Dignité humain—Li possible pou nou tou

“Nou bizin construire enn nouveau lé-monde—enn lé-monde ki beaucoup pli bon—enn lé-monde kot respecté dignité bann dimoune.”—PRESIDENT L’AMÉRIQUE, HARRY TRUMAN, SAN FRANCISCO, CALIFORNIE, ÉTATS-UNIS, LE 25 AVRIL, 1945.

PAREIL couma beaucoup dimoune apré Deuxieme Guerre mondial, president Truman ti pensé ki bann dimoune kapav tire leson ar seki finn arrive zot dan le passé ek construire enn “nouveau lé-monde” kot respecté dignité tou dimoune. Mais, kan nou guette seki pé passé zordi, li triste pou dire ki la realité, li different. Partout bann dimoune pé contigne crase dignité zot camarade, parski racine problem-la li pa avek bann dimoune, mais avek zot pli grand l’ennemi.

Racine problem-la

La Bible faire nou koné ki c’est Satan le Diable ki sa l’ennemi-la. Li enn creature spirituel ki mauvais ek ki, au commencement l’histoire bann humain, finn mette en doute droit ki Bondié ena pou gouverné. Depuis ki Satan ti koz avek Ève dan jardin Éden, li envie empeche bann dimoune servi zot Createur. (Genèse 3:1-5) Mazinn bann mauvais consequence ki sa finn ena lor Adam et Ève kan zot finn ecoute Satan! Kan zot finn desobeir la loi Bondié concernant sa fruit ki ti defann zot mangé-la, dé-suite toulé-deux ‘ti sauvé, ti al cachiette, pou ki Jéhovah pa trouve zot.’ Kifer? Adam ti avoué: “Mo ti peur parski mo ti touni ek alors mo’nn cachiette.” (Genèse 3:8-10) Relation ki Adam ti ena avek so Papa ki dan le ciel ek fason ki li ti considere li-mem, ti’nn changé. Li ti honté ek li ti nepli senti-li a l’aise en presence Jéhovah.

Kifer eski Satan ti envie ki respé ki Adam ti ena pou li-mem, diminué? Parski Bondié inn crée bann dimoune dan so ressemblance, ek Satan content ki zot agir dan enn maniere kot zot nepli kapav reflete la gloire Bondié couma bizin. (Genèse 1:27; Romains 3:23) Sa aide nou comprend kifer toute longue l’histoire, bann dimoune inn humilié zot camarade. En tant ki “bondié sa system-la,” Satan finn encourage sa l’esprit-la pendant tou “sa lé-temps kot dimoune finn domine dimoune pou zot prop malheur.” (2 Corinthiens 4:4; Ecclésiaste 8:9; 1 Jean 5:19) Eski sa vedir ki vrai dignité ki bann dimoune ti supposé ena, finn perdi pou touletan?

Jéhovah donne dignité so creation

Mazinn encore bann condition ki ti ena dan jardin Éden avant kiAdam et Ève faire peché. Zot ti ena mangé en abondance, ek enn travail ki ti donne zot beaucoup satisfaction. En plus, zot ek zot bann descendant ti ena possibilité pou vive en bonne santé pou touletan. (Genèse 1:28) Chaque domaine zot la-vie ti faire ressorti projet ki Bondié ena pou bann dimoune, enn projet ki rempli ar l’amour ek dignité.

Eski fason ki Bondié ti considere dignité bann dimoune ti changé kan Adam et Ève ti faire peché? Non. Li ti prend en consideration la honte ki zot ti ressenti a cause zot ti touni. Li finn montré so l’amour kan Li finn donne zot “bann longue linge ki faire ar la peau” pou remplace bann ti linge courte en feuille figue ki zot ti’nn coude pou couvert zot. (Genèse 3:7, 21) Au lieu ki Li laisse zot reste dan zot la-honte, Bondié ti traite zot avek dignité.

Plitar, kan Li ti traite avek bann Israélite, Jéhovah ti manifesté pitié envers bann orphelin, bann veuve, ek bann etranger ki ti reste parmi so peuple—bann dimoune avek ki lezot ti kapav faire dominere. (Psaume 72:13) Par exemple, kan zot ti recolté cereale, zolive ou-soit raisin, bann Israélite ti gagne l’ordre pou pa retourné pou prend seki zot ti’nn laissé dan karo. Bondié ti plutot donne zot l’ordre pou laisse sa “pou bann etranger ki reste parmi zot, pou bann orphelin ek pou bann veuve.” (Deutéronome 24:19-21) Kan le peuple ti obeir sa bann la-loi-la, personne pa ti bizin demann charité, ek mem bann dimoune ki ti pli misere, ti ena enn travail respectable.

Jésus ti donne lezot dignité

Kan li ti lor la terre, garson Bondié, Jésus Christ, ti montré ki li ti interessé ar dignité lezot. Par exemple, kan li ti en Galilée, enn missié ki ti gagne la lepre dan enn stage bien avancé, ti vinn pré ar li. Dapré la Loi mosaïk, enn lepreux ti bizin crié: “Impur, impur!” pou evité ki lezot attrape so maladie. (Lévitique 13:45) Mais, sa missié-la pa ti crié pou averti bann dimoune kan li ti approche ar Jésus. Plutot, li ti tombe lor so figure ek li ti supplié Jésus: “Seigneur, si to envie, to kapav faire moi vinn pur.” (Luc 5:12) Couma Jésus ti reagir? Jésus pa ti reprend sa lepreux-la parski li ti desobeir la Loi, ni li ti ignore li ou-soit evite li. Plutot, li ti donne li so dignité kan li ti touche li ek li ti dire: “Mo envie. Vinn pur.”—Luc 5:13.

Dan bann lezot l’occasion, Jésus ti montré capacité ki li ti ena pou gueri bann dimoune sans ki li touche zot. Parfois li ti mem gueri bann dimoune alors ki li ti loin ar zot. Mais là, li ti choisir pou touche sa missié-la. (Matthieu 15:21-28; Marc 10:51, 52; Luc 7:1-10) Parski sa missié-la ti “plein ar la lepre,” sa ti faire surement bien longtemps ki okenn dimoune pa ti’nn touche li. Sans doute, sa ti reconforte li pou senti encore enn fois sa contact avek enn lot dimoune-la. Surement li ti zis envie ki Jésus gueri li. Pourtant, sa fason ki Jésus inn gueri li-la, inn surement aide li pou regagne enn kitsoz en plus—so dignité. Eski li realiste pou croire ki, zordi dan nou societé, ena dimoune ki casse la tête avek dignité lezot. Si oui, dan ki fason zot faire sa?

Enn principe ki donne dignité

Jésus ti donne enn principe ki beaucoup considere couma pli grand principe ki concerne relation humain. Li ti dire: “Tou kitsoz ki zot envie bann dimoune faire pou zot, zot aussi, zot bizin faire pareil pou bannla.” (Matthieu 7:12) Souvent appel sa principe-la La Règle d’or. Li pousse enn dimoune pou respecté so prochain, ek li attann ki so prochain aussi respecté li en retour.

L’histoire montré ki li pa dan nou nature pou applik sa principe-la—pli souvent c’est le contraire ki nou faire. Enn missié ki nou pou appel Harold dire: “Au fait, mo ti prend plaisir pou crase lezot. Avek zis dé-trois parole, mo ti kapav faire zot nervé, embarrassé, ek parfois ploré.” Mais enn kitsoz ti arrivé, ek sa ti faire Harold change so fason traite lezot. Li dire: “Bann Témoins de Jéhovah ti commence vinn guette moi. Kan mo mazinn sa lepok-la, mo honté kan mo pense certain kitsoz ki mo ti dire zot, ek fason ki mo ti traite zot parfois. Mais jamais zot pa ti abandonné, ek doucement-doucement, la verité ki ena dan la Bible ti commence touche mo leker ek pousse moi pou changé.” Zordi, Harold pé servi couma enn ancien dan congregation.

L’exemple Harold, li enn preuve ki montré ki “parole Bondié, li vivant ek li puissant, li pli fité ki enn l’epée ki coupe deux coté, ek li rentré ziska li separe nâme ek l’esprit, bann joint ek zot la-moelle, ek li kapav decouvert bann pensée ek bann l’intention ki ena dan leker.” (Hébreux 4:12) Parole Bondié ena pouvoir pou touche leker enn dimoune ek change so pensée ek so conduite. Ala seki bien important pou donne lezot dignité—enn desir sincere pou aidé plutot ki pou blessé, pou honoré plutot ki pou humilié.—Actes 20:35; Romains 12:10.

Bann dimoune pou regagne zot dignité couma bizin

C’est sa mem desir-la ki pousse bann Témoins de Jéhovah pou partage avek lezot l’esperance ki ena dan la Bible. (Actes 5:42) Partage avek enn dimoune “bon nouvel lor enn kitsoz ki pli bon,” sa-mem pli bon fason pou montré respé envers nou prochain ek pou donne li so dignité. (Isaïe 52:7) “Enn kitsoz ki pli bon” implik aussi mette “nouveau personnalité” lor nou, ek sa aide nou pou tire sa “desir ki faire di-tort ki pena sens,” pou humilié lezot-la. (Colossiens 3:5-10) Sa implik aussi projet ki Jéhovah ena pou tire bientot bann condition ek bann l’attitude ki faire bann dimoune perdi zot dignité, ensam avek Satan, celui ki responsable pou sa. (Daniel 2:44; Matthieu 6:9, 10; Révélation 20:1, 2, 10) Seulement lerla, kan la terre pou “rempli avek connaissance Jéhovah,” ki tou dimoune pou kapav finalement ena zot dignité.—Isaïe 11:9.

Nou invite ou pou aprann plus lor sa l’esperance extraordinaire-la. Si ou frequente bann Témoins de Jéhovah, ou pou trouvé ki kan bann dimoune applik bann principe la Bible, sa donne zot dignité. Ou pou kapav aprann couma bientot royaume Bondié pou amenn enn nouveau lé-monde ki beaucoup pli bon, enn lé-monde kot jamais pa pou crase dignité humain encore, kot dignité humain pou enn realité.

[L’encadré ek zimage lor page 6]

Zot inn garde zot dignité grace a zot l’integrité

Pendant Deuxieme Guerre mondial, ti envoye plus ki 2,000 Témoins de Jéhovah dan bann camp concentration nazi a cause zot bann croyance. Gemma La Guardia Gluck ti prisonnier dan camp Ravensbrück, ek li ti remark fason extraordinaire ki zot ti montré zot l’integrité. Dan enn livre ki raconte so zistoire, li dire: “A enn moment, Gestapo ti’nn annoncé ki n’importe ki Etudiant la Bible ki signe enn papier pou faire koné ki li’nn renié so bann croyance, pou gagne so liberté ek pou nepli persecuté.” Concernant bann ki ti refuse signe sa papier-la, li ecrire: “Zot ti prefere contigne souffert ek attann avek patience jour la liberté (le monde nouveau).” Kifer zot ti faire sa? Asterla ki li ena plus ki 80 an, Magdalena, ki mentionné au commencement premier lartik, expliké kifer. Li dire: “Reste fidel envers Jéhovah ti pli important ki faire n’importe ki kitsoz pou reste vivant. Garde nou dignité ti vedir garde nou l’integrité.”a

[Note]

[Zimage page 5]

Jésus ti donne dignité bann ki li ti gueri

[Zimage page 7]

Bann Témoins de Jéhovah donne lezot dignité kan zot partage “bon nouvel lor enn kitsoz ki pli bon” avek lezot