ESKI OU TI KONE?

Dan lepok Biblik, ki sa ti reprezante kan enn dimounn ti desir so linz par expre?

LABIB mansionn plizir sitiasion kot bann dimounn ti desir zot linz. Sa aksion-la kapav paret drol pou bann dimounn ki lir Labib zordi, pourtan, pou bann Zwif, sa ti enn fason pou montre bann santiman bien profon ki zot ti ena parski zot ti dezespere, sagrin, ena laont, ankoler, ouswa tris apre enn lamor.

Par exanp, Ruben “ti desir so linz” kan li ti dekouver ki so plan pou liber so frer, Joseph, pa ti reisi parski so bann frer ti’nn vann Joseph kouma esklav. Jacob, zot papa, “ti desir so linz” kan li ti panse ki enn zanimo sovaz ti’nn devor Joseph. (Gen. 37:18-35) Job “ti desir so linz” kan li ti aprann ki tou so bann zanfan ti’nn mor. (Job 1:18-20) Enn mesaze, ‘avek so linz desire,’ ti vinn devan Gran Pret Éli ek ti dir li ki bann Izraelit ti’nn perdi lager, de garson Éli ti’nn mor, ek bann lennmi ti’nn pran lars lalians. (1 Sam. 4:12-17) Kan Yoshiya ti pe ekout so serviter lir bann parol Lalwa, li ti rekonet ki so pep ti fer bann erer, ek li “ti desir so linz.”​—2 Rois 22:8-13.

Pandan ki ti pe ziz Jésus, Gran Pret Caïphe “ti desir so linz” kan li ti tann Jésus dir bann parol ki li ti konsider kouma enn blasfem. (Mat. 26:59-66) Dapre enn lalwa relizie ki bann rabin ti inpoze, si enn dimounn ti tann enn kikenn blasfem nom Bondie, li ti bizin desir so linz. Me apre destriksion tanp Jérusalem, bann rabin ti dir ki “asterla, enn dimounn pa bizin desir so linz kan li ti tann enn kikenn blasfem Nom Bondie, sinon so linz ti pou desire ti pou vinn bout-bout.”

Biensir, si enn dimounn desir so linz, sa pa pou ena okenn valer devan lizie Bondie si santiman sa dimounn-la pa ti sinser. Akoz sa, Jéhovah ti demann so pep pou ‘desir zot leker, pa zot linz, ek pou retourn ver Li.’​—Yoël 2:13.