Bann bon conseil pou elevé zenfant

Ruth dire concernant premier fois ki li ti enceinte: “Mo ti ena 19 an, mo ti pé reste bien loin ar tou mo famille, ek mo pa ti preparé ditou pou sa situation-la.” Ruth ti enn sel zenfant pou so parent ek li pa ti’nn reflechi ditou lor seki vedir vinn enn parent. Kot-sa li ti pou kapav allé pou gagne bann bon conseil lor ki li ti kapav compté?

Parkont Jan, ki asterla papa deux grand zenfant rappel: “Au commencement, mo ti ena bien confiance dan moi. Mais bien vite, mo’nn realisé ki mo pa ti ena assez connaissance pratik.” Certain parent depuis commencement-mem pa koné couma pou elevé zot zenfant. Pou certain, c’est pli tard ki zot nepli koné couma pou faire. Kot-sa zot kapav gagne l’aide pou elevé zot zenfant?

Zordi beaucoup parent rod conseil lor Internet. Mais kitfois ou demann-ou ki quantité nou kapav compte lor sa bann conseil-la. Nou ena bann bon raison pou faire attention. Eski ou koné vrai-mem kisannla ki pé donne ou sa bann conseil-la? Eski sa bann dimoune-la finn reussi avek zot prop zenfant? Surement ki ou envie faire attention kan sa concerne ou famille. Pareil couma nou ti trouvé dan premier lartik, parfois nou pa kapav compte lor bann conseil ki mem bann specialiste donné. Alors kot-sa nou pou al rod conseil?

Pli grand la-source conseil lor fason pou elevé bann zenfant, c’est Jéhovah, Li ki’nn crée la famille. (Éphésiens 3:15) Li-mem sel vrai specialiste. Dan so Parole, la Bible, Li donne bann bon conseil pratik lor ki nou kapav compté ek ki vrai-mem donne bon resultat. (Psaume 32:8; Isaïe 48:17, 18). Mais nou ki bizin mette sa bann conseil-la en pratik.

Ena bann parent ki’nn reussi elevé zot bann zenfant pou faire zot vinn bann adulte ki equilibré ek ki pé servi Bondié. Finn demann certain parmi zot pou partage zot l’experience. Zot finn dire ki zot finn reussi surtout parski zot finn applik bann principe la Bible. Zot finn trouvé ki zordi, encore toujours kapav compte lor bann conseil ki la Bible donné pareil couma ti kapav compte lor la dan lepok kot ti ecrire la Bible.

Passe le temps avek zot

Catherine ena deux zenfant. Kan ti demann li ki conseil inn aide li plus, dé-suite li ti mentionne Deutéronome 6:7. Sa verset-la dire: “To bizin contigne repete sa [bann principe la Bible] ar to garson pou faire sa rente dan so la-tête ek koz sa kan to assizé dan to lakaz, kan to marché lor chemin, kan to al dormi ek kan to levé.” Catherine ti comprend ki, pou li mette sa conseil-la en pratik, li ti pou bizin passe le temps avek so bann zenfant.

Kitfois ou pé pensé: ‘Sa li pli facile pou dire ki pou faire.’ Zordi dan beaucoup famille, papa ek mama toulé-deux bizin travail pou joinde lé deux boute. Mais, couma eski bann parent ki bien occupé deja kapav passe plus lé-temps avek zot zenfant? Torlief, papa enn garson ki ena so prop famille zordi, dire ki la clé, c’est suive conseil ki ena dan Deutéronome. Amenn ou zenfant avek ou partout kot ou allé, ek automatiquement ou pou gagne bann l’occasion pou koz avek zot. Torlief raconté: “Moi ek mo garson nou ti travail ensam kan ti ena bann travail important pou faire dan lakaz. Nou ti al promené en famille. Nou ti mange en famille.” Resultat, Torlief ajouté: “Nou garson ti touletan senti-li libre pou koz ar nou.”

Mais ki bann parent pou faire si bann zenfant pa kozé ek si li difficile pou ena bann conversation avek zot? Parfois sa arrivé letan bann zenfant pé grandi. Encore enn fois, si bann parent passe plus lé-temps avek zot, sa kapav aidé. Ken, mari Catherine, rappel ki kan so tifi ti rente dan l’adolescence, li ti plaigné ki so papa pa ti pé prend li compte kan li kozé. Sa c’est enn kitsoz ki preské tou bann adolescent reproche zot bann parent. Ki Ken ti kapav faire? Li rappel: “Mo ti decide pou passe plus lé-temps avek li, nou deux tousel, ek nou ti koz lor seki li ti pensé, seki li ti ressenti ek seki ti agace li. Sa ti vrai-mem enn grand l’aide.” (Proverbes 20:5) Mais Ken pensé ki sa method-la inn marché parski ti deja ena communication entre zot dan lakaz. Li dire: “Moi ek mo tifi, nou ti toujours ena bann bon relation, alors li ti senti-li libre pou koz ar moi.”

Li interessant pou noté ki enn l’etude ki’nn fek faire montré ki bann adolescent ena trois fois plus tendance ki zot parent, pou dire ki bann parent ek bann zenfant pa passe assez lé-temps ensam. Alors kifer pa suive conseil ki la Bible donné? Passe autant lé-temps ki ou kapav avek ou bann zenfant—dan ou lé-temps libre ek kan ou pé travail, dan lakaz ek kan ou pé voyagé, dan gramatin kan ou levé ek a-soir avant ou al dormi. Si possible, amenn zot ar ou n’importe kot-sa ou allé. Pareil couma Deutéronome 6:7 faire nou comprend, nanyin pa kapav remplace le temps ki ou kapav passé avek ou zenfant.

Enseigne zot bann bon principe

Mario, enn avocat ki ena deux zenfant, donne sa conseil-la li aussi: “Donne ou zenfant beaucoup l’amour, ek lire ar zot.” Mais, pa faire sa zis parski ou envie faire zot travail zot bann capacité mental. Ou bizin montré zot couma pou faire difference entre seki bon ek seki mauvais. Mario ajouté: “Faire enn l’etude la Bible avek zot.”

A cause sa, la Bible donne bann parent sa conseil-la: “Zot, bann papa, pa enerve zot zenfant, mais elevé zot kan [ou] enseigne zot ek conseil zot dan enn fason ki en accord avek volonté Seigneur.” (Éphésiens 6:4, Semeur) Zordi, dan beaucoup lakaz, pa mette assez l’accent lor l’instruction moral. Certain pensé ki kan bann zenfant vinn pli grand, zot pou kapav decidé par zot-mem ki principe zot pou accepté personnellement. Eski ou trouve sa raisonnable? Pareil couma bann jeune lekor bizin enn bon nourriture pou zot grandi, vinn fort ek ena enn bon la-santé, bann jeune l’esprit ek bann jeune leker aussi bizin conseil. Si ou zenfant pa aprann bann principe moral avek ou dan lakaz, surement ki zot pou adopté bann fason pensé zot bann camarade lekol ek zot bann professeur, ou-soit bann fason pensé ki ena dan journal, radio, television ek lor Internet.

La Bible kapav aide bann parent pou enseigne zot zenfant couma pou faire difference entre seki bon ek seki mauvais. (2 Timothée 3:16, 17) Jeff, enn ancien ki ena bien l’experience ek ki’nn elevé deux zenfant, conseil pou servi la Bible pou enseigne bann zenfant bann bon principe. Li dire: “Kan servi la Bible, sa aide bann zenfant pou comprend seki nou Createur pensé lor enn kitsoz, pa zis seki papa ek mama pensé. Seki nou’nn remarké, c’est l’effet ki zis la Bible tousel kapav ena lor l’esprit ek leker. Pou reglé enn problem ki concerne enn mauvais conduite ou-soit enn mauvais fason pensé, nou ti prend le temps pou rod enn verset la Bible approprié. Lerla nou ti faire zenfant-la lire sa verset-la en privé. Souvent enn ti larme ou-soit gros-gros larme ti coulé lor so la-joue apré ki li’nn lire sa verset-la. Sa ti etonne nou. La Bible ti ena plus l’influence ki n’importe ki kitsoz ki nou ti kapav pensé pou dire ou-soit pou faire.”

Hébreux 4:12 expliké: “Parole Bondié, li vivant ek li puissant, . . . ek li kapav decouvert bann pensée ek bann l’intention ki ena dan leker.” Alors message ki ena dan la Bible, li pa zis fason pensé ou-soit l’experience personnel bann dimoune ki Bondié inn servi pou ecrire la Bible. Mais, li represente pensée Bondié Li-mem lor bann question moral. A cause sa, message ki ena dan la Bible, li bien differerent ar tou bann lezot conseil. Kan ou servi la Bible pou enseigne ou zenfant, ou pé aide zot pou ena pensée Bondié. Formation ki ou donne zot ena plus valeur, ek ou ena plus chance touche leker ou zenfant.

Catherine ki nou ti deja mentionné, d’accord avek sa. Li dire: “Pli situation ti difficile, pli nou ti rod conseil dan Parole Bondié—ek sa ti marché!” Eski ou kapav servi la Bible plus pou enseigne ou zenfant couma pou faire difference entre seki bon ek seki mauvais?

Agir dan enn fason raisonnable

L’apotre Paul montré enn lot principe important ki utile pou elevé zenfant. Li ti dire so bann compagnon chrétien: “Laisse tou dimoune koné ki zot bann dimoune raisonnable.” (Philippiens 4:5) Sa vedir ki nou bann zenfant aussi bizin trouvé ki nou raisonnable. Ek rappel ki enn dimoune raisonnable reflete “la sagesse ki sorti la-haut.”—Jacques 3:17.

Mais kan nou raisonnable, couma sa kapav aide nou pou donne formation nou zenfant? Mem si nou donne zot tou l’aide ki possible, nou pa kapav control chaque kitsoz ki zot faire. Par exemple, Mario ki nou’nn deja cité, li enn Témoin de Jéhovah, ek li rappel: “Nou ti touletan encourage nou bann zenfant pou prend bapteme, pou faire service pionnier, ek pou ena lezot objectif spirituel. Mais nou ti faire zot bien comprend ki c’est zot ki ti pou faire zot choix kan arrive l’heure.” Resultat: zot toulé-deux zenfant dan service pionnier zordi.

La Bible donne bann papa sa l’avertissement-la dan Colossiens 3:21: “Pa enerve zot zenfant, pou ki bannla pa decouragé.” Catherine bien content sa verset-la. Kan enn parent commence perdi patience, li facile pou li en colere ou-soit pou li exige trop beaucoup. Mais, Catherine dire: “Fodé pa ou demann ou zenfant faire autant ki seki ou, ou kapav faire.” Catherine aussi enn Témoin de Jéhovah, ek li ajouté: “Faire ki ou bann zenfant trouve la joie pou servi Jéhovah.”

Jeff, ki nou ti deja mentionné, faire sa remark bien pratik-la: “Kan nou bann zenfant ti pé grandi, enn bon camarade ti dire nou ki li ti realisé ki souvent li ti’nn bizin dire so zenfant non. A cause sa, bann zenfant-la ti agacé ek zot ti ena l’impression ki ti pé faire dominere ar zot. Pou evite sa, li ti conseil nou pou rod bann l’occasion pou dire oui.

Jeff dire: “Nou ti trouve sa conseil-la bien utile. Lerla nou ti rod bann l’occasion pou laisse nou zenfant faire kitsoz avek lezot dan bann situation kot nou ti d’accord. Alors nou ti aborde zot ek nou ti dire: ‘Eski to koné ki intel pé faire tel-tel kitsoz? Kifer to pa allé toi aussi?’ Ou-soit si zot ti demann nou pou amenn zot enn l’endroit, nou ti force-nou pou allé mem si nou ti fatigué. Nou ti faire sa zis pou evite dire non.” Sa-mem ki vedir raisonnable—agir avek la justice, ena consideration ek cedé sans desobeir bann principe la Bible.”

Profite bann bon conseil

Zordi la plupart sa bann couple-la zot bann grand-parent. Zot content pou trouvé ki sa bann mem principe-la pé aide zot zenfant reussi en tant ki parent. Eski ou kapav tire profit ar bann conseil ki ena dan la Bible?

Kan Ruth, ki nou ti mentionné avant, ti vinn enn parent, li ek so missié ti senti-zot tousel parfois. Mais en realité zot pa ti tousel, zot ti ena bann pli bon conseil ki kapav ena ek ki trouve dan Parole Bondié, la Bible. Bann Témoins de Jéhovah inn faire beaucoup bon livre ki basé lor la Bible ki kapav aide bann parent. Parmi ena Mo Liv Zistwar la Bible, Écoute le grand Enseignant, Les jeunes s’interrogent—Réponses pratiques ek Le plus grand homme de tous les temps. Torlief, mari Ruth, dire: “Zordi ena bann conseil la Bible en abondance pou aide bann parent. Si zot zis profite sa, zot kapav gagne l’aide dan tou domaine, a mesure ki zot zenfant grandi.”

[L’encadré, page 5]

Seki bann SPECIALISTE dire . . . Seki la BIBLE dire

Lor fason pou montré l’affection:

Dan The Psychological Care of Infant and Child (1928), Dr. John Broadus Watson donne sa conseil-la bann parent: “Jamais pa serre [ou zenfant] dan ou lé-bras ek embrasse zot. Jamais pa laisse zot assize lor ou.” Mais sa pa faire trop longtemps ki Dr. Vera Lane ek Dr. Dorothy Molyneaux ti faire sa remark-la dan magazine Nos enfants (angl.) (mars 1999): “Bann recherche montré ki bann ti zenfant ki pa gagne okenn contact physik ek l’affection souvent pa developpé couma bizin.”

Parkont, dan Isaïe 66:12 Bondié montré l’amour ki Li ena pou so peuple par bann parole ki bann parent servi pou exprime zot l’amour pou zot zenfant. Jésus aussi pareil. Kan so bann disciple ti rod empeche bann dimoune pou amenn zot bann ti zenfant vers li, li ti reprend zot ek li ti dire: “Laisse bann ti zenfant vinn vers moi; pa rod empeche zot.” Apré sa “li ti prend bann zenfant dan so lé-bras ek li ti commence beni zot.”—Marc 10:14, 16.

Lor l’enseignement concernant bann bon principe:

En 1969, dan enn lartik ki ti parette dan magazine New York Times, Bruno Bettelheim, enn psychologue, ti insisté ki enn zenfant ena ‘droit pou forme so prop l’opinion, dapré so prop l’experience la-vie mais pa dapré sermon ki so bann parent faire ar li.’ Mais preské 30 an apré, Robert Coles, enn psychiatre, ti dire dan so livre The Moral Intelligence of Children (1997): “Bann zenfant bien bizin enn but, enn direction dan la vie, ek aussi bann principe” ki zot parent ek lezot adulte approuvé.

Proverbes 22:6 donne sa conseil-la bann parent: “Instruire enn garson dan chemin ki bon pou li; mem kan li vinn vié, li pa pou vire ledo ar sa.” Mot hébreu ki traduire par “instruire” vedir aussi “commencé.” Ici li pé koz lor bann premier l’instruction ki donne enn ti-baba depuis commencement-mem. Sa bann parole-la encourage bann parent pou commence enseigne zot zenfant bann bon principe depuis ki zot encore bien tipti. (2 Timothée 3:14, 15) Ena enn grand chance ki zot pa blié seki zot finn aprann pendant sa bann l’année kot zot inn gagne sa formation-la.

Lor discipline:

Dr. James Dobson ti ecrire dan so livre L’enfant difficile (angl.) (1978): “Kan enn zenfant gagne batté avek enn parent ki content li, sa li enn moyen pou parent-la enseigne li ek empeche li ena enn conduite ki pou faire li di-tort.” Lot coté, dan enn lartik ki basé lor septieme edition enn livre anglais bien populaire, Comment soigner et éduquer son enfant (1998), Dr. Benjamin Spock dire: “Kan batte zenfant, sa montré zot ki kan enn dimoune pli agé ek pli fort, li ena pouvoir pou faire seki li envie, mem si li pena raison.”

Concernant la discipline, la Bible dire: “Rotin ek reprimande, sa ki donne la sagesse.” (Proverbes 29:15) Mais, batté pa necessaire pou tou zenfant. Proverbes 17:10 dire nou: “Enn reprimande ena plus l’effet lor enn dimoune intelligent ki cent coup-de-baton lor enn dimoune bet.”

[Zimage]

Servi la Bible pou touche leker ou zenfant

[Zimage, page 7]

Bann parent ki ena la sagesse, organise bann moment detente pou zot bann zenfant