COMIÉ chretien ena dan le monde? Dapré Atlas de la chrétienté dans le monde (en anglais), en 2010, ti ena environ 2,3 milliard chretien dan le monde. Mais sa-mem livre-la dire aussi ki sa bann chretien-la forme partie dan plus ki 41,000 groupe​—chaque groupe ena so bann prop doctrine ek so bann prop principe ki guide zot conduite. Nou comprend kifer certain observateur dan confusion ek zot deçu kan zot trouve sa quantité religion “chretien[-la].” Kitfois zot demann-zot-mem: ‘Eski tou bann ki pretann zot chretien, vrai-mem chretien?’

Anou examine sa question-la dan enn fason different. Normalement, enn voyageur bizin dire so nationalité kan li pé al dan enn lot pays. Li bizin aussi montré certain papier, couma par exemple so passeport, pou prouve so l’identité. Li pareil aussi pou enn vrai chretien, li bizin faire plus ki zis dire ki li ena la foi en Christ. Li bizin ena lezot kitsoz ki identifié li couma enn chretien. Ki sa bann kitsoz-la sa?

Ti servi mot “chretien” premier fois enn tipé apré 44 nou lepok. Luc, ki ti ecrire enn livre dan la Bible ek ki ti aussi enn historien, ti dire: “C’est dan Antioche ki premier fois Bondié ti faire bann disciple porte nom chretien.” (Actes 11:26) Remarké ki bann ki ti appel chretien, ti bann disciple Christ. Couma enn dimoune vinn enn disciple Jésus Christ? Enn dictionnaire, The New International Dictionary of New Testament Theology donne sa l’explication-la: “[Kan enn dimoune] suive Jésus couma enn disciple, sa vedir ki li accepté pou sacrifié-li toute longue so la vie, sans pose okenn condition.” Alors, enn vrai chretien c’est enn kikenn ki suive bann l’enseignement ek bann instruction Jésus, ki ti fonde religion chretien. Li accepté pou faire sa dan enn fason complet, sans pose okenn condition.

Eski li possible pou trouve sa qualité dimoune-la parmi tou bann ki pretann ki zot chretien zordi? Dapré Jésus, ki kitsoz ti pou identifié so bann vrai disciple? Nou invite ou pou guetté couma la Bible reponn sa bann question-la. Dan bann prochain lartik, nou pou examine cinq kitsoz ki Jésus ti dire lor so bann vrai disciple ek ki pou permette nou koné kisannla zot été. Nou pou guetté couma bann chretien dan premier siecle ti rempli sa bann condition-la. Ek nou pou faire tou pou trouvé kisannla parmi bann ki dire zot chretien zordi pé suive sa modele-la.

“Si zot contigne garde mo parole, zot vrai-mem mo bann disciple, ek zot pou konn la verité, ek la verité pou libere zot.”​—JEAN 8:31, 32.

Ki sa vedir: Kan Jésus ti servi mot “parole,” sa ti represente so bann l’enseignement. Li ti gagne sa bann l’enseignement-la avek enn kikenn ki pli grand ki li. Li ti dire: “Mo Papa ki finn envoye moi Li-mem finn donne moi enn commandement concernant seki mo bizin dire ek seki mo bizin annoncé.” (Jean 12:49) Dan enn la priere ki li ti faire ar Jéhovah, so Papa ki dan le ciel, Jésus ti dire: “To parole li la verité.” Souvent li ti cite Parole Bondié pou appuye so bann l’enseignement. (Jean 17:17; Matthieu 4:4, 7, 10) Alors, bann vrai chretien ‘garde so parole’​—setadir, zot accepté Parole Bondié, la Bible, couma “la verité.” Pou zot, sa livre-la ena l’autorité en rapport avek zot bann croyance ek tou seki zot faire.

Couma bann premier chretien ti rempli sa condition-la: L’apotre Paul ki finn ecrire pli beaucoup livre dan la Bible, ti ena respé pou Parole Bondié, pareil couma Jésus. Li ti ecrire: “Tou l’Ecriture li inspiré par Bondié, ek li utile.” (2 Timothée 3:16) Bann zom ki’nn etabli pou enseigne lezot chretien ti bizin “reste attaché ar Parole Bondié ki sur ek ki [nou] kapav faire confiance.” (Tite 1:7, 9, The Amplified Bible) Bann chretien premier siecle ti gagne conseil pou rejette “philosophie ek tromperie ki dan vide dapré tradition bann zom, dapré bann kitsoz de base ki ena dan sa le monde-la ek pa dapré Christ.”​—Colossiens 2:8.

Kisannla suive zot l’exemple zordi?: Dapré enn l’enseignement ki Vatican ti etabli en 1965 (Constitution dogmatique sur la révélation divine) ek ki ti cité dan livre Catéchisme de l’Église catholique: “L’Eglise [catholique] pa base-li zis lor bann l’Ecriture Sacré pou croire tou seki finn revelé. Alors, nou bizin accepté ek donne l’importance bann tradition sacré ek bann l’Ecriture Sacré toulé-deux, avek mem fidelité ek respé.” Enn lartik dan magazine Maclean’s ti cite seki enn madame, ki enn pasteur dan Toronto, Canada, ti demandé: “Kifer nou bizin enn la voix ‘revolutionnaire’ ki’nn existé ena deux mille an, pou guide nou? Nou ena nou bann prop l’idée extraordinaire ki touletan pé affaibli parski nou bizin faire zot vinn en accord ar [bann l’enseignement] Jésus ek ar bann l’Ecriture.”

Concernant bann Témoins de Jéhovah, Nouvelle Encyclopédie catholique (en anglais) dire: “C’est zis lor la Bible tousel ki zot base zot croyance ek bann principe ki guide zot conduite.” Pa trop longtemps dan Canada, kan enn soeur ti pé presente-li-mem ar enn missié, missié-la ti dire li: “Mo koné kisannla ou été.” Avek so lé-doigt, li ti montré la Bible sa soeur-la ek ti dire li: “Par ou signature.”

“Le monde finn ena la haine pou zot, parski zot pa faire partie dan le monde.” ​—JEAN 17:14.

Ki sa vedir: Jésus pa ti faire partie dan le monde, alors, li pa ti prend part dan okenn la guerre social ek politik dan so lepok. Li ti donne sa l’explication-la: “Si mo royaume ti faire partie dan sa le monde-la, mo bann serviteur ti pou laguerre pou ki pa livré moi ar bann Juif. Mais, mo royaume pa sorti ici.” (Jean 18:36) Li ti aussi encourage so bann disciple pou rejette bann l’attitude, bann parole, ek enn conduite ki Parole Bondié condamné.​—Matthieu 20:25-27.

Couma bann premier chretien ti rempli sa condition-la: Dapré Jonathan Dymond, enn ecrivain ki ecrire lor la religion, bann premier chretien “ti refuse pou prend part dan [la guerre]; n’importe ki consequence sa ti ena, mem si zot ti gagne bann reproche, ti mette zot dan prison, ou-soit ti touye zot.” Zot ti choisir pou souffert pou zot pa desobeir zot principe en rapport avek zot neutralité. Zot bann principe moral aussi ti mette zot a part. Pierre ti dire bann chretien: “Parski zot nepli galope ensam avek bannla pou amenn sa mem mauvais la vie-la, bannla etonné ek contigne koz en mal lor zot.” (1 Pierre 4:4) Will Durant, enn historien, ti ecrire ki bann chretien “ti bien attaché ar Bondié ek ti ena enn bon la vie, ek sa ti pé troublé bann païen ki ti pé amusé couma bann fou.”

Kisannla suive zot l’exemple zordi? Concernant neutralité bann chretien, Nouvelle Encyclopédie catholique (en anglais) dire ki li mauvais lor plan moral pou refuse prend bann zarme. Enn lartik dan Reformierte Presse dire ki African Rights, enn l’organisation ki defann droit bann dimoune, ti faire enn rapport lor massacre ki ti ena dan Rwanda en 1994. Dapré sa rapport-la, tou bann religion la chretienté ti participe dan sa massacre-la, “excepté bann Témoins de Jéhovah.”

Kan enn professeur l’université ti koz lor Holocauste, setadir kan bann nazi ti faire touye bann Juif, li ti dire avek beaucoup la peine ki “okenn groupe, ni l’organisation kot ena bann citoyen ordinaire, pa finn denonce sa quantité mensonge, cruauté, ek massacre ki ti ena-la.” Apré ki li ti visite enn musée en Amérique (United States Holocaust Memorial Museum), li ti ecrire: “Asterla mo finn gagne mo reponse.” La-bas li ti aprann ki bann Témoins de Jéhovah ti reste ferme en rapport avek zot croyance malgré bann traitement bien cruel ki zot ti gagné.

Ki nou kapav dire lor zot bann principe moral? Magazine U.S. Catholic dire: “La plupart parmi bann jeune catholique pa d’accord avek zot religion ki defann pou vive ensam sans marié [ek] pou gagne relation sexuel avant mariage.” Sa magazine-la cite enn membre ki ena bann responsabilité dan l’eglise, ki ti dire: “Enn grand pourcentage [bann dimoune]​—mo pensé plus ki 50 pour cent​—pé deja vive ensam kan zot decidé pou zot marié.” The New Encyclopædia Britannica faire remarké ki bann Témoins de Jéhovah “mette l’accent lor bann principe moral bien elevé dan zot la vie personnel.”

“Mo pé donne zot enn nouveau commandement: zot bizin content zot camarade. Pareil couma mo finn content zot, zot aussi, zot bizin content zot camarade. Par sa tou dimoune pou koné ki zot mo bann disciple, si zot ena l’amour entre zot.”​—JEAN 13:34, 35.

Ki sa vedir: Christ ti dire so bann disciple ki zot bizin content sakenn zot camarade pareil couma li ti content zot. Couma Jésus ti content zot? Li ti content tou dimoune malgré ki dan so lepok, bann dimoune ti meprise bann ki ti sorti dan lezot pays ek ti meprise bann femme. (Jean 4:7-10) L’amour ti pousse Jésus pou sacrifié so le temps, so la force, ek so confort personnel pou aide lezot. (Marc 6:30-34) Finalement, Christ ti montré so l’amour dan enn fason pli extraordinaire encore. Li ti dire: “Mo-mem l’excellent berger; l’excellent berger donne so nâme pou so bann mouton.”​—Jean 10:11.

Couma bann premier chretien ti rempli sa condition-la: Dan premier siecle, bann chretien ti appel zot camarade “frere” ek “soeur.” (Philémon 1, 2) Tou bann nation ti bienvenue dan congregation, parski pou bann chretien, pa ti ena “okenn difference entre enn Juif ek enn Grec, parski ena mem Seigneur lor zot tou.” (Romains 10:11, 12) Apré Pentecôte l’an 33 nou lepok, bann disciple dan Jérusalem “ti vann zot la terre ek zot di-bien ek ti partage seki zot ti gagné avek zot tou, dapré seki sakenn ti bizin.” Kifer? Pou ki bann ki ti fek baptisé kapav reste dan Jérusalem ek contigne “consacré zot le temps pou ecoute l’enseignement bann zapotre.” (Actes 2:41-45) Ki ti pousse zot pou faire sa? Moins ki 200 an apré la mort bann zapotre, Tertullien ti cite seki lezot ti dire lor bann chretien: “Zot ti content sakenn so camarade . . . ek zot ti mem pré pou mort sakenn pou so camarade.”

Kisannla suive zot l’exemple zordi? Livre Histoire du déclin et de la chute de l’Empire romain (1837) ti faire remarké ki a travers bann siecle, bann ki ti pretann zot chretien “ti agir dan enn fason pli cruel envers zot camarade, ki fason ki bann infidele [bann incroyant] ki ti zelé, ti agir envers zot [bann chretien].” Dapré enn l’etude ki’nn fek faire en Amérique, ena enn grand rapport entre bann dimoune religieux​—la plupart pretann ki zot chretien​—ek bann tendance raciste. Bann dimoune ki dan enn certain religion dan enn pays, souvent pena okenn lien avek bann dimoune dan enn lot pays ki dan mem religion ki zot, ek a cause sa, zot pa kapav ou-soit zot refuse pou aide bann membre zot religion ki bizin l’aide.

En 2004, apré ki ti ena enn serie quatre cyclone dan Floride, en deux mois, president Florida’s Emergency Operations Committee ti verifié bann stock mangé pou guetté si pé bien servi sa. Li ti dire ki pena okenn lot groupe ki bien organisé couma bann Témoins de Jéhovah. Li ti propose pou donne n’importe ki kitsoz ki bann Témoins ti bizin. Avant sa, en 1997, bann Témoins de Jéhovah ki ti forme partie dan enn groupe secours, ti prend bann medecine, mangé, ek linge ek ti voyagé pou al aide zot bann frere ek lezot dimoune ki ti bizin l’aide dan République démocratique Congo. Bann Témoins dan l’Europe ti faire bann don ki ti ena enn valeur enn million dollar américain (apepré 28 million roupie).

“Mo finn faire bann dimoune ki to finn donne moi, ek ki sorti dan le monde, konn to nom. . . . Mo’nn faire zot konn to nom ek mo pou faire konn sa.”​—JEAN 17:6, 26.

Ki sa vedir: Jésus ti faire konn nom Bondié kan li ti servi sa nom-la dan so ministere. Kan Jésus ti lire bann l’Ecriture, couma souvent li ti faire, li ti prononce nom personnel Bondié. (Luc 4:16-21) Li ti enseigne so bann disciple pou prié coumsa: “Papa, ki to nom sanctifié.”​—Luc 11:2.

Couma bann premier chretien ti rempli sa condition-la: L’apotre Pierre ti dire bann ancien dan Jérusalem ki Bondié finn tire parmi bann nation ‘enn peuple pou so nom.’ (Actes 15:14) Bann zapotre ek lezot disciple Jésus ti preché ki “tou seki invok nom Jéhovah pou sauvé.” (Actes 2:21; Romains 10:13) Zot ti aussi servi nom Bondié dan bann livre ki zot ti ecrire. Tossefta, enn livre kot ena bann la loi juif ek ki ti terminé vers 300 nou lepok, faire sa commentaire-la lor livre bann chretien ki zot bann opposant ti pé brulé: “Fodé laisse livre bann evangeliste ek livre bann minim [kitfois bann chretien juif] brulé dan difé. Laisse zot brulé kot zot été, . . . zot ek bann reference kot ena Nom Bondié ki ladan.”

Kisannla suive zot l’exemple zordi? Enn traduction la Bible ki appel Revised Standard Version, ek ki autorisé par Conseil national des Églises du Christ, en Amérique, dire dan so l’introduction: “Servi enn nom prop pou koz lor sel Bondié, coumadir ti ena lezot bondié ek ti bizin faire enn difference entre Li ek [sa bann bondié-la], c’est enn kitsoz ki religion juif avant lepok bann chretien ti’nn arrete faire, ek aussi c’est enn kitsoz ki pa en accord ditou avek la foi [bann membre] l’Eglise dan le monde entier.” Alors, sa traduction-la finn remplace nom Bondié par enn titre: “SEIGNEUR.” Pa trop longtemps, Vatican ti donne sa l’ordre-la tou so bann l’eveque: “Dan bann cantik ek bann la priere fodé pa servi, ni prononce nom Bondié dan forme tétragramme YHWH.”a

Kisannla zordi servi ek faire konn nom personnel Bondié? Kan Sergey ti enn adolescent ek ti reste Kirghizistan, li ti guette enn film kot ti montré ki nom Bondié c’est Jéhovah. Pendant apepré dix an, li pa ti tann sa nom-la encore. Plitar, Sergey ti demenagé pou al reste en Amérique. La-bas, deux Témoins de Jéhovah ti visite li ek ti montré li nom Bondié dan la Bible. Sergey ti extra content pou trouve enn groupe dimoune ki servi nom Jéhovah. Li interessant pou noté ki, kan nou guette l’expression “Bondié Jéhovah” dan Webster’s Third New International Dictionary, nou trouve sa definition-la: “Enn Bondié supreme [ki beaucoup] reconette, sel Bondié ki bann Témoins de Jéhovah adoré.”

[Note]

“Sa bon nouvelle lor royaume-la pou preché partout kot dimoune resté lor la terre couma enn temoignage pou tou bann nation; ek lerla la fin pou vini.”​—MATTHIEU 24:14.

Ki sa vedir: Dan so l’Evangile, Luc ti ecrire ki Jésus “ti al dan enn la ville apré lot ek dan enn village apré lot, li ti preché ek li ti annonce la bonne nouvelle lor royaume Bondié.” (Luc 8:1) Jésus li-mem ti dire: “Mo bizin annonce la bonne nouvelle lor royaume Bondié . . . , parski c’est a cause sa ki finn envoye moi.” (Luc 4:43) Li ti envoye so bann disciple preche la bonne nouvelle dan bann la ville ek bann village ek plitar, li ti donne zot sa l’ordre-la: “Zot pou vinn mo bann temoin . . . ziska dan region pli loin lor la terre.”​—Actes 1:8; Luc 10:1.

Couma bann premier chretien ti rempli sa condition-la: Bann disciple Jésus pa ti perdi le temps pou faire seki Jésus ti demann zot. “Toulé-jour, dan temple ek lakaz par lakaz, zot ti contigne enseigne ek annonce la bonne nouvelle sans arreté lor le Christ.” (Actes 5:42) C’est pa zis enn groupe dimoune ki ti ena enn grand position, ki ti preché. Enn historien ki appel Néander ti dire ki “Celse, premier ecrivain ki ti ecrire kont bann chretien, ti trouve sa meprisant ki bann dimoune ki ti travail avek la laine, bann cordonnier, bann ki ti travail avek cuir, bann dimoune ki pa ti konn lire ek ki pa ti ena bon maniere, ti bann predicateur l’evangile bien zelé.” Dan so livre, Les premiers siècles de l’Église, Jean Bernardi ti ecrire: “[Bann chretien] ti bizin al partout ek ti koz ar tou dimoune. Lor bann grand la route ek dan bann la ville, dan bann place publik ek dan bann lakaz. Ki bann dimoune ti accueillir zot ou-soit non. . . . ziska dan boute la terre.”

Kisannla suive zot l’exemple zordi? David Watson, enn pretre anglican, ti ecrire: “L’Eglise pa finn prend so responsabilité pou preché ek pou enseigné avek serieux, c’est enn raison kifer zordi bann dimoune nepli interessé pou servi Bondié.” Dan so livre, Pourquoi les catholiques s’en vont-ils ? (espagnol), José Luis Pérez Guadalupe ti ecrire lor l’activité bann evangelik, bann adventiste, ek lezot religion. Li ti faire remarké ki “zot pa al lakaz par lakaz.” Concernant bann Témoins de Jéhovah, li ti ecrire: “Zot contigne al lakaz par lakaz.”

Jonathan Turley ti faire enn remark bien interessant dan enn publication ki appel Cato Supreme Court Review, 2001-2002: “Mentionne bann Témoins de Jéhovah ek la plupart dimoune desuite pense bann predicateur ki visite nou kot nou dan bann ler ki derange nou. Pou bann Témoins de Jéhovah, preche lakaz par lakaz, c’est pa zis [enn fason] pou faire konn zot la foi mais c’est enn kitsoz important pou zot prop la foi.”

[L’encadré page 9]

Eski ou reconette seki identifié zot?

Dapré bann pensée biblik ki nou finn examiné dan sa serie lartik-la, kisannla zordi ou pensé pé montré ki zot bann vrai chretien? Mem si ena plusieurs millier groupe ki pretann zot chretien, rappel seki Jésus ti dire so bann disciple: “Pa tou seki dire moi: ‘Seigneur, Seigneur,’ ki pou rente dan royaume ki dan le ciel, mais celui ki faire volonté mo Papa ki dan le ciel.” (Matthieu 7:21) Si nou reussi reconette kisannla ki pé faire volonté Papa Jésus​—ek coumsa montré ki zot bann vrai chretien​—ek nou associé nou avek zot, sa kapav faire nou gagne bann benediction eternel kan Royaume Bondié pou dirigé. Nou invite ou pou demann bann Témoins de Jéhovah ki finn donne ou sa magazine-la, plus renseignement lor Royaume Bondié ek bann benediction ki sa Royaume-la pou amené.​—Luc 4:43.