Tanperatir Pe Monte dan Lemond Antie​—Ki Labib Dir lor La?

Pandan mwa Ziliet 2022, finn fer bien pli so dan diferan parti dan lemond:

• “Pou deziem fwa sa mwa-la, bann ofisie dan Lasinn finn averti bann dimounn ki dan anviron 70 lavil pou fer extra so ek kitfwa sa pou danzere.”​—25 Ziliet 2022, CNN Wire Service.

• “Dan Lerop pe fer bien pli so, ek akoz sa, dan plizir pei finn ena bann gran dife dan bann lafore.”​—17 Ziliet 2022, The Guardian.

• “Parski ti pe fer pli so lor Lakot Les, ek dan enn parti Lesid ek Sant Letazini, sa dimans-la dan boukou lavil tanperatir inn monte.”​—24 Ziliet 2022, The New York Times.

Eski tousala ena enn sinifikasion? Eski avek letan pou nepli kapav viv lor later? Ki Labib dir lor la?

Eski Labib ti predir ki ti pou fer so koumsa?

Wi. Dan lemond pe fer bien pli so, ek sa an-akor avek seki Labib ti predir konsernan nou lepok. Par exanp, Zezi ti predir ki nou pou trouv “bann gran sign terifian.” (Lik 21:11, Nouvo Testaman Dan Kreol Morisien, NTKM) Parski pe fer pli so dan lemond, boukou per ki avek letan bann dimounn detrir later.

Eski li pou vinn inposib pou viv lor later?

Non. Bondie finn kree later pou ki bann dimounn viv lor la pou touletan. (Psom 115:16, Psom an Kreol Morisien, PKM; Ekleziast 1:4) Li pa pou les bann dimounn detrir later, okontrer Li’nn promet ki Li “pou detrir bann ki detrir later.”​—Revelasion 11:18, NTKM.

Anou get de promes ki Bondie inn fer konsernan later:

• “Dezer ek landrwa sek pou bien kontan, ek laplenn kot nanye pa pouse pou dan lazwa ek pou bourzone kouma safran.” (Izai 35:1) Bondie pa pou les later vinn enn dezer kot li inposib pou viv. Okontrer, Li pou repar bann parti kot later dan enn move leta.

• “To montre to lamour pou later e to aroz li. To nouri later, to fer li vinn fertil.” (Psom 65:9, PKM) Bondie pou fer later vinn enn paradi.

Pou aprann plis lor kouma bann sanzman klimatik pe realiz bann profesi Labib, lir lartik « Les changements climatiques et notre avenir : qu’en dit la Bible ? »

Labib promet ki Bondie pou repar later. Pou aprann plis lor la, lir lartik « Qui sauvera la terre ? »