis ki 220 dimounn inn mor akoz bann fiziyad ki finn ena dan Letazini ant le 2 ek le 4 Ziliet.”​—5 Ziliet 2022, CBS News.

Eski ena kit lespwar ki sa bann krim-la pou arete enn zour? Ki Labib dir lor la?

Pou Nepli Ena Violans

Labib dekrir lepok ki nou pe viv kouma “bann dernie zour,” enn lepok kot bann dimounn pou agresif, violan, ek sovaz. (2 Timote 3:1, 3) Bann dimounn viv dan laper akoz sa bann kalite konportman-la. (Lik 21:11) Me selman, Labib promet ki enn zour pou nepli ena laviolans ek bann dimounn “pou res dan enn landrwa kot ena lape, dan bann lakaz kot ena sekirite ek dan bann plas ki trankil.” (Izai 32:18) Kouma laviolans pou arete?

Bondie pou detrir bann move dimounn ek tou bann zarm.

• “Me pou tir bann move dimounn lor later.”​—Proverb 2:22.

• “[Bondie] finn aret lager ki ena partou dan lemond; kas-kas bann zarm anmorso e bril lekipman militer dan enn gran dife.”​—Psom 46:9, Psom an Kreol Morisien, PKM.

Bondie pou ansegn bann dimounn kouma pou viv dan lape, lerla pou nepli ena laviolans.

• “Personn pa pou fer okenn ditor ni okenn ravaz dan tou mo montagn ki sin, parski vremem later pou ranpli avek konesans Zeova, parey kouma delo kouver lamer.”​—Izai 11:9.

• Depi aster-la mem, Bondie pe ansegn so pep pou res lwin ar laviolans ek pou pa servi bann zarm, pou ‘fer zot bann lepe vinn bann zouti pou travay later, ek pou fer zot bann lans vinn bann sizay.’​—Mishe 4:3.

Pou aprann plis lor promes ki ena dan Labib konsernan enn lemond kot nou pou nepli viv dan laper, lir lartik « Affranchis de la peur : est-ce possible ? »

Pou aprann plis lor vre solision kont laviolans, lir lartik « Enfin la paix sur la terre ! »