Bondié Li-mem finn donne signification so nom ar so fidel serviteur Moïse. Kan Moïse ti pose question lor nom Bondié, Jéhovah ti reponn li: “Mo pou vinn seki mo pou vini.” (Exode 3:14) Traduction Rotherham (angl.) traduire sa bann parole-la coumsa: “Mo pou vinn seki mo envie vini.” Alors, Jéhovah kapav vinn tou seki ki Li envie, pou realise so bann projet.

Faire coumadir ou ti kapav vinn seki ou envie. Ki ou ti pou faire pou ou bann camarade? Si enn finn tombe malade, ou ti pou kapav vinn enn bon docteur ek gueri li. Si enn lot finn perdi beaucoup l’argent, ou ti pou kapav vinn enn dimoune ki bien riche, ek lerla ou reglé so problem. Mais, en realité, ou pa kapav vinn tou seki ou envie. Nou tou nou limité. Mais kan ou etudié la Bible, ou pou etonné pou trouvé couma Jéhovah vinn seki bizin, pou Li realise so bann promesse. Ek Li content servi so pouvoir pou aide bann ki content Li. (2 Chroniques 16:9) Bann ki pa konn so nom pa kapav comprend ki grand personnage ena derriere sa nom-la.

Oui, li clair ki bizin ena nom Jéhovah dan la Bible. Kan nou konn signification sa nom-la, ek ki nou pa hesité pou servi li dan nou l’adoration, c’est bann moyen ki aide nou pou vinn pli proche avek nou Papa ki dan le ciel, Jéhovah.a

PROPHETE Daniel ti vive plus ki 500 an avant naissance Jésus. Pourtant, Jéhovah ti donne Daniel bann renseignement ki ti pou aide bann dimoune koné kan Jésus ti pou gagne l’esprit saint Bondié, pou ki lerla li vinn Messie, ou-soit Christ. Daniel ti dire: “To bizin koné, ek to bizin comprend ki depuis l’heure ki parole pou retabli ek reconstruire Jérusalem pou sorti, ziska Messie le Guide, pou ena sept semaine ek aussi soixante-deux semaine.”—Daniel 9:25.

Pou nou koné kan Jésus ti pou vini, avant nou bizin koné kan sa period ki amenn nou vers Messie-la finn commencé. Dapré sa prophetie-la, li finn commencé kan “parole pou retabli ek reconstruire Jérusalem pou sorti.” Mais kan ‘sa parole-la ti sorti’? Dapré Nehémia, ki ti enn ecrivain la Bible, parole pou reconstruire bann muraille autour Jérusalem ti sorti “dan vingtieme l’année le roi Artaxerxès.” (Nehémia 2:1, 5-8) Bann historien confirmé ki premier l’année entier ki Artaxerxès finn regné, ti 474 a.n.l. Alors, so vingtieme l’année tombe en 455 a.n.l. Asterla nou koné kan sa period lé-temps-la finn commencé, setadir en 455 a.n.l.

Daniel dire nou comié lé-temps sa period-la ti pou duré ziska ki “Messie le Guide” vini. Sa prophetie-la koz lor “sept semaine, ek aussi soixante-deux semaine,” seki faire enn total 69 semaine. Comié lé-temps sa period-la representé? Plusieurs traduction la Bible dire ki sa bann semaine-la zot pa represente bann semaine sept jour, mais bann semaine l’année. Alors, chaque semaine represente sept l’année. Bann Juif lepok longtemps ti habitué avek sa l’expression‘semaine l’année-la.’ Par exemple, zot ti observe enn l’année sabbat chaque septieme l’année. (Exode 23:10, 11) Alors, sa 69 l’année prophetik-la, represente 69 fois 7 l’année, setadir 483 l’année.

Asterla nou bizin compté. Si nou prend a partir 455 a.n.l., nou ajoute 483 an, nou tombe en l’année 29 n.l. Ek sa, li exactement l’année kan Jésus finn baptisé ek ti vinn Messie!a (Luc 3:1, 2, 21, 22) Li extraordinaire couma sa prophetie-la finn realisé exactement couma ti annoncé.

POU aide nou identifié le Messie, sa kikenn ki pou delivré bann dimoune-la, ki Jéhovah finn faire? A travers So l’esprit-saint, Li finn faire bann prophete ecrire bann detail lor so naissance, so ministere ek so la-mort. Jésus Christ finn realise tou sa bann prophetie-la. C’est bann prophetie bien detaillé, ek tou seki zot ti dire pou arrivé, finn arrivé. Pou nou trouve sa, anou examine dé-trois prophetie ki koz lor naissance Messie, ek so l’enfance.

Prophete Isaïe ti annoncé ki Messie pou enn descendant le roi David. (Isaïe 9:7) Vrai-mem Jésus ti sorti dan descendance David.—Matthieu 1:1, 6-17.

Mika, enn lot prophete Bondié, ti annoncé ki sa zenfant-la pou vinn enn dirigeant ek ki li pou né en “Bethléhem Éphratha.” (Mika 5:2) Lepok ki Jésus ti né, ti ena deux la-ville en Israël ki ti appel Bethléhem. Enn ti pré ar Nazareth dan le nord, ek lot-la ti pré ar Jérusalem dan Juda. La ville Bethléhem ki ti pré ar Jérusalem, avant ti appel Éphratha. Jésus ti né dan sa la-ville-la, exactement couma sa prophetie-la ti’nn annoncé!—Matthieu 2:1.

Enn lot prophetie ti annoncé ki Garson Bondié pou ‘sorti en Égypte.’ Kan Jésus ti encore enn ti zenfant, so mama ek so papa ti amenn li en Égypte. Li ti retourné apré la mort Hérode, alors li finn realise sa prophetie-la.—Hoshéa 11:1; Matthieu 2:15.

Lor tableau “Bann prophetie concernant le Messie”, enba sous-titre “Prophetie” ena bann text biblik ki donne bann detail concernant Messie. Compare zot avek bann text ki trouve enba sous-titre “Realisation.” Kan ou faire sa, ou pou ena encore plus la foi ki Parole Bondié, li vrai.

Kan ou examine sa bann text-la, pa blié ki sa bann prophetie-la finn ecrire bann centaine l’année avant ki Jésus ti né. Jésus ti dire: “Tou bann kitsoz ki’nn ecrire dan la Loi Moïse ek dan bann Prophete ek dan bann Psaume lor moi, ti bizin realisé.” (Luc 24:44) Kan ou pou verifié dan ou prop la-Bible, ou pou trouvé ki tou finn realisé en detail!

BANN dimoune ki croire dan la Trinité dire ki Bondié Li en trois personne. Ena le Père, le Fils ek l’esprit saint. Toulé-trois egal ar zot camarade, zot toulé-trois tou puissant ek toulé-trois pena enn commencement. Alors, dapré doctrine la Trinité, le Père li Bondié, le Fils li Bondié, ek l’esprit saint li Bondié, mais pourtant ena enn sel Bondié.