Jéhovah koné couma pou delivré so peuple

“Jéhovah koné couma pou delivré bann dimoune ki attaché ar Li, kan zot dan l’epreuve.”​—2 PIERRE 2:9.

KIFER NOU KAPAV ENA CONFIANCE KI JÉHOVAH:

Koné dan ki moment bann l’evenement bizin arrivé pou realise so projet?

Pou servi so pouvoir pou delivré so peuple?

Koné couma bann l’evenement important pou deroulé?

1. Ki bann condition pou ena pendant la “grande tribulation”?

KAN Bondié pou detruire le monde Satan, sa pou arrive enn sel coute, sans ki bann dimoune attann. (1 Thess. 5:2, 3) A mesure ki “grand jour Jéhovah” pou kosté, le monde pou rempli ar confusion. (Tseph. 1:14-17) La vie pou rempli ar probleme ek bann dimoune pa pou ena seki zot bizin lor plan materiel. Sa lepok-la pou bien dur, enn lepok “couma jamais pa finn ena depuis commencement le monde ziska zordi.”​—Lire Matthieu 24:21, 22.

2, 3. (a) Ki pou arrive peuple Bondié pendant la “grande tribulation”? (b) Ki kapav fortifié nou pou seki pou arrivé dan l’avenir?

² Vers la fin la “grande tribulation,” “Gog dan pays Magog” pou lance enn dernier l’attak kont peuple Bondié. Pendant sa l’attak-la, “enn grand l’armée” pou vinn kont peuple Bondié ‘pareil couma bann nuage ki couvert pays.’ (Ézék. 38:2, 14-16) Okenn l’organisation lor la terre pa pou defann bann serviteur Jéhovah. Zot delivrance pou depann zis lor Bondié tousel. Couma zot pou reagir kan zot bann l’ennemi pou rod detruire zot?

³ Si ou enn serviteur Jéhovah, eski ou ena la foi ki Jéhovah ena capacité ek desir pou protege so peuple a travers la grande tribulation? L’apotre Pierre ti ecrire: “Jéhovah koné couma pou delivré bann dimoune ki attaché ar Li, kan zot dan l’epreuve, mais Li pou reserve bann dimoune injuste pou jour jugement, pou detruire zot.” (2 Pierre 2:9) Kan nou medite lor seki Jéhovah ti faire dan le passé pou delivré so peuple, sa kapav fortifié nou pou seki pou arrivé dan l’avenir. Anou examine trois l’exemple ki pou faire nou ena confiance ki Jéhovah ena capacité pou delivré so peuple.

DELIVRÉ KAN TI ENA DELUGE

4. Kifer ena certain kitsoz ki ti bizin faire dan bon moment avant deluge?

⁴ Premierement, anou examine seki ti arrivé kan ti ena deluge dan lepok Noé. Pou ki volonté Jéhovah accompli, ena certain kitsoz ki ti bizin faire dan bon moment. Ti bizin construire enn grand l’arche, ek ramasse bann zanimo en securité ladan avant la pluie tombé. Dapré livre Genèse, Jéhovah pa ti demann Noé construire l’arche ek apré Li ti decidé kan pou faire deluge, coumadir Li ti bizin attann avant ki Li fixé enn date pou faire deluge pangar construction l’arche pankor fini kan deluge vini. Au contraire, bien avant ki Li ti dire Noé construire l’arche, Bondié ti’nn fini fixé date ki Li ti pou faire deluge. Couma nou konn sa?

5. Ki Jéhovah ti dire dan Genèse 6:3, ek kan Li ti faire sa declaration-la?

⁵ La Bible dire nou ki Jéhovah ti prend enn decision dan le ciel. Dapré Genèse 6:3, Li ti dire: “Mo pa pou contigne ena patience envers bann dimoune, parski zot bann humain. Alors, zot pou ena cent vingt an pou vive.” Sa pa ti concerne ki quantité l’année enn dimoune ti pou vive en general. Sa ti concerne declaration ki Jéhovah ti faire concernant moment ki Li ti pou nettoye la terre ek detruire bann mauvais dimoune.a Deluge ti commencé en 2370 avant nou lepok, alors kitfois Bondié ti faire sa declaration-la en l’an 2490 avant nou lepok. Sa lepok-la, Noé ti ena 480 an. (Gen. 7:6) Vingt an plitar, en 2470 avant nou lepok, Noé ti commence ena zenfant. (Gen. 5:32) Ti reste apepré cent an avant ki deluge vini, mais Jéhovah pa ti encore dire Noé ki role special li ti pou ena pou protege race humain. Comié le temps Bondié ti pou attann avant ki Li dire sa Noé?

6. Kan eski Jéhovah ti donne Noé l’ordre pou construire l’arche?

⁶ Li possible ki Jéhovah ti attann plusieurs dizaine l’année avant ki Li ti dire Noé seki Li ti pou faire. Kifer nou kapav tire sa conclusion-la? Livre Genèse dire nou ki bann garson Noé ti deja grand ek ti fini marié kan Bondié ti donne Noé l’ordre pou construire l’arche. Jéhovah ti dire li: “Mo faire enn l’alliance avek toi; ek to bizin rente dan l’arche, toi, to bann garson, to madame ek bann madame to bann garson, avek toi.” (Gen. 6:9-18) Alors, li possible ki, kan Noé ti gagne l’ordre pou construire l’arche, ti reste zis 40 ou 50 an avant ki deluge vini.

7. (a) Couma Noé ek so famille ti montré zot la foi? (b) Kan eski finalement Bondié ti dire Noé exactement kan deluge ti pou commencé?

⁷ A mesure ki construction l’arche ti pé avancé, surement Noé ek so famille ti demann-zot couma Bondié ti pou realise so projet, ek kan deluge ti pou vini. Pourtant, mem si zot pa ti konn tou bann detail, sa pa ti empeche zot construire l’arche. Livre Genèse dire: “Noé ti faire dapré tou seki Bondié ti’nn donne li l’ordre pou faire. Li ti faire exactement seki ti’nn dire li faire.” (Gen. 6:22) Sept jour avant deluge​—assez le temps pou ki Noé ek so famille faire bann zanimo rente dan l’arche​—Jéhovah finalement ti dire Noé exactement kan deluge ti pou commencé. Alors, kan de l’eau ki ti dan le ciel ti commence tombe lor la terre, “en l’an six cent dan la vie Noé, dan deuxieme mois, dix-septieme jour sa mois-la,” tou ti’nn pré.​—Gen. 7:1-5, 11.

8. Couma recit lor deluge donne nou l’assurance ki Jéhovah koné kan pou delivré so peuple?

⁸ Recit lor deluge c’est pa zis enn preuve ki Jéhovah koné ki pli bon moment pou agir, mais aussi sa montré ki Li ena capacité pou delivré so bann serviteur. A mesure ki la fin sa systeme-la pé kosté, nou kapav sur ki tou seki Jéhovah inn decidé pou faire, pou arrivé dan l’heure ki Li’nn fixé, exactement ‘jour ek l’heure’ ki Li’nn decidé.​—Mat. 24:36; lire Habaqouq 2:3.

DELIVRÉ KAN ZOT TI TRAVERSE LA MER ROUGE

9, 10. Couma Jéhovah ti servi so peuple pou mette l’armée Pharaon dan enn piege?

⁹ Dan recit ki koz lor deluge, nou finn trouvé ki Jéhovah ena enn controle total lor moment ki bann l’evenement bizin arrivé pou realise so projet. Deuxieme l’exemple ki nou pou examiné montré nou enn lot raison kifer nou kapav ena confiance ki Jéhovah pou delivré so peuple: Li pou servi so pouvoir ki pena limite pou faire sur ki so volonté realisé. Jéhovah tellement sur dan capacité ki Li ena pou delivré so bann serviteur ki parfois, Li’nn permette zot passe dan bann situation difficile pou ki Li kapav piege so bann l’ennemi. C’est seki Li ti faire kan Li ti delivré bann Israélite dan l’Égypte.

¹⁰ Environ trois million Israélite ti quitte l’Égypte. Jéhovah ti demann Moïse pou guide bann Israélite dan enn fason ki ti faire Pharaon pensé ki bann Israélite ti dan confusion ek pa ti koné kot zot ti pé allé. (Lire Exode 14:1-4.) Pharaon ti tombe dan sa piege-la; li ti pousse so l’armée pou poursuive bann Israélite, ek ti blok zot kot la mer Rouge. Li ti parette ki pa ti ena okenn chemin sorti pou bann Israélite. (Ex. 14:5-10) Mais bann Israélite pa ti vrai-mem en danger. Kifer? Parski Jéhovah ti pou delivré zot.

11, 12. (a) Couma Jéhovah ti delivré so peuple? (b) Ki resultat sa ti ena, ek ki sa recit-la enseigne nou lor Jéhovah?

¹¹ “Colonne nuage” ki ti pé guide bann Israélite, ti al derriere zot, pou empeche l’armée Pharaon vinn pré ar zot ek ti mette bann Égyptien dan noir. Mais sa colonne nuage-la par mirak ti permette bann Israélite gagne la lumiere pendant la nuit. (Lire Exode 14:19, 20.) Apré sa, Jéhovah ti servi enn di-vent bien fort ki ti sorti dan l’est, pou separe la mer en deux ek “Li ti faire fond la mer vinn enn la terre sec.” Pena doute ki sa ti prend beaucoup le temps, parski sa recit-la dire: “Finalement, bann Israélite ti al au milieu la mer, lor enn la terre sec.” Comparé ar l’armée Pharaon ki ti dan zot char, bann Israélite ti pé avance beaucoup pli doucement. Pourtant, pa ti ena chemin ki bann Égyptien vinn zwenn bann Israélite, parski Jéhovah ti pé laguerre pou so peuple. “Li ti mette confusion dan camp bann Égyptien. Ek Li ti pé tire la roue zot bann char, sa ti faire zot gagne difficulté pou conduire zot char.”​—Ex. 14:21-25.

¹² Kan tou bann Israélite ti’nn arrive lot coté la mer ek zot ti en securité, Jéhovah ti dire Moïse: “Tini to la main dan direction la mer pou ki de l’eau ré-vinn lor bann Égyptien, lor zot char ek lor zot cavalier.” Kan bann soldat égyptien ti trouve sa grand pression de l’eau-la pé vinn lor zot, zot ti rod sauvé, mais “Jéhovah ti jette bann Égyptien au milieu la mer.” “Pa ti ena enn sel ki ti sapé.” (Ex. 14:26-28) Dan sa fason-la, Jéhovah ti montré ki Li ena pouvoir pou delivré so peuple dan n’importe ki situation.

CERTAIN TI GAGNE LA VIE SAUVE KAN JÉRUSALEM TI DETRUIRE

13. Ki bann instruction Jésus ti donné, ek ki question kitfois so bann disciple ti demann-zot-mem?

¹³ Jéhovah koné exactement couma bann l’evenement pou deroulé pou realise so projet. Nou trouve sa bien dan troisieme l’exemple ki nou pou examiné: kan l’armée romain ti encerclé Jérusalem dan premier siecle. A travers so Garson, Jéhovah ti donne bann instruction bann chretien ki ti vive dan Jérusalem ek Judée, avant destruction Jérusalem en 70 nou lepok. Sa ti permette zot gagne la vie sauve. Jésus ti dire: “Kan zot trouve sa kitsoz degoutant ki faire bann degat-la, lor ki prophete Daniel ti kozé, deboute dan enn place ki saint, . . . alors bann ki dan Judée bizin commence sauvé ek al vers bann montagne.” (Mat. 24:15, 16) Mais couma bann disciple Jésus ti pou koné kan eski sa prophetie-la ti pou realisé?

14. Couma bann l’evenement ki ti arrivé ti faire bann instruction Jésus vinn pli clair?

¹⁴ A mesure ki bann l’evenement ti pé deroulé, bann parole Jésus ti vinn pli clair. En 66 nou lepok, l’armée romain ki ti dirigé par Cestius Gallus ti rente dan Jérusalem pou arrete enn rebellion ki certain Juif ki ti appel bann Zélote, ti faire. Kan sa bann rebelle-la ti al cachiette dan enn la tour pré ar temple, bann soldat romain ti commence crase muraille temple. Pou bann chretien ki ti reste lor zot garde, sa ti bien clair: enn l’armée païen avek bann pavillon ki sa l’armée-la ti considere couma bann zidole (enn “kitsoz degoutant”), ti arrive ziska muraille temple (“enn place ki saint”). Ti’nn arrive ler pou bann disciple Jésus “commence sauvé ek al vers bann montagne.” Mais couma zot ti pou kapav sorti dan enn la ville ki ti encerclé par bann l’ennemi? Enn kitsoz ki zot pa ti attann ti pou arrivé.

15, 16. (a) Ki l’instruction precis Jésus ti donné, ek kifer li ti bien important ki so bann disciple obeir? (b) Nou delivrance pou depann lor ki kitsoz?

¹⁵ Pou enn raison ki nou pa sur, Cestius Gallus ek so bann soldat ti quitte Jérusalem ek ti allé. Bann Zélote ti poursuive zot. Ni bann romain, ni bann Juif rebelle pa ti dan la ville, alors sa ti enn bon l’occasion pou bann disciple Jésus sauvé. Jésus ti donne zot bann instruction bien precis pou quitte zot bann kitsoz materiel ek pou sauvé sans tardé. (Lire Matthieu 24:17, 18.) Eski li ti vrai-mem necessaire pou agir vite coumsa? Pa ti pou tardé pou konn reponse sa question-la. Enn tigit le temps apré, bann Zélote ti retourné ek zot ti commence force bann habitant Jérusalem ek Judée pou vinn ensam avek zot dan zot rebellion. Bann condition dan la ville ti deterioré bien vite kan bann lezot groupe juif ti commence laguerre pou prend controle. Li ti vinn pli difficile pou sauvé ek quitte la ville. Kan bann Romain ti retourné en 70 nou lepok, li ti vinn impossible pou sauvé. (Luc 19:43) Tou bann ki ti’nn tardé pou quitte la ville ti’nn bloké la-mem! Bann chretien ki ti suive bann instruction Jésus ek ki ti sauvé pou al dan bann montagne, ti gagne la vie sauve. Zot ti trouvé par zot-mem ki Jéhovah koné couma pou delivré so peuple. Ki leson nou kapav tiré ar sa recit-la?

¹⁶ Pendant la grande tribulation, bann chretien pou bizin suive bann instruction ki Jéhovah pou donné a travers so Parole ek so l’organisation. Par exemple, commandement ki Jésus ti donne bann chretien pou “commence sauvé ek al vers bann montagne” ena enn application moderne. Nou pa koné dan ki sens nou pou bizin sauvé.b Mais nou sur ki Jéhovah pou faire nou comprend pli bien signification sa bann instruction-la kan pou arrive ler pou suive zot. Nou delivrance pou depann lor nou l’obeissance, alors li bon ki nou demann-nou sa bann question-la: ‘Couma mo reagir ar bann instruction ki Jéhovah donne so peuple zordi? Eski mo suive zot desuite ou-soit mo hesité pou obeir?’​—Jacq. 3:17.

FORTIFIÉ POU SEKI PÉ ATTANN NOU DAN L’AVENIR

17. Ki prophetie Habaqouq montré concernant l’attak ki pou ena kont peuple Bondié?

¹⁷ Asterla, anou guette plus en detail l’attak ki Gog pou faire ek ki ti mentionné dan commencement sa lartik-la. Dan enn prophetie ki koz lor la, Habaqouq ti dire: “Mo ti tendé, ek mo l’estomac ti viré; kan mo ti tann sa tapage-la, mo la levre ti tremblé; pourriture ti rente dan mo bann lezo; ek dan mo situation, mo ti bouleversé, pou ki mo attann avek calme jour detresse, kan [Bondié] pou monte vers sa peuple-la [bann l’armée ki ti pé menace zot], pou attak li.” (Hab. 3:16) Kan Habaqouq ti tann l’attak ki ti pou ena kont peuple Bondié sa ti faire so l’estomac viré, so la levre tremblé, ek so la force diminué. Reaction Habaqouq faire nou comprend a ki point nou situation pou parette critik kan Gog pou attak nou. Mais selman, prophete Habaqouq ti disposé pou attann avek calme grand jour Jéhovah. Li ti ena confiance ki Jéhovah ti pou delivré so peuple. Nou aussi nou kapav ena mem confiance.​—Hab. 3:18, 19.

18. (a) Kifer fodé pa nou peur sa l’attak ki pou ena-la? (b) Ki nou pou examiné dan prochain lartik?

¹⁸ Sa trois l’exemple ki nou finn examiné-la montré ki Jéhovah koné couma pou delivré so peuple. Nanyin pa pou kapav empeche so projet realisé; pena doute ki Li pou gagne la victoire. Selman, pou nou kapav nou aussi celebré sa victoire-la, nou bizin reste fidele ziska la fin. Couma Jéhovah aide nou pou nou garde nou l’integrité asterla? Prochain lartik pou koz lor la.

[Notes]