Eski Bondie Ena enn Nom?

Seki Labib dir

Tou dimounn ena enn nom. Alor, eski li pa lozik ki Bondie osi bizin ena enn nom? Pou vinn kamarad ar enn kikenn, li inportan ki nou konn ek servi so nom. Li parey si nou anvi vinn kamarad avek Bondie.

Dan Labib, Bondie dir: “Mwa mo Zeova. Samem mo nom.” (Izai 42:8) Mem si Li ena boukou tit, kouma “Bondie Tou-Pwisan,” “Souverin Segner,” ek “Kreater,” Li onor so bann adorater kan Li invit zot pou apel Li par so nom.​—Zenez 17:1; Zistwar Bann Apot 4:24; 1 Pier 4:19, NTKM.

Dan boukou tradiksion Labib ena nom Bondie dan Exod 6:3. Verse-la dir: “Mo ti abitie aparet ar Abraam, Izaak, ek Zakob kouma Bondie Tou-Pwisan, me konsernan mo nom, Zeova, mo pa’nn fer zot konn mwa.”

An Franse, finn servi Jéhovah kouma nom Bondie pandan boukou siek. Sertin spesialis prefer servi “Yahvé,” me selman Jéhovah se nom ki bann dimounn plis kone. Premie parti Labib ti ekrir an Ebre, ek pou lir sa lang-la ti bizin lir depi drwat ziska gos. Dan sa lang-la, nom Bondie se sa kat konsonn-la, יהוה, ek dan lezot lang azordi se YHWH. Nou osi apel sa kat konsonn-la Tetragram.