“Mo ti koumans reflesi dan enn fason serye ki direksion mo lavi ti pe pran”

MO PASE:

Mo ti grandi dan enn ti lavil ki apel Warialda ek ki trouv dan Nouvelle-Galles du Sud. Dan Warialda fer lelvaz mouton ek bef, ek fer plantasion sereal ek bann ti plantasion. Se enn lavil ki prop, ek rar tann bann move kitsoz.

Nou ti a dis zanfan ek mo ti pli gran. Kan mo ti ena 13 an, mo ti koumans travay pou ed mo paran swagn nou fami. Parski mo ti ena zis enn tigit ledikasion, mo ti travay dan bann laferm. Kan mo ti ena 15 an, mo ti travay kouma gardien zanimo ek mo ti dres bann seval sovaz.

Kan mo ti travay dan bann laferm, sa ti ena bann lavantaz me osi bann dezavantaz. Enn kote, mo ti vremem kontan sa travay-la, ek osi lanvironnman kot mo ti pe travay. Aswar, mo ti ena labitid asiz devan enn ti dife ek get lalinn ek bann zetwal dan lesiel, pandan ki labriz ti amenn parfin bann pie ki ti ena toutotour. Mo rapel ki mo ti pe panse ki bizin ena enn Kikenn ki’nn kree tou sa bann kitsoz extraordiner-la. Selman, kot mo ti pe travay ti ena osi bann move linflians. Souvan mo ti tann bann dimounn zoure, ek li ti bien fasil pou mo gagn bann sigaret. Bien vit, mo’si mo ti koumans fime ek zoure.

Kan mo ti gagn 18 an, mo ti al res Sydney. Mo ti esey rant dan larme me bann-la pa ti aksepte mwa akoz mo pa ti ena ase ledikasion. Me mo ti gagn enn travay dan Sydney ek mo ti res laba pou enn an. Se pandan sa lepok-la ki mo’nn zwenn bann Temwin Jéhovah pou premie fwa. Mo ti aksepte linvitasion pou asiste enn zot bann renion, ek deswit mo ti trouve ki zot ti pe ansegn laverite.

Selman, enn tipe apre sa, mo ti desid pou retourn dan lakanpagn. Alafin, mo ti al res dan enn landrwa ki apel Goondiwindi, dan Queensland. Laba mo ti gagn enn travay ek mo ti marye, me malerezman mo ti osi koumans bwar.

Mo madam ek mwa nou finn gagn de zanfan. Apre nesans mo bann garson, mo’nn koumans reflesi dan enn fason serye ki direksion mo lavi ti pe pran. Mo ti rapel seki mo ti tande dan sa renion bann Temwin ki mo ti asiste dan Sydney la ek mo ti desid pou fer kitsoz.

Mo ti trouv enn vie nimero Latour Degard, kot ti ena ladres filial bann Temwin Jéhovah dan l’Australie. Mo ti avoy enn let pou demann led, ek enn Temwin ki bien zanti ek ki ena boukou lafeksion ti vinn vizit mwa. Bien vit li’nn koumans enn letid Labib ar mwa.

KOUMA LABIB INN SANZ MO LAVI:

Amezir mo ti pe etidie Labib, mo ti konpran ki mo bizin fer bann gran sanzman dan mo lavi. Enn verse Labib ki ti sirtou tous mwa se 2 Corinthiens 7:1. Sa verse-la ankouraz nou pou “tir dan nou tou kitsoz ki sali nou lekor.”

Mo ti desid pou aret fime ek bwar boukou. Li pa ti fasil pou fer sa bann sanzman-la, parski mo ti ena sa bann labitid-la depi bien lontan. Me mo ti bien deside pou viv dan enn fason ki fer Bondie plezir. Seki finn pli ed mwa se kan mo’nn met an pratik seki ena dan Romains 12:2 ki dir: “Aret fer parey kouma sa lemond-la, me transform zot, ek renouvle zot fason panse.” Mo ti realize ki pou mo kapav sanz mo bann labitid, mo ti bizin sanz mo fason panse ek pans parey kouma Bondie lor sa bann labitid-la, setadir ki zot ti pe fer mwa ditor. Avek so led, mo’nn reisi aret fime ek bwar boukou.

Me seki ti pli difisil pou mwa se aret zoure. Mo ti konn konsey ki Labib done dan Éphésiens 4:29 ki dir: “Pa les okenn parol pouri sorti dan zot labous.” Malgre sa, mo pa ti reisi deswit koriz mo langaz. Mo ti trouve ki kan mo ti medit lor bann parol ki ena dan Isaïe 40:26, sa ti ed mwa. Sa verse-la ki koz lor lesiel ki ranpli ar zetwal, dir: “Lev zot lizie lao ek gete. Kisann-la ki finn kree sa bann kitsoz-la? Se sa Kikenn ki fer zot larme sorti dapre zot kantite; Li apel zot tou par zot nom. Akoz labondans lenerzi aktif, parski Li pwisan par lafors, pena enn [parmi zot] ki manke.” Alor, mo ti dir momem: ‘Si Bondie ena pouvwar pou kree sa gran liniver ki mo bien kontan admire la, sirman li pou kapav donn mwa lafors pou sanze pou mo kapav fer li plezir.’ Mo ti fer boukou lapriyer ek boukou zefor, ek tigit-tigit mo’nn arive kontrol mo bann parol.

KI BENEDIKSION MO FINN GAGNE:

Kan mo ti travay kouma gardien zanimo, mo pa ti ena boukou lokazion pou koz avek bann dimounn, parski ti ena tigit dimounn dan bann laferm kot mo ti pe travay. Pourtan, gras-a bann formasion ki mo’nn gagne dan bann renion Temwin Jéhovah, mo’nn aprann pou exprim mwa. Sa bann formasion-la inn osi ed mwa pou koz ar bann dimounn lor bon nouvel Rwayom Bondie.​—Matthieu 6:9, 10; 24:14.

Sa fer deza plizir lane ki mo pe servi dan lazwa kouma ansien dan kongregasion bann Temwin Jéhovah. Pou mwa, se enn loner pou fer tou seki mo kapav pou ed mo bann frer ek ser.

Mo remersie Jéhovah ki Li’nn ansegn mwa​—enn kikenn ki pena boukou ledikasion. (Isaïe 54:13) Mo dakor san-poursan avek bann parol Proverbes 10:22 ki dir: “Benediksion Jéhovah​—samem ki fer vinn ris.”