Nou trouve sagesse Bondié dan la nature

“Li-mem ki enseigne nou plus ki bann zanimo lor la terre, ek Li faire nou vinn pli sage ki bann creature ki envolé dan le ciel.”—JOB 35:11.

BANN zoiseau ena bann capacité extraordinaire. Bann dimoune ki dessine bann plan pou construire bann avion admire fason ki bann zoiseau kapav envolé sans faire beaucoup zeffort. Ena certain varieté zoiseau ki voyage bann millier kilometre pou traverse bann grand l’ocean kot zot pena okenn repere ek zot reussi arrive kot zot bizin.

Bann zoiseau ena enn lot capacité extraordinaire, enn capacité ki faire nou trouve sagesse zot Createur. C’est capacité pou communiké entre zot par fason ki zot criyé ek chanté. Anou guette deux-trois l’exemple.

Kan bann zoiseau communiké entre zot

Certain varieté zoiseau commence communiké mem avant ki zot eclo. Par exemple, enn femelle caille ponn ziska huit dizef, enn chaque jour. Si toulé-huit dizef ti developpe mem vitesse, zot ti pou eclo lor enn periode huit jour. Lerla li ti pou difficile pou mama-la occupe bann tipti ki ena enn semaine ek en mem temps contigne couve sa dizef ki pankor eclo-la. Seki arrivé plutot, c’est ki toulé-huit dizef pou eclo dan enn periode six heure-temps. Couma eski sa possible? Bann dimoune ki faire recherche pensé ki enn raison principal, c’est parski bann ti caille ki encore dan zot dizef communiké entre zot ek dan enn certain fason zot tombe d’accord pou eclo preské en mem temps.

Kan bann zoiseau grandi, en general c’est male-la ki chanté. Li faire sa surtout pendant periode kot bizin accouplé pou mark so territoire ou-soit pou attire enn femelle. Sakenn parmi bann millier varieté zoiseau ki existé, ena, dan enn certaine fason, so prop langage, ek sa aide bann femelle pou reconette bann male ki mem varieté ki zot.

Bann zoiseau chanté surtout boner gramatin, ek ler soleil pé al couché. Zot faire sa pou enn bon raison. Ena moins di-vent ek moins tapaz autour zot dan sa bann moment-la. Bann dimoune ki faire recherche inn decouvert ki boner gramatin ek ler soleil al couché, kapav tann chanté bann zoiseau 20 fois pli bien ki pendant la journée.

Alors ki pli souvent c’est bann male ki chanté, toulé-deux, male ek femelle ena different fason criyé, ou-soit zot kapav faire different son ki ena bann signification different. Par exemple, bann pinson ena enn vocabulaire kot ena neuf different qualité criyé. Zot ena enn qualité criyé pou averti ki ena enn menace dan l’air—par exemple si ena enn zoiseau ki pé envolé ek ki pé rod kitsoz pou mangé—mais zot criyé enn lot fason kan enn menace pé approché enba.

Enn cadeau pli superieur

Sagesse ki bann zoiseau ena grace a zot l’instinct, li extraordinaire, pena okenn doute lor la. Mais en seki concerne bann capacité pou communiké, seki bann dimoune kapav faire pli extraordinaire encore. Job 35:11 dire ki Bondié inn faire bann dimoune “pli sage ki bann creature ki envolé dan le ciel.” Zis bann dimoune tousel ki ena capacité pou transmette bann pensée compliké ek bann l’idée grace a bann son ki zot bann la corde vocal produire ek grace a bann geste.

Li parette ki, kan bann tibaba né zot different ar bann lezot creature, parski zot né avek capacité pou aprann bann langage compliké. American Scientist, enn journal lor Internet, dire: “Bann tibaba ki pé faire zot bann premier pas, reussi aprann kozé mem si zot bann parent pa koz ar zot directement; bann zenfant ki sourde kapav mem invente zot prop langage signe mem si personne pa montré zot sa dan lakaz.”

Capacité pou communik bann pensée ek bann l’emotion par la parole ou-soit langage signe, li vrai-mem enn cadeau extraordinaire ki Bondié inn donne nou. Pourtant, enn pli grand cadeau encore ki Bondié inn donne bann dimoune, c’est capacité pou communik avek Li par la priere. En realité, Jéhovah invite nou pou koz avek Li. Parole Bondié, la Bible, dire: “Pa tracassé pou okenn kitsoz, mais dan tou kitsoz, par la priere, supplication avek bann remerciement, demann Bondié seki zot bizin.”—Philippiens 4:6.

Kan nou ena bann decision difficile pou prend, Jéhovah envie ki nou profite bann renseignement ki Li’nn faire ecrire dan la Bible, ki concerne enn grand varieté sujet ek situation. Li pou aussi aide nou koné couma pou applik sa bann conseil ki nou trouvé dan la Bible-la. Jacques, enn ecrivain la Bible, dire: “Si kikenn parmi zot mank sagesse, laisse li contigne demann Bondié, parski Bondié content pou donne tou dimoune, sans faire okenn reproche; ek li pou gagné.”—Jacques 1:5.

Ki l’effet sa ena lor ou?

Kan ou ecoute enn zoiseau ki pé chanté, ou-soit enn zenfant ki pé commence kozé, ki l’effet sa ena lor ou? Eski ou trouve sagesse Bondié dan bann kitsoz ki Li’nn faire?

Apré ki li ti medite lor fason ki so lekor inn faire, David ki ti ecrire bann psaume, ti poussé pou dire Bondié: “Mo pou loué toi parski to finn faire moi dan enn fason extraordinaire ki faire gagne la crainte. Tou seki to faire, li extraordinaire, ek mo nâme konn sa bien.” (Psaume 139:14) A mesure ki avek appreciation ou examine sagesse Bondié ki bien clair dan so creation, ou pou augmente ou confiance dan so capacité pou donne ou enn bon direction dan ou la vie.

[L’encadré lor page 5]

Capacité pou communiké, li enn cadeau ki Bondié inn donné

[Remerciement photo page 4]