15, 16. (a) Kouma Hanna inn santi li apre ki li’nn devid so leker ar Jéhovah ek ador Li dan tabernak? (b) Kouma nou kapav swiv lexanp Hanna kan nou pe lite kont bann santiman negatif?

¹⁵ Kouma Hanna finn santi li apre ki li’nn devid so leker ar Jéhovah ek ki li’nn ador Li dan tabernak? Labib dir: “Madam-la ti ale, li ti manze ek so figir ti nepli paret trakase.” (1 Sam. 1:18) The Jerusalem Bible tradir sa verse-la koumsa: “Pa ti ena tristes lor so figir.” Hanna inn soulaze. Dan enn sertin sans, koumadir li’nn pran tou traka ki ti ena lor so zepol, li’nn zet sa lor enn zepol ki pli for ek pli larz, setadir lor zepol so Papa ki dan lesiel. (Lir Psaume 55:22.) Eski ena enn problem ki tro lour pou Li? Non​—pa finn ena, pena, ek zame pa pou ena!

¹⁶ Kan nou santi nou dekouraze, deprime, ek koumadir ena enn pwa lor nou leker, li bon nou swiv lexanp Hanna ek devid nou leker ar Jéhovah, nou Bondie, “ki ekout lapriyer.” (Ps. 65:2) Si nou fer sa avek lafwa, nou osi nou pou trouve ki “lape Bondie ki depas tou panse,” pou ranplas sa tristes ki nou ena la.​—Phil. 4:6, 7.

¹⁸ Kan eski Peninna rann li kont ki so bann parol nepli ena okenn lefe lor Hanna? Labib pa dir nanye lor la. Me lexpresion “nepli paret trakase,” fer nou konpran ki depi sa zour-la, Hanna ti dan lazwa. So lespri ti nepli tourmante. Antouka, bien vit Peninna finn realize ki so bann parol blesan ti koumadir delo lor bredsonz. Labib pa remansionn so nom ankor.