“To enn Fam Ekselan”

Ti adres sa bann parol luanz la ar enn zenn fam Moabit. Li ti enn vev ki ti apel Rit, belfi enn madam Izraelit, ki ti apel Naomi. Li ti res an Izrael ena anviron 3000 an desela, kan bann ziz ti pe dirize. Rit ti gayn repitasyon kuma enn fam ekselan. (Rit 3:11) Kuma eski li ti’nn arive gayn sa repitasyon la? Kisannla kapav tir profi ar so legzanp?

Rit pa ti enn dimunn ki ti manz “dipin pares,” li ti travay dir kan li ti glane dan bann karo pandan bann long lazurne antye. Li ti telman travay dir ki li ti’nn gayn sa luanz la. Mem kan ti propoz li pu diminye so travay, li ti kontiyn travay dir, li ti fer plis ki bizin. Dan enn fason remarkab, li parey kuma sa fam ki Labib dekrir la, ki merit loner, ki kapab ek ki travay dir.—Proverb 31:10-31; Rit 2:7, 15-17.

Se bann kalite spirityel ki Rit ti ena—so limilite, so lespri sakrifis ek so lamur fidel—ki ti kontribye pu fer li gayn enn bon repitasyon devan piblik. Li ti kit so bann paran ek peyi kot li ti ne, alor ki li pa ti ena gran lespwar pu truv sekirite ki maryaz ti kapav amene. Li ti res atase ar Naomi. An mem tan, Rit ti exprim dezir pu servi Zeova, Bondye so belmer. Pu montre ki kantite valer li ti ena, resi Labib dir ki li ti “pli bon pu [Naomi] ki set garson.”—Rit 1:16, 17; 2:11, 12; 4:15.

Mem si ekselan repitasyon ki Rit ti ena ti fer li merit buku luanz parmi bann dimunn ki ti otur li, seki ti ena plis linportans se lapresyasyon ki Bondye ti ena pu so bann kalite ek rekonpans ki Li ti donn li: privilez vinn enn anset Zezi Kris. (Matye 1:5; 1 Pyer 3:4) Legzanp Rit pa zis enn bon legzanp pu bann fam Kretyin, me pu tu ki dir zot ador Zeova!