Deteronom

34 Lerla, depi bann laplenn Moab ki ti kouma bann dezer, Moiz ti mont lor montagn Nebo, lao Pisga, ki anfas Zeriko. Ek Zeova ti montre li pei-la an-antie, depi Galaad ziska Dann, 2 ek tou Neftali, pei Efraim ek Manase, ek tou pei Zida ziska lamer ki dan Lwes,* 3 Negev ek distrik Zourdin, laplenn Zeriko ki lavil bann pie palmis, ziska Zoar.

4 Lerla Zeova ti dir li: “Sa se pei ki mo ti fer serman ar Abraam, Izaak, ek Zakob, ek ti dir, ‘Mo pou donn to desandans sa pei-la.’ Mo’nn les twa trouv sa pei-la avek to prop lizie, me to pa pou traverse pou al laba.”

5 Apre sa, Moiz, serviter Zeova, ti mor lamem dan pei Moab, parey kouma Zeova ti’nn dir. 6 Li ti anter li dan vale ki dan pei Moab, anfas avek Bet-Peor, ek ziska azordi personn pa kone kot so tom ete. 7 Moiz ti ena 120 an kan li ti mor. So lizie ti ankor bon, ek li ti ankor for. 8 Lepep Izrael ti plore pou Moiz pandan 30 zour dan bann laplenn Moab ki ti kouma bann dezer. Apre sa, bann zour kot lepep ti plore ek ti an-dey pou Moiz ti fini.

9 Zozwe, garson Noun, ti ranpli ar lespri sazes, parski Moiz ti’nn poz so lame lor li; ek bann Izraelit ti koumans ekout li, ek zot ti fer parey kouma Zeova ti’nn donn Moiz lord. 10 Me zame pa finn ena ankor enn profet kouma Moiz dan Izrael, ki Zeova ti bien kone.* 11 Li ti fer tou bann sign ek bann mirak ki Zeova ti’nn avoy li pou fer dan pei Lezip kont Faraon, kont so bann serviter, ek kont so pei an-antie. 12 Moiz ti fer tousala devan lizie tou Izrael avek enn lame pwisan ek enn pwisans extraordiner.