Kouma Bann Temwin Zeova Azir Anver Bann Ki Avan Ti Form Parti dan Zot Relizion?
Nou fer zefor pou azir avek lamour, zantiyes, ek respe anver tou dimounn. Si enn Temwin Zeova nepli partisip osi regilierman dan nou bann aktivite ouswa ki li’nn aret ador Zeova, nou pran linisiativ pou al koz avek li, pou rasir li ki nou kontan li, ek esey ed li pou revinn pros avek Bondie.—Lik 15:4-7.
Parfwa, li kapav arive ki bizin tir enn dimounn dan lasanble akoz bann kitsoz ki li’nn fer. (1 Korintien 5:13) Me selman, nou pou fer boukou zefor pou ed sa dimounn-la pou ki li res dan lasanble, parski nou ena enn profon lamour pou bann ki ador Zeova ansam avek nou. Ek mem si arive li nepli form parti dan lasanble, nou kontign montre li lamour ek respe, parey kouma Labib ankouraz nou pou fer.—Mark 12:31; 1 Pier 2:17.
Kifer bizin tir enn dimounn dan lasanble?
Labib dir dan enn fason bien kler ki si enn Kretien fer enn pese grav ek refiz pou sanze, bizin tir li dan lasanble.a (1 Korintien 5:11-13) Se Labib ki determine ki bann pese ki grav ek ki kapav ena pou konsekans ki tir sa dimounn-la dan lasanble. Par exanp, li koz lor bann pese kouma ladilter, bwar ziska sou, krim, violans domestik, ek kokin.—1 Korintien 6:9, 10; Galat 5:19-21; 1 Timote 1:9, 10.
Selman, kan enn dimounn inn fer enn pese grav, se pa deswit ki nou tir li dan lasanble. Pou koumanse, bann ansienb dan lasanble pou esey ed li pou ki li sanz so kondwit. (Romin 2:4) Zot fer tou seki zot kapav pou tous leker sa dimounn-la avek douser, zantiyes, ek takt. (Galat 6:1) Kan zot fer sa, sa kapav fer dimounn-la realize ki bann erer ki li’nn fer ek lerla sa ed li pou repanti. (2 Timote 2:24-26) Si mem apre ki bann ansien inn fer zefor plizir fwa pou ed li, li fer sa vinn enn labitid pou dezobeir bann prinsip ki ena dan Labib ek li pa repanti, pou bizin tir li dan lasanble. Lerla bann ansien pou zis anonse dan lasanble ki sa dimounn-la nepli Temwin Zeova.
Bann ansien fer tou seki zot kapav pou tous leker sa dimounn-la avek douser, zantiyes, ek takt.
Kifer li enn bon kitsoz ki tir enn kikenn ki kontign fer pese? Premierman, sa permet lasanble pou kontign respekte bann prinsip Bondie konsernan moralite ek sa protez lasanble kont linflians negatif ki sa dimounn-la kapav ena. (1 Korintien 5:6; 15:33; 1 Pier 1:16) Deziemman, sa kapav pous sa dimounn ki’nn fer pese la pou aret so bann move pratik ek motiv li pou sanze.—Ebre 12:11.
Kouma bann Temwin Zeova azir anver bann ki nepli form parti dan lasanble?
Labib dir ki bann Kretien bizin “aret frekant” enn kikenn ki nepli form parti dan lasanble ek osi “fode mem pa ki zot manz avek enn dimounn koumsa.” (1 Korintien 5:11) Alor nou pa pou pas letan avek enn dimounn ki nepli form parti dan lasanble. Selman, nou pa pou inior li net. Nou tret li avek respe. Li invite pou asiste nou bann renion, kot bann Temwin Zeovac pou kapav akeyir li. Li kapav osi demann bann ansien pou ed li retourn dan lasanble.
Bann ki nepli form parti dan lasanble invite pou asiste nou bann renion.
Ki nou kapav dir konsernan enn dimounn ki nepli form parti dan lasanble me ki so konzwin ek so bann zanfan ankor Temwin Zeova? Mem si li nepli ador Zeova ansam avek so fami, zot ankor bann manb enn sel fami. Parski zot res dan mem lakaz, li ankor ena enn lien avek so konzwin ek so bann zanfan, alor zot pou kontign amenn enn lavi fami normal ek kontign montre lafeksion anver sakenn zot kamarad.
Enn dimounn ki nepli form parti dan lasanble kapav demann bann ansien pou vizit li. Ek pandan sa bann vizit-la, bann ansien pou partaz avek li bann konsey Biblik ki ranpli ar lamour, ek avek zantiyes zot pou ankouraz li pou repanti ek retourn ver Bondie. (Zakari 1:3) Si li aret fer seki move ek montre enn dezir sinser pou viv dapre bann prinsip Labib, li pou kapav re-form parti dan lasanble. Lasanble pou “pardonn li avek tou zot leker ek rekonfort li,” parey kouma bann Kretien dan Korint ti fer kan enn kikenn ki ti fer pese ti sanz so kondwit.—2 Korintien 2:6-8.
Kouma bann ki’nn viv sa sitiasion-la santi zot aster-la?
Anou get sertin temwaniaz bann Temwin Zeova, ki pandan enn moman ti nepli form parti dan lasanble, me ki apre inn desid pou retourn ver Bondie.
“Kan mo’nn desid pou retourn dan lasanble, mo ti panse ki bann ansien ti pou anvi konn tou seki mo’nn fer pandan sa bann dizenn lane ki mo pa ti dan lasanble la. Olie sa, zot ti zis dir mwa, ‘Nou anvi ki to konsantre lor lavenir.’ Apre sa, mo ti santi mwa soulaze.”—Maria, Letazini.
“Pandan tou sa letan-la, lasanble ti pe atann ki mo retourne. Mo ti santi ki mo ena valer. Mo bann frer ek ser dan lasanble inn fer mwa santi ki zot inn pardonn mwa ek ki Zeova osi inn pardonn mwa, ek sa inn ed mwa pou aret santi mwa mal konsernan lepase. Bann ansien ti touletan la pou ed mwa pou regagn enn bon relasion avek Zeova. Zot ti konsol mwa ek ti ed mwa pou trouve ki Zeova kontan mwa ek ki mo ankor ena valer pou li.”—Malcom, Siera Leonn.
“Mo kontan ki Zeova telman kontan so pep ki li fer sir ki so lorganizasion res prop lor plan moral. Mem si sa dispozision-la kapav paret dir pou bann dimounn andeor, se enn dispozision ki alafwa neseser ek ki montre lamour. Mo vremem rekonesan ki nou Papa ki dan lesiel, Li enn Bondie ki ena lamour ek ki pardone.”—Sandi, Letazini.
a Avan, kan enn dimounn ti fer pese ek ki li pa ti repanti, nou ti dir ki li exkli. Me aster-la, nou zis servi term ki ena dan Labib ek nou dir ki finn tir sa dimounn-la dan lasanble.
b Bann ansien se bann zom ki Kretien ek ki ena matirite. Zot ansegn pep Zeova gras-a bann Lekritir ek pran swin bann serviter Zeova kan zot ed ek ankouraz bann-la. Zot pa gagn okenn lapey pou sa travay-la.—1 Pier 5:1-3.
c Dan bann ka bien rar, li arive ki enn kikenn pa zis kit lasanble, me ki li osi fer tou pou detrir li ek dekouraz bann ki ladan, ouswa ki li esey konvink lezot pou ki zot osi zot fer seki pa bon. Kan sa arive, nou swiv lord ki Labib done pou ‘pa dir bonzour’ sa kalite dimounn-la.—2 Zan 9-11.