• Li’nn Gagn Konsolasion Avek So Bondie
    Imit Zot Lafwa

    • 20, 21. (a) Ki Éliya finn trouve kan li ti pe debout kot lantre enn kavern? (b) Ki Jéhovah ansegn Éliya atraver so pwisans?

      20 Ki Jéhovah fer pou tir laper ek traka Éliya? Anz-la dir Éliya debout kot lantre kavern. Li obeir, san mem kone ki pe atann li. Enn gran divan koumans soufle! Sirman sa divan-la kas zorey parski li telman for ki li fann bann montagn ek bann ros an de. Mazinn Éliya pe kasiet so figir ek pe tini so long linz bien lour pou ki li pa anvole dan sa gran divan-la. Zis apre, mazinn li pe bizin lite pou gard so lekilib parski later pe koumans bouze; enn tranbleman-de-ter pe sakouy sa plas-la net. Li pa mem gagn letan pran so lesouf ki enn gro dife paret. Li oblize retourn dan kavern pou al kasiet tansion li brile ar sa gro saler-la.​—1 Rois 19:11, 12.

      Éliya pe debout devan lantre enn lakav ek pe protez limem kont dife

      Jéhovah finn servi so gran pwisans pou rekonfort ek ankouraz Éliya

      21 Labib presize ki Jéhovah pa ti ni dan sa divan-la, ni dan sa tranbleman-de-ter-la, ek ni dan sa dife-la​—bann fenomenn extraordiner ki montre pwisans lanatir. Éliya kone ki Jéhovah Li pa enn bondie lanatir parey kouma Baal, “ki diriz bann niaz” ek ki swadizan kapav amenn lapli. Se Jéhovah Limem ki vre Lasours tou bann lafors extraordiner ki ena dan lanatir. Me Li osi boukou pli pwisan ki tou seki Li’nn kree Limem. Mem lesiel pa ase gran pou ki Li kapav res ladan! (1 Rois 8:27) Kouma tousala finn ed Éliya? To rapel li ti per? Avek enn Bondie kouma Jéhovah akote li, enn Bondie ki ena enn extra gran pwisans, kifer Éliya bizin per Ahab ek Jézabel?​—Lir Psaume 118:6.

      22. (a) Kouma Jéhovah rasir Éliya? (b) Kisannla ki’nn koze avek enn “lavwa kalm, trankil”? (Get not.)

      22 Dife-la disparet, apre sa ena enn gran silans. Lerla Éliya tann “enn lavwa kalm, trankil” ki invit li pou ouver so leker ankor enn fwa, ek se seki li fer.a Kitfwa sa soulaz li plis ankor. Me, seki sa “lavwa kalm, trankil” la dir li apre, se sa ki pli rekonfort li. Jéhovah donn Éliya lasirans ki li ena boukou valer. Kouma Li fer sa? Jéhovah explik Éliya seki Li anvi fer pou eliminn ladorasion Baal dan Israël. Li kler ki tou seki Éliya inn fer, li pa dan vid parski, pena bare, volonte Jéhovah pou realize. Anplis, Éliya ankor ena enn rol pou zwe dan sa proze-la, parski Jéhovah fer li retourne pou akonpli so travay antan ki profet, me sa fwa-la avek bann instriksion bien presi.​—1 Rois 19:12-17.

  • Li’nn Gagn Konsolasion Avek So Bondie
    Imit Zot Lafwa

    • a Sa “lavwa kalm, trankil” la, sirman se lavwa sa mem anz ki ti donn Éliya “parol Jéhovah” ki mansione dan 1 Rois 19:9. Dan verse 15, Labib apel sa anz-la par nom “Jéhovah.” Kitfwa sa fer nou pans sa anz ki Jéhovah ti servi pou gid Israël dan dezer la. Nou rapel ki Bondie ti dir: “Mo nom an li.” (Ex. 23:21). Nou pa kapav dir sir-sir ki se Jésus. Me li interesan pou remarke ki avan li vinn lor later, ti apel li “Laparol.” Li ti Portparol ant Jéhovah ek So bann serviter.​—Jean 1:1.