pou bizin obeir bann commandement Bondié, ek aussi bann nouveau kitsoz ki Jéhovah pou kitfois faire nou koné pendant Regne mille an. Dan sa fason-la, jugement ki chaque dimoune pou gagné, pou basé lor seki li faire pendant Jour Jugement.

Jour Jugement pou donne bann milliard dimoune zot premier possibilité pou aprann konn volonté Bondié, ek agir en accord avek sa. Sa vedir ki pou ena enn grand travail l’enseignement. Vrai-mem, “li sur ki bann habitant la terre pou aprann la justice.” (Isaïe 26:9) Mais seulement, pa tou ki pou envie vive en accord avek volonté Bondié. Isaïe 26:10 dire: “Mem si faire seki bon pou enn dimoune mauvais, jamais li pa pou aprann la justice. Dan pays kot tou droite, li pou agir avek l’injustice, ek li pa pou trouve grandeur Jéhovah.” Sa bann mauvais dimoune-la pou detruire pou touletan pendant Jour Jugement.—Isaïe 65:20.

Arrive la fin Jour Jugement, bann dimoune ki’nn sapé pou “commence vive” vrai-mem, en tant ki bann dimoune parfait. (Révélation 20:5) Alors a la fin Jour Jugement, bann dimoune pou fini ré-vinn parfait, pareil couma Adam ek Ève ti été dan commencement. (1 Corinthiens 15:24-28) Lerla pou ena enn l’epreuve final. Satan pou largué dan so prison ek Jéhovah pou laisse li essaye detourne bann dimoune pou enn dernier fois. (Révélation 20:3, 7-10) Bann ki pou resisté kont li, pou vive realisation sa promesse ki la Bible faire-la: “Bann dimoune juste pou possede la terre, ek zot pou reste lor la pou touletan.” (Psaume 37:29) Oui, Jour Jugement li pou enn benediction pou tou bann dimoune fidel!

APEPRÉ quarante an avant 1914, bann Étudiants de la Bible ti annoncé ki ti pou ena bann evenement important sa l’année-la. Ki finn arrivé en 1914, ek ki preuve montré ki sa li ti vrai-mem enn l’année important?

Dan Luc 21:24, Jésus ti dire: “Bann nation pou crase Jérusalem enba zot lipié, ziska le temps fixé [pou] bann nation [“temps des Gentils,” Bible de Crampon] fini.” Jérusalem ti capital nation juif; li ti l’endroit kot ti ena trone tou bann lé-roi ki descendant le roi David. (Psaume 48:1, 2) Seulement, parmi tou bann lé-roi ki’nn dirige bann nation, sa bann lé-roi-la ti ena enn kitsoz special. Zot ti assize lor “trone Jéhovah” couma bann representant Bondié Li-mem. (1 Chroniques 29:23) Alors, Jérusalem ti enn symbol souveraineté ou-soit domination Jéhovah.

Mais couma ek kan souveraineté Jéhovah inn ‘crasé enba lipié bann nation’? Sa ti arrivé en 607 a.n.l. kan bann Babylonien ti detruire Jérusalem. Personne ti nepli assize lor “trone Jéhovah,” ek ti nepli ena okenn lé-roi ki ti enn descendant David lor sa trone-la pou enn certaine lé-temps. (2 Rois 25:1-26) Eski “bann nation pou crase Jérusalem enba zot lipié” pou touletan? Non, parski prophetie Ézékiel dire concernant Tsidqiya, dernier lé-roi Jérusalem: “Tire turban, ek enleve couronne. . . . Li pa pou vinn pou personne ziska ki celui ki ena droit legal vini, ek mo pou donne li sa.” (Ézékiel 21:26, 27) Celui ki ena “droit legal” pou herite couronne David, c’est Jésus Christ. (Luc 1:32, 33) Alors bann nation ti pou arrete crase Jérusalem kan Jésus vinn le roi.

Kan eski sa l’evenement important-la ti pou arrivé? Jésus ti montré ki bann nation ti pou dirigé pou enn period lé-temps fixe. Chapitre 4 dan livre biblik Daniel aide nou pou calculé comié lé-temps sa period-la ti pou duré. Li raconte enn rêve prophetik ki Neboukadnetsar, le roi Babylone, ti gagné. Li ti trouve enn grand pié ki ti coupé. Sa boute tronc ki ti reste dan la terre-la pa ti kapav poussé, parski ti attache li tout autour avek bann bande ferraille ek cuivre. Enn ange ti dire: “Laisse sept lé-temps passe lor li.”—Daniel 4:10-16.

Dan la Bible, parfois bann pié represente domination. (Ézékiel 17:22-24; 31:2-5) Alors sa pié symbolik ki coupé-la montré ki domination Bondié par moyen bann lé-roi dan Jérusalem, ti pou arreté. Mais, vision-la ti faire koné ki “bann nation [ti] pou crase Jérusalem” pou zis enn certaine lé-temps—enn period “sept lé-temps.” Ki longueur sa period-la?

Révélation 12:6, 14 montré ki trois lé-temps et demi faire “mille deux cent soixante jour.” Alors “sept lé-temps” li deux fois pli longue, li faire 2,520 jour. Mais bann nation gentils pa ti arrete “crase” domination Bondié 2,520 jour apré ki Jérusalem ti detruire. Alors, li clair ki sa prophetie-la couvert enn period pli longue. Si nou base lor Nombres 14:34 ek Ézékiel 4:6, ki koz lor “enn jour pou enn l’année,” ‘sa sept lé-temps-la’ ti pou couvert 2,520 l’année.

Sa 2,520 l’année-la ti commence en octobre 607 a.n.l, kan bann Babylonien ti detruire Jérusalem ek ti tire le roi ki ti descendant David, lor so trone. Sa period-la ti fini en octobre 1914. Sa l’année-la “le temps fixé bann nation” ti fini ek Bondié ti etabli Jésus Christ couma so lé-roi dan le ciel.a—Psaume 2:1-6; Daniel 7:13, 14.

Pareil couma Jésus ti annoncé, so “presence” en tant ki lé-roi dan le ciel, finn marké par bann evenement mondial terrible—la guerre, la famine, tremblement de terre, ek maladie. (Matthieu 24:3-8; Luc 21:11) Sa bann l’evenement-la, zot donne nou bann preuve solid ki en 1914, Royaume Bondié finn etabli dan le ciel ek bann “dernier jour” sa lé-monde mauvais-la finn commencé.—2 Timothée 3:1-5.

DAN la Bible, pa koz souvent lor sa creature spirituel ki appel Mikaël-la. Mais, kan koz lor li, li touletan pé faire kitsoz. Dan livre Daniel, Mikaël pé laguerre avek bann mauvais ange; dan livre Jude, li dan enn grand discussion avek Satan, ek dan Révélation, li pé faire la guerre kont Satan ek so bann demon. Parski li defann regne Jéhovah ek li laguerre kont bann l’ennemi Bondié, Mikaël agir en accord avek seki so nom vedir—“Kisannla ki couma Jéhovah?” Mais kisannla Mikaël?

Parfois, enn dimoune ena plus ki enn nom. Par exemple, Jacob ti appel aussi Israël, ek l’apotre Pierre ti appel aussi Simon. (Genèse 49:1, 2; Matthieu 10:2) Li pareil; la Bible montré ki Mikaël, li enn lot nom pou Jésus Christ, avant ek apré ki li finn vive lor la terre. Anou guette bann raison biblik ki faire nou dire sa.

Archange. La Bible appel Mikaël, “l’archange.” (Jude 9) Sa mot-la vedir “chef bann ange.” Noté ki appel Mikaël, l’archange. Sa faire nou comprend ki ena enn sel ange coumsa. Aussi, sa mot ‘archange-la’ dan la Bible, li touletan singulier, jamais li pa pluriel. En plus, ena enn rapport entre Jésus ek sa position archange-la. Concernant Seigneur Jésus Christ apré so resurrection, 1 Thessaloniciens 4:16 dire: “[Nou] Seigneur li-mem pou desann depuis dan le ciel, ek li pou donne enn l’ordre, avek la-voix enn archange.”