Deteronom
2 “Apre sa nou ti fer demi-tour ek nou ti al ver dezer par semin Lamer Rouz, parey kouma Zeova ti’nn dir mwa, ek pandan plizir zour nou ti marse dan lezanviron Montagn Seir. 2 Finalman Zeova ti dir mwa, 3 ‘Zot inn ase marse dan lezanviron sa montagn-la. Aster-la, al ver Lenor. 4 Ek donn lepep sa lord-la: “Zot pou pas pre ar frontier zot bann frer, bann desandan Ezai, ki pe res dan Seir, ek bann-la pou gagn per zot, alor zot bizin fer bien atansion. 5 Pa provok zot parski mo pa pou donn zot okenn par dan bann-la zot pei, pa mem enn bout ki grander enn lanprint lipie, parski mo’nn donn Ezai Montagn Seir. 6 Zot bizin donn bann-la kas pou manze ki zot pou manze ek zot bizin pey bann-la pou delo ki zot pou bwar. 7 Parski Zeova to Bondie inn beni twa dan tou seki to’nn fer. Li’nn bien trouve kouma zot inn marse dan sa gran dezer-la. Pandan sa 40 an-la, Zeova to Bondie ti avek twa, ek to pa’nn mank nanye.”’ 8 Alor nou ti pas akote nou bann frer, bann desandan Ezai, ki pe res dan Seir, ek nou ti res lwin ar semin Araba, ar Elat, ek ar Ezionn-Geber.
“Apre sa nou ti sanz direksion ek nou ti pas par sime dezer Moab. 9 Lerla Zeova ti dir mwa, ‘Pa provok Moab ouswa al lager avek li, parski mo pa pou donn twa okenn par dan so pei akoz mo’nn donn bann desandan Lot Ar. 10 (Avan bann Emim ti pe res laba, zot ti enn gran pep ek zot ti bien boukou ek zot ti long parey kouma bann Anakim. 11 Parski bann Refaim ti osi resanble bann Anakim, bann Moabit ti abitie apel zot bann Emim. 12 Avan sa, bann Orit ti pe viv dan Seir, me bann desandan Ezai ti pran zot bann dibien, ti detrir zot ek ti pran zot plas, parey kouma Izrael pou fer ar sa pei ki pou vinn pou zot la, pei ki Zeova pou vremem donn zot.) 13 Aster-la ale ek travers Vale Zerred.’ Alor nou ti travers Vale Zerred. 14 Sa ti pran 38 an pou ki nou marse depi Kades-Barnea ziska ki nou travers Vale Zerred, ziska ki tou sa zenerasion bann gerye ki ti ena dan kan la ti mor, parey kouma Zeova ti’nn fer zot serman. 15 Lame Zeova ti kont zot pou eliminn zot depi dan kan ziska ki zot ti’nn mor.
16 “Deswit kouma tou bann gerye parmi lepep ti mor, 17 Zeova ti koz ar mwa ankor ek ti dir, 18 ‘Zordi to pou pas pre ar teritwar Moab, setadir, Ar. 19 Kan to vinn pre ar bann Amonit, pa arsel zot, ni provok zot, parski mo pa pou donn twa okenn par dan pei bann Amonit, akoz mo’nn donn sa bann desandan Lot. 20 Ti osi konsider sa pei-la kouma pei bann Refaim. (Avan sa bann Refaim ti res laba, ek bann Amonit ti abitie apel zot bann Zamzoumim. 21 Zot ti enn gran pep ek zot ti bien boukou ek zot ti long parey kouma bann Anakim; me Zeova ti detrir zot devan bann Amonit, ek bann Amonit ti pous zot ek ti pran zot plas. 22 Se seki li ti fer pou bann desandan Ezai, ki aster-la pe res dan Seir, kan li ti detrir bann Orit devan zot, pou ki bann-la kapav pran dibien bann Orit ek res dan zot plas ziska azordi. 23 Konsernan bann Avim, zot ti pe res dan bann vilaz dan rezion Gaza ziska ki bann Kaftorim, ki sorti Kaftor,* ti detrir zot ek ti pran zot plas.)
24 “‘Leve ek travers Vale Arnon. Gete, mo’nn livre dan to lame Sihonn, lerwa Esbonn, ki enn Amorit. Alor lager avek li ek al pran so pei. 25 Apartir zordi mo pou fer tou bann pep lor later ki tann koz lor twa, ena enn gran lafreyer ek per twa. Bann-la pou panike ek pou tranble* akoz twa.’
26 “Apre sa mo ti avoy bann mesaze depi dezer Kedemot pou al get Sihonn, lerwa Esbonn, avek sa mesaz lape-la, 27 ‘Les mo travers to pei. Mo pou res lor sime ek mo pa vir ni dan drwat ni dan gos. 28 Mo pou manz zis manze ek bwar zis delo ki to pou vann ar mwa. Zis les mwa travers to pei apie 29 —se seki bann desandan Ezai ki pe res dan Seir ek bann Moabit ki pe res dan Ar ti fer pou mwa—ziska ki mo travers Zourdin pou rant dan pei ki Zeova nou Bondie pe donn nou.’ 30 Me Sihonn, lerwa Esbonn pa ti les nou traverse, parski Zeova to Bondie ti les li vinn teti ek ti les so leker vinn dir pou ki li livre li dan to lame parey kouma li’nn fer azordi.
31 “Lerla Zeova ti dir mwa, ‘Gete, mo’nn fini donn twa Sihonn ek so pei. Koumans pran so pei.’ 32 Kan Sihonn ti sorti avek tou so larme pou lager kont nou dan Zaaz, 33 Zeova nou Bondie ti livre li dan nou lame pou ki nou gagn laviktwar lor li, lor so bann garson, ek lor tou so larme. 34 Sa lepok-la, nou ti pran tou so bann lavil ek nou ti detrir bann lavil-la net, parmi ti ena bann zom, bann madam ek bann zanfan. Nou pa ti les okenn sirvivan. 35 Dan bann lavil ki nou ti pran, nou ti gard zis bann zanimo ek bann dibien pou nou. 36 Depi Aroer, ki trouv lor bor Vale Arnon (parmi ena osi lavil ki dan sa vale-la), ziska Galaad, pa ti ena okenn lavil ki nou pa ti kapav pran. Zeova nou Bondie ti livre zot tou dan nou lame. 37 Me selman, to pa ti al pre ar pei bann Amonit, ni ar bor Vale Zabok, ni ar bann lavil ki trouv dan rezion kot ena bann montagn, ni ar okenn lezot plas ki Zeova nou Bondie ti interdi nou pou ale.