Eski Bondie Li Partou?
Seki Labib dir
Bondie trouv tou kitsoz ek Li kapav azir ninport kan ek kotsa Li anvi. (Proverb 15:3; Ebre 4:13, NTKM) Me selman, Labib pa ansegne ki Bondie Li omniprezan, setadir ki Li partou, ouswa dan tou kitsoz. Plito, Labib explike ki Bondie Li enn kikenn ki res dan enn plas bien presi.
Kouma Bondie ete? Bondie Li enn lespri. (Zan 4:24, NTKM) Bann dimounn pa kapav trouv Li. (Zan 1:18) Dan Labib, ena bann vizion ki dekrir Bondie ek zot montre ki Li res dan enn plas bien presi. Labib pa dir ki Li res partou.—Izai 6:1, 2; Revelasion 4:2, 3, 8, NTKM.
Kotsa Bondie reste? Labib dir ki Bondie ena enn ‘plas kot Li reste dan lesiel.’ (1 Lerwa 8:30) Savedir ki Bondie pa res lor later ouswa dan liniver me dan lesiel. Labib mansionn enn fwa kot bann anz “ti rantre pou plas zot devan Zeova.”a Sa montre dan enn fason kler ki Bondie res dan enn plas bien presi.—Zob 1:6.
Si Bondie pa omniprezan, eski Li vremem gagn mo traka?
Wi. Bondie gagn traka sak dimounn. Mem si Bondie viv dan lesiel, Li remark bann dimounn ki anvi fer Li plezir, ek Li azir dan zot faver. (1 Lerwa 8:39; 2 Kronik 16:9) Gete kouma Zeova gagn traka so bann serviter ki sinser:
Kan ou priye: Zeova ekout ou kan ou priye.—2 Kronik 18:31.
Kan ou deprime: “Zeova pre ar bann dimounn ki zot leker inn kase; ek Li sov bann ki dekouraze.”—Psom 34:18.
Kan ou bizin enn gid: Gras-a so Parol, Labib, Zeova “pou ansegn twa e montre twa ki sime bizin pran.”—Psom 32:8, PKM.
Seki bann dimounn panse lor lide ki Bondie Li omniprezan
Seki dimounn panse: Bondie Li dan tou kitsoz ki Li’nn kree.
Laverite: Bondie pa res ni lor later ni dan liniver ki Li’nn kree. (1 Lerwa 8:27) Labib dir ki bann zetwal ek bann lezot kitsoz ki Li’nn kree “revel klerman laglwar Bondie.” (Psom 19:1, PKM) Parey kouma enn artis pa res dan tablo ki li’nn penn, Bondie osi pa res dan bann kitsoz ki Li’nn kree. Me selman, enn tablo donn nou bann detay lor sa artis ki’nn penn li la. Dan mem fason, tou kitsoz ki nou trouve dan kreasion aprann nou lor bann “kalite invizib” nou Kreater, par exanp so pwisans, so sazes, ek so lamour.—Romin 1:20, NTKM.
Seki dimounn panse: Pou ki Bondie Li tou pwisan ek konn tou kitsoz, Li bizin partou.
Laverite: Lespri sin se lafors aktif Bondie. Bondie servi so lespri sin pou trouv tou ek fer tou kitsoz, ninport kotsa, ninport kiler, san ki Li bizin laba.—Psom 139:7.
Seki dimounn panse: Psom 139:8 (PKM) dir ki Bondie Li partou: “Si mo mont dan lesiel to pou laba; si mo tom dan trou lamor, laba osi to pou prezan.”
Laverite: Sa verse-la pa pe koz lor plas kot Bondie ete. Dan enn fason poetik, li ansegn nou ki ninport kotsa nou ete, Bondie kapav azir dan nou faver.
a Zeova se nom Bondie dan Labib.