VINN PROCHE AR BONDIÉ
Jéhovah “Pa Faire Preference”
Eski ou’nn deja victime discrimination? Par exemple, lezot inn deja pa accepté enn demann ki ou’nn faire, pa donne ou enn service ki lezot inn gagné, ou-soit traite ou couma enn nanyé ditou a cause ou couleur la peau, ou race, ou-soit ou rang social? Si oui, ou pa tousel. Mais, guette sa bon nouvelle-la: Mem si lor later souvent ena sa bann discrimination-la, dan le ciel sa pa existé. L’apotre Pierre, ki ti enn Chretien, ti dire avek enn grand conviction: “Bondié pa faire preference.”—Lire Actes 10:34, 35.
Pierre ti dire sa bann parole-la dan enn situation bien a part—dan lakaz enn Gentil ki ti appel Corneille. Pierre ki ti enn Juif, ti vive dan enn lepok kot bann Juif ti considere bann Gentil couma impur ek pa ti pou frequente zot dan n’importe ki fason. Alors, kifer eski Pierre ti dan lakaz Corneille? En deux-trois mot, nou kapav dire ki c’est Jéhovah ki’nn faire zot zwenn zot camarade. Bondié ti faire Pierre gagne enn vision ek dan sa vision-la, Li ti dire li: “Arrete appel impur bann kitsoz ki Bondié inn purifié.” Seki Pierre pa ti koné, enn jour avant sa, Corneille aussi ti gagne enn vision kot enn ange ti demann li pou faire al cherche Pierre. (Actes 10:1-15) Kan Pierre ti rann-li compte ki c’est Jéhovah ki ti derriere tousala, li pa ti kapav empeche-li-mem exprime so sentiment.
Pierre ti dire: “Vrai-mem, mo rann-moi compte ki Bondié pa faire preference.” (Actes 10:34) Mot Grec ki’nn servi pou traduire “preference” litteralement vedir “guette figure.” (The Kingdom Interlinear Translation of the Greek Scriptures) Concernant sa l’expression-la, enn bibliste dire: “Li faire reference ar enn juge ki guette figure enn dimoune pou rann enn jugement. [So jugement] pa dapré seki dimoune-la merité, mais li depann lor si li content dimoune-la ou-soit non.” Bondié pa donne enn dimoune plis preference ki enn lot a cause so race, so nationalité, so rang social, ou-soit enn lot kitsoz ki concerne so l’apparence.
Mais plutot, Jéhovah trouve seki ena dan nou leker. (1 Samuel 16:7; Proverbes 21:2) Apré sa, Pierre ti dire: “Dan n’importe ki nation, dimoune ki ena la crainte pou Li ek ki pratik la justice, Bondié accepté li.” (Actes 10:35) Ena la crainte pou Bondié vedir respecté Li, donne Li l’honneur, ek faire Li confiance, setadir evite faire n’importe ki kitsoz ki pa faire Li plaisir. Pratik la justice implik faire seki droite devant lizié Bondié avek tou nou leker. Jéhovah content bann dimoune ki ena la crainte pou Li ek ki respecté Li ek ki laisse sa bann qualité-la pousse zot pou faire seki droite.—Deutéronome 10:12, 13.
Kan Jéhovah guette nou depuis le ciel, Li trouve zis enn sel race—race humain
Si lezot inn deja faire discrimination ar ou ou-soit juge ou en avance, ena bann bon raison pou ou senti-ou encouragé par seki Pierre ti dire lor Bondié. Jéhovah pé rassemblé bann dimoune ki sorti dan diferan nation pou amenn zot dan vrai l’adoration. (Jean 6:44; Actes 17:26, 27) Li ecoute ek Li reponn la priere so bann adorateur n’importe ki race, nationalité, ou-soit rang social zot été. (1 Rois 8:41-43) Nou kapav sur ki kan Jéhovah guette nou depuis le ciel, Li trouve zis enn sel race—race humain. Eski ou ti pou content konn plis lor sa Bondié ki pa faire preference-la?