Enn le Roi ki dirigé par l’esprit Bondié —Pou ou profit!

“L’esprit Jéhovah pou repose lor li.”—IS. 11:2.

1. Ki certain finn dire pou montré ki zot tracassé concernant bann probleme ki ena dan le monde?

“DAN enn le monde ki dan enn confusion total lor plan politik, social ek kot l’environnement pé degradé, couma eski l’humanité pou kapav tini encore 100 an?” C’est question ki Stephen Hawking, enn specialiste ki etudié bann kitsoz ki ena dan l’espace, ti posé en 2006. Enn lartik dan journal New Statesman ti faire sa remark-la: “Nou pa finn ni aboli pauvreté ni nou finn etabli la paix dan le monde. Li parette ki c’est exactement le contraire ki nou finn reussi faire. C’est pa ki nou pa finn essayé. Nou finn essaye tou moyen. Nou finn essaye enn gouvernement communiste ki controle l’economie net, ziska mem nou’nn essaye enn gouvernement capitaliste, setadir enn gouvernement ki pena okenn controle lor l’economie enn pays. Nou finn etabli Société des Nations pou empeche ki ena bann la guerre, mais nou finn aussi stock enn quantité zarme nucleaire pou empeche la guerre. Nou finn faire trop beaucoup ‘la guerre pou arrete la guerre’ pou pensé ki nou koné couma pou arrete sa.”

2. Couma bientot Jéhovah pou servi so l’autorité pou dirige la terre?

² Mais bann serviteur Jéhovah pa etonné kan zot tann bann parole coumsa. La Bible dire nou ki Bondié pa finn crée bann dimoune pou dirige zot par zot-mem. (Jér. 10:23) Jéhovah tousel ena droit legal pou dirige nou. En tant ki Souverain l’univers, Li ena droit legal pou etabli bann principe pou nou. Li ena droit aussi pou decidé ki but nou la vie bizin ena ek pou guide nou vers sa but-la. En plus, bientot Li pou agir en tant ki Souverain l’univers. Bann dimoune zordi pé essaye tou qualité gouvernement pou dirige zot-mem, mais zot pa finn reussi. Jéhovah pou arrete tousala. En mem temps, Li pou detruire tou bann dimoune ki, kan zot rejette so domination legal, garde l’humanité prisonnier ar peché, prisonnier ar l’imperfection ek prisonnier “bondié sa systeme-la,” setadir Satan le Diable.—2 Cor. 4:4.

3. Ki Isaïe ti annoncé concernant le Messie?

³ Dan le monde nouveau ki pou vinn enn paradis, Jéhovah pou servi Royaume messianik pou exerce so domination avek amour lor bann dimoune. (Dan. 7:13, 14) Concernant le Roi sa Royaume-la, Isaïe ti annoncé: “Enn ti branche pou sorti dan siko Jessé ek enn bourgeon ki sorti dan so racine pou rapporté. Oui, l’esprit Jéhovah pou repose lor li, l’esprit sagesse ek l’intelligence, l’esprit ki faire li servi so bon jugement ek la force, l’esprit la connaissance ek la crainte pou Jéhovah.” (Is. 11:1, 2) Dan ki bann fason precis l’esprit Bondié finn qualifié sa ‘ti branche ki sorti dan siko Jessé-la’—Jésus Christ—pou dirige l’humanité? Ki bann benediction nou pou gagné kan li pou dirigé? Ek ki nou bizin faire pou nou recolté sa bann benediction-la?

Qualifié par Bondié pou regné

4-6. Ki connaissance bien important pou permette Jésus servi en tant ki enn le Roi, Grand pretre, ek Juge, ki ena la sagesse ek compassion?

⁴ Jéhovah envie ki bann dimoune lor ki Li dirigé, tigit-tigit vinn parfait enba direction enn le Roi, Grand Pretre, ek Juge ki vrai-mem sage ek ki ena compassion. A cause sa Bondié ti choisir Jésus Christ. Par moyen l’esprit saint Li ti qualifié Jésus pou sa bann responsabilité bien-bien important-la. Anou guette certain raison kifer Jésus pou rempli, dan enn fason parfait, sa bann role ki Bondié finn donne li-la.

⁵ Jésus tousel ena pli grand connaissance lor Bondié. Sa sel garson ki Bondié finn crée direct-la finn konn le Père pli longtemps ki n’importe kisannla, kitfois pendant plusieurs milliard l’année. Pendant sa le temps-la, Jésus ti gagne enn connaissance tellement profond lor Jéhovah ki ti kapav decrire li couma “reflet Bondié ki invisible.” (Col. 1:15) Jésus li-mem ti dire: “Enn kikenn ki finn trouve moi, finn trouve aussi mo Papa.”—Jean 14:9.

⁶ Apré Jéhovah, Jésus ena enn connaissance complete lor creation ek lor bann humain aussi. Colossiens 1:16, 17 dire: “Par so moyen [Garson Bondié] tou bann lezot kitsoz dan le ciel ek lor la terre, inn crée, bann kitsoz ki visible ek ki invisible . . . En plus, li existé avant tou kitsoz, c’est par so moyen ki tou lezot kitsoz inn existé.” Mazinn enn coup! Jésus, en tant ki “zouvrier qualifié” Bondié, ti participe dan tou lezot l’aspect creation. A cause sa, li comprend tou bann detail dan l’univers en entier, parmi ena aussi cerveau humain ki extraordinaire. Oui, vrai-mem, Christ li-mem la sagesse!—Prov. 8:12, 22, 30, 31.

7, 8. Couma l’esprit Bondié ti aide Jésus dan so ministere?

⁷ Jésus ti oint ar l’esprit saint Bondié. Jésus ti dire: “L’esprit Jéhovah lor moi, parski Li finn choisir moi pou annonce bann bon nouvelle ar bann pauvre, Li’nn envoye moi pou preche avek bann prisonnier ki zot pou liberé ek bann aveugle ki zot pou retrouve clair, pou libere bann ki souffert, pou preche l’année ki Jéhovah approuvé.” (Luc 4:18, 19) Kan Jésus ti baptisé, li parette ki l’esprit saint ti faire li rappel bann kitsoz ki li ti’nn aprann kan li ti dan le ciel. Parmi sa bann kitsoz-la ti ena seki Bondié ti envie li accompli pendant so ministere lor la terre en tant ki le Messie.—Lire Isaïe 42:1; Luc 3:21, 22; Jean 12:50.

⁸ Parski Jésus ti gagne pouvoir grace a l’esprit saint ek li ti ena enn lekor ek enn l’esprit parfait, a cause sa li pa ti zis pli grand personnage ki ti existé lor la terre, mais li ti aussi pli grand Enseignant. En realité, bann ki ti ecoute li ti “impressionné par so fason enseigné.” (Mat. 7:28) Par exemple, Jésus ti kapav koz lor la source bann probleme l’humanité—peché, l’imperfection, ek enn mank connaissance lor Bondié. Li ti kapav aussi trouvé seki bann dimoune été vrai-mem dan zot leker ek agir avek zot couma bizin.—Mat. 9:4; Jean 1:47.

9. Kan ou reflechi lor seki Jésus inn faire kan li ti lor la terre, couma sa augmente ou confiance en li en tant ki le Roi?

⁹ Jésus ti vive en tant ki enn humain. Bon relation ki Jésus ti ena avek bann dimoune imparfait ek so prop l’experience en tant ki enn humain finn aide li pou vinn enn bon le Roi. L’apotre Paul ti ecrire: “Li ti necessaire ki [Jésus] vinn couma so bann ‘frere’ dan tou kitsoz, pou ki li kapav vinn enn grand pretre ki ena misericorde ek ki fidele dan bann kitsoz ki concerne Bondié, ek lerla offert enn sacrifice ki couvert peché bann dimoune. Parski li-mem li finn souffert kan li’nn passe par bann l’epreuve, li kapav vinn au secours bann ki pé passe par bann l’epreuve.” (Héb. 2:17, 18) Parski Jésus ti “passe par bann l’epreuve,” li kapav comprend bann ki pé konn bann difficulté. Pendant so ministere lor la terre, bann dimoune ti kapav trouve bien compassion ki Jésus ti ena. Bann ki ti malade, bann handicapé, bann ki ti pé souffert parski lezot ti pé faire dominere ar zot, ek mem bann zenfant ti senti-zot libre pou approche ar li. (Marc 5:22-24, 38-42; 10:14-16) Bann ki ti humble ek bann ki ti ena enn grand desir pou konn Bondié, zot aussi zot ti attiré vers Li. Mais, bann dimoune orgueilleux, arrogant, ek bann ki pa ti ena “l’amour Bondié en zot,” ti rejette li, ti ena la haine pou li ek ti persecute li.—Jean 5:40-42; 11:47-53.

10. Dan ki fason extraordinaire Jésus ti montré ki li content nou?

¹⁰ Jésus ti donne so la vie pou nou. Kitfois pli grand preuve ki montré ki, a part Jésus pena enn lot pli bon dirigeant, c’est ki li ti disposé pou mort pou nou. (Lire Psaume 40:6-10.) Christ ti dire: “Personne pena enn pli grand l’amour ki sa: ki enn kikenn donne so nâme pou so bann camarade.” (Jean 15:13) Oui, Jésus pa couma bann dirigeant humain imparfait ki souvent amenn enn la vie luxe ar l’argent bann dimoune ki zot dirigé. Jésus li, li ti donne so prop la vie pou l’humanité.—Mat. 20:28.

Jésus gagne pouvoir pou applik bann bienfait la ranson

11. Kifer nou kapav ena enn confiance total en Jésus ki finn donne so la vie en ranson pou nou?

¹¹ Oui, li bien approprié ki Jésus, en tant ki Grand pretre, prend la tête pou applik bann bienfait so ranson lor nou! En realité, pendant so ministere lor la terre, Jésus ti donne nou enn l’idée lor seki li pou faire pendant so Regne mille an, en tant ki sa Kikenn ki’nn donne so la vie couma enn ranson-la. Si nou reste fidele, nou pou kapav profite sa bann bienfait-la. Kan li ti lor la terre, li ti gueri bann malade ek bann handicapé, li ti ressuscite bann mort, li ti nourri bann la foule, ek li ti mem controle bann la force dan la nature. (Mat. 8:26; 14:14-21; Luc 7:14, 15) En plus, li pa ti faire sa bann kitsoz-la zis pou attire l’attention lor so l’autorité ek so pouvoir, mais plutot pou montré so compassion ek so l’amour. Kan enn dimoune ki ti ena la lepre ti suppliye li pou gagne enn guerison, li ti dire: “Mo envie.” (Marc 1:40, 41) Jésus pou montré sa mem compassion-la pendant so Regne mille an, mais sa fois-la li pou faire sa pou tou dimoune lor la terre.

12. Couma Isaïe 11:9 pou realisé?

¹² Christ ek bann ki dirige ensam avek li pou aussi contigne programme l’enseignement spirituel ki Jésus ti commencé, inn gagne environ 2,000 an. Lerla, bann parole ki trouve dan Isaïe 11:9 pou realisé: “La terre vrai-mem pou rempli avek connaissance Jéhovah, pareil couma de l’eau couvert la mer.” Pena doute ki dan sa programme l’enseignement spirituel-la, pou ena aussi bann l’instruction ki pou montré couma pou prend soin la terre ek tou bann creature ki ena lor la terre, pareil couma Bondié ti donne Adam l’ordre pou faire. A la fin sa 1,000 an-la, projet ki Bondié ti ena au commencement, couma nou kapav lire dan Genèse 1:28, pou’nn fini realisé, ek bann bienfait sacrifice Jésus pou’nn fini appliké.

Jésus gagne pouvoir pou jugé

13. Couma Jésus ti montré so l’amour pou la justice?

¹³ C’est Christ “li-mem ki Bondié finn etabli pou juge bann vivant ek bann mort.” (Actes 10:42) Vrai-mem, sa reconforte nou pou koné ki pa kapav corrompe Jésus, ki la justice ek fidelité zot couma enn ceinture ki bien attaché lor so lé-rein! (Is. 11:5) Li ti montré ki li ti ena la haine pou enn desir exageré pou gagne plus, l’hypocrisie, ek lezot defaut. Li ti mem condamne bann ki ti insensible kan zot ti trouve lezot souffert. (Mat. 23:1-8, 25-28; Marc 3:5) En plus, Jésus ti montré ki li pa ti laisse-li trompé par l’apparence bann dimoune, parski “li, li ti koné ki ena dan leker enn dimoune.”—Jean 2:25.

14. Dan ki fason Jésus pé montré so l’amour pou la justice zordi, ek ki nou bizin demann nou-mem?

¹⁴ Zordi Jésus pé contigne montré so l’amour pou la justice kan li dirige pli grand campagne predication ek l’enseignement dan l’histoire l’humanité. Okenn zom, okenn gouvernement, ni okenn l’esprit mauvais pa kapav arrete sa travail-la ek empeche li realisé ziska ki Bondié satisfait. A cause sa, nou kapav ena full confiance ki kan Har-Maguédôn fini, c’est la justice Bondié ki pou’nn gagne la victoire. (Lire Isaïe 11:4; Matthieu 16:27.) Demann ou-mem: ‘Eski mo manifesté mem l’attitude ki Jésus dan mo ministere? Eski mo donne Jéhovah mo maximum, mem si mo la santé ou-soit mo situation limite seki mo kapav faire?’

15. Ki kitsoz, si nou garde dan nou l’esprit, kapav aide nou pou donne Bondié nou maximum?

¹⁵ Si nou garde dan nou l’esprit ki l’activité predication c’est travail Bondié, sa pou aide nou pou contigne servi Li avek tou nou nâme. C’est Bondié ki ti donne l’ordre pou faire sa; a travers so Garson, Li dirige sa travail-la; ek par moyen so l’esprit saint Li donne nou la force pou participe ladan. Eski ou apprecié privilege ki ou ena pou travail ensam avek Bondié ek so Garson ki Li dirigé par So l’esprit? Kisannla, a part Jéhovah kapav pousse plus ki sept million dimoune—kot la plupart parmi zot consideré couma bann dimoune “ordinaire ki pena grand l’instruction”—pou annonce message Royaume Bondié dan plus ki 236 pays?—Actes 4:13.

A travers Christ, attire benediction lor ou!

16. Ki Genèse 22:18 faire nou comprend concernant benediction Bondié?

¹⁶ Jéhovah ti dire Abraham: “Par moyen to descendance, tou bann nation lor la terre pou vrai-mem attire benediction lor zot, parski to finn ecoute seki mo’nn dire toi.” (Gen. 22:18) Sa faire nou comprend ki bann dimoune ki apprecié privilege ki zot ena pou servi Bondié ek so Garson kapav attann avek l’assurance bann benediction ki descendance Messianik pou amené. Ek avek sa bann benediction-la dan zot l’esprit, zot bien occupé dan zot service pou Bondié zordi.

17, 18. Ki Jéhovah ti promette dan Deutéronome 28:2, ek ki sa representé pou nou?

¹⁷ Enn fois Bondié ti dire descendance Abraham, nation Israël: “To pou gagne sa bann benediction-la [ki trouve dan l’alliance la Loi] ek zot pou vinn lor toi, parski to contigne ecoute la voix Jéhovah to Bondié.” (Deut. 28:2) Li pareil aussi pou bann serviteur Bondié zordi. Si ou envie gagne benediction Jéhovah, alors “contigne ecoute” so la voix. Lerla ‘ou pou gagne so bann benediction ek zot pou vinn lor ou.’ Mais ki sa impliké pou “ecouté”?

¹⁸ Bien sur, ecouté vedir prend serieux seki’nn dire dan Parole Bondié ek nourriture spirituel ki Li donne nou. (Mat. 24:45) Sa vedir aussi obeir Bondié ek so Garson. Jésus ti dire: “Pa tou seki dire moi, ‘Seigneur, Seigneur,’ ki pou rente dan royaume ki dan le ciel, mais celui ki faire volonté mo Papa ki dan le ciel.” (Mat. 7:21) Ek ecoute Bondié vedir soumette-nou volontairement ar disposition ki Li’nn etabli, setadir congregation chretien avek bann ancien, ‘bann zom ki Li’nn donné couma bann don.’—Éph. 4:8.

19. Ki nou kapav faire pou nou gagne benediction?

¹⁹ Parmi sa bann ‘zom ki Li’nn donné couma bann don-la’ ena bann membre College central, ki represente congregation bann chretien oint en entier. (Actes 15:2, 6) En realité, nou l’attitude envers bann frere oint Christ li enn l’aspect bien important ki pou determiné ki jugement nou pou gagné pendant grand tribulation ki pé vini. (Mat. 25:34-40) Alors, enn fason ki nou kapav gagne benediction c’est kan nou soutenir avek fidelité bann chretien oint Bondié.

20. (a) Ki responsabilité bien important “bann zom ki Bondié inn donné couma bann don,” ena? (b) Couma nou kapav montré ki nou apprecié sa bann frere-la?

²⁰ Parmi ‘sa bann zom ki Bondié inn donné couma bann don-la,’ ena aussi bann membre comité filiale, bann surveillant itinerant, ek bann ancien dan congregation. Tou sa bann frere-la finn nommé par l’esprit saint. (Actes 20:28) Responsabilité principal sa bann frere-la c’est pou batir peuple Bondié “ziska ki nou tou, nou vinn enn sel dan la foi ek dan connaissance exact Garson Bondié, ek ziska ki nou vinn bann adulte, ek nou konn enn developpement complet pareil couma Christ.” (Éph. 4:13) Li vrai ki pareil couma nou tou, zot aussi zot imparfait. Mais kan nou reagir dan enn fason ki montré ki nou reconnaissant envers zot travail en tant ki berger, nou attire benediction lor nou-mem.—Héb. 13:7, 17.

21. Kifer li bien urgent ki nou obeir Garson Bondié zordi?

²¹ Bientot Christ pou agir kont sa mauvais systeme Satan-la. Kan sa pou arrivé, nou la vie pou depann lor jugement Jésus. Kifer nou dire sa? C’est parski Bondié finn donne li pouvoir pou guide ‘la grande foule,’ ki la Bible ti annoncé, vers “bann la source de l’eau la vie.” (Rév. 7:9, 16, 17) Alors, anou faire tou seki nou kapav asterla-mem pou nou soumette volontairement ek avek reconnaissance ar le Roi ki dirigé par l’esprit Bondié.

Ki ou finn aprann dan . . .

• Isaïe 11:1-5?

• Marc 1:40, 41?

• Actes 10:42?

• Genèse 22:18?

[Zimage page 25]

Bann dimoune ti kapav trouve compassion Jésus kan Li ti ressuscite tifi Jaïrus