1. Ki projet Bondié ena pou la terre?

PROJET ki Bondié ena pou la terre li vrai-mem extraordinaire. Jéhovah envie trouve la terre rempli ar bann dimoune ki heureux ek en bonne santé. La Bible dire: “Bondié ti faire enn jardin en Éden” ek Li ti “faire la terre produire tou qualité pié ki joli pou guetté ek ki bon pou mangé.” Apré ki Bondié ti crée premier zom ek premier femme, Adam ek Ève, Li ti mette zot dan sa joli l’endroit-la ek li ti dire zot: “Gagne beaucoup zenfant, rempli la terre ek cultive li.” (Genèse 1:28; 2:8, 9, 15) Alors, li ti dan projet Bondié ki bann dimoune gagne zenfant, ki zot faire la terre entier vinn enn paradi, ek ki zot prend soin bann zanimo.

2. (a) Couma nou koné ki projet Bondié concernant la terre pou realisé? (b) Ki la Bible dire concernant la vie pou touletan?

² Eski ou pensé ki enn jour, Jéhovah pou reussi realise so projet pou faire bann dimoune vive lor enn la-terre transformé en paradi? Guette seki Bondié dire: “Oui mo finn dire sa; ek mo pou faire sa arrivé aussi.” (Isaïe 46:9-11; 55:11) Oui, seki Bondié envie faire, nou sur ki Li pou faire li! Li dire ki Li “pa finn crée [la terre] pou nanyin” mais Li “finn forme la terre pou ki dimoune reste lor la.” (Isaïe 45:18) Ki qualité dimoune Bondié ti envie trouvé lor la terre? Ek pou comié lé-temps? La Bible reponn: “Bann dimoune juste pou possede la terre, ek zot pou reste lor la pou touletan.”—Psaume 37:29; Révélation 21:3, 4.

3. Ki condition bien triste existé zordi lor la terre, ek ki question sa soulevé?

³ Couma ou trouvé ou-mem, sa pankor arrivé. Dimoune tombe malade, zot mort; zot mem laguerre ek touye zot camarade. Ena enn kitsoz ki’nn mal tourné. Mais, surement Bondié pa ti envie trouve la terre vinn couma seki nou trouvé zordi! Mais ki finn arrivé? Kifer projet Bondié pa finn realisé? Okenn livre ki dimoune inn ecrire pa pou kapav explik nou sa, parski problem-la inn commencé dan le ciel.

ENN L’ENNEMI APPARETTE

4, 5. (a) En realité kisannla ki ti koz avek Ève a travers enn serpent? (b) Couma enn dimoune ki ti bon ek honnete, kapav vinn enn voleur?

⁴ Premier livre la Bible dire nou ki enn l’ennemi Bondié ti apparette dan jardin Éden. La Bible decrire li couma “enn serpent,” mais li pa ti zis enn zanimo. Dernier livre la Bible identifié li couma enn kikenn “ki appel Diable ek Satan, ki pé mette tou bann dimoune lor la terre entier dan l’erreur.” Li appel aussi “serpent originel.” (Genèse 3:1; Révélation 12:9) Sa ange-la li puissant ek li enn creature spirituel invisible. Li ti servi enn serpent pou koz avek Ève, pareil couma certain dimoune kapav faire croire ki zot la-voix sorti dan enn marionnette. Surement ki sa creature spirituel-la ti present kan Bondié ti prepare la terre pou bann dimoune.—Job 38:4, 7.

⁵ Parski tou seki Jéhovah inn crée, li parfait, alors couma “le Diable,” ‘sa Satan-la’ finn existé? En dé-trois mot, li enn parmi bann ange, ek li finn faire li-mem vinn enn Diable. Couma sa finn arrivé? Nou koné ki zordi enn dimoune ki ena enn bon reputation ek ki honnete, kapav vinn enn voleur. Couma sa kapav arrivé? Sa dimoune-la kapav laisse enn mauvais desir developpé dan so leker. Si li contigne pense sa, sa mauvais desir-la kapav vinn bien fort. Lerla, si li gagne l’occasion, li kapav faire sa mauvais kitsoz ki li ti pé pensé-la.—Jacques 1:13-15.

6. Couma enn ange finn vinn Satan le Diable?

⁶ Sa-mem ki ti arrive Satan le Diable. Sans doute li ti tann Bondié dire Adam ek Ève gagne bann zenfant ek rempli la terre. (Genèse 1:27, 28) Surement Satan ti dire dan so leker: ‘Au lieu zot adore Bondié, tou sa dimoune-la ti kapav adore moi!’ Satan finn contigne pense lor la. Alors, li finn laisse enn mauvais desir developpé dan so leker. Plitar, li ti al embete Ève ek li ti koz menti lor Bondié. (Genèse 3:1-5) C’est coumsa ki li finn vinn “Diable,” ki vedir “Calomniateur” (enn kikenn ki koz menti pou gate reputation so prochain). En mem temps, li finn vinn “Satan,” ki vedir “Opposant.”

7. (a) Kifer Adam ek Ève finn mort? (b) Kifer tou descendant Adam ek Ève vinn vieux ek mort?

⁷ Satan le Diable finn embete Adam ek Ève ek finn servi bann mensonge pou pousse zot pou desobeir Bondié. (Genèse 2:17; 3:6) Resultat: finalement zot inn mort, pareil couma Bondié ti dire pou arrive zot si zot desobeir. (Genèse 3:17-19) Parski Adam inn vinn imparfait kan li ti faire peché, li finn transmette sa peché-la so bann descendant. (Romains 5:12) Pou explik sa, anou prend enn l’exemple. Si nou prend enn moule pou faire di-pain, ek ki moule-la cabossé, ki pou arrive tou di-pain ki sorti dan sa moule-la? Chaque di-pain pou deformé, setadir li pou ena enn defaut. Li pareil, chaque dimoune finn herite “defaut” ou-soit imperfection Adam. A cause sa-mem tou dimoune vinn vié ek mort.—Romains 3:23.

8, 9. (a) Ki accusation Satan finn lancé? (b) Kifer Bondié pa ti touye bann rebel dé-suite?

⁸ Kan Satan ti pousse Adam ek Ève pou faire peché, avredir li ti pé dirige enn rebellion. Li ti pé defié maniere ki Jéhovah dirigé. En realité, Satan ti pé dire: ‘Bondié enn mauvais dirigeant. Li koz menti ek Li prive so bann serviteur bann bon kitsoz. Bann dimoune pa bizin Bondié pou dirige zot. Zot kapav decidé par zot-mem seki bon ek seki pa bon. Zot pou pli bien si moi mo dirige zot.’ Ki Bondié ti pou bizin faire, face ar sa l’accusation-la? Certain pensé ki tou seki Bondié ti ena pou faire, c’est touye sa bann rebel-la. Mais eski sa ti pou reponn sa l’accusation-la? Eski sa ti pou prouvé ki fason Bondié dirigé, li juste?

⁹ La justice Jéhovah pa ti permette Li touye dé-suite sa bann rebel-la. Pou prouvé ki Satan enn menteur, ek pou reponn sa l’accusation-la couma bizin, Jéhovah inn decidé pou laisse le temps passé. Alors, Bondié inn decidé ki pou enn certain lé-temps, Li pou laisse bann dimoune dirige zot-mem, avek l’influence Satan. Chapitre 11 dan sa livre-la pou expliké kifer Jéhovah finn agir coumsa, ek kifer Li finn laisse tou sa lé-temps-la passé avant ki Li reglé sa bann question-la. Asterla, pose ou-mem sa question-la: Eski Adam ek Ève ti ena raison pou croire Satan, ki jamais pa finn faire nanyin pou zot? Eski zot ti ena raison pou croire ki Jéhovah, ki finn donne zot tou seki zot ti ena, Li enn grand menteur? Ki ou ti pou faire, ou?

10. Couma ou kapav montré ki ou dan coté Jéhovah, pou Li reponn sa l’accusation ki Satan inn lancé-la?

¹⁰ Li bon ki nou reflechi lor sa bann question-la parski sakenn parmi nou bizin faire face ar mem situation. Oui, ou ena l’occasion pou montré ki ou dan coté Jéhovah, pou Li reponn sa l’accusation ki Satan inn lancé-la. Ou kapav accepté Jéhovah couma ou dirigeant ek faire ou part pou montré ki Satan li enn menteur. (Psaume 73:28; Proverbes 27:11) Malheureusement, parmi tou dimoune ki lor la terre zordi, zis enn tigit ki finn faire sa choix-la. Sa souleve enn question bien important: Eski la Bible vrai-mem enseigné ki Satan pé dirige le monde?

KISANNLA KI PÉ DIRIGE LE MONDE?

11, 12. (a) Couma enn tentation ki Jésus finn gagné, montré ki Satan pé dirige le monde? (b) Ki lezot preuve montré ki Satan li-mem chef sa lé-monde-la?

¹¹ Jamais Jésus finn douté ki Satan pé dirige le monde. Par enn mirak, Satan ti montré Jésus “tou bann gouvernement dan le monde ek zot la-gloire.” Lerla, Satan ti faire sa promesse-la avek Jésus: “Mo pou donne toi tou sa bann kitsoz-la, si to tombe devant moi ek to adore moi.” (Matthieu 4:8, 9; Luc 4:5, 6) Pense enn coup. Si vrai-mem Satan pa ti pé dirige tou sa bann royaume-la, eski sa l’offre-la ti pou kapav vinn enn tentation pou Jésus? Jésus pa ti nié ki tou sa bann gouvernement-la ti pou Satan. Surement li ti pou faire li si sa pa ti vrai.

¹² Bien-sur, Jéhovah Li-mem ki Bondié Tout Puissant, Createur l’univers ki extraordinaire. (Révélation 4:11) Pourtant, pena okenn place dan la Bible ki dire ki Jéhovah ou-soit Jésus Christ pé dirige sa lé-monde-la. Au contraire, Jésus ti dire clairement ki Satan li-mem ‘chef sa lé-monde-la.’ (Jean 12:31; 14:30; 16:11) La Bible-mem dire ki Satan le Diable li “bondié sa system-la.” (2 Corinthiens 4:3, 4) Concernant sa adversaire-la, l’apotre Jean ti ecrire: ‘Le monde entier li dan pouvoir Satan.’—1 Jean 5:19.

COUMA LE MONDE SATAN POU DISPARETTE

13. Kifer enn nouveau lé-monde li necessaire?

¹³ Chaque l’année ki passé, le monde pé vinn pli dangereux. Partout ena la-guerre, ena bann politicien malhonnete, ena bann chef religieux hypocrite, ek ena bann criminel ki jamais pa pou changé. Li impossible pou change sa lé-monde-la. La Bible dire ki l’heure finn approché pou Bondié detruire sa mauvais lé-monde-la pendant la guerre Har–Maguédôn. Sa lé-monde-la pou remplacé par enn nouveau lé-monde kot pou ena la justice.—Révélation 16:14-16.

14. Kisannla Bondié inn choisir pou dirige so Royaume ek couma sa ti predire?

¹⁴ Jéhovah finn choisir Jésus Christ pou dirige So Royaume, setadir So gouvernement ki dan le ciel. Bien longtemps avant, la Bible ti predire: “Enn zenfant inn né pou nou, inn donne nou enn garson; ek gouvernement-la pou reste lor so zepaule: ek pou appel li . . . Prince de Paix. So gouvernement pou vinn pli grand ek so la-paix jamais pa pou fini.” (Isaïe 9:6, 7, King James Version) Concernant sa gouvernement-la, Jésus ti montré nou prié coumsa: “Ki to royaume vini. Ki to volonté faire lor la terre pareil couma dan le ciel.” (Matthieu 6:10) Plitar dan sa livre-la nou pou trouvé ki Royaume Bondié pou detruire tou bann gouvernement ki ena dan sa lé-monde-la, ek li pou remplace zot tou. (Daniel 2:44) Lerla, Royaume Bondié pou faire la terre entier vinn enn paradi.

ENN NOUVEAU LÉ-MONDE PÉ KOSTÉ!

15. Ki “nouveau la-terre” representé?

¹⁵ La Bible donne nou sa l’assurance-la: “Dapré promesse [Bondié], nou pé attann enn nouveau lé-ciel ek enn nouveau la-terre, kot pou ena la justice.” (2 Pierre 3:13; Isaïe 65:17) Parfois, dan la Bible, l’expression “la terre” vedir bann dimoune ki vive lor la terre. (Genèse 11:1) Alors, sa “nouveau la-terre” kot pou ena la justice-la, represente bann dimoune ki forme enn societé ki Bondié approuvé.

16. Ki joli cadeau Bondié pou donne bann dimoune ki Li approuvé, ek ki nou bizin faire pou gagne sa?

¹⁶ Jésus ti promette ki dan sa nouveau lé-monde ki pé kosté-la, bann dimoune ki Bondié approuvé, pou gagne enn joli cadeau: “la vie eternel.” (Marc 10:30) S’il vous plait, ouvert ou la-Bible dan Jean 3:16 ek 17:3, ek lire seki Jésus inn dire lor seki nou bizin faire pou gagne la vie eternel. Asterla anou guetté ki benediction Bondié pou donne bann ki merite sa joli cadeau-la, kan la terre pou vinn enn paradi.

17, 18. Couma nou kapav sur ki pou ena la paix ek securité partout lor la terre?

¹⁷ Mechanceté, la guerre, crime ek violence pou disparette. “Mauvais dimoune nepli pou existé . . . Mais bann ki ena l’humilité pou possede la terre.” (Psaume 37:10, 11) Pou ena la paix parski ‘Bondié pou faire la guerre arreté partout lor la terre.’ (Psaume 46:9; Isaïe 2:4) Lerla, bann “dimoune ki juste pou germé, ek pou ena la paix en abondance, ziska ki la lune nepli existé”—sa vedir pou touletan!—Psaume 72:7.

¹⁸ Bann ki adore Jéhovah pou vive en securité. Dan lepok ki ti ecrire la Bible, tant ki bann Israélite ti obeir Jéhovah, zot ti vive en securité. (Lévitique 25:18, 19) Li pou vrai-mem extraordinaire pou konn mem securité dan Paradi!—Isaïe 32:18; Mika 4:4.

19. Couma nou koné ki pou ena mangé en abondance dan le monde nouveau?

¹⁹ Nepli pou ena la famine. Enn ecrivain Psaume ti chanté: “Pou ena la grain en abondance lor la terre, ek la-haut lor bann montagne, pou ena plus ki bizin.” (Psaume 72:16) Jéhovah pou beni so bann serviteur juste, ek “la terre li-mem pou vrai-mem donne so recolte.”—Psaume 67:6.

20. Kifer nou kapav sur ki la terre entier pou vinn enn paradi?

²⁰ La terre entier pou vinn enn paradi. Pou ena bann joli lakaz neuf, ek bann joli jardin lor bann terrain ki bann mauvais dimoune finn gaté avant. (Isaïe 65:21-24; Révélation 11:18) Tigit par tigit la terre entier pou vinn joli ek fertile pareil couma jardin Éden. Jamais Bondié pou manké ouvert so ‘la-main pou satisfaire desir tou seki vivant.’—Psaume 145:16.

21. Couma nou koné ki pou ena la paix entre bann dimoune ek bann zanimo?

²¹ Pou ena la paix entre bann dimoune ek bann zanimo. Bann zanimo sauvage ek domestik pou mange ensam. Mem enn ti-zenfant pa pou bizin peur bann zanimo ki zordi dangereux.—Isaïe 11:6-9; 65:25.

22. Ki pou arrive tou bann maladie?

²² Maladie pou disparette. En tant ki dirigeant Royaume Bondié ki dan le ciel, Jésus pou gueri beaucoup plus dimoune ki kan li ti lor la terre. (Matthieu 9:35; Marc 1:40-42; Jean 5:5-9) Lerla, “okenn habitant pa pou dire: ‘Mo malade.’”—Isaïe 33:24; 35:5, 6.

23. Kifer la resurrection pou faire nou leker content?

²³ Bann dimoune ki nou ti bien content, mais ki’nn mort, pou regagne la vie avek l’espoir ki jamais zot pa pou mort encore. Tou bann dimoune ki finn mort ek ki dan memoire Bondié pou regagne la vie. En realité, “pou ena enn resurrection bann dimoune ki juste ek bann ki pa juste.”—Actes 24:15; Jean 5:28, 29.

24. Ki ou ressenti kan ou pensé ki li possible pou ou vive dan enn paradi lor la terre?

²⁴ Oui, enn l’avenir extraordinaire pé attann bann ki finn decide pou konn nou Grand Createur, Jéhovah, ek pou servi Li! C’est sa paradi ki pou ena lor la terre-la, ki Jésus ti promette criminel ki ti lor poteau pré kot li, kan li ti dire li: “To pou avek moi dan Paradi.” (Luc 23:43) Li bien important ki nou aprann plus lor Jésus Christ, parski li-mem ki pou faire nou trouve tou sa bann benediction-la.

1. Ki la priere bien populaire nou pou examiné asterla?

DAN le monde entier, ena bann million dimoune ki konn bien la priere ‘Notre Père.’ C’est enn la-priere bien populaire ki Jésus Christ li-mem ti enseigné couma enn model. Sa la-priere-la ena enn grand signification, ek si nou examine sa trois premier kitsoz ki nou demandé dan sa la-priere-la, sa pou aide nou aprann plus lor seki la Bible enseigné vrai-mem.

2. Ki sa trois premier kitsoz ki Jésus ti enseigne so bann disciple pou prié-la?

² Dan commencement sa la-priere model-la, Jésus ti dire bann ki ti pé ecoute li: “Alors, ala couma zot bizin prié: ‘Nou Papa ki dan le ciel, ki to nom sanctifié. Ki to royaume vini. Ki to volonté faire lor la terre pareil couma dan le ciel.’” (Matthieu 6:9-13) Sa trois kitsoz ki nou bizin demandé-la, ki zot vedir?

3. Ki nou bizin aprann lor Royaume Bondié?

³ Nou finn aprann beaucoup kitsoz lor nom Bondié, Jéhovah. Ek nou finn examine aussi certain kitsoz lor volonté Bondié—seki Li finn faire ek seki Li pou faire pou tou dimoune. Mais lor ki kitsoz Jésus ti pé kozé kan li ti dire nou prié: “Ki to royaume vini”? Ki été Royaume Bondié? Kan sa Royaume-la vini, couma eski li pou sanctifié nom Bondié, setadir faire li vinn saint? Ek ki rapport sa ena avek volonté Bondié?

KI ÉTÉ ROYAUME BONDIÉ?

4. Ki été Royaume Bondié, ek kisannla ki lé-Roi dan sa Royaume-la?

⁴ Royaume Bondié li enn gouvernement etabli par Jéhovah ek li dirigé par le Roi ki Bondié finn choisir. Kisannla le Roi dan Royaume Bondié? Jésus Christ. En tant ki lé-Roi, Jésus pli grand ki tou lezot dirigeant humain. La Bible appel li “le Roi tou bann ki gouverné couma lé-roi, ek Seigneur tou bann ki gouverné couma seigneur.” (1 Timothée 6:15) Li ena pouvoir pou faire beaucoup plus di-bien ki n’importe ki dirigeant humain, oui, mem seki pli bon parmi zot.

5. Kot-sa Royaume Bondié été, ek lor ki li pou dirigé?

⁵ Kot-sa Royaume-la été? Avant tou, kot Jésus été asterla? Surement ou rappel ki Jésus ti mort lor enn poteau, lerla li ti ressuscité. Enn tipé lé-temps apré, li finn monte dan le ciel. (Actes 2:33) Alors, Royaume Bondié trouve la-bas, dan le ciel. A cause sa, la Bible appel li “royaume ki dan le ciel.” (2 Timothée 4:18) Mem si Royaume Bondié trouve dan le ciel, li pou dirige la terre.—Révélation 11:15.

6, 7. Kifer nou kapav dire ki Jésus li enn lé-Roi extraordinaire?

⁶ Kifer eski Jésus li enn lé-Roi extraordinaire? Enn raison, c’est ki jamais li pa pou mort. La Bible faire enn comparaison entre Jésus ek bann lé-roi lor la terre. Li dire ki Jésus ‘tousel ki ena la vie immortel, ek ki reste dan enn la-lumiere kot personne pa kapav kosté.’ (1 Timothée 6:16) Sa vedir ki tou bann bon kitsoz ki Jésus faire, pou resté pou touletan. Ek nou sur ki li pou faire enn quantité bon kitsoz pou nou bonheur.

⁷ Anou examine enn prophetie ki concerne Jésus: “L’esprit Jéhovah pou repose lor li, l’esprit sagesse ek l’intelligence, l’esprit bon conseil ek grand la-force, l’esprit la connaissance ek la crainte Jéhovah, ek li pou prend plaisir dan la crainte Jéhovah. Ek li pa pou juge seulement dapré seki li trouvé, li pa pou corrige seulement dapré seki li tendé. Ek vrai-mem avek la justice li pou juge bann ti dimoune, ek avek la justice li pou corrige bann dimoune, pou favorise bann ki humble lor la terre.” (Isaïe 11:2-4) Sa bann parole-la promette nou ki Jésus pou enn lé-Roi ki pou faire seki droite, ek ki pou comprend bann dimoune lor la terre. Eski ou pa ti pou content ena enn dirigeant coumsa?

8. Kisannla pou dirigé avek Jésus?

⁸ Anou guette enn lot point lor Royaume Bondié: Jésus pa pou dirige tousel. Pou ena lezot ki pou dirigé ensam avek li. Par exemple, l’apotre Paul ti dire Timothée: “Si nou contigne enduré, nou aussi nou pou dirigé couma bann lé-roi.” (2 Timothée 2:12) Oui, Paul, Timothée, ek bann lezot serviteur fidel ki Bondié finn choisir, pou dirigé ensam avek Jésus dan Royaume Bondié. Comié pou gagne sa grand privilege-la?

9. Comié pou dirigé ensam avek Jésus, ek kan eski Bondié finn commence choisir zot?

⁹ Couma nou ti trouvé dan chapitre 7 sa livre-la, l’apotre Jean ti gagne enn vision kot li ti trouve “l’Agneau [Jésus Christ] pé deboute lor montagne Sion [so position royal dan le ciel], ek avek li ena cent quarante quatre mille ki ena so nom ek nom so Papa ecrire lor zot front.” Kisannla sa 144,000 dimoune-la? Jean li-mem dire nou: “C’est bann ki finn contigne suive l’Agneau n’importe kot-sa li allé. Finn acheté zot parmi bann dimoune lor la terre, ek zot couma bann premier fruit pou Bondié ek pou l’Agneau.” (Révélation 14:1, 4) Oui, c’est bann ki finn suive Jésus Christ avek fidelité, ek Bondié finn choisir zot pou gouverne avek Jésus dan le ciel. Apré ki zot ressuscité pou vive dan le ciel, ‘zot pou dirigé couma bann lé-roi lor bann habitant la terre’ ensam avek Jésus. (Révélation 5:10) Depuis lepok bann zapotre, Bondié finn commence choisir bann chrétien fidel ziska gagne toulé 144,000.

10. Kifer Jéhovah finn montré beaucoup l’amour kan li finn choisir Jésus ek bann 144,000 pou dirige la terre?

¹⁰ Kan Jéhovah finn choisir Jésus ek bann 144,000 pou dirigé lor bann dimoune lor la terre, Li ti pé montré beaucoup l’amour. Jésus koné ki sa vedir vive couma enn humain, ek li koné ki sa vedir la souffrance. Paul ti dire ki Jésus li pa enn kikenn “ki pa kapav comprend nou bann faiblesse, mais enn kikenn ki finn konn beaucoup l’epreuve pareil couma nou-mem, mais seulement sans okenn peché.” (Hébreux 4:15; 5:8) Kan bann ki pou dirigé ensam avek li, ti lor la terre, zot aussi zot finn souffert, ek zot finn enduré. En plus, zot finn lutté kont zot l’imperfection ek zot finn endure tou qualité maladie. Pena doute ki zot pou comprend bann problem ki bann dimoune gagné!

KI ROYAUME BONDIÉ POU FAIRE?

11. Kifer Jésus ti dire ki so bann disciple bizin prié pou ki volonté Bondié faire dan le ciel?

¹¹ Kan Jésus ti dire ki so bann disciple bizin prié pou ki Royaume Bondié vini, li ti dire aussi ki zot bizin prié pou ki volonté Bondié faire “lor la terre pareil couma dan le ciel.” Bondié reste dan le ciel, ek bann ange fidel finn touletan faire volonté Bondié dan le ciel. Mais, couma nou ti aprann dan chapitre 3 sa livre-la, enn mauvais ange finn arrete faire volonté Bondié, ek finn pousse Adam ek Ève pou peché. Dan chapitre 10, nou pou aprann inpé plus lor seki la Bible enseigné lor sa mauvais ange-la, ki appel Satan le Diable. Jéhovah ti laisse Satan ek bann demon, setadir lezot ange ki finn decidé pou suive li, reste dan le ciel pou inpé lé-temps. Alors, dan le ciel, pa tou ki ti pé faire volonté Bondié. Mais, kan Royaume Bondié ti pou commence dirigé, sa ti pou changé. Kan nouveau lé-Roi, Jésus Christ, ti monte lor so trone, li ti pou faire la guerre kont Satan.—Révélation 12:7-9.

12. Ki deux l’evenement important decrire dan Révélation 12:10?

¹² Anou guette seki la Bible dire ti pou arrivé. “Mo finn tann enn la-voix fort dan le ciel dire: ‘Asterla finn arrive delivrance ki Bondié donné, so puissance, so royaume, ek pouvoir so Christ, parski finn jette li dehors, sa kikenn [Satan] ki accuse nou bann frere, ki accuse zot la-nuit li-jour devant nou Bondié!’” (Révélation 12:10) Eski ou finn remark deux l’evenement bien important dan sa verset-la? Premierement Royaume Bondié, dirigé par Jésus Christ commence dirigé. Deuxiemement, Jésus finn tire Satan dan le ciel ek finn jette li lor la terre.

13. Kan Jésus finn tire Satan dan le ciel, ki consequence sa finn ena?

¹³ Kan sa deux l’evenement-la finn arrivé, ki consequence sa finn ena? Concernant seki finn arrivé dan le ciel, nou lire: “Ala kifer zot bizin content, zot ki reste dan le ciel!” (Révélation 12:12) Oui, bann ange fidel dan le ciel bien content parski asterla ki Satan ek so bann demon nepli dan le ciel, reste zis bann ki fidel envers Jéhovah. Asterla dan le ciel ena la paix ek l’unité total. Asterla volonté Bondié pé faire dan le ciel.

14. Ki finn arrivé kan finn jette Satan lor la terre?

¹⁴ Ek la terre alors? La Bible dire: “Malheur pou la terre ek pou la mer, parski Satan finn desann vers zot; li ena enn grand colere parski li koné ki li ena zis enn tigit lé-temps mem.” (Révélation 12:12) Satan bien en colere parski Jésus finn tire li dan le ciel ek li ena zis enn tigit lé-temps. Dan so colere li pé faire beaucoup degat ou-soit “malheur” lor la terre. Nou pou aprann plus lor sa ‘malheur-la’ dan prochain chapitre. Mais si Satan pé faire beaucoup malheur lor la terre, nou kapav demandé couma eski Royaume Bondié pou faire volonté Bondié realisé lor la terre?

15. Ki volonté Bondié pou la terre?

¹⁵ Fodé pa blié volonté ki Bondié ena pou la terre. Nou ti aprann sa dan chapitre 3. Dan jardin Éden, Bondié ti montré ki so volonté, c’est faire sa la-terre-la vinn enn paradi, rempli avek bann dimoune ki droite ek ki jamais pa pou mort. Satan finn pousse Adam ek Ève pou peché, ek sa finn retarde realisation volonté Bondié pou la terre, mais li pa finn change li. Volonté Jéhovah c’est toujours ki ‘bann juste possede la terre ek zot reste pou touletan lor la.’ (Psaume 37:29) Ek Royaume Bondié pou accompli sa. Couma?

16, 17. Ki Daniel 2:44 dire nou lor Royaume Bondié?

¹⁶ Anou examine prophetie ki trouve dan Daniel 2:44. Nou lire: “Dan lepok sa bann lé-roi-la, Bondié ki dan le ciel pou etabli enn royaume ki jamais pa pou detruire. Ek sa royaume-la pa pou vinn pou enn lot peuple. Li pou crase tou bann lezot royaume ek pou fini zot, ek li pou regné pou touletan.” Ki sa verset-la montré nou lor Royaume Bondié?

¹⁷ Premierement, li dire nou ki c’est “dan lepok sa bann lé-roi-la,” ou-soit pendant ki bann lezot royaume pou encore existé, ki Royaume Bondié pou commence dirigé. Deuxiemement, li dire nou ki sa Royaume-la pou existé pou touletan. Okenn lot gouvernement pa pou renverse sa royaume-la ou-soit remplace-li. Troisiemement nou trouvé ki pou ena enn la-guerre entre Royaume Bondié ek bann royaume sa lé-monde-la. C’est Royaume Bondié ki pou gagne la victoire. Finalement, c’est sa gouvernement-la tousel ki pou dirige bann dimoune lor la terre. Bann humain pou dirigé par pli bon gouvernement ki jamais finn existé, ek zot pou bien content.

18. Couma appel sa dernier la-guerre entre Royaume Bondié ek bann gouvernement sa lé-monde-la?

¹⁸ Ena beaucoup kitsoz ki la Bible dire lor sa dernier la-guerre ki pou ena entre Royaume Bondié ek bann gouvernement sa lé-monde-la. Par exemple, li dire nou ki kan la fin kosté, bann mauvais l’esprit pou fane bann fausseté pou embete “bann lé-roi lor la terre entier.” Pou ki raison? “Pou rassemblé zot ensam pou la guerre grand jour Bondié, le Tout-Puissant.” Bann lé-roi la terre pou rassemblé “dan enn place ki en hébreu appel Har–Maguédôn.” (Révélation 16:14, 16) Dapré sa deux verset-la, sa dernier la-guerre ki pou ena entre bann gouvernement humain ek royaume Bondié-la, appel la guerre Har–Maguédôn.

19, 20. Ki pé empeche volonté Bondié pou faire lor la terre asterla-mem?

¹⁹ Mais ki Royaume Bondié pou reussi faire grace a Har–Maguédôn? Anou rappel encore enn fois volonté Bondié pou la terre. Volonté Jéhovah c’est ki la terre rempli avek bann dimoune droite ek parfait ki servi Li dan Paradi. Ki kitsoz ki pé empeche sa arrivé depuis zordi-mem? Premierement, nou tou nou bann pecheur, nou malade ek nou mort. Mais, nou finn aprann dan chapitre 5, ki Jésus finn mort pou nou, pou ki nou kapav vive pou touletan. Surement ou rappel bann parol ki trouve dan l’Évangile Jean: “Bondié finn tellement content le monde ki Li finn donne so sel Garson ki Li finn crée direct, pou ki tou seki ena la foi en li pa detruire, mais [zot] gagne la vie pou touletan.”—Jean 3:16.

²⁰ Enn lot problem, c’est ki beaucoup dimoune faire bann mauvais kitsoz. Zot koz menti, zot malhonnete ek zot immoral. Zot pa envie faire volonté Bondié. Bann dimoune ki faire bann mauvais kitsoz pou detruire pendant Har–Maguédôn, la guerre Bondié. (Psaume 37:10) Enn lot raison encore kifer volonté Bondié pa pé faire lor la terre, seki bann gouvernement pa pé encourage bann dimoune pou faire sa. Beaucoup gouvernement finn montré zot faible, sans okenn pitié, ou-soit rempli avek corruption. La Bible dire franchement: “Dimoune finn domine dimoune pou zot propre malheur.”—Ecclésiaste 8:9.

21. Couma eski Royaume Bondié pou faire volonté Bondié lor la terre?

²¹ Apré Har–Maguédôn, bann dimoune pou dirigé par enn sel gouvernement, Royaume Bondié. Sa Royaume-la pou faire volonté Bondié ek li pou amenn beaucoup benediction extraordinaire. Par exemple, li pou tire Satan ek so bann demon. (Révélation 20:1-3) Grace a sacrifice Jésus, bann dimoune fidel pou nepli malade ni zot pou mort. Au contraire, kan Royaume Bondié pou dirigé, zot pou kapav vive pou touletan. (Révélation 22:1-3) La terre pou transformé en enn paradi. C’est coumsa ki sa Royaume-la pou faire volonté Bondié lor la terre ek li pou sanctifié nom Bondié. Ki sa vedir? Sa vedir ki kan Royaume Bondié pou dirigé, tou dimoune ki vivant pou honore nom Jéhovah.

KAN ESKI ROYAUME BONDIÉ POU COMMENCE DIRIGÉ?

22. Couma nou koné ki Royaume Bondié pa’nn vini kan Jésus ti lor la terre ou-soit zis apré ki li finn ressuscité?

²² Kan Jésus ti dire so bann disciple prié “Ki to royaume vini,” li clair ki sa Royaume-la pa ti encore vini sa lepok-la. Eski li ti vini kan Jésus ti monte dan le ciel? Non, parski Pierre ek Paul toulé-deux ti dire ki apré resurrection Jésus, li ti realise prophetie Psaume 110:1 ki dire: “Sa-mem seki Jéhovah finn dire mo Seigneur: ‘Assize toi dan mo coté droite ziska ki mo place to bann l’ennemi couma enn marchepied enba to lipié.’” (Actes 2:32-34; Hébreux 10:12, 13) Jésus ti bizin attann pendant enn certain lé-temps.

23. (a) Kan eski Royaume Bondié inn commence dirigé? (b) Ki nou pou examiné dan prochain chapitre?

²³ Pou comié lé-temps? Vers la fin bann l’année 1800, bann Étudiants de la Bible ti calculé ki sa period kot Jésus ti bizin attann-la, ti pou fini en 1914. (Concernant sa date-la, guette Appendice “1914—Enn l’année important dan bann prophetie la Bible.”) Bann evenement dan lé-monde ki finn commence arrivé en 1914, montré ki sa bann Étudiants de la Bible-la ti ena raison. Realisation bann prophetie la Bible montré ki en 1914 Christ finn vinn lé-Roi ek ki Royaume Bondié dan le ciel inn commence dirigé. Oui, nou pé vive pendant sa “tigit lé-temps” ki resté pou Satan-la. (Révélation 12:12; Psaume 110:2) Nou kapav dire aussi avek l’assurance, ki bientot Royaume Bondié pou agir ek ki grace a li, volonté Bondié pou faire lor la terre. Eski ou pa trouvé ki sa li enn nouvel extraordinaire? Eski ou croire ki li vrai? Prochain chapitre pou aide nou trouvé ki la Bible vrai-mem enseigne sa bann kitsoz-la.